whyslife's Profile

平日放假想食下點心，就搵咗呢間周記點心。點心種類未算好多，但都有啲特式點心。茶方面就同酒樓唔同，無茶葉揀，只係好似茶餐廳咁有杯茶。芝麻蝦多士 📌$45蝦多士比一般既大件，所以都幾飽肚。上枱時熱辣辣，又唔會太油，蝦膠都夠味，可以一試。XO醬炒蘿蔔糕📌$43蘿蔔糕份量唔算好多，XO醬幾惹味。可惜蘿蔔糕外層唔夠脆，所以無乜口感。鴛鴦燒賣(黑松露拼蟹子) 📌$32傳統豬肉燒賣既質素，每次飲茶必吃，無乜特別驚喜，但下次再嚟的話都會再叫。子薑皮蛋蝦卷 📌$38呢款點心比較特別，喺其他地方未食過。脆既外層包住子薑皮蛋同蝦。雖然我平日唔食子薑，但都覺得好易入口。鐘意子薑既，仲有額外一小碟子薑可以食。懷舊糯米包 📌$30 糯米包味道都Ok，可惜口感比較乾，如果再多啲料同無咁乾就好喇。因為係平日接近下午茶時候去，所以客人唔算好多，店員態度還算可以。但舖頭冷氣有啲大，如果想去試就最好帶件外套喇。…Read More

食過中環既天海，回味無窮，所以知道北角開咗分店，仲行平價路線就即刻嚟試。但係感覺、環境同食物都同中環間天海無得比。北角分店喺裝修咗既和富商場入面，比中環分店大。因為喺商場入面同行平價路線，所以都預咗係快餐既裝修同感覺。一開始午餐時段就到咗，但經理既態度認真麻麻，茶餐廳侍應既感覺。海鮮天丼配迷你烏冬📌$118丼飯配海鮮天婦羅仲有個燒汁，拌飯幾好味。天婦羅有蝦、帆立貝、魷魚、魚、蟹棒、秋葵。最好食係個炸蝦，跟餐仲可以揀配沙律或迷你烏冬。我地揀咗烏冬，份量都好夠，烏冬係幼烏冬，質地煙韌。壽喜燒&天婦羅幕之內便當📌$128便當有天婦羅、牛肉同燒三文魚。天婦羅質素正常，好彩都夠熱。肥牛好肥，仲肥過吉野家肥牛。三文魚燒到好乾，過熟，有啲浪費咗條三文魚既感覺。北角分店做緊promotion，Like 社交平台page送汔水，check in 仲有一隻炸蝦送，都幾抵。整體嚟講，可能因為食過中環天海，所以對北角分店都有少少失望。如果可以揀，寧願比多少少錢食中環既Lunch Set，成餐飯既感覺同食物都更好。…Read More

好耐無食燒鵝，又唔想去咁遠，所以就嚟到尖沙咀呢間裕鵝莊。裕鵝莊係由出名既深井燒鵝第三代傳人開既。我地係平日六點鐘左右去，所以到既時候都無乜人。深井燒鵝例牌 📌$160例牌有四份一隻鵝，燒鵝既肉都幾厚身，配埋塊燒鵝皮食好滿足。配埋既醬同平日食既酸梅醬有啲唔同，好似酸梅醬加咗啲是拉差辣醬咁，不過我都係鐘意食傳統酸梅醬多啲。鼓油皇灼鵝腸 📌$138鵝腸好夠味，好爽口唔會好韌，食落有驚喜。鵝莊小炒皇 📌$118小炒皇幾夠鑊氣，入面有幾款唔同既料。有魷魚、腰果、蝦乾之類，用嚟送飯都幾好。黃金蝦多士 📌$78蝦多士有六件，除咗蝦之外仲有咸蛋黃碎，好香口。不過塊麵包比較油，一人食一件就夠喇。除咗燒鵝之外，其他小菜都整得幾好食，可以一試。用埋Openrice訂位有八折就仲抵啦。…Read More

突然間好想食台灣野，所以就去咗三星，又係一間隔一排就會想食既餐廳。本身一心想食刀削麵，但竟然無咗，所以就轉叫咗台式雞扒魯肉飯。因為想食多啲小食，所以就叫咗一個飯兩份分。台式雞扒魯肉飯 📌$76炸雞扒熱辣辣新鮮炸起，加上半肥瘦既魯肉撈飯食真係好正。魯肉既份量唔孤寒，白飯佈滿咗魯肉汁，仲有流心蛋、菜同配菜，食到想加飯。炸甜不辣📌$58如果鐘意食煙韌既野，叫呢個炸甜不辣就啱晒。食落好有咬口，而且唔係好多台灣餐廳有賣，加上椒鹽令人忍唔住再食一舊。份量唔少，食到最尾個口都有啲攰 椒鹽四季豆 📌$46椒鹽四季豆食落唔會好油，可能因為豆本身較幼，所以比較重口味。如果你鐘意食蒜蓉，仲可以夾埋一齊食，正。整體嚟講，味道偏咸同重口味，不過我鐘意。希望下次嚟會食到刀削麵啦！…Read More

今次同朋友行維園，行到去天后，見就快到晚餐時間，就用openrice搵食。搵到呢間幾高分又好味既小店。天后站行過去10分鐘左右（天后同炮台山站之間）。餐廳只有十幾個位，如果想食就最好訂位喇。明太子蟹肉忌廉意粉 📌$118本來唔敢抱太大期望，因為唔係好多餐廳既明太子意粉整得好食，但見餐牌有推薦既icon就試下。今次既明太子意粉醬整得好creamy，而且好多醬(唔洗慳住食），意粉又夠咬口（唔會太腍），反而蟹肉唔係太多（但可以接受）。意粉上面仲有啲蟹籽同洋葱碎，平衡返creamy既口感。如果鐘意食忌廉明太子意粉既朋友一定要試呀！叄嘗卷 📌$128卷物入面有辣吞拿魚（我自己覺得唔辣）、牛油果同炸蝦，口感好豐富，而且炸蝦仲係脆既。連平日唔食生冷野既朋友都食到，正呀。我食到最尾仲點埋個意粉既明太子醬食全程店員都好有禮貌，又會睇下你有咩需要。因為之後有人訂咗枱，所以今次好快食完就走喇，下次一定會再去食。…Read More

work from home 咗一段時間，終於要返工，就搵咗附近既朋友食晏。今次試上環站附近既叻東叻沙。上環站A2出口行過嚟好近，五分鐘咗右就到。Lunch時段都幾多人，四人枱要搭枱，但中間有塊都幾厚既玻璃隔開。其實餐牌都唔算特別多選擇，今次就試下個香茅豬扒叻沙$73。香茅豬扒係分開用碟上既，都算熱辣辣，但肉質唔係特別腍。湯底方面都重椰漿味，有層辣油喺面，但碗麵唔辣，味道幾濃，算唔錯，但啲瀨粉有啲碎。朋友叫正宗叻沙$82，湯底其實係一樣，但啲餸好似有啲少。如果大家經過，都可以試下。但餐廳只收現金，要留意一下。…Read More

鐘意食牛扒既一定要試下La Vache! 本身喺中環既La Vache近年喺尖沙咀開咗分店，掛住佢既牛扒薯條，經開呢頭就過嚟食午餐啦。唔計甜品，食客要揀牛扒既生熟程度，每位$318再加一。尖沙咀分店有柔和既燈光，加上牆上既壁畫，感覺幾舒服。午餐有法包、合桃沙律(法式芥末油醋汁)、10安士USDA Prime 肉眼扒、熱辣辣任食薯條同泡芙。每人有兩片法包，配上牛油。合桃沙律加上法式芥末油醋汁，酸酸地好開胃。食牛扒同薯條前食啲菜無咁内疚牛扒揀咗Medium Rare，唔太多筋又有牛味，幾好。另一樣我既favorite就係薯條，熱辣辣加上調味粉，每次都忍唔住食多碟！午餐仲送咗個泡芙做甜品，食得好滿足！…Read More

行開Aeon唔知食咩好，就去咗康怡廣場搵食。好耐無食拉麵既關係就試下呢間樂拉麵。中午有set lunch，包沙律或者汽水。一坐低就比龍蝦湯既香味吸引住，所以就毫不猶豫揀咗 櫻花蝦龍蝦湯拉麵 HK$89 。同其他拉麵店一樣，係有得揀麵既軟硬度，我就揀咗適中。而叉燒就揀左豚腩。拉麵一到，就見到有滿滿既櫻花蝦！食麵前飲啖湯，個湯有啲油，但充滿龍蝦味，配埋軟硬適中既拉麵，令人一啖接一啖咁食。個豚腩反而無咩特別，中規中矩。除咗麵同湯底之外，好欣賞佢個半熟蛋同炸蓮藕片，令成碗麵生息不少。如果可以單點炸蓮藕片做小食就好喇 …Read More

太安樓有好多唔同既小食，係港島東區版既葵廣。其中一間必食既就係齊柏林熱狗喇！熱狗選擇唔算好多但都揀左一陣先決定到食咩。熱狗同小食即叫即製，但等一陣就有得拎喇！期間都好多人叫外賣。火炙芝士辣肉醬熱狗 $42熱狗熱辣辣，好足料！上面有好多熱熔芝士，夾住脆皮既荷蘭腸，食落好滿足之餘仲有啖啖芥末味，推薦！除左熱狗之外，仲叫左個飛船小食杯 $26小食杯入面有洋蔥圈、雞塊同薯格，配埋茄汁同BBQ醬，正！下次再去要試埋美國洋蔥圈熱狗 …Read More

今次係第一次去The Tai Pan 。餐廳位於美利酒店既酒店花園樓層，設計風格時尚，距離香港公園只係五至十分鐘路程。一入酒店範圍，就有職員幫你量度體溫。進入餐廳前，會再量度一次同埋比搓手液你清潔雙手。所有職員都戴咗口罩，令食客食得安心。今次食Lunch Set Menu， 3-course 每人HK$550。一坐低就有一籃餐前麵包，叫左以下既食物:1. Signature Maine Lobster Caesar Salad +$80 有啖啖龍蝦肉，沙律菜仲有啲龍蝦汁既味，鐘意食龍蝦既一定要試下！2. Wild Mushroom Soup 職員會喺你面前倒湯，係好濃既蘑菇湯，夾雜住啲黑松露同芝士味，偏杰身質地3. Tartine of Beef Skirt Steak 側腹橫肌牛扒唔會過熟，配上牛油果麵包，味道非常夾。只係配埋麵包喺底下有啲難切開嚟食。因為今次係慶祝親友結婚，酒店仲即場免費送左枝香檳比我地，值得一讚！…Read More

台北就好似香港人既後花園，耐唔耐就會想去。暫時無得去旅行，知道銅鑼灣開左間師大夜市既滷味店，緊係要嚟試下！因為食咗晚飯，加上要排隊，所以今次外賣返屋企當宵夜。即叫即製關係，都要預返啲時間等。試業期間，選擇都唔算少。今次嗌左豬大腸、百頁豆腐同彈牙貢丸(想食既甜不辣賣晒，唯有下次再試啦)。滷水味好香，餐廳外同拎住外賣時都聞得到。食落味道都好似台灣食到既，只係份量略少，如果係男仔或者當晚餐食就最好加個王子麵喇！…Read More