肥熊熊家族's Profile

見廣告打得甘勁，經開嚟試下。號稱無加味精嘅濃湯，食落就得味精味，豬骨味完全缺乏，點知好失望。叫左三碗唔同味，味精超重，第一磅清湯好咸，第二碗酸辣湯得個酸字，我個麻辣加麻，直頭似火鍋湯底，好咸又唔好味。餸都唔好食，份量又小，叫左札肉，又細片又薄，又無味。腩肉都係一樣，完全唔覺係食緊腩肉，剩係知係舊肉，雞翼有滷過，但放到凍左硬左，就算放番嚟個熱湯入面都救唔到拒，唯一個豬軟骨好d，有骨，有小小味，但係得兩小舊要11蚊。。絕對失望…Read More

放監呢兩個字好似唔係咁好聽，但係咁耐冇出嚟食飯真係有呢一個感覺，哈哈。而且呢餐甘正，食完之後真係好開心，好滿足。頭盤先嚟一個三小碟。有絹頭腐，醬茄子同煙燻雞肉。呢個煙燻雞肉真係十分之特別，喺出面完全冇食過，佢係用生嘅雞肉煙燻，聽落好似比較奇怪，但係食落去味道十分之好，好鮮味，口感好特別，而且師傅嘅刀工十分之好，係雞肉的面𠝹出一層層嘅絲，令雞肉更易入味，一定要試吓。之後就有吞拿魚沙律，味道酸酸甜甜，為將要食嘅主菜打開序幕。三色刺身有甜蝦，油甘魚同埋吞拿魚，甜蝦雖然唔係好大隻，但係佢嘅味道十分之鮮甜，有種留香嘅口感。到食主菜嘅時候，首先就係食呢一個阿拉斯加銀鱈魚，食日本菜銀鱈魚係我必叫嘅食品，呢度食嘅銀鱈魚同一般出邊用咗西京汁整嘅銀鱈魚唔同，佢只係用咗少少嘅胡椒，鹽，同埋自家製嘅汁嚟調味，所以除了提升味道外，鱈魚嘅味道可以完全咁保留住。之後就係帝王虎蝦，未食見到咁大隻虎蝦已經流晒口水 一路睇師傅整發現師傅嘅手藝非常之好，慢慢用工具將蝦分開，然後將蝦頭嘅蝦膏取出製作汁料，最後淋在大蝦上面，整到菜蝦味十足。到咗我最鍾意食嘅鵝肝出場 ，鵝肝嘅厚度非常之厚，並唔係出邊嘅紙甘薄，煎完之後都完全無縮水。兩邊煎到金黃色，入面軟熟，入口即溶，食時配上黑醋汁，仲可以減輕油膩嘅感覺，正呀，可唔可以食多舊呀。。。另外我最喜出望外嘅就係呢個A5和牛薄燒，平時出去食鐵板燒就淨係會就咁煎塊牛。呢到喺用牛牛包住香葱。未食嘅時候，我覺得葱嘅味道會完全蓋住牛嘅味道，但係食落去完全冇呢種感覺，牛嘅味道十分之濃郁，而且帶出少少香蔥嘅味道。香蔥亦都增加咗成個牛肉嘅口感層次，十分之奇妙。食完咁多嘢之後其實已經好飽，但係仲有個特色嘅櫻花蝦乾炒飯 ，食埋仲更加滿足。仲有一定唔可以小嘅甜品，今日係好甜蜜嘅雪糕。…Read More

我好掛住日本，有得睇就冇得食，其實都幾慘。諗返起之前喺日本夜晚好鍾意去居酒屋食串燒，飲啤酒，再傾吓計，其實真係好舒服。特別係一啲有戶外座位嘅居酒屋特別有風味。呢間居酒屋雖然係室內，但佢嘅裝修有日式嘅設計，坐落去都舒服，最緊要係佢有我想食嘅串燒，而且質量仲非常之好。今日我嗌左幾種唔同嘅，最鍾意嘅就係佢嘅免治雞肉，出邊好少地方有得食，而佢嘅味道非常之好，肉咬落去唔會好鞋，有雞肉嘅香味，仲配有雞蛋豉油醬汁，十分之美味，食一串完全唔夠。另外就係白鱔串燒，白鱔除咗蒸之外串燒都係十分之好食，特別係厚身嘅白鱔去外面皮燒咗出嚟脆卜卜，入面肉好鮮甜，正。除咗串燒之外，呢度仲會有唔同種類嘅刺身或者壽司，今日我揀咗個比較特別嘅羽太原條刺身，味道鮮甜之餘仲好爽口彈牙特別係配埋佢個酸汁一流。仲有佢嘅左口魚邊同銀雪魚火炙壽司都係超級好味全部即叫即整，壽司入口嘅時候仲有微溫，記住一上枱嘅時候要即刻食咗有紫菜包嘅先如果唔係紫菜淋左就冇咁好食㗎啦可能我今日冇飲酒，所以叫嘅食物都比較多，如果一路飲酒一路食嘢慢慢細味，真係正。…Read More

平時去親大喜屋食個感覺總係迫迫夾夾，但係觀塘呢一間大喜屋嘅空間感十足，完全唔會感到迫夾，仲有大量大玻璃望到出邊嘅環境，十分之舒適，而且自助取點嘅地方亦都十分之大，款式十分之多。佢最吸引我嘅自助取點，你諗都諗唔到係乜嘢。。。係糖果區呀，唔好話小朋友冇抗拒嘅能力，作為大人嘅我心思思都想食返幾粒，好開心哈哈。除咗糖果之外仲有好多唔同嘅炸物，有薯條有薯塊，有薯角同埋炸餃子，佢用個爐烘住，食嘅時間仲熱，係愛炸物人士的必選。另外仲會有啲凍海鮮，我啱啱去到嘅時候左啲蜆，之後就係蝦，一拎出黎嘅時候好多人去夾，所以呢想留意呢一個區域有咩新野。至於嘢飲區嘅選擇真係十分十分之多，除咗有凍飲之外，仲會有熱飲，難得一見嘅系列。當然唔少得嘅就係刺身系列，刺身嘅選擇都好多，有我最鍾意食嘅蝦同埋三文魚，第一轉叫三文魚嘅時候好肥美，係三文魚腩嘅位，所以非常之鮮甜。到第二轉食嘅時候雖然唔係腩位但係味道依然鮮甜，質素十分之高。最後就有好多唔同嘅熟食，全部都係熱辣辣，例如燒牛脷，燒鰻魚，燒雞翼等等。嘢食多到真係10個肚都食唔晒 我決定每一次嚟都揀一個主題去食，慢慢試哂甘多嘢食先，哈哈…Read More

時日特別限定的羊腩煲，呢一排我都好小出街食飯，好怕去到d好亂嘅地方。今日終於有得透下氣出嚟。呢一個羊腩煲係我今年食嘅第一個。我中意拒嘅味道夠正宗，濃度剛剛好，隱約中爆香嘅薑同蒜味會透出，而這兩個配料是不能忽視的，沒有了他做不出這個味道，更加沒了羊腩煲驅寒嘅功效。羊腩的軟硬度適中，不會像其他餐廳，硬到咬唔到。肉質又不會太韌，肥瘦適中。而且價錢實惠，份量剛好，還附送一盤時令蔬菜和一碗白飯。諗起又好想出去食，唔知幾時可以呢。…Read More

焗豬一向係男人嘅至愛，我朋友亦都避唔過，一嚟到呢一度見到有焗豬扒飯，隻眼好似識放閃光咁樣即刻要叫。睇個樣就巳經知道無得輸，軟軟嘅芝士 配上酸酸甜甜嘅秘醬汁，再撈埋炒底嘅飯，一流嘅味道。佢嘅豬扒份量有1.5件咁多。佢呢度嘅豬扒有別於出邊，比較薄身 ，但係佢嘅口感非常之好，唔會好韌，入口好淋。而我就揀咗我最鍾意食嘅牛柳餐，係尖沙咀來講食到呢一個價錢呢一個質素係十分之高質。仲可以揀唔同嘅熟程度，我揀咗五成熟 ，果然中間仲會有微微嘅紅色，唔似出邊啲餐廳無論你叫幾多成出到嚟都係全熟。呢個牛柳餐仲會包塊多士同埋餐湯，份量非常之大，完全冇馬虎。…Read More

位於尖沙咀唔算係最旺嘅位置，仲要落地牢先至搵到，如果唔係朋友介紹都好少機會嚟到呢度，但係食完之後下次我一定會再帶朋友過嚟，水準不錯。係呢度除咗識佢嘅裝修之外，就係食佢嘅懷舊食品，好似個炸魚皮甘，佢寫住有骨炸魚皮聽落好似好驚咁。但試吓先發現原來佢係我細細個開始就同為食嘅炸魚皮 ，好耐搵唔到呢個口味。佢比普通嘅炸魚皮更加豐富，好脆，好好味。跟住就係呢一個鴨血，通常台灣人打邊爐都會有鴨血出現，香港來講比較少而且好味道嘅鴨血，唔係度度都有 ，但呢度嘅十分之唔錯。仲有呢個豬天梯，可能唔係咁多人食，又可能唔係咁多人敢食，但係佢嘅味道十分之唔錯，好爽好脆。呢度除咗散叫之外仲會有啲組合嘅價錢，例如手切肥牛加海鮮拼盤先588元，抵過散叫。喜歡吃刺身的不妨試下活魚刺身，唔係度度都有。…Read More

鐵板燒我平時唔係特別鍾意食，因為覺得好似平平無奇 ，只不過係有一個師傅喺面前即煮俾你食。個味道同自己食韓燒味道差唔多，而且仲要等好耐，所以我好少主動去食 ，但係朋友今日帶咗我嚟呢度，令我有小小改觀。原因係師傅話食鐵板燒的其中一個精髓就係可以按不同人不同的味道煮。今天點了一個伊勢海老餐，有龍蝦，鱈魚和A5和牛。先上一個洋蔥汁銀鱈魚，雪白的銀鱈魚肉質又滑又甜，再加上師傅將魚皮拆出黎，煎到香脆可口好似食緊炸魚皮甘。因為我們是3個人，把2人餐加多了半份，比正常的龍蝦份量多了點，每人食多d。菜菜子有時令的露荀，爽口鮮甜。之後就係主角鹿兒島的A5和牛，肉和油脂的分佈十分完美，吃下一件，就立刻想再吃。想吃不同熟成度的，就跟廚師說一聲，隨時做到。和牛肉炒飯 ，其實食鐵板燒我最唔中意食呢樣，因為比較乾身，又無乜特別。但今日我向廚師要求加辣，拒拎左老闆娘嘅秘製辣椒粒，加在炒飯內，簡直係妙筆生輝。清酒雞湯，用暖笠笠的湯作為熱盤的結尾。甜品係不會吃到撐的生果杯，幫助一下消化。…Read More

我鍾意食沾面嘅原因係因為佢嘅湯會比較濃郁，而且佢嘅面通常都係比較厚身，同埋有彈性，啱晒我嘅口味。今日我揀選左龍蝦湯配和牛，呢度最大嘅特色就係選用和牛來做肉類 但係佢嘅價錢同普通拉麵店一樣，所以係十分之抵食。佢嘅和牛會有兩大片，煮到半生熟，看起來可能好生，但食起來剛好，又軟身，又有口感。至於拒嘅龍蝦湯，味道係十分之濃，唔會一味得個咸字 ，有淡淡的龍蝦香味，比起豬骨湯嘅湯底來得特別。另外配料除牛肉之外 ，仲會有其他配菜。特別係我最鍾意嘅筍，平時喺出面食要加一份先至會有呢度係包埋，正。…Read More

去尖沙咀度發現咗一間唔錯嘅放題，佢除咗刺身嘅質素好之外 ，佢另外嘅熟食都有返咁上下質素，而且熟悉嘅物品多數會喺現場即叫即整，可以望住個師傅一路整一路食。而且佢嘅食物都係出面放題比較少見嘅 尤其是係呢一個中拖羅 ，出去食起碼要三四十蚊1件，但係呢度係任食。另外就係鵝肝多士 ，通常呢一個食品會喺酒店嘅自助餐見得多。日本放題我都係第一次見到，佢嘅鵝肝質素都十分之唔錯 ，最有驚喜嘅係佢嗰塊多士 ，唔會係硬繃繃仲係好香脆。呢一個泰式嘅雞扒個味道我都好鍾意，佢係泰式酸酸辣辣嗰種味道，呢種汁撈埋係煎香嘅雞扒上面食額外惹味。最後佢嘅甜品係哈根大師，仲有士多啤梨味，雲呢拿味 ，朱古力味同埋香蕉味四種選擇。…Read More

凍冰冰嘅時候打邊爐咁梗係最好啦 ，但係有陣時後一個星期打足四五日火鍋嘅話，就會覺得好悶，因為食嚟食去都係果幾樣野。想搵一啲新意其實一啲都唔簡單，但係呢度比我一個好新鮮嘅感覺。未食之前見到佢個鍋底整出嚟非常之靚 ，佢係個湯底上面會放一浸打發咗嘅蛋白 ，然後上面總會有啲花喺度點綴 然後仲會特別做出一個火焰嘅效果，未食之前已經賞心悅目。再講一講佢嘅湯底 ，我今次叫咗呢一個湯底有五種唔同嘅口味，個人來講梗係鍾意返食麻辣啦 佢呢度嘅麻辣唔算非常之辣，但係入口剛好，又麻又香。然後就係佢啲食物嘅質素，好多火鍋店都會將啲食物用一個好靚嘅器皿去包裝令到非常之吸引 呢度除咗有做包裝之外，佢仲會係食物上面花心思。好似呢一個墨魚丸咁佢上面鋪滿左唔同顏色嘅金粉，就算唔好食都會非常之好睇。而呢一個墨魚丸食落去真係有手打嘅煙韌感覺，好睇又好食。而呢一個豬肉片就係用咗上等嘅黑毛豬，豬味濃，又唔會太油膩。還有呢一個即食鴨血都需要提一提 佢嘅煮法有幾正宗，又麻又香。同埋佢呢一個鴨血就真係鴨血來做 ，點解我咁講？因為食落去真係比較有口感 同出面用雞血做嘅係完全唔同。…Read More

今日本來想食日式嘅料理，嚟到呢一間餐廳發現原來除咗日式嘅料理之外拒上層係係酒吧，仲可以叫魚子醬食，但係今日我哋都揀咗幾個簡單嘅嘢菜，下次先再去飲酒。佢夜晚會有一至二人或者三至四人嘅套餐，本身我哋想叫個二人套餐，見佢有前菜又有主菜又會有餐湯同埋甜品 價錢仲要只係三百幾蚊，十分之吸引。但係今日又唔係好肚餓，所以我哋散叫左一個美國嘅安格斯牛扒，份量剛好，牛扒就比較薄，佢嘅配菜份量有好多，除咗有蘆筍之外仲會有翠玉瓜，茄子等等。另外呢一個原條嘅燒茄子係日式嘅風味，茄子上面會有啲堅魚碎碎，同埋日式嘅風味醬汁。仲有我鍾意食嘅黑松露薯條，其實就係炸薯條配上沙律醬，沙律醬入邊會有黑松露，味道十分之香濃，好味。…Read More

今日一大班人嚟慶祝過咗嘅聖誕節，雖然過咗，但係有聚頭嘅機會其實已經好好，應珍惜。一嚟到我哋就叫咗個花膠雞窩，估唔到個花膠雞窩真係非常之足料，入邊有好多片花膠，仲有蜆，半隻雞。佢煮出嚟嘅湯味道都好濃，唔會剩係得味精嘅味道，我哋好快就已經將啲湯飲晒。之後就轉左韓式燒烤，材料嘅選擇都幾多，可以燒活生生嘅鮑魚啦，鮮蝦。甚至韓牛，豬頸肉第都有提供。我就梗係叫咗我最鍾意食嘅漢堡扒啦，好多朋友都話有冇搞錯啊食漢堡扒，但係識食嘅一定係食漢堡扒啦，你明嘅。其實本身個鍋，可以打埋邊爐，但係佢嘅食物實在太豐富，打得邊爐，韓燒埋其實都無位再食其他。但係都建議食埋佢啲日本嘅小食，例如炸芝士年糕，炸香芋丸，鮮蝦天婦羅， 南瓜天婦羅等等，都係非食不可嘅食物。仲有嘅就係甜品，佢嘅甜品會有紅豆嘅雪條，日式雪米糍，同埋好多杯裝嘅雪糕記住食埋先走啊。…Read More

平時嚟都康怡廣場我都淨係會喺下邊食烏冬，但今次同埋屋企人一齊嚟就想去食個小菜。所以我哋就揀咗呢一間又有點心又有小菜食嘅金公館。先來叫咗一個好開胃嘅涼菜，今日我冇揀到啲好辣好酸嘅，反而揀咗呢一個話梅番石榴，食落去嘅特感覺非常之清新開胃，酸酸甜甜嘅番石榴上面仲加咗酸酸甜甜嘅話梅，簡直係幾個層次嘅享受， 比起有酸有辣嘅開胃小菜更加出色。之後就叫左呢一個必食嘅水煮魚片，呢度嘅水煮魚片用想做桂花魚，比起鯇魚更加滑溜，這種唔會有一陣泥味。除咗魚肉之外底層仲會有寬條粉，青瓜，芽菜等等。味道夠香夠麻，但不會太辣，十分不錯。仲有呢一個雲吞雞湯唔好睇佢個份量好似唔係好大，但係四個人飲係非常之足夠 而且入面足足有六隻雲吞同埋起碼有半隻雞肉非常足料。…Read More

啱啱去完汕頭汕尾返嚟無耐，又掛住潮州牛丸牛肉餅啊！朋友就介紹你食呢間話佢嘅牛肉丸牛肉餅超正喎！一鍋90幾蚊，款式就係牛肉餅同牛肉丸，呢個做法好地道嘅潮州風味，就係加啲生菜加啲炸蒜清湯底。落多少少潮州辣椒油更加正！俾個機會我回味一下潮汕風味，牛肉丸juicy 好正！連湯都飲埋！比好多話自己出名嘅牛丸有過之而無不及。仲有鰻魚餃，呢樣野我都係第一次食，情況有啲似魚皮餃，幾有口感，勝在難得同罕見。個皮其實同魚皮餃一樣，個餡就用咗鰻魚！都幾正！食串燒點少得食燒茄子原隻大大隻茄子配上子然粉辣椒粉呀！香蔥蒜頭等等，風味十足。我會鍾意係街頭食多過裝修靚一靚嘅餐廳，別有一番風味嗎！附近容易泊車。。。小心俾人炒牌！哈哈…Read More