wordstock's Profile

喺荃灣廣場行完街去咗附近揾地方食飯，經過呢間位於享和街嘅《牛県》見佢仲有幾分鐘先開舖就已經有食客喺門口外面等，咁受歡迎當然要試。開咗舖幾分鐘，已經幾乎坐滿食客。餐牌上提供6款唔同嘅牛肉，客人仲可以揀牛扒嘅重量。上枱時，放喺高溫岩石上嘅牛扒約一成熟，牛扒表面己先煎封鎖住肉汁，客人可以按自喜好控制牛扒嘅生熟程度。另外，上枱時餐廳用張白紙將牛扒蓋住，咁就唔怕食客畀D油彈到 la👍上腰西冷 ($168/300g) - 西冷表面煎得好，牛味濃得嚟帶有油脂嘅香味，肉質有彈性唔嚡口，相當好食。牛橫隔膜腹肉 ($128/200g) - 牛肉味濃郁鮮甜，肉質軟腍柔軟，十分優質美味。牛扒有兩款不同的醬汁選擇：紅酒牛肉汁或阿根廷青醬，不過其實牛扒本身都好夠味，唔沾醬汁都己經好好食。點牛扒餐仲可以加$30，另外加點“五選三套餐”：飯、薯條、湯、沙律或汽水，沙律：紅洋蔥、青瓜、番茄仔、沙律菜……等等，配上酸酸地嘅沙律汁，清新開胃。飯：夠飯香又帶點黏口，上面灑有帶點脆脆地嘅飯素，相當香口。呢度嘅牛扒相當美味，而且價錢夠曬實惠，難怪咁受食客歡迎。…Read More

嗰日去咗土瓜灣探個朋友，朋友話有間拉麵店好似幾正，叫埋我哋一齊去食下，所以嗰一晚，我哋就去咗土瓜灣呢間金鶴拉麵食夜晚。行到附近，其實好易認得出呢個拉麵店，因為佢同周邊嘅環境好唔同，門口仲有個大大個金鶴，好grand好易認。🥳🥳一入到去，以為淨係得一行Bar枱，點知行上半層，裡面原來仲有一個area係有四人同二人枱，燈光有啲暗，個氣氛好好，而且啲位好闊落，好好坐。我哋叫咗一個雞白湯沾麵、辛味拉麵同埋黑醬油拉麵同埋一碟唐揚炸雞。😎😎個雞白湯好有雞味，飲得出係用咗好多雞去煲出嚟，放咗啲麵落去個湯度，再一啖食咗佢，每條麵都掛咗好多湯，好濃郁好正。😍😍至於個辛味拉麵，本身驚會好辣，點知唔係，個辣味好適中，好惹味，而且辛味拉麵個配料係蘆筍同菇，同個辛味拉麵好夾。😆😆而個黑醬油拉麵係朋友叫嘅，佢話個湯底好濃郁好好食，每個拉麵都會有叉燒同埋雞肉，喺出面拉麵店好少見到有雞肉，但出奇地夾拉麵。推薦😋😋！最後，其實我哋每人食一個拉麵已經好飽，但一開始叫咗個唐揚炸雞，個炸雞即叫即炸，出到嚟仲熱辣辣，配埋啲柚子鹽，即係感覺清新咗，外脆內多汁！👍👍值得一提，佢哋呢度嘅態度好好，一坐低會問我哋想要熱茶定凍水，無限供應🙈🙈！呢度無論環境、服務同食物質素份量都好好，超級推介！👍👍…Read More

今日午飯，與同事行到北帝街揾食，見到呢間《一口京味》門外嘅餐牌，有好多唔同嘅午餐選擇，於是便入去試試。雖然係街坊小館，面積不大，但座位一啲都唔擠逼。我揀咗魚香茄子菜飯套餐($47)，配油菜和凍豆漿。油菜先上，是很清淡的灼生菜上淋一點點豉油。等了好一陣子，魚香茄子菜飯才上枱，賣相不俗，份量十足。泡過油的茄子極具口感，香濃微辣的豆瓣醬令到整個菜式非常惹味香口，與菜飯配食，十分適合。不過菜飯比較乾食，硬了一點。飯後再來杯清甜的凍豆漿，感覺還不錯。…Read More

呢日因為工作需要嚟到太子花園街，收工後就同事附近搵地方食飯，呢間《有囍》口貼滿同明星嘅合照，應該唔錯，決定試下。餐廳格局方正，面積唔細，上邊擺有各種裝飾，整體佈置得幾舒服。星加坡麥皮蝦 ($198) - 蝦肉爽甜，蝦殼炸得好香口，配上由馬來西亞進口，炒得香脆鬆化嘅麥皮，既有特色又好食。有囍沙薑雞 ($168/半隻) - 雞肉嫩滑，有雞味，而且食落夠沙薑味，相當唔錯。薑蔥美國桶蠔 ($198) - 十分夠鑊氣，桶蠔口感creamy，味道鮮美。醬汁嘅味道校得好好，連薑蔥都好好味。椒絲腐乳炒通菜 ($66) - 大大碟，通菜時令，加入椒絲腐乳炒已經好好食。白飯 ($12/碗) - 有米香，軟硬度適中。呢度食物味道有水準，坐得舒服，用餐嘅感覺唔錯，相信我哋會再嚟幫襯。…Read More

從朋友處得知元朗新開了一間日式鐵板燒Omakase，今日終於抽到時間一試。甫坐下侍應先送上田園沙律，沙律內加有爽脆蓮莖，食落份外清新爽脆。前菜係黑松露三文魚籽蒸蛋，大廚以清酒杯盛載蛋漿，再在鐵板上灒水將雞蛋蒸熟，雞蛋十分嫩滑，加上大大粒的三文魚籽及芳香黑松露，份外滋味。北寄貝紫菜湯，北寄貝十分爽甜鮮美，加上紫菜味濃郁的紫菜湯，味道鮮甜到極。北海道帶子，大廚將大大隻的帶子略為煎香，半隻以竹炭鹽調味；另外半隻加有柚子胡椒醬；帶子新鮮爽甜，柚子胡椒醬令帶子更為鮮美。粒貝烏魚子，略炒的粒貝味道鮮甜，口感爽脆，灑上爆香的烏魚子，這種帶少少鹹香的食法，更能吊起粒貝的鮮甜味。甘鯛配海膽松露忌廉醬，大廚先用LC煲將甘鯛魚表面的魚鱗炸至鬆化香脆，配上海膽松露忌廉醬，食落魚肉嫩滑；魚鱗香脆鬆化；醬汁香濃幼滑，味道濃郁，口感有層次。香煎鰻魚，鰻魚皮煎得十分香脆，仍保持到魚肉的肉汁，魚肉肥美、爽口彈牙。配上甜度恰到好處的自家製鰻魚汁，看似簡單的幾片鰻魚，盡顯大廚功力。孟加拉虎蝦，比筷子還要長的孟加拉虎蝦相當大隻，而且有好多蝦膏。大廚三兩下手勢，便將虎蝦去殼煎香，蝦肉鮮甜爽脆香口；蝦膏甘香煙韌，令人再三回味。瀨戶蠔配明太子醬，瀨戶蠔蠔味濃郁，配上帶有酒味脆卜卜的明太子醬，味道濃郁口感豐富。焦糖多士，十分香脆，甜中帶點焦糖香味。澳洲羊架，色澤鮮紅優質新鮮，羊味濃郁鮮甜但不會過羶。大廚將羊架表面煎得略帶香脆，咬落肉質爽嫩，香味在口中爆發。櫻花蝦乾炒飯，大廚將飯炒得乾身粒粒分明，加上香口櫻花蝦、雞蛋、香葱粒等，食落相當香口。鯛魚豆腐湯，以魚肉魚骨熬煮的魚湯，味道鮮甜，相當有質感。炒椰菜，炒得清甜爽脆。甜品是哈密瓜味及焦糖咖啡味的大福，甜度適中，口感煙韌。這餐不論食材、味道、烹調技巧及服務都相當優質，食得相當滿意！…Read More

巴打生日飯，挑了西九戲曲中心的滿樂中菜。食肆面積頗大，裝修採用中國式庭園風格，清雅别緻，座位闊落舒適。每次生日飯局，我們這班大食軍團事必開盡turbo，大吃特吃，今晚都唔例外。椒鹽九肚魚$98，每塊都炸得金黄色，外脆內軟，水準之作。鴛鴦胡椒焗蝦$168，甫上枱香氣已撲鼻而來，鮮嫩的海蝦配上香辣的胡椒，變得異常美味，讚！蒜香梅汁蒸白鱔片$228，師傅掌控蒸煮的時間恰到好處，鱔片肉質非常嫩滑，而酸梅汁亦發揮提鮮的作用，大大豐富了味道的層次。杏汁燉白肺湯$268/四位用，杏汁清而不膩，入口滋潤順喉，讓人忍不住想再來多一碗。肉餅蒸蟹圈$498，賣相夠晒睇頭，大廚精心挑選頂角羔蟹炮製而成，蟹肉鮮美可口，最精彩是下面的肉餅，完全汲取了羔蟹的精華，滋味至極。薑蔥爆海參花膠煲$498，煲內有大大塊的海參同花膠，份量十足，加入薑蔥爆炒，夠鑊氣，夠火候。普寧蘿蔔灌漿$88/4件，這是我首次品嘗的菜式，卻是一試難忘。外層金黄酥脆，內裡的蘿蔔綿軟細膩，加一点点酸酸甜甜的普寧醬食用，别具風味。玫瑰豉油鷄$298/一隻，看似平凡，但味道絶不平凡。赢在豉油汁的味道調校得非常出色，鮮美可口，而鷄肉亦非常嫩滑，箇中好滋味，非筆墨可形容，唯有親身品嘗。無論食物、環境及服務，今晚的飯局都令人相當滿意。…Read More

今晚到觀塘The Wave六樓的《Deer Kitchen》吃飯。餐廳格局簡約雅致，燈光偏暗，特意營造一股浪漫氣氛。先來片小巧軟熟的餐包配意大利黑醋。正在做 promotion嘅日本生蠔 ($10/隻)，十分新鮮，口感爽滑，蠔味鮮甜，淡淡海水味中帶一点金屬味，讚！白酒煮藍青口及馬拉蜆 ($138)，馬拉蜆帶有海水味，肉身有彈性，藍青口肉質則較軟滑，各有特色。鮮海膽蟹肉明太子扁意粉 ($178)，賣相精緻，份量不少。海膽鮮甜配上明太子鹹香，令味道更豐盈。北海道帶子墨汁意大利飯 ($158)，刺身級帶子外層微煎，咬開後內裡爽軟，異常美味；而薄薄的芝士更讓墨汁意大利飯倍添滋味。大大杯的芒果香橙沙冰 ($45)，以鮮橙及芒果炮製，口味清新。薄荷意大利朱古力 ($42)，拉花圖案是一隻鹿，非常别緻。薄荷味為香濃甜美朱古力加入一絲清新。今晚食物質素不俗，環境舒適，是一頓令人愜意的晚餐。…Read More

假期唔想煮，揀咗屋企附近嘅《Wanna eat》食晏。餐廳面積頗細，不過乾淨企理。午膳套餐都有中、西、日、台等不同的套餐選擇。我揀咗台式三杯雞飯($68)，另加$19要個芒果沙冰特飲。Lunch set有餐湯或沙律送，我揀沙律，清清地醒吓胃。等咗冇耐，台式三杯雞上枱，賣相不俗，份量都算足。咬一口，雞肉相當嫩滑，而且惹味可口，好好送飯。食得出師傅手藝有番咁上下，夠火候，冇欺場。芒果沙冰都幾大杯，酸酸甜甜，口感清新。想不到街角小店的食物質素都有相當水準，絕冇將貨就價，咁有誠意嘅食肆，我一定會再來支持。…Read More

這晚一行二人來到這間位於尖沙咀The ONE 的《丼吉日式吉列豬排專門店》食晚飯。餐廳大部份都是沙發座位，而且均以屏風相隔，私隱度高。先點幾款前菜試一下。八爪魚芥辣毛茄 ($58) - 八爪魚及毛茄均十分爽口，加了芥辣分外滋味。日式冷菠菜 ($58) - 新鮮爽嫩的菠菜配以香甜鰹魚味濃的醬汁，清新之選。薯仔沙律 ($52) - 以薯仔蓉及紅蘿蔔絲等材料加入法律醬拌成，薯仔味濃，口感幼滑。主食方面，我們點了吉列越乃黃金豚定食 ($298) 配 單點吉列蠔 ($58) 及 吉列車海老定食 ($328)，每個定食均均有醃菜、赤味噌湯、日本宮城米飯及椰菜絲。吉列越乃黃金豚 - 外層炸醬非常鬆化，黃金豚肉豚味濃郁鮮甜，肥瘦分明，爽嫩多汁，令人印象難忘。吉列越乃黃金豚定食上枱前，侍應先送上炒香的日本芝蔴，將芝麻磨碎後，加入枱上的鮮中帶酸的豬扒汁，令豚肉更加鮮美。吉列蠔 - 外層炸漿酥脆，入面蠔味十分濃郁口感creamy，一口咬下，蠔味在口中爆發。吉列車海老 - 十分大隻，比餐刀還要長。炸漿酥化，蝦殼炸得十分香口，蝦肉爽口彈牙，蝦味濃郁，而且有好多蝦膏，蝦控必試！日本宮城珍珠米飯 - 有米香，口感軟糯，食完還可以refill 。🍚🍚🍚赤味噌湯 - 入面有蜆及海帶等，足料好飲。椰菜絲 - 配上枱上的柚子汁或紫菜汁，爽甜好食，亦是可以refill的。最後再來個甜品，金箔丹波黑豆醬油雪糕 ($58) - 以味道醇厚、鹹味溫和的鶴醬醬油加入香甜軟滑的雲呢拿雪糕，出奇地食到焦糖香味，既有特色亦相當好食。這餐每樣食物都很美味，相信我和朋友很快會再來吃飯。…Read More

同同事喺九龍城做完嘢揾地方食飯，見呢間《BTS美食站》嘅裝修幾吸引，就入去試下。餐廳裝修以曼谷鐵路為主題，甚具特色。座位都坐得好舒服。極上安格斯牛小排俺沙律 ($118) - 剛好五成熟嘅牛小排片表面煎得香口，肉質軟腍，牛味濃郁，配上爽甜沙律菜，惹味紅洋蔥及酸咪咪嘅沙律汁，清新好食。BTS海南雞 ($92/半隻，$172/一隻) - 份量足，雞肉嫩滑，蘸上酸酸地嘅醬汁，更鮮美。泰汁叉燒乾麵 ($58) - 嚟自泰國嘅全蛋麵口感爽彈，無鹼水味。加上自家製泰式叉燒、泰國臘腸及自家製叉燒汁，飽肚美味之選。鮮芒果椰汁沙冰 ($36) - 香甜呂宋芒加上椰汁，香甜滋味。鮮椰皇沙冰 ($32) - 有椰皇、椰子及椰奶味，豐富好飲。…Read More

呢日一行幾人嚟到這間位於大埔直街嘅《OPPA韓國燒肉店》食韓燒。餐廳牆壁畫滿七彩繽紛嘅彩繪，感覺熱絡。我哋揀左個每人$238嘅弘大燒肉放題餐。餐廳先送上頭盤配送，有A4黑毛和牛肩肉、A4黑毛和牛三角腩、澳洲和牛脷、澳洲和牛下腩、封門柳、鹿兒島牛柳粒、加拿大牛排骨、無骨牛肋肉同美國牛小排，真係十分豐富。肉質新鮮，唔同部位有唔同味道同口感，牛魔王必試！餐廳再送上五花腩肉 - 肥瘦交替，既食到肉鮮味，又食到油香味，每次食韓燒必點之一。食完以上配送覺得唔夠喉，點餐紙上面嘅頭盤、肉類、海鮮、韓式料理同野菜各大類有方格嘅都可以追點。雞腎燒完好爽口；豬大腸腸味香濃；當然唔少得新鮮嘅蔬菜同菇類。魷魚十分新鮮，燒完味香爽脆，職員話係每朝街市新鮮攞貨，絕對唔係一般冰鮮貨色。亦有好多款熱食選擇，人蔘雞湯，味道甘甜。真露蜆湯，材料豐富，除咗大蜆仲有豬大腸、白蘿蔔，魚腐等，鮮甜得嚟略帶胡椒味。每人加$30，就可以任飲呢兩個雪櫃嘅飲品。最後每人食返杯優質雪糕。呢餐任飲任食兩小時，每人都係二百幾蚊，成班朋友都覺得認真唔錯。…Read More

九龍城一向多泰國餐廳，競爭咁大，要做得住一定要有返咁上下，同事話之前食過有間《小曼谷海鮮燒烤屋》相當唔錯，呢日咁啱做嘢要到呢頭，就嚟試下。泰脆炸豬手 ($208) - 十分大隻，熱辣辣上枱，上枱時豬手已經切好一件件，食起嚟好方便。外皮炸得香脆鬆化，肉質仍然保持到嫩度，伴以爽脆蔬菜絲、微酸木瓜絲及泰式酸甜醬，好食又唔油膩。小曼谷五星燒雞 ($248) - 以黄薑粉、香茅及多種香料醃成嘅燒鷄，既入味又帶有香料嘅香味。外表燒得香脆，肉質嫩滑，配上滋味泰式燒烤醬，水準之作。泰式燒盲鰽 ($168) - 上枱時已將魚皮剪開方便食用，魚肉鮮甜嫩滑juicy，魚肚塞有香料令魚肉多添一份香味。伴上酸酸辣辣嘅泰式生蝦醬，出色！榴槤沙冰 ($45) - 榴槤味濃郁，口感幼滑，榴槤控必試。芒果椰汁沙冰 ($36) - 芒果味香濃，椰汁香甜，好飲。呢餐食物味道咁好，相信我哋好快會再嚟幫襯！…Read More

約咗幾個朋友食飯，大家都嗜辣，就揀咗呢間位于尖沙咀加連威老道嘅《滿江紅》。餐廳裝修滲入好多中國原素，感覺古色古香。甫坐下侍應先送上兩碟前菜。食辣前先點兩個小菜打打底。蒜泥白肉 ($58) - 薄切嘅白肉鮮味爽口，配上蒜泥醬汁，甚是滋味。香油土豆絲 ($38) -士豆絲非常爽脆，配上香油亦係一道唔錯嘅小菜。水煮桂花魚 ($298) - 桂花魚塊無骨，滑嫩非常，水煮汁加有好多乾椒、花椒等香料，十分香、麻、辣，加上爽滑豬紅；爽脆竹笋及大豆芽等配料，越食越過癮。麻辣雞煲 ($288) - 跟有gas爐上枱，上枱後滾起就可以開動，鷄件份量多，鷄肉嫩滑。湯底麻辣中更帶有好香嘅香料味，味道更有層次。正宗四川擔擔麵 ($32) - 擔擔麵口感夠滑、湯底嘅麻醬香味同麻辣味各自明顯得嚟又好融和，雖然唔係好大碗，但絕對精彩。最後點個甜品解解辣，棗蓉糕 ($32) - 濃郁嘅紅棗味中帶有椰香味，甜度適中，口感軟熟。呢餐好食又正宗，相信我哋好快會再嚟幫襯！…Read More

呢排做嘢做得辛苦，決定約個friend 去食餐好嘅善待下自己。我哋揀咗呢間位於佐敦偉晴街嘅S2 食鐵板餐。一入餐廳已經見到多處掛色七彩繽紛嘅旗幟，又靚又充滿日本風味。🇯🇵先同朋友試下呢度出名嘅十層海膽杯($398) - 材料非常豐富，包括：燒白飯魚脆片、黑魚子、北海道紫海膽、海葡萄、拖羅蓉、三文魚子、白蝦、松葉蟹肉及天海帶碎。一個杯可以食匀多種食材，款款新鮮優質，鮮甜味美，十分豐富！套餐都有幾多選擇，我揀咗呢個A5和牛北海道原隻粒貝套餐🐚🐮❤❤❤先上一個煙熏鴨胸沙律盛盒杯，滋味嫩滑鴨胸片配上鮮甜爽脆嘅蔬菜，既健康又好食。三點刺身，牡丹蝦、三文魚，北寄貝，三款都相當新鮮爽甜，優質。跟住係我期待已久嘅A5和牛薄燒，呢日採用嘅熊本A5和牛，肉質嫩滑，牛味香濃，配上入面包住嘅青蔥炸蒜 ，既香口味道又豐富。再嚟係北海道原隻粒貝， 貝粒味道十分鮮甜，口感爽脆。加上青瓜粒及蟹籽，忍唔住一啖接一啖。法式煎鵝肝，鵝肝嫩滑，油香味濃，加上酸酸甜甜嘅醬汁、香甜哈蜜瓜及口感鬆化嘅法包，好味唔油膩。S2特色黃金炒飯，揀咗黑松露做配料，飯身粒粒分明，口感微帶點煙韌又充滿黑松露、鷄蛋嘅香味，水準之作。S2鐵板紙包蜆湯，湯中充滿大蜆及香菇嘅鮮味，相當好飲。燒野菜，食完肉類，最好食蔬菜中和一下。甜品，最後食返個雪糕泡芙，呢餐真係十分滿足！…Read More

每個月都要食餐好嘅嚟獎勵一下自己，今次揀咗大埔嘅稻八日式火煱炸物放題，呢度有各款價錢嘅放題選擇。餐廳面積頗大，裝修採用日本傳統風格，座位都算闊落，可以坐得舒舒服服慢慢歎。我揀咗 $318 嘅M9和牛套餐。等咗一陣，大堆頭嘅盛盒上場，當中有特選M9和牛牛小排、M6和牛盛盒、安格斯牛小排、北海道鷄片、美國自然豚肉片、羊肉、海鮮、刺身、炸物...数都数唔晒，睇到已經令人食指大動。先嚟M9和牛，雪花紋分佈均匀，入口嫩滑，讚！讚！讚！M6和牛盛盒內備有不同的牛肉部位，有肉味濃郁嘅牛肌胛肉，有滑膩嘅下腹腩，有嚼勁嘅牛舌...完完全全滿足我呢個牛魔王嘅要求。海鮮盛盒有蝦、蠔、蚌、螺、青口、墨魚等等，款式多多。刺身都有不少選擇，鮮嫩嘅甜蝦同嫩滑嘅帶子，真係令人難以抗拒！場內仲有設有自助炸物區，大家可因應自己嘅需要，挑選食材，炮製美味嘅炸物。食肆另一面就係火煱食物的自助區，有蔬菜、鮮菇、丸類豆腐、烏冬等，林林總總，式式兼備。仲有各式飲料同甜品畀你選擇。今晚真係開行turbo，踩盡呢120分鐘，滿足！滿足！…Read More