jenny_cln's Profile

久不久都會去呢一間分店因為銅鑼灣嗰間太好食心心念念方便放工食，最近都係中環呢間人流唔算多但係食物水準及唔上銅鑼灣上一次嚟食，其實係OK但係今次講真：吞拿魚真係唔新鮮！而且係有筋！魚肉嘅份量亦都屬於好比較少感覺上好似食超級市場cheap cheap雜錦魚生飯咁樣因為試過喺銅鑼灣食真係一粒骰仔咁大每一粒都好精緻中環呢度就好似差好遠飲食氣氛亦都好差店員亦都虎視眈眈（尤其是個年紀較為大嘅四眼女人）飲食環境好緊張食得比較趕最重要都唔係爆場唔知趕乜嘢其實明眼人一睇都知道啲魚肉真係麻麻哋新鮮新鮮魚肉都會令令立立呢一個你見到顏色比較暗淡雖然話係油漬但係都唔係咁嘅樣慘過去食壽司郎最緊要價錢仲貴啲添二百幾蚊一個咁嘅餐真係唔值好可惜暫時唔會再去…Read More

話說朋友介紹話呢度服務好好食物質素又好所以就book同老爺食生日飯結果係大失所望老實講，啲嘢食係好好食嘅開頭嘅服務都可以但係當我哋食到差唔多六七成嘅時候就已經吹住你走Book枱嘅時候講明六點至八點老人家唔識搵呢啲山旮旯地方結果18:15先至到嗌咗幾碟餸，我哋又食得快開心吹水又飲酒去到七點左右已經食得7788但係仲想繼續傾偈但係啲服務員已經喺度猛咁係咁喺你附近枱度巡嚟巡去我嗌咗兩支大啤都未飲完仲有大半支！喂大佬，我坐咗一個鐘都未夠喎話明8:00pm交枱7:00pm已經喺度催住曬本來開頭印象都唔錯，結果就衰收尾！碟菜仲有兩條都未食完！生腸魷魚都仲有兩嚿喺隻碟度已經想收我碟啦。咁仲點坐落去啊？19:15已經要埋單走人！你估仲有冇下次呀？你唔怪得啲香港人返晒大陸消費！最大問題根本冇人喺度等位，點解要吹呢？感受非常之唔好。成年人大家都明白㗎啦，約一餐出嚟食飯有好多時間成本又要約得啱時間、齊人可以一齊食一餐飯已經好困難！難得坐低食飯，但就係俾人吹吹吹極差體驗！作為香港人都好想留港振興香港經濟！但係一日唔改呢啲吹住晒嘅服務！一日都唔使旨意香港人留喺度消費啦！等深圳收香港皮啦。返屋企食冇咁嬲啦⋯⋯…Read More

是日random 路經呢一間店幾年前食過係好味但係座位好迫，所以冇再去。今日路過五點幾就嚟六點嘅時候竟然好多位咁就入去試吓再食，結果六點打後又爆場。爆都有原因嘅食物真係OK唔錯👍🏻因為本人weekend會去做gym，所以孭住個大背囊。初時入去冇人，所以求其放喺座位上面就算。點知後來越嚟越多人。所以要拎起背囊。都唔緊要，但餐廳職員無視我求救，個樣表現一面「好L煩。」問題你連俾個籃我放地下都冇。事關我衰，唔捨得放個2萬蚊backpack 係地下…唯有求其勾住咗個櫈背…實在唔好意思，又影響後面食客。講呢一段嘢就係因為個開頭同服務員嘅互動已經有少少影響咗飲食嘅心情。平心而論講返啲食物係OK正嘅，但係因為坐得咁迫，根本就係趕住你食完就要即刻走…後邊有人等…咁其實你應該整到好似一蘭嗰啲面壁位而唔係四人枱兩pair人你眼望我眼大家又唔識，但係又同台食飯 食得尷尬，又傾唔到偈而且食到咁大壓力逼住你快啲食完要走。所以下次唔會再嚟呢一間。…Read More

之前經過見人排隊已經想試。美國🇺🇸大品牌好似好吸引。昨日路過，竟然又冇人排隊喎。就試吓啦！結果真的好一般。其實係幾失望。雞蛋唔滑，也不juicy。醬汁味道似加了辣椒的千島醬。劈芝士唔熱冇味又乾，好似放咗好耐。乾晒差唔開。整體食物唔熱。坐位唔舒服。布面凳上邊仲要有可疑污跡👻仲有，問職員要一杯清水都冇，要你買瓶裝水。問題我不是cheap唔買飲品，已經一人要一個餐有可樂，（隔籬枱強國自由行三人家庭先叫一個包🫣）我只是要一杯清水，食完清一清口腔都唔可以。唯一可以讚係可以走麵包，轉要沙律。沙律菜成個餐係唯一好食的。HK$200兩個餐($7x單買一個包）貴夾唔飽份量少過下午茶。老老實實滑蛋黎計澳牛好食、新鮮過佢多多聲冇下次…Read More

朋友生日，於是乎約出嚟hightea傾偈。座位非常寬敞，而且落地大玻璃。坐底冇耐之後職員就遞上不同嘅茶俾我哋選擇：職員都好有禮貌同埋耐性去講解茶葉嘅味道啦，亦都可以輕輕聞吓佢嘅香味。當日佢哋做緊Crossover所以就冇咩選擇得一個餐咋。呢個鬆餅幾好食，佢啲cream又可以無限添加。酒店set嚟講係做得幾靚同埋算幾好食㗎啦。特別要讚呢一舊係有茶嘅香味，清香又唔會太甜。佢哋呢喺大概…. 冇記錯嘅話好似係5:30pm會有個開香檳嘅會議式。淨係拍咗片冇影相upload唔到上嚟啦。志在係有氣氛，並飲少少嘅。我哋大約4:30pm坐到8:00pm。啲職員有同我哋講咗6:00已經係dinnertime。不過冇趕我哋走，繼續俾我哋傾偈，可能星期三晚並不是好繁忙。呢一樣嘢真係要讚👍🏻你知香港幾多餐廳限時限刻㗎啦。無壓力嘅悠閒下午茶非常推介。買，埋單$1000左右…Read More

今次寫呢個食評讚揚一下呢間新餐廳。不是好perfect 但誠意搭救。自從將軍澳有海邊長廊都一直好想去。今次主題係細佬生日，佢又住附近，所以就揀咗呢間餐廳。其實打電話預約嘅時候，已經要求過要一個Happy birthday嘅dessert。聽電話嘅服務員其實好有禮貌，可惜最尾應該係唔記得咗。所以去到最後都係我自己同服務員講呢個要求，雖然係唔記得咗，但係仍然好有禮貌去補救呢個事情。所以都值得嘉許。其實個環境都幾有外國feel。見到開陽嘅風景。我哋去到，waitress 安排內邊枱。但Book 嘅時候，已經講咗要坐窗邊位，冇人有記錄要求。好彩剛好有一檯窗邊位available ，Waitress 又好樂意比我地掉枱。所以都okay。我哋order 咗三個tea combo and one premium tea set.花茶視覺美麗，味道一般。呢個鳥籠係好靚❤️尚算足料，新鮮度可以。下格是甜點。其實食物水準可以。Birthday dessert 好靚。也都好食。你問我呢間餐廳會唔會encore呢就未必嘅又唔算好差不過不失服務幾好食物水平可以接受。新嘅餐廳可以俾啲allowances.…Read More

叫做「牛大人」，當然係期望牛肉好食。點知失望到喊。你睇睇塊牛肉！雖則話係機切，但都唔係衰成咁！薄過張紙！之後再嚟手切牛肉，你睇吓d顏色，下三分之一都好差。瘀色的！唔敢食。反而蝦係最新鮮。墨魚膠so so only，不彈牙。係和牛牛丸好食。飲品係多選擇。最後每人有一杯movenpick 雪糕。星期六去食每人仲要加$10。最唔清楚係幾點離塲又有不同收費。唯一讚佢有長者卡有優惠。卡位算好坐。不過限時限刻都係有壓力。最緊要牛肉質素咁差叫自己「牛大人」，真心有名冇實。冇下次。…Read More

自從疫情開始之後，已經絶少出街食飯。現在已經過了一年有多，疫情亦算是平穩。五月又是母親節的時候。做個孝順兒女都應該陪奶奶食餐飯。今日特別啲去離島食海鮮。呢一間喺網上見到都幾出名。而且座位有限，唔預先book嘅話，根本上就唔會有位啦。我哋都算係幾臨時臨急晏晝先至book夜晚。所以鮮雞已經話賣晒啦。於是乎就預先book定海鮮啦。有圖有真相，去片先：門面很少，座位也不會多。所以記得訂位啦。那個大合照先。成餐飯色香味俱全！我的腌尖長輩竟然都讚好食😋今餐真是俾得抵！第一碟來到的是黃金南瓜鮑魚。來個近鏡zoom下隻鮑魚先。望落去以為炸鮑魚...肯定唔新鮮同埋好韌?點知嚇一跳！鮮味十足，個鮑魚好淋，咬落去果下係嚇一跳！表面嘅鹹蛋黃好香口，但冇過厚。更加冇搶到個鮮味之餘，仲提升了口感。外脆內軟！真係忍唔住咬開一半都要影張相！必定要試呀！以為配角係南瓜🎃，只係伴碟？咁就錯啦！個南瓜煮得剛剛好！本人一向係比較怕食林啤啤嘅南瓜。所以對南瓜印象不嬲都好一般。呢一個竟然可以烹到啱啱熟，又不會淋，仲有少少爽口嘅感覺。加埋外邊脆卜卜嘅鹹蛋，竟然可以係咁好食囉！真係要用驚喜來形容！竟然第一道菜已經咁驚喜第二道送上：蒜蓉蒸扇貝。我咁大個女喺香港出街食海鮮，未見過一隻咁乾淨嘅扇貝！好多喺出邊食都見到有黑蚊蚊嘅綑邊，差嘅甚至會食到有沙。呢一個係洗得：超。乾。淨！超乾淨！超乾淨！超乾淨！重要嘅嘢要講三次！完全食唔到砂粒，而且係白雪雪嘅！鮮味就唔在講，蒜蓉唔會過多。如果再多啲粉絲吸吓啲鮮味就發達啦！豉油好少，可能係唔想蓋過咗扇貝嘅味道。啖啖肉好滋味！呢個豬手並非我最愛。本人係唔鍾意食豬嘅。係叫比老爺食。佢識食肉，又鍾意豬手。佢話炆得得啱啱好。我咬咗一啖發覺佢係膠質好重。又不會太油。花生應該都好食。我見到老爺奶奶係咁食。因為我自己就唔鍾意食花生，所以就冇試。鍾意豬手嘅大家，可以考慮呢一個。壓軸嘉賓，花蟹花雕蒸蛋！超鮮甜！你唔好睇過花蟹好似唔係好大隻。實質裏面真係好多肉！個蟹鉗直頭係香濃郁嘅鮮味。實實在在俾晒兩隻蟹你。完全唔係擺個殼做裝飾。絕對真材實料！蒸蛋吸收晒蟹汁嘅精華，加上花雕嘅吊味。超級滑！未試過食咁樣嘅蒸蛋！酒味不算重，我覺得幾香。跟住嚟到招牌菜，籠仔蒸蝦糯米飯🍚🦐非常肥美的蝦，打開個蒸籠已經聞到香味。真係好多蝦！隻隻彈牙，頭部多蝦膏！見到底下嘅糯米飯，以為薄薄地一層。點知食極都有！糯米飯鬆軟而不失口感。再一次將蝦嘅鮮味吸收得淋漓盡致！咁樣嘅配搭真係食極都睇唔到口！最後，想食健康啲，於是乎叫了一個菜心。侍應生放低蝶菜嘅時候我哋仲以為係芥蘭！因為真係綠油油得出奇！連蝶蔬菜🥬都要讚！新鮮又Juicy!每一碟餸都各有千秋！厲害厲害！下次要帶埋我阿媽嚟試吓先得一定再encore！冇得彈！Service 也不錯。侍應姐姐好Helpful 有禮貌又有笑容😊香港少有喇！愉快的一餐，仲要長輩滿意！任務完成✅…Read More

香港竟然開咗FIVE GUYS! 🤓呢間餐廳係我每次去英國必到嘅快餐店🍔。香港開了分店，我當然要去試! 一於叫個cheese burger🧀! 的確不能與英國的相提並論。個麵包最唔掂，濕濕立立💦。一路食一路出水！其實啲內容係不錯，都係足料炮製嘅。我最愛嘅青瓜🥒蔬菜🥬都係滿滿嘅填滿左個漢堡包。但係香港嘅牛肉🥩又的確唔能夠同英國嘅相比，唔知係因為煮得太耐🔥，有少少老左嘅問題🍖；定係啲肉本身唔係英國嘅牛肉🤔，水準略為遜色😕。啲芝士又溶晒。圖中可見個麵包已經濕到扁晒。我會比75分☑️($85)如果同其他香港快餐店相比，其實已經贏到開巷。🙌🏻👏🏻只係因為我係英國食過，所以會有比較。另外，我欣賞佢都係跟外國嘅一樣：有無限添汽水🥤$35，同埋無限添花生🥜for free and still super crispy !香脆！仲有室內嘅設計跟英國嘅一模一樣，空間感十足，樓底超級高💡。喺香港就比較難搵到呢啲空間咁闊落、舒適嘅快餐店👍🏻。而且要讚一下服務員態度非常好！每個人都面有笑容，絶不會黑面！要知道心情絕對影響食慾。價錢不是便宜。但咁足料，都合理。亦同英國分店價錢相若。P.S.:（如果你有興趣，可以睇下我之前英國食Five Guys的相，就會見到嗰個cheese burger同香港食到嘅有好大分別）👇🏻個麵包係脹卜卜，好乾爽、層次分明。希望香港分店加油、繼續改善！我希望再幫襯！…Read More

又用外賣app叫晚餐呀！今晚想食點心。見到呢間叫「包點超人」就試吓啦。佢嘅包點粒粒都好大隻！鮮蝦餃，裏面嘅蝦肉好新鮮好豐富。粉果裏面有好多好爽趣嘅粉葛。放入口裏面非常之充實！本人係非常之鍾意食雜菌嘅。所以老公叫咗呢個雜菌餃俾我。咬開入邊的確有好多款式嘅雜菌同蔬菜。然後到呢個煎釀兩寶。有青椒同埋茄子。我就最鍾意食青椒。呢個係好好味。但係呢要留意！佢呢個青椒係辣㗎！仲要唔係小辣！呢個鮮雞紮不得了啦！直頭講笑咁講，中咗輻射咁大隻！打開裏面非常之多餸。有鮮冬菇啦、豬皮啦、蓮藕啦、鮮雞肉啦等等。食完呢隻野都飽咗一半跟住仲有呢個春卷。都係超大隻，送到黎仲係脆㗎。唯一缺點係佢冇比喼汁。咁就爭左少少。但係佢平均啲嘢都好夠味呀。仲有一個鮮竹牛肉就唔記得影相。都係整得好好味、好大隻、好抵食。最後就希望反映番比店主聽，其實佢呢啲包裝非常之唔環保。發泡膠係地球降解唔到嘅物質。唔好為咗平宜，而用啲咁唔環保嘅包裝。我寧願加包裝錢，要紙盒或者係其他可降解嘅食物容器。為環保出一分力！食物質素同埋價錢係好嘅。但係因為啲發泡膠，我就唔會再幫襯住。希望佢會改善呢方面嘅問題。…Read More

呢一間嘅打邊爐真係幾特別嘅。雖然地方都係有啲狹窄，但係佢嘅碗碗碟碟係幾靚嘅。服務員嘅態度都算幾好，幾有禮貌。首先朋友話一定要叫呢個醉雞湯底我話有咩咁特別呀。佢話你陣間就知。結果真係幾驚喜喎。原來個店員呢，就拎個醉雞鍋來，之後點火呢就係你面前點火炒炒炒喎！場面都幾火爆！有氣勢得來又唔錯喎！我呢啲食肉獸，就點最貴嗰個牛肉拼盤好味到唔識形容。非常之爽滑肉鮮嫩！牛味十足！有幾個唔同嘅牛肉部位。最鍾意都係爽脆嘅牛舌！仲有好難order到嘅牛骨髓！新鮮滑流到不得了！好味到痴線！仲有叫咗墨魚滑同蝦滑！鮮味十足彈牙到不得了！食肉獸都要食下菜！我最愛嘅雜菇！鮮味到不行！打邊爐當然唔少得香口野啦！呢個炸魚皮，死都要食啦！好似上邊仲有少少鹹蛋黃嘅香味。我真係食到呢一度，係味角開花啦！咁好味，梗係價錢唔會平啦三個人食$1700！當然唔係平啦。值唔值得？豐儉由人！但係我覺得間唔中食一次，絕對可以接受。喜歡高質素嘅你，可以考慮。…Read More

朋友介紹話呢一間係台式珍珠奶茶嘅始祖！我本人好鍾意番茄湯，所以嗌咗呢個蕃茄牛筋牛腩面。牛筋同牛腩都蚊到非常淋、好入味！湯底酸酸美味但又不失牛肉嘅香濃味道！我自己係好鍾意！蕃茄係好鮮甜、白菜仔亦都新鮮好味。差唔多要飲晒啲湯！朋友order咗呢個台式便當。賣相都非常之靚仔！第二日有嘢做，又來到銅鑼灣。心思思結果又走去食喎。今次叫咗呢個三寶牛肉麵。呢個牛肉麵真係好足料。裏面相信有牛展、金錢肚等等。都係果句肉質好新鮮、好入味、蚊得好淋。不過湯底冇蕃茄湯咁濃。面底都唔錯。不過我都係鍾意番茄湯個湯底同埋面底囉。由於我係一個不折不扣嘅青瓜怪。雖然價錢唔平，記得好似大約$38嘅一個醃青瓜。我都照叫咗啦。不過係冇後悔㗎😆佢嘅辣係香嘅，酸味剛剛好、好輕微，青瓜非常之新鮮爽脆。I enjoyed it a lot! 食到呢度其實已經飽到入心入肺㗎啦。但你都去珍珠奶茶嘅始祖，點可以唔飲珍珠奶茶呢？結果叫咗呢個鐵觀音珍珠奶茶！$34絕對值回票價！鐵觀音味香濃！奶味亦不會過搶。非常之完美嘅平衡。不過本人經常要睇住飲食，所以走甜！健康啲！最後嘅評論係：可以一食再食，甚至會有啲掛住佢嘅一間台式餐廳。最後都讚下佢哋嘅員工，其實都算幾有禮貌、服務質素都算唔錯㗎啦。起碼坐位，你自己揀，唔會逼你坐某啲位置。揮手唔會個個得低頭。算係幾Helpful. 有時食嘢，除咗食物質素高之外，服務都佔好高嘅影響力。因為食到一肚氣、唔開心嗰陣，啲食物幾好味都冇用。報告完畢。我會比五星星佢。不過Peak hour會好多人。好似我今日11點幾12點去剛剛好可以享受一個舒舒服服嘅午餐。中午一點之後相信就冇呢支歌仔唱喇。…Read More

話說是日行山到上山頂。全身出汗兼夾又攰又餓，於是乎就諗住快速坐低搵啲嘢飲下食下。見有位坐，就去到呢一間Pacific Coffee啦。我老公就咖啡控，於是乎叫咗一杯Americano。價錢同Starbucks係差唔多。不過質素就爭好遠。可以話呢間咖啡店嘅咖啡係一啲都唔香啦。飲咗落去唔知自己飲緊啲乜嘢。唔識去形容佢嗰種味道，好似係冰水溝咖啡渣嘅感覺。總之就極度後悔啦。見佢啲cake好似懶靚咁於是乎又叫啦。結果芝士蛋糕冇芝士味，只係一浸糖嘅粉。冇黏性、餅底又超硬。我嗰個Rock and road 蛋糕亦都係惡夢一樣.甜到飛起，好溜。總括而言，山頂冇得揀求其搵定坐，涼下冷氣。建議大家買支水就算數啦。…Read More

話說放工又唔想煮飯。係某app度搵到有間蔡瀾嘅越南野，於是就試吓啦價錢亦都唔貴喎。佢哋個外賣碗都幾有心思，有埋公司招牌。實記得食過佢啲嘢啦。食物方面叫咗豬頸肉春卷夢粉，老公就叫咗牛肉湯粉。佢哋啲湯啦、粉啦、同埋餸；係會分別係三個唔同嘅容器裏面裝着。所以呢就唔會送到黎嘅時候唔新鮮，同埋淋晒啦。所以送到黎嘅時候個春卷仲係脆卜卜嘅。仲要讚佢，比好多香料、香草同埋芽菜俾你自己放入個湯到，增加佢嘅質感同味道。感覺到好似喺餐廳食到一樣咁新鮮。至於撈夢粉方面，佢亦都會另上。有好多花生粒啦、青瓜啦、車厘茄啦、芽菜啦等等配菜，真係多到你唔信。放入口入邊層次感非常豐富。都叫咗一個通菜。香味十足。略嫌有少少辣，可能我唔食得辣。但係都絕對可以食得晒嘅。柚子沙律呢，就柚子粒粒非常清甜。而且份量一啲都唔小。都係要賺多一句，個包裝非常之靚。而且佢有紙皮幫助啲湯底隔熱，就唔會熱食同冷食撈埋一齊放。唔會因為運送過程，互相影響味道。絕對會回頭嘅一間餐廳！…Read More

最近中環開咗一間新嘅元氣。開頭嘅時候都冇乜人知，但係而家似乎已經陽咗。一放工時間又多人到乜咁啦。我非常鍾意佢用app可以點餸呢個服務。免除咗同服務員嘅衝突。另外平均價錢都係10幾廿蚊就有一碟壽司。你話想食到飽飽咁樣，放工唔使諗嘢嘅話。兩個人為返$100，真係抵到爛啦。另外希望大家唔好怪我偷懶，用外買app叫返嚟屋企食呢一樣都係水準keep得到。所以真係唔錯嘅元氣。呢個外賣拼盤呢，就係堂食冇個喎。好多燒灼嘅壽司味道非常之唔錯。所以你見我宴請親朋，費事煩。叫外賣都一定會帶埋元氣。…Read More