SUGAR_10241024's Profile

之前經過見到中午都有啲人幫襯吓，就諗住試吓午餐，叫咗個三鮮炒拉麵配酸辣湯，再單點左兩個點心，一個紅油抄手，另一個係生煎包。紅油抄手個味有啲古怪，唔似一般紅油抄手個隻味。生煎包味道正常，但入面無汁。而酸辣湯一嚟到，面頭浮咗隻曱甴，即刻同侍應講，話換過碗俾我哋，都係同一煲野，換過碗都唔會要，所以無要到。。。。整體嚟講食物味道都好一般，而且午餐又要收小食錢又收茶芥又要加一，性價比低，難怪今時今日香港地啲餐廳咁難做，總括嚟講唔會再幫襯。…Read More

叫左個$268餐，任飲每位加$28，八寶飯轉粥底每位又加$28，星期五每位又加$20，醬料每位再加$20，網上訂位有八折，埋單每位$326，咁嘅價錢，絕對唔抵食。1. 間鋪太細，座位又逼夾，已經有開冷氣加幾部風扇，但都食到一身汗，全晚無停過流汗，感覺上好似係30幾度下bbq一樣咁熱2. 收費同食物唔成正比，每位$326唔算平亦唔算貴，聲稱包埋任食安格斯肥牛，成塊有2/3都係肥膏，仲差過個間凍肉舖x寶最平個隻肥牛。另外海鮮都好垃圾，有食過其他專門做蒸海鮮既餐廳都未試過會俾呢啲咁既食物客人3. 本身一開始俾左6隻鮑魚我地，之後蒸完上哂碟問我地係咪有人生日，我地話無，跟住店員就話個3隻鮑魚原來係後面枱，蒸熟左都攞返走，未免有啲太市儈4. 未埋單前出去拎罐野飲，店員同我地講你地埋左單唔可以再攞，但其實我地仲未埋單全晚最正常既食物係點心同個燉湯。…Read More

最近見佢推出個午市放題，分60同90分鐘，試左個90分鐘$108 得豬同雞無牛肉既餐，之前睇過佢menu覺得好似幾吸引所以去試，點知去到食完覺得勁伏。d丸質素好一般，啲嘢飲係自己出去斟，燉湯又話賣哂，放題入邊包既台式食品全部都係凍嘅，鹽酥雞大部份都係啲炸粉，臭豆腐超難食，唯一好少少嘅係糖醋骨。叫佢加兩款肉就淨係黎左d雞，個人認為如果要咁樣將價就貨叫左d野又唔黎又賣哂既話就唔好做學人做放題，另外，女侍應態度好差但門口帶位就好有禮貌。…Read More

先講服務態度，態度係極差又冇禮貌，個阿姐自己落單聽唔到我哋係要豬扒担担麵，再重複一次單個陣同佢講我哋係要豬扒担担面唔係要淨擔擔麵，之後就怪責我哋話我地又話係要淨擔擔麵同埋表露出一副極之不耐煩嘅樣子。然後講食物，一共叫左三樣野：1. 豬扒擔擔麵 - 係三樣嘢入邊最好食嘅一樣，豬扒係鬆軟嘅，麵係煙韌彈牙嘅，湯底都幾好嘅2. 小籠包 - 係好多汁，但入面既肉太散，皮又厚，感覺好唔新鮮，完全唔可以用好食黎形容3. 菜肉雲吞 - 呢樣真係超難食，個皮勁口，有好大浸鹼水味，入面啲餡嘅味道又怪，肉又鬆散個人認為咁嘅價俾咁嘅質素，我覺得係略貴嘅同埋唔值，唔值得推薦。…Read More

嚟過呢間餐廳食過幾次晚餐，決定要寫一篇食評讚下佢個炸豬扒🐷星期一至五有dinner set，我叫左豬扒喇沙，個set$64包湯或飲品。塊豬扒炸到岩岩好，好juicy又唔會太乾，而且份量非常多，喇沙味道都唔錯，唔會話好濃味亦都唔會太淡，又唔會話好辣，喇沙入邊仲跟左一隻半熟蛋，兩粒魚蛋同幾舊豆卜。仲有值得一讚嘅就係有一位男侍應真係非常有禮貌。不過我中午打去問當晚會唔會營業，接聽電話個位就非常冇禮貌禮貌，佢當時既回覆係”梗係開，開緊啦，點解會唔開”。。。其實而家疫情嚴重，真係有好多餐廳係唔做晚市，我只係打去問一問費事摸門釘但係就遭受到冇禮貌嘅對待。。…Read More

之前一直有上開深圳食酸菜魚，但由於近排疫情嚴重，導致無得北上食酸菜魚，但係又心掛掛，所以決定同友人一齊黎呢間試下佢啲酸菜魚。我地今次叫左三樣野，第一樣係麻辣拼盤，我哋要咗小辣，但係食落都幾辣，拼盤有少少似夫妻肺片，入面有牛肚，牛𦟌，豬耳，牛肺，青瓜絲。味道都唔錯份量亦都好多但小辣都幾辣下。第二樣係酸菜魚，整體黎講酸菜魚嘅味道就真係不及深圳好食，魚係桂花魚，但係就唔夠滑同埋切得太厚，我哋叫咗小辣，但係反而一啲都唔辣，酸菜魚我覺得味道比較普通，唔算話係太特別。第三樣係大盤菜花，即係福花，佢用咗啲鹹肉黎炒，明顯地福花係走過油所以好香口，而且仲用咗啲孜然粉一齊煮又有小小辣味，我認為呢一個餸係全晚最好食嘅。整體來講我覺得呢餐係唔錯嘅，三個餸都好平均，而且份量都好多，都算係抵食嘅！…Read More

今晚揀咗呢度同個朋友慶祝生日🎂事前book位嘅時候已經問定個到既staff可唔可以當日提前拎個蛋糕上去俾個驚喜朋友。佢一口答應仲話會幫手將個蛋糕放上去個碟度，碟上面會寫上Happy Birthday，咁當然要收返$100切餅費啦。雖然呢間餐廳係工廈入面，但係入到去見到個環境同所有擺設同佈置都好靚，真係好適合慶祝生日。我地叫左2個set dinner，appetizer有2款，我揀咗蟹餅，味道非常之好，好有驚喜。是日餐湯係甘筍湯，估唔到一樣都係好好飲。main course 我就揀左牛扒，牛扒我就覺得有少少韌，但都唔算太差。食到最後staff上埋個生日蛋糕，碟上面句Happy Birthday寫得好靚，staff仲好主動話幫我哋影相，仲用自己部電話幫我地影咗張相，之後曬咗出嚟入係個相架到送俾我哋，好窩心♥️我哋最後因為太飽所以冇食到個蛋糕，staff仲幫我地pack返個蛋糕入盒。到埋單嗰陣，佢仲話無收到我地$100切餅費。整體黎講，不論係食物，服務態度同環境，我地都好滿意！一定會推介朋友嚟！…Read More