hklemontwbubbletea的個人專頁

今次兩個人晚餐去食，上年十二月去好似只有$298一位的tasting menu 。今次去有set dinner for 2（$488加一），包括兩個starter、兩個pasta及兩個甜品 。雖然tasting menu可以多點一個starter或pasta，但上次食到好飽，所以set for 2都夠 。前菜點了兩份香草蕃茄醬青口，蕃茄醬配麵包超好食，麵包食完可以問店員再添加 。意粉分別點了意式辣肉貓耳朵麵（芝士味濃，麵有咬勁）及大蝦海鮮濃汁黑細麵 （海鮮味濃）。兩個意粉醬汁都好好食，沾滿醬汁嘅意粉真係食多幾碟都得 。甜品選了tiramisu，是去Pici百吃不厭的甜品 。最後要讚吓店員非常熱情友善嘅服務態度，整體而言都好好 。 …查看更多

呢間隱藏喺K11 art mall一個角落嘅西餐廳，唔特別行入去真係唔為意佢嘅存在 。今次一行四人去食午餐，所以點咗四個主菜，食物排名如下：1. Six cheese pizza，佢個名都話俾大家聽由六種芝士組成，芝士味濃，pizza仲會附上蜜糖，配pizza食又係另外一個風味，相當特別。2. 煎北海道帶子伏特加蕃茄奶油長通粉，最出色係醬汁，長通粉有咬人非常入味 。3. 吉列芝心豬扒日式咖哩，雖然豬排入面有好多芝士，但味道唔算好特別，整體一般般。4. 美國西冷牛扒，最貴嘅菜式令人最失望，其實控制火候已經做得好好，叫五成熟真係做到，睇落都煎得好靚，可惜塊牛扒好多筋，砌開已經好困難，每食一塊時都要咀嚼好耐，好可惜☹️ 。…查看更多

每次去薩莉亞，因為價錢比較相宜，都可以叫好多款式，猶如食放題，今次兩個人去點咗九款食物，好吃排序如下：1.蘑菇湯與蒜蓉麵包 - 蘑菇湯比周打海鮮湯同粟米忌廉湯更高品質，配上蒜蓉麵包蘸湯食，可以話係最佳拍檔。2.蘑菇忌廉粗管麵 - 本來都唔睇好會特別好食，擔心冇乜味道同埋冇咩餸，結果食落都幾意外，野菌同忌廉味都幾濃，粗管面煮得好彈牙且入味，本來已經好飽，都仲食得落。3.三倍水牛芝士Pizza與意式洋蔥蒜蓉燒雞 - 價廉嘅Pizza嚟講，呢個Pizza充滿芝士同蕃茄味，搭配煮食燒雞，令口味食落有變化。其他食物依味道排名都擺上嚟俾大家睇一睇。…查看更多

一坐低就見到枱上介紹六大必點美食，兩個人去就試咗其中兩個。首先介紹特色蕃茄濃湯通粉配炒蛋，加招牌瑞士雞髀（$59）。番茄濃湯據稱以200斤新鮮蕃茄、豬骨同雞骨烹調10小時製作，的確幾濃味，只係略嫌太甜。瑞士雞髀同蕃茄湯一樣，雖然味道唔錯，但係又莫名其妙地甜。另一個午餐點咗金牌咖喱牛腩飯配熱奶茶（$62）。咖喱汁撈飯，都幾好食，可惜部份牛腩有啲韌，奇怪之處就係咖喱汁少少辣之中又有啲甜味，唔知呢間冰室嘅廚師係咪好鍾意甜甜哋？…查看更多

踏入Morty’s就好似進入美國電視劇/電影嘅餐廳咁，好有外國感覺。餐牌有各種麵包同材料選擇，研究食乜已經要花啲時間。今次兩個人去食，所以揀咗兩款唔太一樣嘅食物。先介紹佢哋比較有名嘅smoked meat sandwich。因為有啲餓，所以揀咗smoked meat combo（Regular $135），兩款肉就揀咗鴨同火雞。所有三文治都配一個side，我哋就加咗$15轉蕃薯條。個三文治好多肉非常厚，肉亦唔會太乾，好滿足。蕃薯條第一次試，甜甜地幾特別，但個人口味問題，下次會想食返薯條。另一份點咗smoked meat burger。相比之下，覺得三文治好味啲，始終食漢堡似乎有其他專門店有更好選擇。配菜係南瓜湯，如果碗湯煮熱啲同大碗啲應該更好。總結佢嘅煙燻肉三文治較為好食，而且選擇眾多，總有一種配搭適合你。…查看更多

光榮冰室旺角店午市一向非常熱鬧，可能因為價錢親民，今時今日午餐五十幾至六十幾蚊可以食到你捧住個肚走，真係好難得。既然今次唔駛排隊，就去幫襯支持一吓。首先介紹最著名嘅雞扒三眼仔飯（$62），呢個飯最適合要練大隻，吸收大量蛋白質嘅朋友。我就揀咗配秘製豉油加蔥油汁，用嚟撈飯一流。美中不足係有兩隻蛋黃爆咗，唔係我就中意就咁成隻蛋黃吞。另外一個飯就揀左雞髀炒蛋飯（$60）炒蛋都幾滑，可惜雞髀應該係雪藏貨，煎炸完好似仲有一陣雪味。整體而言，如果肚餓去一定夠飽夠滿足，但唔同菜式質素唔同，真係要試過先知。…查看更多

大家通常光顧呢間大排檔晚市小炒，原來午市有抵食嘅套餐，平均價錢只係$50左右！首先介紹炒粉麵飯，叫咗一個雪菜肉絲炆米（$53），係即叫即炒，通常最怕雪菜太鹹，但呢度就唔會。不過啲肉絲就冇乜豬肉味。另外點咗一個霸王雞（$49），雞肉好似隨機抽樣派發咁，雞髀又有，背脊又有，連頸都有。味道都可以，但略嫌唔係好夠汁，咁大碗白飯咁少汁，食到後段真係有啲dry。所有套餐都有例湯，加$4仲有杯熱飲。以後大家去旺角lunch唔知食乜，都可以去試一試。…查看更多

今次星期日午市光顧，即使係假日，都有午市套餐，價錢以尖沙咀區而言，尚算合理 。首先介紹係主打嘅串燒定食（$198），定食總共有七款串燒，有各種肉、秋葵、菇，都燒得好惹味 。點串燒要等候耐一啲，因為即叫即燒。另一個定食係壽喜燒（$158），可以揀豚肉或者牛肉，個鍋入邊有菜有肉有蛋，非常豐富 。所有定食都配溫泉蛋，但唔想食生雞蛋可以要求佢轉玉子燒 。最後一個定食係鱈魚西京燒（$198） ，鱈魚燒嘅汁甜甜地，配一大堆沙律菜，適合唔想食咁多肉食得太飽嘅朋友。定食仲可以加$28轉稻庭烏冬。值得一讚係服務態度非常好，有禮貌之餘，仲好關心客人需要。…查看更多

呢間主打湯米線嘅餐廳，招牌係雞湯，當然要試試不同口味嘅雞湯。首先係招牌癡花膠雞濃湯米線（$68），真係有幾塊花膠，而且個湯又癡癡地，充滿花膠味道。麵方面除咗米線，仲可以轉米粉、上海麵、薯粉等，今次我就轉左米粉。因為唔想食太多麵，所以另一份點左椰子雞（一份，$50）。椰子雞湯椰子味十足，好似落咗好多椰子咁，個人覺得呢個比花膠湯更好味。特別之處係所有雞湯都係一隻鐵鑊咁上餐，好似快餐店打邊爐咁，下面有個火熱住，咁樣啲湯就唔會凍咗膠住。另外值得一讚係雞嘅份量幾多，男士食都夠飽。最後點多個濃雞湯時蔬（$28），試埋佢最原始雞湯味，用湯煮嘅菜清淡得嚟又有味道，唔錯。…查看更多

呢間台式餐廳可以揀火鍋定係普通套餐。全日套餐睇落好多選擇，但睇真啲所有米線餐其實萬變不離其中，主菜都係雞、牛、餃子同花枝丸等等。只不過係配唔同湯底或唔同口味嘅主菜，令到好似有好多選擇。例如藥膳湯就已經有藥膳養生湯雞、藥膳麻油雞、蟲草花藥膳湯雞等等… 可以睇得出唔同配料都俾呢間餐廳玩到出神入化。試左三款米線，好大碗一定夠飽，味道方面還可以，湯底略嫌有啲油膩。雖然佢以台灣地方命名，不過問返台灣人，佢啲餐點台灣都冇嘅🤣，但至少食落唔難食，而且份量都非常足，所以要飽肚係ok的，但唔好期望真係台灣口味。…查看更多

上環熟食中心嘅大排檔，午餐種類繁多，有碟頭飯，有炒粉麵飯，任君選擇，價錢只係四十幾至五十幾蚊，總有一款啱你心水。食得大排檔就唔食碟頭飯啦，梗係叫啲炒粉麵試吓夠唔夠鑊氣，所以就點咗乾炒牛河（$50，連飲品）。乾炒牛河即叫即炒，等咗唔夠10分鐘就有得食，仲要係熱辣辣嘅，河粉上食唔錯，用芽菜同韭菜炒，但食到後面覺得有啲油。環境方面，雖然有冷氣，但就坐得唔係好舒服，同埋預咗有啲嘈，不過咁樣先至係大排檔氣氛。同埋勝在價錢平兼即叫即做，呢點已經好好。…查看更多

喺廣華街開咗一排嘅日本石燒餐廳，星期五午餐去試吓，完全唔使等位就可以直入。今次冇點到石燒，反而點左牛肉野菜鍋（$72）。食物好快到，因為鍋入面嘅係材料都係生嘅，店員會點火等你自己煮熟。個鍋材料都算豐富，有牛肉、菜、芋絲、菇等等。店員服務都幾好，見到你個鍋冇晒火，會問你需唔需要換，但係食壽喜燒啲餸煮好晒都唔需要繼續滾住，所以我就冇換。埋單原來要加一，加埋都要差不多$80，唔可以話平，但又唔算太貴，材料亦唔係特別名貴或質素特別好，所以總結算係不過不失啦。…查看更多

Lunch time喺黃埔區要價錢唔太貴，品質又唔錯嘅西餐廳，呢間Flames就可以滿足晒兩個要求。最出名嘅菜式就係葡式香辣燒春雞（3-course，$128），可以配飯、薯條或沙律，今次點咗飯，可惜啲飯煮到爛爛地有啲失望。好彩隻雞燒得好惹味，亦唔係太辣，加番啲分。唔想食煎炸嘢，可以試吓個燒魚（3-course，$138），份量足，有蔬菜做配菜，相對上係健康之選。唔想食咁多肉，想簡單食個pasta，就可以試佢個鮮茄紅酒燴牛肉面意粉（$88），有啲蕃茄都幾開胃。…查看更多

餐廳名講明係牛肉麵店，咁就當然要試吓佢嘅牛肉麵。犇牛四寶麵（$108）非常足料，個湯係紅燒牛肉麵嗰種比較濃味嘅湯，食完略嫌有少少鹹。麵方面，可以選擇幼面或者手工麵（ 粗麵 ）。想食清淡啲，就可以試佢嘅燉濃湯雞麵（$88）。 湯頭清淡好多，而且味道豐富。雞肉有一隻雞上髀，一隻雞下髀，都算係啖啖肉。男士去食如果驚唔夠飽，可以叫多個小食。滷水拼盤（$78）有牛肚、牛𦟌、滷水蛋、豆腐同菇，一次過滿足你幾個願望，不過部份食物味道都係略嫌偏鹹。總括而言，今次試呢間餐廳，主要係有信用卡優惠。如果唔係有優惠，正價就應該唔會幫襯，因為未到好好食嘅程度。…查看更多

想食日式牛肉丼飯，但唔食吉X 家，最好嘅選擇當然係Sukiya，可以用四個字總結： 平、靚、正、快。視乎你食咩肉同丼飯大小，一個丼飯最平只係廿幾蚊，想食豐富啲，或者營養好啲，加溫泉蛋或者加蔥嘅牛丼都只係三十幾蚊。特別推薦係堂食一定要加錢變套餐，只要加$10，就可以有一客青菜（蒜蓉炒通菜）配飲品或麵豉湯。如果外賣的話，就咁買一個青菜都已經要$10。套餐仲有其他選擇，例如沙律同炸雞，不過價錢就有少少唔同。W溫泉蛋牛丼（M $38)，配青菜麵豉湯（加$10）。個人認為最豐富最抵食，可以話係首選。溫泉蛋炙燒豚丼（M $50），配青菜麵豉湯（加$10）。佢燒肉個醬撈埋隻溫泉蛋味道有少少奇怪，價錢亦都貴頗多，試過一次就夠，唔係太推薦。…查看更多