Laikiii's Profile

食好野開心，但食到又抵食又好食既野更開心！位於黃竹坑熟食市場既「芭堤雅」真係好值得推介，廚師係正宗泰國人，食物質素高又抵食！每次必食既小食拼盤，當中包括蝦餅、雞翼同春卷各四件，加埋三串串燒，真係好抵食。蝦餅彈牙有蝦味，雞翼香脆惹味，春卷餡料有芋頭粉絲同蘿蔔，蘸埋醬汁真係好開胃嫁！馬拉盞炒通菜鑊氣十足，醬汁濃郁，仔細睇仲見到有啲蝦毛仔，唔怪得食落有啲咬口又有啲鮮味。泰式炒金邊粉酸酸地最啱我胃口，而且份量好夠，配料仲有幾隻蝦添！…Read More

每次同屋企人要出街食飯，首選洲際，煮海鮮寧舍出色！先推介每次必食既墨魚餅，睇下真係煎到外面脆卜卜金黃色嫁！比張近照大家睇下，真係成塊都係墨魚滑同墨魚粒做嫁，每咬一啖都超有咬口。搭配埋啲汁真係食幾多塊都唔夠呀！豉油皇大蝦，一邊啜佢啲味一邊用口剝殼，真係勁惹味！最緊要蝦肉結實，仲好有蝦味添。豉椒炒勝子，炒得剛剛好，完全唔韌，勝子大大隻好有豉椒味，最後我地梗係食到配菜都無剩呀。炒斑球亦係必備菜式，事關家中有長者，清清地啱晒佢地。魚好新鮮，魚皮又厚又滑，肉質結實，最好係無骨，可以盡情享用。除左煮海鮮了得，煮其他小菜都難唔到洲際，炸豆腐係表弟表妹最愛，香口之餘入口即溶，外層香脆表面好薄好薄，食唔到有任何炸漿，諗左好耐都諗唔明點炸得禁好食。粉絲雜菜煲清新有菇味，菜軟硬適中，最怕食到煮到軟霖霖既菜。蝦醬通菜煲濃郁蝦醬味好吸引，特別係通菜芯入面都有汁好好味。咕嚕肉酸酸甜甜醒胃，用黎送飯一流。…Read More

喺葵芳掃左一輪小食，突然想食啲甜品，經過見到仲要係泰式甜品，真係唔食唔得呀除左糯米飯之外，泰糯米仲有唔同甜品賣，但每次到泰國必食既芒果糯米飯先係我今日要介紹既。見到比一般紫米或糯米唔同，有三隻食既糯米飯，決定試一試佢，三色糯米飯比其他糯米飯貴5蚊，25蚊一盒。份量剛好，唔會太多，一個人食晒剛剛好。三色中除左一般糯米，仲有綠色代表斑蘭味，粉紫色係蝶豆花味。三款糯米軟硬都適中，咬落好有口感，其中斑蘭同蝶豆花味好新鮮，蝶豆花味未食之前都聞到淡淡花香，食落好清新。芒果都甜，配埋椰漿真係好好食呀。…Read More

手抓餅絕對係台式美食中我既最愛，但香港好多手抓餅都又貴又唔好食，難得「慧食貓」又抵又大件又好食，真係每次去葵涌都一定要食呀！小小一個檔口，打正台灣手抓餅既旗號，人流無停過就知佢有幾好食。餐牌上面有多個配搭好既選擇，我揀左b餐火腿雞蛋肉鬆手抓餅，老闆服務超好，落左單講明等幾耐，取食物時先比錢，我等候期間觀察到老闆記得曬食客既order，而且態度勁親切，難怪禁多fans啦！再睇返張相都流晒口水呀，手抓餅煎得好脆好香口，又唔會太燶，但又有焦脆既口感，餡料勁多，多到每咬一啖啲餡都漏出黎，真係用心之作呀。…Read More

同好多香港人一樣，台式食物喺我心目中佔據住好重要既地位，時不時就會興起想食台式食物既念頭。今次黎到葵涌廣場，見到有車輪餅賣，一定要試一試佢。其實魷味應該係主打玉子燒，但偏偏我比四餡車輪餅深深吸引住，下次先再試玉子燒啦惟有。車輪餅即叫即造，都要等成十分鐘先有得食，但一拎上熱辣辣既感覺真係好正呀！一咬落去就可以食到麻薯、紅豆、肉鬆同咸蛋黃，口感勁豐富，有麻薯煙韌、紅豆帶沙、肉鬆脆口同餅皮外脆內軟既感覺，真係不枉我等左佢十分鐘呀。…Read More

轉新工之後唯一好處就係離美食十分近，仲要係出名美食雜中地既葵涌廣場，真係日日放工都心郁郁想食下啲小食先返屋企嫁！今日忍唔住放工都去食一食鹽水雞先，個人覺得呢間最好食最有台灣風味。放工時間黎到，排晒隊嫁！除左主要既雞之外，仲有好多配菜可以揀，青瓜、菇、西蘭花、木耳，樣樣睇落都新鮮，可能因為多人買，流量大，菜都新鮮唔會擺好耐。成件事好簡單，拎張紙剔你想要既餐，雞份量越多越貴，再揀配菜，比錢後會拎到號碼牌，等叫號就得喇。因為仲想食其他野，叫左一人餐雞腿加三款配菜，配菜揀左菇、木耳同青瓜。一人餐無論雞同配菜份量都好多，加埋蔥睇落真係好想要碗白飯黎送呀。雞完全去骨，食落唔洗怕咬到細骨，雞皮同雞肉中間仲有晶瑩剔透既啫喱，食落超嫩滑。揀左小辣同蒜，真係超惹味，辣度適中，適個唔太識得辣但又想食濃味野既人。…Read More