yumsik的個人專頁

好少入西貢食海鮮，今次有朋友帶路提議去食晚飯，我就當然舉手贊成啦！每一道菜都新鮮美味，果然近海得食啊。原來仲係米芝蓮一星食府，真係有驚喜到我啊！西貢地道魚湯好濃郁魚香嘅滾湯，原來用咁十幾種魚去煲，鮮甜魚味再加上酸甜番茄堆疊，好有家的感覺。椒鹽奇脆豆腐朋友大推依個招牌菜，比起平時正正方方個款更讓我滿足，長長嘅鮮嫩豆腐磚口感好滑溜。椒鹽味道剛好不會蓋過豆香，皮薄之餘內裡仲保持到好平滑。椒鹽焗大連鮮鮑魚鮑魚新鮮嘅程度係用咗椒鹽嘅處理都依然鮮味彈牙，個頭唔細嘅大連鮑魚，外衣好薄脆，鮑魚邊仲好腍嫩，中間就彈牙口感，讓人回味。鹽蒸野生海魚一行十人當然要點條魚食下，魚肉好厚啖啖肉，蘸埋醬汁伴住蔥食係一流啊！蒜蓉粉絲蒸貴妃蚌蚌肉好鮮味，夾埋蒜蓉食更加分。薑蔥炒蟶子皇配煎米粉蟶子皇好大隻，上枱滋滋作響超誘人！薑蔥炒過香氣十足，好味到朋友連料頭都唔放過啊！椒鹽鮮魷去菜館必點嘅送酒菜，炸得香脆內裡魷魚好彈牙，頗有水準呢！蒜蓉粉絲蒸茄子一開始以為上錯菜，見到全碟白雪雪一片，原來係去咗皮嘅茄子蒸粉絲，配搭埋蒜蓉加上蔥花芫茜點綴都係全片白色畫面，望落去清淡但食落卻重蒜味同埋幾有油香。豉油王炒麵朋友話之前食過好推介嘅豉油王炒麵，炒得好乾身嘅麵底，調味都剛剛好。藥膳辣酒煮花螺嗜辣嘅朋友點咗依道，麻香十足送酒一流啊！天婦羅桶蠔伴生菜酥脆外殼包住飽滿嘅桶蠔，用生菜包住食清爽咗，整體唔會膩。…查看更多

美食精緻有驚喜 仲有得出露台欣賞賽馬賽馬間場仲有DJ打碟好有氣氛現場仲有互動式AI揀馬站可以對比唔同馬匹仲有Racing Specialist提供賽馬101教學脆炸三黃雞配四川楓糖漿及烤蒜泥蛋黃醬肉嫩嘅炸雞裹咗啲四川楓糖漿 咸甜咸甜嘅味道外皮金黃薄脆 仲可以蘸啲烤蒜泥蛋黃醬 好愛喔清酒南非鮑魚配昆布及大豆鮑魚鮮嫩彈牙 邊嚼邊散出淡淡酒香調味都恰到好處呢本地豬里脊肉配蘋果醬 ﹑ 冧酒提子及燒茄子最驚喜嘅一道菜 豬肉質地軟腍唔柴 仲帶煙燻味面頭有粒粒蘋果肉嘅香甜醬汁 味道好夾燒過嘅茄子好似薯蓉嘅texture 好香滑美國特級牛柳片配牛骨髓汁﹑烤舞茸﹑煙燻橄欖油及火箭菜依道都係餐廳嘅推介 5成熟嘅牛柳片好粉嫩搭配牛骨髓汁味道香濃 伴埋烤舞茸一齊食都唔錯Vantage on Ice 冰鎮甜品拼盤視覺與味覺的雙重享受 內容物超級豐富有時令日本蜜瓜・野莓・脆皮雪糕・熱帶水果冰棒心太軟・士多啤梨奶凍・香橙馬天尼有得飲又有得食嘅配搭 特別鍾意士多啤梨奶凍奶凍睇到好多雲呢嗱籽 質地奶滑又濃郁食完晚餐不可錯過要點一set同朋友分享呢Signature cocktails 美麗傳承 & 金鑽貴人雞尾酒以名駒命名及設計概念 揀咗兩款試試 美麗傳承以 Whiskey為基底 加入草莓及蘋果汁桂花糖漿點綴 味道幾柔和 酒味好平衡～而金鑽貴人則以Rum為基礎 口味偏熱帶風情混合咗椰奶、芒果、草莓茶等味道…查看更多

最近去咗Auntie MALAY 安娣瑪萊覓食，一踏入餐廳，就感受到一種輕鬆愉快嘅氛圍。餐廳設計充滿馬來風情，營造出溫暖而親切嘅感覺，令人感到十分舒適。佢哋嘅菜式幾吸引我，同朋友點返幾道菜試下先。椰糖燒雞翼雞翼燒得好香，椰糖帶嚟香甜味，咬落仲有肉汁，整體味道唔錯。馬來沙嗲雞肉串醬汁微微辣，香料同甜味出啲，雞肉好入味唔柴。招牌肉骨茶湯底濃郁藥材味幾出，肉嘅份量好多呢！招牌海南雞雞肉好滑嫩，配埋雞湯同油飯好滿足。椰香黃咖喱牛肋肉煮得好好，牛肋肉幾腍嫩，黃咖喱配白飯或者酥餅都好正。上湯蝦米肉末浸娃娃菜食落幾清爽，啱啱好可以平衡其他重口味嘅菜式。飲品方面，我點咗青檸梳打，清新解渴酸酸甜甜，非常爽。朋友點咗菠蘿熱情果沙冰，果味幾突出，好冰涼。當日仲見到餐廳一周年優惠可以加一蚊換購斑蘭咖央多士，當然要換返份嚟食。多士烘得好薄脆，內餡凍凍嘅斑蘭咖央醬，香滑濃郁嘅味道，好推介。整體食物質素唔錯，下次可以再嚟試下其他菜式。…查看更多

久仰Nara Thai大名，係泰國獲得米其林推薦，但上次泰國之旅錯過咗無機會拜訪，今次同朋友係沙田覓食就一定要book位試下。坐低後先點返杯泰式飲品，青檸梳打同泰式奶茶都唔錯呢～邊飲邊食蝦片好爽！見到生蝦刺身做緊優惠，2位客人用餐作任何堂食消費以$1就可以換到一客呢。生蝦鮮甜彈牙，配埋生蒜同蘸汁好酸爽。海鮮冬蔭功湯冬蔭功湯頭酸辣味好平衡，內裡海鮮量都好多，有大蝦、帶子、青口等，2-3人分享都可以呢！黃咖喱軟殼蟹最期待嘅一道菜，軟殼蟹炸到好香脆，食落啖啖肉十分滿足。黃咖喱甜中帶奶香，蘸上好多咖喱咁食就最爽。燒豬頸肉份量都幾大仲配上青木瓜沙律平衡肉膩感。薄片嘅豬頸肉食到肉嘅脂香及爽彈嘅口感，邊位嘅炙燒香氣特別吸引我。牛肉船麵喜歡牛肉嘅我地點咗牛肉船麵試下，好大一碗嘅船麵，麵條吸晒湯汁，配料有齊牛肉片、滷水牛腱、牛筋、泰國手打牛肉丸，超級豐富。芒果糯米飯甜品當然要來一客糯米飯，芒果唔會死甜味，甜中帶微酸，糯米飯軟糯適中，倒上椰汁就甜度剛剛好。…查看更多

朋友搵我中午去到ICC高空嘆點心，原來餐廳新開張做緊好抵食嘅午市半價點心。喺101層樓高望住咁靚嘅香港海景加城景，為忙碌工作嘅我地充滿電。筍尖鮮蝦餃必點蝦餃，一睇就知道師傅功架。外皮唔會一夾就爛，蝦肉新鮮爽彈，一口滿足！酸辣海鮮小籠包皮薄餡爆汁，帶少少辣勁。食唔到辣嘅朋友都接受到呢！手打陳皮騸牯牛肉球估唔到陳皮味幾出，牛肉球軟腍中帶彈性，腐皮唔會太淋。蜂巢芋角外層裹得好薄好鬆，芋泥綿密無過多調味，擺入口唔洗點用力都可以抿開。流金流沙包造型好特別，綠色嘅包體夾住金黃色嘅流沙，一咬爆漿好出色！欖仁沖繩黑糖馬拉糕口感好鬆軟，黑糖味好出。春風得意水網腸腸粉部分有米香好軟滑，內裡包裹住脆網及彈牙蝦肉，仲有透明爆珠增加口感。手工蛋散配龍眼蜜兒時最愛嘅蛋散，淋上清香嘅龍眼蜜，仲撒上粒粒芝麻，脆口又甜蜜。黃金蝦多士好香脆又唔會油膩，蝦膠部分好彈牙。鮮蝦蟹籽燒賣熱燙燙上枱咬開燒賣都係有彈牙蝦肉，豬肉部分都好鮮嫩，燒賣皮厚薄剛好，蟹籽份量都頗多。優惠做到2月尾，已經預約咗同屋企人嚟食。…查看更多

為慶祝朋友生日，訂座了一間尖沙咀鐵板燒同佢食。餐廳座位好闊落，可以望住師傅整每一道菜，體驗好好啊！今次點咗PREMIUM SET可以食到龍蝦、鮑魚、鵝肝、白子、腦天、魚子醬，過一個奢華的生日。海鮮沙律伴日本果茄先嚟份沙律，日本水果番茄好甜，仲有煙三文魚及蝦肉，係清新嘅開始。鱈魚白子係我最愛，每人有兩大塊，口感超creamy，熱燙燙要小心食。仲可配以柚子酸汁，味道好夾！每人一盒10g魚子醬，咸中帶鮮再配搭龍蝦同和牛一齊食都正。活龍蝦好大隻，新鮮爽彈口感，蘸埋蝦頭醬汁味道更提昇。日本蝦夷鮑煎到剛剛好，彈牙中帶柔嫩，係我食過口感最正嘅鮑魚呢！煙燻吞拿魚腦天係珍貴部位-吞拿魚頭頂嘅肉，配搭紫蘇葉及沙律菜一齊食，整體好平衡～鵝肝厚切配漢堡包夾住減油膩感，入口即溶真的很幸福！A4和牛肉眼表面焦脆感，咬落油香四溢。粒粒分明的炒飯，上面嘅燶邊蘭王蛋是重點啊！大蜆舞茸菇清湯，好清甜又透徹的湯頭。砂糖多士配雪糕砂糖均勻多士薄脆配埋雲呢嗱雪糕係完美嘅結尾。…查看更多

最近經常出沒新蒲崗，想打邊爐就諗起幾年前食過嘅陳儀興玫瑰餐廳，質素好且平靚正。今次訂咗位同預留咗個靚湯底，一行四人仲可以試得多啲嘢。湯底選擇十分多，好多足料嘅配搭。我地提早預訂咗當月優惠嘅雙龍吐珠海鮮鍋，係超豐盛由唔同海鮮組成嘅鍋。先要講講兩隻大大隻龍蝦，平時出去食蒸龍蝦都唔止依個價啦！龍蝦新鮮彈牙，鮮味十足！入面仲有鮑魚、蜆、海蝦等海鮮，夾埋番茄、南瓜啲蔬菜一齊滾完個湯底好鮮甜呢。火鍋配料我必點脆鯇魚腩，平時係屋企少啲食到，每次打邊爐食到魚肉爽脆口感都覺得好正。依度嘅手切肥牛質素好高，睇到啲紋路都覺得正！切得厚薄適中，入口少少油脂感外，肉質腍嫩十分讚。餃子都係必點項目，上次嚟食韭菜餃就已經好喜歡，超重韭菜味又足料。今次拼埋芥末西芹餃，芥末少少嗆辣，西芹味好出又香，整體好過癮。蟹籽墨魚滑夠彈牙，蟹籽仲添加咗重口感。配料都不乏內臟的選擇呢，豬潤同粉腸都係我嘅愛，雙拼就一次過可以享受晒兩款。豬潤涮一陣就熟了，質地仲會爆汁。粉腸都無異味，又唔會難嚼。新鮮黑柏葉都好適合火鍋食，幼條咬落脆口，比普通牛柏葉更嫩，不會韌。今次食完都一樣覺得好正，下次要再同朋友一齊嚟呢！…查看更多

朋友推介尖沙咀性價比高居酒屋半放題，馬上訂位試一試。90分鐘和食半放題$388/位，主要有日本A4和牛、北海道米豚、廣島牡蠣壽喜燒任食，已經十分吸引了！先來一道和風沙律開開胃，醬汁酸酸地好清新。再嚟時令刺身五款，當日有油甘魚、三文魚、希靈魚、八爪魚及帆立貝，5款足夠嚐鮮。接下來就係任食手握壽司部分，壽司每件唔會太大件，咁就可以試到多啲款，唔會一嚟就打爆自己。每次點單每人可選五款，分別有加州卷、三文魚、油甘魚、火炙三文魚、火炙左口魚邊、香蔥吞拿魚蓉、八爪魚、飛魚籽、海膽魷魚、青芥辣八爪魚、明太子沙律。個人最愛火炙左口魚邊，香氣誘人仲入口即溶。後面仲有自選5款串燒料理/天婦羅，選擇好多令人犯選擇困難症啦！甲羅燒好濃郁配多士都好夾。明太子雞腿串肉幾嫩，咸香明太子好加分。鹽燒雞腎好爽口，無過多調味都好突出。炸物一碟過上晒，每款一件啱晒淺嚐。芝麻雞翼係熟悉嘅味道，但每次為佢嘅香脆度驚嘆。海膽大葉天婦羅係紫蘇葉包着海膽，外層薄脆內裡creamy。虎蝦天婦羅蝦肉新鮮彈牙，吉列廣島蠔咬落爆汁。土佐豆腐內裡超細嫩，外面焦脆好香口。味噌田樂茄子燒味道唔清淡，茄子肉拆上食落好方便。後段專注食壽喜燒，鍋內有各款蔬菜，可點日本A4和牛、北海道米豚、廣島牡蠣享用。肉類質素都唔錯，更令我驚艷係蠔大細都好有誠意。喜歡食蠔嘅真係要來一戰。另可任點野菜盤及主食溫泉蛋紫菜飯/溫泉蛋稻庭烏冬，個人偏愛溫泉蛋稻庭烏冬，冷烏冬好彈牙，撈埋溫泉蛋係簡單嘅美味。最後甜品時間可選雪糕芝麻或綠茶口味，我哋點了各一，兩款味道都幾濃厚，完美ending！…查看更多

早前去台灣竟然無飲到珍奶，見葵廣開咗一間人氣過江龍，即刻去咗買返杯試下。店面有列出熱銷嘅排行榜，我就選咗一杯top one嘅紅柚翡翠。平時我都好喜歡依個口味，果味清爽，好適合炎炎夏日飲，好消暑啊！龜記嘅紅柚翡翠內有好多柚子肉，每飲一啖都飲到絲絲柚肉，配埋綠茶幽幽茶香帶回甘，同酸甜柚肉好夾。我仲加咗蘆薈粒有啲咬口，一分糖但水果嘅糖分都好足夠，下次試埋無糖先。朋友點咗碎銀普洱鮮乳，鮮乳奶味唔會太搶，茶味無想像中咁濃，整體各方面都幾平衡。鮮奶茶加珍珠試埋佢另一款配料，珍珠size偏細同埋軟q口感為主，煲得透好易咬，但朋友係煙韌控，就想再有咬口啲。店舖位置係新都會廣場，買外賣比朋友都好方便。下次途經會想再買杯飲，試多幾款口味。…查看更多

一段時間無光顧了，十分想念佢地嘅蝦多士，所以前嚟再回味。入座後見佢地出咗Emperor Tasting Menu，同朋友都決定要試試佢，有好多款食物仲包含咗佢地嘅招牌菜。Chefs Platter套餐中我最期待嘅蝦多士就係拼盤嘅其中一款。芝麻蝦多士有原隻蝦肉係面，多士上更有一層蝦膠，口感結合了彈牙與香脆，加埋芝麻嘅香氣真係讓人回味無窮。仲有酸甜嘅陳醋蜜汁排骨，肉偏緊實味道好入味。脆皮素春卷炸到金黃色，雖然內餡都係蔬菜但都唔會清淡。湖區海鮮羹每一啖都有滿滿嘅料，蝦肉同帶子肉都保持到鮮味，豆腐粒好滑，仲有紅蘿蔔同其他蔬菜等脆度增加口感。海鮮當然要配白酒，我點了一杯Riesling，葡萄味幾出同時甜度好適合女仔飲呢！朋友就鍾意紅酒就點咗杯Pinot Noir。蒜蓉粉絲蒸扇貝上枱時店員會幫忙分比我哋，同時將重點精華充滿鮮味嘅汁𢳂返去扇貝上面。扇貝好厚肉有口感，好巨型嘅size，蒜蓉粉絲好夠味。棒棒吉列蝦掛包套餐澱粉質量都幾多，啱晒我依啲澱粉質控。刈包好軟熟，吉列蝦餅係中間，炸過所以十分熱燙，食落脆口又唔會好油，中間仲夾咗啲沙律菜同唧上了千島醬，整體十分配合。楓樹蜜橙香燒春雞一奉上就已經香氣撲鼻，半隻春雞份量十足，雞肉嫩滑多汁，帶淡淡橙香及香料味。伴以英式煙肉粟米粒炒蛋飯十分飽肚，炒飯粒粒分明乾身幾香口，唯獨粟米粒有啲乾。朋友點嘅係乾燒薑汁鱈魚，我試了一口都覺得唔錯，肉質細嫩。最後仲有每人一款Chef's Dessert，有芝士蛋糕同埋檸檬撻，前者軟滑香濃，後者酸甜平衡，係完美的結尾。$680一位可以嚐到咁多款美食，二人捧住個肚走，真讓人滿足！…查看更多

朋友介紹先知海濱有間西餐廳，去到發現環境唔錯，仲要咁啱個日店外有busking，坐戶外位都幾有feel。食物選擇都幾多，有小食、頭盤、主食等。餐前麵包有兩款，一款係鬆軟帶甜，一款有辣肉腸粒係入面，都幾有誠意。香辣棒棒雞棒棒雞帶麻辣，食落香脆又惹味。大蝦濃汁虎蝦意大利蝴蝶粉蝴蝶粉沾滿濃汁，海鮮味都幾出，不過份量偏少呢。而虎蝦部分已經剝咗殼食落好方便。烤魷魚夠彈牙又唔乾，送酒一流。我哋每人點了一杯Cocktail試吓，我嘅係Tea for U，有淡淡茉莉味。朋友點了Buddy Orange Punch，酸甜有橙香，sparkling wine底都幾易入口。…查看更多

喺觀塘同朋友gathering想食西餐，我就會諗起依間，餐點精緻而有質素，推介比朋友絕對唔失禮啊！Mango Crab Meat Salad晚餐唔想食得太heavy，開頭先點咗款沙律。蟹肉經過調味，食落有香料味，所以整體都唔會清淡，加上芒果醬配合底下好開胃。Turin Spicy Chicken Wings面頭有紅紅嘅辣醬，就同水牛城雞翼差唔多，雞肉內裡都好嫩，作為小食點綴一下非常可以！US Prime Rib Eye主食點咗牛扒，兩人分享都好足夠。我哋點咗5成熟，牛扒中間好粉嫩，食落好腍亦帶香濃牛味。牛扒配搭咗香脆薯條，外面嘅粉係cajun style超惹味呢！Coco sparkling-Peach之前嚟過一次都有飲過依款特飲，下半部有清爽嘅椰子水，上半部有桃味泡沫般輕盈嘅奶蓋，整體唔會好甜，最底部仲有啲馬蹄粒爆珠增加口感。Pineapple Oolong Tea鍾意比較清香口味就可以點茶，選擇都有幾款，而依款配搭都幾夾。Forbidden Lover甜品時間當然要有，cheesecake伴咗莓醬酸酸地好減膩。本身cheesecake都濃而不膩，仲有啲爽口木耳係底部同旁邊，食落脆脆地有少少衝突感但又無違和感。…查看更多

好耐無去海港城，發現都有啲新食店之前未見過，今次晚餐就揀咗依間馬來西亞菜試吓。入座後店員就奉上荔枝紅茶，香氣十足飲落幾舒服。迷你魚醬蝦米春卷先點咗一款小食過下口癮，味道好惹味又香口。蟹肉雜菜薄餅卷餅皮薄得嚟帶少少彈性，蘿蔔絲同生菜等幾爽口，蟹肉量唔多但配埋面頭蝦米食都幾鮮味。亞參酸辣沙巴仔配黃金油條一整條魚上十分澎湃，魚肉鮮嫩腩位帶少少膠質，醬汁酸辣開胃。海南雞鑊仔飯超有特色嘅一道菜，店員會提供桌邊服務，一開蓋就發現鑊仔飯先用了蔥薑蒜、班蘭葉同埋香茅係竹網上焗煮過。即場再放入蔥油同醬油係滿佈蝦乾、芋頭粒及臘腸粒嘅飯內，均勻拌好後再擺海南雞係面頭，造型十分吸引。雞肉嫩滑咸香咸香，飯材料豐富所以食落都好香，仲有飯焦部分。班蘭咖椰多士依款都係必食嘅甜點，咖椰醬凍凍地配埋香脆多士，每一口都令人滿足。香茅白桃沙冰係香甜口味，帶淡淡香茅味幾清新。而話梅蜂蜜梳打甜甜酸酸，邊食邊飲可解膩。…查看更多

最近慶祝朋友生日去咗銅鑼灣Omakase，二人同行更有清酒優惠，同朋友飲飽食醉好滿足。前菜先有水雲醋，酸酸地好開胃。旁邊係凍菠菜配雜菌，加埋三文魚籽增添咗鮮味程度。鱈魚白子經木魚水烚過，食落微暖加上creamy奶滑嘅口感，滑落喉嚨好舒服。富山灣特產嘅冰見寒鰤，面頭撒上芥末及芝麻碎，層次幾豐富。仲配上山桃漬，甜甜地咬落juicy。金目鯛配洋蔥汁及大蔥碎，魚皮炙燒過，魚肉幾嫩。食完魚再食柑橘啫喱，好清爽。岩手縣生蠔配上醋mousse及新鮮紫菜，蠔肉好飽滿，裙邊口感好脆，內裡creamy。笠貝片到好薄，已經撈咗豉油同柚子汁同埋撒上柚子皮，口感爽脆，特別係邊位。北海道嘅BB銀鱈魚輕輕燒過魚油味好香，配埋松露醬都幾夾。鮟鱇魚肝最中餅配上士多啤梨粒同芽蔥，魚肝經過慢煮同埋浸牛奶，口感好濃滑。拆晒肉嘅香箱蟹，溝埋蟹籽同蟹膏，啖啖肉口感一流。加入咗醋茨汁，同蟹肉味道好夾，面頭仲加咗少少三文魚籽。原隻磯煮鮑魚好彈牙，煮後唔會變太腍，伴上肝醬好濃郁。之後到和食部分，係比較少見嘅吞拿魚下巴，燒過面頭有焦脆部分，內裡肉好嫩，仲有好多入口即化嘅油脂位。壽司有4款，刺身部分比重比較多，對我哋來說好適合，數量剛剛好。第一款係赤貝，鮮味好出之餘更爽脆厚肉。面頭仲刨咗啲柚子皮，好清香。甜蝦好甜糯，size都幾大呢！師傅掃上蝦頭膏醬油更提鮮。黑鯥魚味幾濃，皮位好有口感，魚肉同飯中間夾咗啲蔥碎。厚厚疊起來嘅馬糞海膽，入口Creamy又甜，幸福嘅味道。最後一道以Toro結尾，漬Toro及炙燒Otoro嘅組合太誘人，前者口感緊實啲，後者入口即溶、魚油十足。中間夾咗紫蘇葉及加入了柚子胡椒加wasabi嘅豉油，香氣平衡魚油嘅膩感，紫菜新鮮香脆。當然唔少得魚湯部分，一睇就見到十分濃厚，飲落好順滑、魚味濃郁，仲帶蔬菜甜味。甜品係Tiramisu千層，賣相幾吸引！先聞到面頭可可粉嘅香氣，cream都唔會好膩，唯一係千層皮有啲乾，如果濕潤啲會更有Tiramisu嘅風味。…查看更多

間唔時都會心思思想食潮州菜，朋友推介咗依間正宗潮州菜館比我，即刻訂位試一試。入座後睇餐牌見到好多少見嘅潮州菜式，不過知自己眼寬肚窄難以一一品嘗晒，就揀咗幾款經典嘅菜式試吓先。暖胃之選老菜脯豬肚湯，湯頭顏色好深，飲落好濃郁胡椒味好出，所以更適合秋冬飲啊。豬肚都煲到腍左唔難咬，可以清埋啲湯渣。潮州菜必食一定係滷水項目啦！滷水鵝片份量都唔少，鵝片軟腍唔柴，皮位帶油脂香。鵝片下面仲藏咗滷豆腐，十分嫩滑呢！川椒雞頸肉好惹味，味道好帶勁，以往食過一啲辣味係比較Mild，依度嘅係好啱我地重口味人士。雞頸肉富彈性仲帶啲脆脆口感，好有特色。糖醋煎伊麵撒上糖及醋，表層好香脆內裡仲帶濕潤，功夫好到家。最後來碗清心丸綠豆爽甜品結尾。清心丸係軟軟QQ的，有啲似軟糖口感呢！綠豆好綿，甜度不會太高，係幾清爽嘅甜品選擇。…查看更多