kerasel's Profile

作為素食素食者好多年，聽過哩間好耐，一直未有機會黎，今日黎開尖沙嘴，發現好近，就一個人上黎試試。地方真係唔容易搵，好神秘，好彩見到有blogger 介紹地方先搵到。開門都是佛教擺設，唔係佛教徒可能未必鍾意。家庭式感覺的檯凳，2點幾黎到有兩檯客人，隨便坐下有位姐姐招呼你，比張紙你落單。叫了 酸辣乾撈金邊粉，配素雞，好快上菜，午餐$60，有湯係冬陰功，加錢有飲品。糖水都係自助。冬陰功好多料，香料蔬菜菇等等，不油膩，幾好飲。賣相係唔錯的，但一食落去，一堆素？肉鬆，唔知咩味，麵痴埋一堆，好奇怪，加辣醬就得辣味，食食吓發現入面好多芫茜，就更加中伏（哩part係個人口味問題）⋯素雞同平日素菜舖食嘅有啲唔同，都係豆腐制，外皮脆脆地，唔算太多豆香，不過都ok啦。食食吓隔離檯呀叔自己去較細咗部冷氣⋯好熱喎有無咁自助然後另一位客人去完洗手間衝出黎望住我同呀叔話沖唔到廁⋯ 咩事 （呀叔叫佢搵店員，然後發現係佢按太細力⋯）可能係口味問題/唔識叫嘢食，又真係唔係好頂得順咁「家庭式」嘅地方啦，我都唔係好食得完，決定埋單走人。點知，店員以為我係另一台4人檯客人，話$280？！跟著先發現係睇錯（得三檯客咋喎）仲有好唔環保，好多膠/紙用具⋯試過一次就算啦，唔會再黎…Read More

見咁多好評，終於有機會約了朋友來試試。天氣太熱，行到身水身汗，但店舖冷氣風大卻不太夠冷，朋友唯有話心靜自然涼⋯選擇不太多。叫了炸天貝，泰北咖喱金麵配腐皮雞腿同埋特別推介嘅菠蘿炒飯，兩杯嘢飲。天貝當然無咩特別味道，係靠醬汁，醬汁有三種，黑松露好味啲。我覺得都撇除了本身的怪味，都ok。朋友就唔係好慣隻味。麵就好普通，腐皮係一般貨啦，話係咖喱但味道不辣的，整體OK啦，份量不多，感覺不值得這個價。（可能中環係咁？）菠蘿炒飯是比較好的，不算油膩，味道一樣係好standard，餐牌話少少辣但我覺得唔辣。服務就真係好一般。我地兩人share黎食，叫佢比多隻碗食麵，真係得隻碗，筷子都唔會比多一set你⋯ 啲 staff 可能好多附近熟客，打招呼好開心，或者無咩興趣理其他客。 埋單有得reg會員拎$10 coupon，但個system都有點麻煩。感覺有點overrated，應該試過一次夠了。…Read More

今日有事要去觀塘，經過東廣場先食一個late lunch。其實本來係想去附近嘅素食小店，但係冇開到，經過見到呢間Cafe嘅環境比較好楚，餐牌上有竟然有幾個素食嘅選擇，就決定坐低。坐咗喺一張用膠板揀開4份嘅大嘅長枱，對面近外面嘅一位女士係帶住隻好得意嘅狗仔，睇嚟餐廳都幾Friendly。落單係用QR code囉落，我揀咗 omni beef burger，本身就包埋沙律同薯條，嘢飲分開叫，叫咗杯凍嘅Rose latte (skimmed milk)。嘢飲先到，我唔係飲咖啡嘅專家，唔識分佢啲咖啡豆，不過我覺得幾好飲，有少少玫瑰嘅香味，奶味唔算太重，我個人就幾啱飲。等咗一陣嘢食就到，嘩，咁大碟嘅，特別係啲薯條，多到好似唔使錢咁，份量好似獨立一個dish咁，完全唔似係sides。😲啲薯條係熱辣辣炸起，好香脆。沙律就比較特別啲，係酸酸地嘅紫椰菜好似仲溝咗啲洋蔥？ 食落其實幾開胃，特別好味，一啖薯條一啖沙律，感覺會平衡啲。講返個burger，我其實都好鍾意是唔同Cafe嘅素Burger，睇吓有咩唔同。今次呢個size都幾大，除咗兩塊包，入面仲有生菜，蕃茄，沙律醬，洋蔥，omni beef 扒同埋大啡菇。大部份嘅Cafe嘅素Burger通常一係菇一係得扒，今次呢個Burger竟然有晒兩樣，一次過滿足晒兩個願望。omni beef 扒味道就冇咩特別，其實我覺得同Beyond Meat都差唔多味，個人係鍾意Imposible多啲。總體嚟講個burger嘅味道就唔算太特別，但有一個唔錯嘅素Burger，再配合埋個沙律同熱辣辣嘅薯條，好飲嘅咖啡，哩個lunch都好滿足。埋單$180，應該貴過 隔離啲餐廳，不過咁大份，都算OK 啦，薯條係食唔哂的 😅…Read More

計畫了很久的相聚 ：） 揀了到蟲二，聽到個名嚇一嚇，點解有個蟲字？！原來係 風月無邊 嘅意思，幾有趣！可能因為天氣寒冷，餐廳位於天台（有室內），星期六4 點唔算多人，環境幾好幾舒服，不過間中會有陣陣涼風吹入黎。大家都唔肚餓，叫了兩個小食，一個pancake share，兩杯飲品，用QR code 落單。小食叫了烤豆腐，上黎連碟都係熱嘅，紫菜好多好香，食落有好多脆脆係上面，配合豆腐好特別！有驚喜！另一個係玉子燒，有沙律醬係上面，味道都唔錯，蛋很香。Pancake 叫了 earl grey mochi，唔係一般嘅 fluffy pancake 喎！ texture 有啲似 banana cake，但鬆軟一啲，裡面係有 mochi，仲食到脆脆嘅焦糖，上面又有 香蕉， earl grey syrup， 同埋 vanilla 雪糕。混合一齊好好味！自問唔係特別好 pancake，但哩個 pancake 比想像好味！ 值得特登寫一個食評，哈哈！飲品方面，朋友叫了一杯茶，聞到就幾香下。我叫了個 bailey choco，有拉花，飲落朱古力味比較重，唔算太重酒味，比較一般。4 點傾到 6 點，好滿足：）埋單收現金/轉數快，去嘅要留意啦。…Read More

Decided to pick riverside grill for comfort food after work.Ordered impossible burger today with discount from delivery 份外賣黎到，嘅兜大到嚇死人，成份 party food 咁嘅 size！ Burger 份量都唔細，好大塊 impossible meat patty，煎得香口，不過就鹹咗啲...... 飽係鬆脆嘅，配料都好普通，有生菜番茄，洋蔥味道就最突出，配千島醬。另外有好多薯角，送到仍然香脆，一個人真係食唔完，分埋比同事 comfort food 係開心嘅，餐廳有素食供應都好好，調味如果可以改善一吓就更加好！…Read More

星期六遲放工，同好姐妹決定去澳南食好啲！哩間想試好耐！（好耐好耐以前試過銅鑼灣個間）上次 lunch time 黎到太多人了無食到，今次 late lunch （其實都已經 tea time）就唔駛等位，終於可以試下啦！入到去可以坐張四人檯，侍應姐姐主動問我地有無黎過，我地話無，佢就問準准我地話講一下推介嘅食物。（好好呀係問准先推介！唔會令你覺得煩厭/hardsell ）menu 上嘅雲☁️同火山🌋 飯真係好吸引！好 cute！ 其實我覺得舊雲得意啲，但因為我食素就唔敢叫牛肉碎嘅雲，火山係餐肉粒，好啲🤣我哋叫咗一個烏卒卒火山泡菜餐肉炒飯，要等30分鐘，叫咗一個雜菜韓式炒粉絲，跟住叫咗推介嘅雜莓窩夫配雪糕，然後叫咗兩杯雪山，一個士多啤梨，一個就培茶加朱古力。首先上咗兩杯嘢飲，兩杯個造型都好靚，粉紅色嘅士多啤梨奶蓋雪山簡直就係令我地少女心爆發🤣 味道都唔錯，士多啤梨奶昔無藥水味，應該都係足料嘅奶昔，焙茶溝朱古力就比較有特色，冇諗過兩樣嘢可以溝埋嚟飲，仲要加啲芝士味嘅奶蓋，比想像中好飲。兩杯都係唔單止望落去靚，仲好好飲。跟住就上咗雜菜炒粉絲同個窩夫，可能係用QR code落單，有冇諗起個甜品係咪可以問佢哋遲上，不過唔緊要啦嚟咗就算啦。反正天氣唔係咁熱個雪糕都可以擺多陣嘅。先食呢個雜菜炒韓式粉絲，仲以為係好一般嘅菜式，但呢個炒粉絲又唔錯喎！粉絲都係韓式粉絲，比較硬身同煙韌，炒出嚟唔會太油亦都冇淋到。配料嘅雜菜，都唔係其他餐廳求求其其用啲用剩嘅菜咁嘅感覺，識落都係爽口新鮮嘅。個粉絲就無配辣醬，我哋亦冇特別話要加，就唔知有冇呢個option啦。食完個粉絲，啱啱好個火山炒飯就到啦！造型真係好得意呀！上碟嘅時候，侍應會用一個蓋冚住佢（雖然我點餐嘅時候其實冇為意佢有一part叫做煙霧彌漫），侍應問我哋需唔需要拍片，我哋呆咗一呆，就話唔使啦。咁其實又唔係想像中咁大煙，不過我就好欣賞侍應姐姐咁貼心嘅問題。雖然望返張相同個Menu係有少少出入😂 座山冇咁一座山嘅形狀，但係佢都好得意呀！完全係打卡必叫兼IG-able ! 😎出面嗰層灰色嘅mousse類物體係鹹鹹地嘅，切開裏面係泡菜炒飯，有啲大大粒嘅餐肉粒，上面嗰粒蛋仲係流心嘅，切開左就可以撈埋嚟食。落單嘅時候可以揀辣定唔辣，不過其實就唔算真係好辣，只係小小辣。味道唔會太重口味唔會太鹹，除咗睇得，味道都好好。結果食完啲主食，我哋先至食一早已經上咗嘅窩夫，個雪糕有少少溶。窩夫就比想像中硬身咗少少，唔知係咪因為已經擺咗一段時間。不過整體味道都唔錯。Overall 哩餐好滿意好滿足！食物唔單止造型可愛，味道都好唔錯！當然最緊要都係同好姊妹傾咗一個晏晝 🥰 highly recommended! …Read More

見到 green common 出咗新菜式，竟然係 laksa！用素食材料整嘅 curry laksa，好想試！今日返半日，放工即刻去試！新出嘅係植物雞 laksa 湯米粉，加埋燕麥奶 cuppiccino，$97。兩點左右，唔多人，好快有得食。米粉先到，都幾香，賣相以好吸引。先試一啖湯，都有 laksa 嘅香味，味道不太濃，亦唔辣，但我覺得都唔錯。上面有煎過嘅植物雞柳，話係香辣，我就唔覺，但味道都幾好，唔會有「假肉」啲怪味，亦唔重豆味，口感都似雞柳。豆卜得兩舊，要浸一下湯先入味。配料有芽菜，有少量脆脆，仲有啲唔知係咩嘅嘢（？酸菜但唔似喎）。米粉係好幼身，透透地，軟硬度適中，亦掛湯，雖然唔似平時最常見個種喇沙質感，但都唔錯。 份量唔算多，剛剛好，男士可能唔夠食。整體都幾好見凍凍地就飲杯 cuppuccino，唔鍾意杏仁奶所以一定叫燕麥奶，唔算好香，ok 啦。作為好鍾意食 laksa 嘅人，有素食版 laksa 真係好滿足！ 我諗哩樣將會成為繼焗豬扒飯同已經無咗嘅咖喱魚蛋後我最鍾意嘅 green common choice …Read More

最近又回到了觀塘區，今日放工一個人去搵 late lunch，見到評價唔錯特意走來試試。第一次黎觀塘懂廣場地下食嘢，原來好似一條食街咁，都是小店放幾張檯，感覺像 modern 版的大排檔。兩點幾去到坐了一半人，好熱情嘅姐姐介紹有咩食，款式其實不算多，沙律就有幾款又有唔同配搭，好似幾吸引。不過我唔好沙律，於是叫個魚柳包餐，有配蕃薯條，餐湯，一款沙律，我揀咗最 basic 嘅雜果，見到仲有藜麥呀冷麵呀西蘭花等等，飲品我叫了凍豆奶咖啡，要加八蚊。飲品先上，咦原來所謂咖啡，原來係咖啡味豆奶，仲要好細杯 == 個杯邊重要痴笠笠  跟著送上餐湯，應該係南瓜湯？但好稀好水，唔太好味.... 好啦主餐到，隻碟好細，所有嘢擺埋一齊，個包其實都好細...分開咗兩部分，有兩件魚柳，番茄，羽衣甘藍，同另一面有素芝士。味道 OK 啦，其實都係 green common 代理個幾款素食嘅配搭，但實在太細份又無咩特別，旁邊的蕃薯條都不夠脆...仲有，用 burger 方式咁上但無比刀你隻碟又細究竟點食呢... 個餐普普通通啦，但收 $98 我就覺得唔太抵。見到附近其他人叫啲沙律意粉份量都好細，有個叫細沙律都要成 $70 真係好細碟。叫得 cafe，收咁嘅價錢，我會 expect 好少少嘅食物/服務/環境。相同價錢我應該會選擇其他餐廳了。…Read More

今日有事又去荃灣，因為太遲起身食早餐就去到下晝四點先食野。點知原來好多間餐廳四點幾都唔開冇嘢食，結果又搵返我嘅 comfort food triple o 😅 上次試咗一次 triple o version impossible burger 覺得唔好食，於是今日決定叫返普通嘅 veggie burger，跟餐加錢轉洋蔥圈同士多啤梨奶昔。成件事都非常之咁邪惡但係呢個配搭真係好滿足 😝坐低等緊嘅時候另外有兩位阿叔黎問素食有咩選擇， counter嘅哥哥非常專業咁解釋左嗰兩款素食漢堡由咩材料做，結果兩位叔叔度嗌左 impossible burger。嗰個時段冇咩人，等左一陣就有嘢食。個包維持咗一貫嘅水平，入面嘅生菜蕃茄全部都好新鮮。洋蔥圈唔算油但夠香口，配埋我最愛嘅士多啤梨奶昔非常之match！士多啤梨奶昔係好似雪糕咁，其實咁大杯係飲唔晒嘅⋯ 食完非常非常之飽，今晚可以唔使食飯啦！…Read More

難得星期日訓到中午先起身，出面又落大雨，完全懶得出街，結果就叫咗個外賣嚟食。望住個外賣手機程式，諗咗好耐終於叫咗個咖喱雜菜配意粉。點知因為個程式嘅問題冇人送餐，等左好耐先至有得食，變咗個溫度就唔夠熱，勉強溫溫地，不過好彩係意粉，咁都還可以嘅。意粉隔離有啲配菜，望落去都好似幾好。咖喱嘅味道就冇乜特別啦，一般茶餐廳貨仔，唔算辣。雜菜嘅料都OK，有西蘭花、薯仔、洋蔥、西芹、番茄等等，仲有一隻幾靚嘅煎熟蛋喺面，味道都OK。總括來講，就不過不失。…Read More

難得五一勞動節放假，朝早同阿媽去咗睇早場，跟住阿媽話想去食悠蔬食（其實佢講咗幾次，不過最近都冇去食）於是就搭車出銅鑼灣去食。出到去12點幾，紅日冇book位好彩都有位。今次坐咗喺入面房仔嗰邊嘅兩人位，感覺被坐喺出面更加舒服，更加有私人空間。叫咗兩個lunch set，一個係日式拿破崙扁意粉配溏心蛋，一個係葡汁蔬菜白玉焗飯（嗱我都話我好鍾意食焗飯㗎啦）。唔記得咗影餐牌唔記得咗啲名，湯就大家都叫咗西式嘅湯係蘋果甘筍唔知乜乜忌廉湯，仲有個前菜係沙律，嘢飲就普通咁叫咗咖啡。加咗甜品，一個春季銅鑼灣分店限定嘅赤苺紅蓮，一個伯爵紅茶千層班戟。湯同沙律好快就到啦，佢個湯好好味，好濃好creamy，其實份量都唔少，超鍾意！跟住到主菜，意粉先到，賣相幾好，溏心蛋都真係溏心 texture ，啲意粉有啲咬口幾好食，味道 ok 不過就冇乜特別，配料又唔多。個焗飯遲過意粉少少黎，見到已經好吸引，焗到熱辣辣個面脆脆地咁！食落去都令人驚喜，味道就葡汁咁嘅味啦，驚喜嘅係個舊「白玉」，原來係素雞肉，味道幾好，仲要？炸過定煎過，脆脆地又唔油膩，真係好好！其實食完主菜都已經好飽（其實次次黎親都係好飽），不過啲甜品咁吸引都一定要試吓。個赤苺紅蓮賣相就好靚，不過原來只不過係士多啤梨吉士撻姐，食落味道唔錯但其實就冇乜特別。反而個伯爵紅茶千層班戟就真係幾好食，淡淡嘅茶香，又唔會過甜，為滿足嘅一餐畫上句號！…Read More

放假約人黎食個 tea ，先 book 咗位，但其實 4:30pm 係完全無人嘅 XD我當tea 食，朋友要當埋晚餐，一個食肉一個食素，叫咗一個 tea set 本來打算叫雞絲粉絲配酸辣醬，點知唔知係咪waiter oppa 唔識中文落錯單變咗炸醬麵，不過我地唔想浪費，照要啦。另外叫咗個焗番茄泡菜豆腐，味道唔錯！最鍾意係泡菜煎餅，雖然唔係咩特別菜式，但好脆好香，又唔會太油膩  食到好飽，不過都係要叫甜品嘅！啲名好長唔記得叫乜但係嘅雪糕好好味 XD waffle 都 ok…Read More

工作太忙，好耐無寫食評啦。今日難得放假，又要去油麻地複診，複診前 2 點鐘黎 kubrick 食個 late lunch。每次黎複診都鍾意去 kubrick hea 吓，食個 late lunch 先，鍾意哩度夠文青，氣氛夠輕鬆，同埋最鍾意佢個 bailey‘s coffee！最近工作太辛苦，放假要對自己好啲，叫咗個 意大利香草醬芝士意粉，見到有蘑菇湯又想飲，佢轉套餐一加就要加兩樣，就加埋薯條。唔理係咪肥死啦既然做嘢都就做死.... 當然要叫我最愛嘅 iced bailey's coffee 啦！加埋就要 $150. 當獎勵自己返工咁辛苦啦！意粉先到，好香，夠濃味，不過都係要加埋辣椒仔先好食。跟著上薯條，粗身，熱辣辣，又夠脆。然後送上蘑菇湯，嘩，原來咁大碗！仲有麵包！我無諗過.... 一個人叫到成檯嘢食好似好誇張咁... 蘑菇湯係最有驚喜！好好飲，清清地，有蘑菇粒粒，好味過好多西餐廳喎！麵包都夠熱夠脆  最愛當然係 bailey coffee，無失望！好滿足 難得悠閒食個 late lunch，但習慣咗，都係食得太快... 又諗起兩年幾前被當頭棒喝後係 kubrick 的一個下午....…Read More

好耐無食 green common，今日放假，做完考順女陪呀爸去律敦治睇醫生，睇完都成三點半過黎試吓哩間（之前都係食將軍澳個間）食個 late lunch 。係天橋邊入好易搵，不過間隔係比條路分開咗咁，又有啲焗。可能附近都係上班族，下午茶時段係無咩人，有啲員工休息緊，感覺將軍澳個間舒服啲。Green common 食過好幾次，不過佢最 hardsell 嘅 beyond burger 我就唔太識欣賞，個植物蛋上次直頭試咗幾啖食唔落肚😖 但有啲嘢食包括啲飯同雞都唔錯嘅 XD 本來好掛住佢個咖喱三寶，但見到有個新登場嘅葡國雞飯好似幾吸引喎！（我都話我好鐘意食焗飯架啦😅）仲要係配黃薑飯，之前試過佢個焗豬排飯都唔錯，於是決定試下。飲品就叫咗個 iced latte ，要燕麥奶（個人唔太鐘意杏仁奶）。係 counter 落完單，就比個牌你坐低等，睇黎因為要焗，都要等成 20 分鐘⋯不過送到黎個樣好靚喎！worth the wait 個飯熱辣辣焗起，個邊仲有少少飯焦，配菜種類多色彩豐富，新鮮得黎又唔會太生好似食草咁！（記得上次係美心食個焗飯啲西蘭花係黃嘅😑 另一次係 green common 就好似食生嘅草咁）焗飯面有啲芝士，應該係 green common 代理隻素芝士(我唔係 vegan，所以都係鐘意真芝士多啲🤣) ，仲有啲提子乾 mix 啲甜味落去。葡汁同黃薑飯兩樣都係黃色，顏色上其實就唔係最好嘅配合，撞哂色咁😅 葡汁都ok，唔算太濃味，黃薑飯唔係平時印尼舖個種米，但幾香，夾埋個味道又唔錯喎！至於主角植物雞，texture 都真係幾似雞肉！味道亦ok，無個啲好假好膠嘅素肉味道🤣 仲要煎過先？個邊脆脆哋幾好食喎！總括哩講個飯都幾好！可以再食！至於 iced latte 用燕麥奶似乎味道同平常嘅 latte 無咩分別，等我下次都繼續揀燕麥奶先！價錢方面唔算好平但acceptable，weekday 6點前 main dish 平$10，份量都唔少，食吓食吓都好飽，如果想試佢啲小食就要多幾個人share 先得。…Read More

又一返完夜班嘅一日，係附近搵早餐食。見到哩間 cafe 仔，係商用大廈地下一角，外面有餐牌，被吸引入去試下。星期六朝九點幾，除咗隔離搭電梯返工嘅人，一個人都無，係無客人，店員就有一個。其實座位唔多，得六張細細張嘅二人檯，不過好有趣，見到有得用 QR code 用手機點餐 😅叫咗個精選早餐，有炒蛋多士同薯餅。（因為炒蛋同薯餅都係我至愛XD）加杯熱檸水。坐低等一陣就有得食，但竟然係用膠盤膠餐具😲 可能店鋪太細？但環保啲會好啲。味道就幾好！炒蛋夠香同滑，多士夠脆，又唔會太乾身，薯餅係細細塊，有兩件，乾脆唔油膩！檸水好熱好熱，熱到我要慢慢飲，可以打埋篇食評 😅…Read More