rickycklau的個人專頁

平時行開都係買十二蚊四條腸粉（平盡葵芳冇得輸）今日晏晝點左一份滷水雞髀（買俾屋企人嘅外賣）同埋一碗冬菇、豬大腸、牛腩、滷水雞翼車仔麵，整體而言，滿意嘅用餐體驗。滷水雞翼車仔麵。麵條彈牙有嚼勁，與滷水雞翼的濃郁滷汁完美融合。冬菇嘅香氣同豬大腸和牛腩嘅肉香相互交織，令整個湯底更加豐富。整碗麵條和湯汁比例適中，有濃郁口感嘅同時，又唔會覺得好肥膩。滷水雞髀，拎到返屋企仲係熱，十分難得。以滷水煮熟的雞髀肉質鮮嫩多汁，入口即化，其他舖頭一係就唔夠熱，一係就熟嗰頭。滷汁的味道濃郁，啱晒鍾意濃味嘅屋企人。滷水雞髀同車仔麵給都留下深刻印象。味道同口感都非常出色，如果鍾意滷水菜式和濃郁的湯頭，一定要試下。好好彩行街附近有呢一間孖寶車仔麵，每次到葵廣一定要去。…查看更多

行經旺角啱啱要食晚餐，見到大大個餐牌推銷緊試食晚餐，諗住見平又有少少肚餓就走入去啦。6:30到唔算太多人，試食晚餐有湯，主菜有三個選擇，雞翼肉燥飯、日式吉列豬扒飯、蕃茄辣魷魚意粉，款款都係$68 （未連加一服務費）。我揀咗中式湯（薏米煲排骨），蕃茄辣魷魚意粉。中式湯唔似落咗好多味精，好飲嘅，意粉好足料，茶餐廳居然有橄欖，辣味蕃茄酸味適中，超級好食。雖然冇餐飲，$75算係差唔多啦。咁好食，一定會再試。…查看更多

尖沙咀宜昌街：應該係好少人知嘅街名，平時行開呢條街，淨係見到有個舖頭好多人排隊。今次行經附近，可能時間比較早，終於少啲人，所以諗住去食嘢。初頭以為食日本拉麵，原來係食台灣嘢，咁啱晒啦，我就係想食拌麵。坐低叫咗清清地嘅兩樣嘢：皮蛋豆腐麻辣乾拌麵皮蛋豆腐首先要試嘅就係佢嘅醬汁：真係台灣嘅好友，甜甜地，最重要嘅就係豆腐皮蛋夠凍。麻辣拌麵：睇落去唔覺得好辣，食落去嗰種辣有真刺激嘅感覺，加埋皮蛋豆腐凍凍地，食落去超有快感。…查看更多

星期五team meeting，同事book咗呢一間喺戲曲中心嘅中菜餐廳，裝修擺設充滿咗中式嘅味道。由於負責同事已經預訂好套餐，我哋一坐低就好快有得食，又唔使揀，其中以下菜式推介俾大家試吓。叉燒拼燒腩仔——叉燒唔會太燶，重點係燒腩仔嘅皮好鬆脆水牛芝士蝦春卷——坦白講芝士味就唔係好濃郁，但係自己唔係like芝士，所以都可以嘅。椒鹽九肚魚——中午都食到呢個超開心，師傅炮製得好香口，有大排檔味道。脆皮燒乳鴿——香口乾身唔多油水晶包——熱辣辣嘅水晶包皮薄饀又唔甜下次再同屋企人嚟食過先！…查看更多

一個人唔想去茶記食嘅時候，拉麵舖頭就係最好嘅選擇。喺尖沙咀睇完戲之後，行經呢一間拉麵舖頭，被佢嘅裝修所吸引。餐牌嘅拉麵有唔同嘅辣度選擇，雖然自己食得辣，但係第一次試點都有啲膽怯，所以揀咗個微辣。食開拉麵嘅朋友都會覺得麵條湯底呢啲基本野響呢一類型正宗嘅拉麵舖頭一定做得到，當然係鬼金棒入面都係超額完成。今日想特別表揚佢嘅洋蔥，拉麵入邊加咗呢一個粒狀嘅洋蔥配菜，令本身濃嘅湯底都加添先甜味道，辣味唔算太辣，所以下次可以挑戰中級。…查看更多

每年嘅蟹宴套餐都會特登book完又book，今年都唔例外。唔同嘅地方係今年嘅訂枱異常困難，當屋企人book到嘅時候心入面都好期待。蟠龍鮮蟹鉗——初頭以為蟹鉗係炸蟹鉗，原來係蛋白蒸配大蝦，呢個配搭冇得輸，味道一流。花膠蟹肉燴燕窩——好強烈嘅南瓜湯底，甜味有啲搶咗蟹肉嘅味道，不過自己係南瓜控，所以都冇問題。燕窩同埋花膠都好足料，係今次難忘嘅餸菜之一。咁多道餸最正嘅就係花雕雞油焗膏蟹——第一，呢隻膏蟹真係爆膏，蟹蓋同埋蟹身都有好多，第二，蟹嘅味香濃鮮甜，再加埋雞油吊一吊味，同平常花雕蛋白蒸或者粉絲蟹煲有另外一種風味。好可惜蟹宴只係秋冬季先至有，想食又要等下年。…查看更多

之前已經好想去呢間餐廳，收到電郵推介順手訂位。整個下午茶包括一個海鮮頭盤、一個主菜、任食雪糕同埋餐飲，$200以內來講都幾抵。海鮮濃湯——濃湯鹹度適中，最緊要有一定份量嘅料（青口、蝦、魷魚）紅酒燴牛面肉——呢個主菜正，牛面肉十分幼嫩，又唔肥膩。安格斯牛肉漢堡——朋友就點左呢一個，好大個漢堡再加上薯條。任食雪糕——場內有八種唔同雪糕同好多其他配料比客人任食。餐廳美中不足嘅地方就係要早到嘅客人罰企，之前去佢嘅中菜廳都已經試過，所以今次去嘅時候都唔會太早到。…查看更多

去過星加坡同馬來西亞，一直覺得香港唔配有馬來餐廳。點解冇資格？因為香港嘅租金實在貴到嚇死人，相比於星馬等地主打人情味家族生意嘅餐廳，香港嘅餐廳只係利益掛帥。今日去到呢一間餐廳，終於覺得佢係應該要喺深水埗繼續棋穩陣腳，同埋繼續做獨市生意。今日專登坐的士去到附近一帶行吓，近年深水埗最值得留意嘅就係獨立咖啡店，行經好多特色嘅小店，有賣布、有賣雜貨、有小本經營嘅商店，不知不覺就到咗呢一間以星馬裝修為主題嘅餐廳。咖喱雞麵——好香嘅椰汁味，配料食物溫度賣相一啲都唔似茶餐廳，果然驚喜陸續有來。馬來沙嗲——對上一次食到好味道嘅沙嗲就係喺尖沙咀嘅印尼餐廳，印尼餐廳老店已經執咗啦，今次有幸尋獲返星加坡老巴剎嘅味道。炸魚皮（咖喱汁）——魚皮超脆，咖喱汁熱辣辣，口感一流。咖央多士——自己超鍾意食奶醬多，所以呢個多士嘅溫度、同埋餡都係我關注嘅，醬搽得均勻，好滿足。凍薏米水、凍奶茶——完全飲唔到港式嘅風味，咁就啱啦因為我係要姓馬嘅奶茶香味。所以所有嘢都係剛剛好！…查看更多

通常喺元朗食早餐40幾蚊一定搞得掂，仲要飽飽咁樣離開餐廳。永順食店，一向唔係以套餐作賣點，但係始終吸引到好多人去幫襯，究竟點解呢？就係食物嘅質素高到人客都唔介意俾貴啲同埋花多啲時間去等位。今日呢個早餐價值$59 ，只係得兩樣嘢：凍奶茶，炒牛豬扒蟹黃麵，全部都超出水準完成。炒牛肉身幼嫩，調味適中（冇強烈嘅生抽同埋鹽味），筆者通常叫煎豬扒嘅，但係今日唔記得淨係講咗豬扒，換來嘅就係炸豬扒，好好彩都一樣咁好味。蟹黃麵先至係重點，食過好多間茶餐廳佢哋嘅出前一丁多數都係因為趕時間而煮得好硬，喺呢度食嘅蟹黃麵就從來冇試過係硬。凍奶茶就正常發揮👍…查看更多

通常喺元朗食早餐40幾蚊一定搞得掂，仲要飽飽咁樣離開餐廳。永順食店，一向唔係以套餐作賣點，但係始終吸引到好多人去幫襯，究竟點解呢？就係食物嘅質素高到人客都唔介意俾貴啲同埋花多啲時間去等位。今日呢個早餐價值$59 ，只係得兩樣嘢：凍奶茶，炒牛豬扒蟹黃麵，全部都超出水準完成。炒牛肉身幼嫩，調味適中（冇強烈嘅生抽同埋鹽味），筆者通常叫煎豬扒嘅，但係今日唔記得淨係講咗豬扒，換來嘅就係炸豬扒，好好彩都一樣咁好味。蟹黃麵先至係重點，食過好多間茶餐廳佢哋嘅出前一丁多數都係因為趕時間而煮得好硬，喺呢度食嘅蟹黃麵就從來冇試過係硬。凍奶茶就正常發揮👍…查看更多

元朗開雞煲都開咗好多間，今日呢一間雞煲可以講得係比較細規模，但係美味指數佢毫不輸蝕。原本book咗8:15 ，但係發覺原來8:30係會做優惠，所以同朋友一齊等多15分鐘先入去。老闆娘同老闆都好好人，叫我哋早5分鐘入去坐定諗定叫啲咩嘢食。小辣雞煲（半隻）雞煲配菜都好足料，自己唔係好鍾意食勁胡椒八角嘅味道，所以呢個雞煲啱晒我。醬汁調味不太鹹，所以覺得好好味。火鍋配料——牛肉拼盤，炸響鈴我哋嗌左個牛肉拼盤，入邊包含咗五至六款牛嘅部位，份量適中都抵食嘅，牛嘅質素方面，全部都唔太肥膩，入口即溶。呢間舖頭有個特色，飲品方面除咗有罐裝之外仲有一個重量級嘅凍檸茶或者凍檸樂，啱晒打邊爐。平時要飲兩三罐可樂嘅我，索性一次過嗌重量級，一杯搞掂晒，爽！…查看更多

牛扒大餐同朋友慶祝生日，諗住搵間穩穩陣陣嘅，最緊要有得泊車，今日就揀咗The One商場入邊嘅呢間。頭盤——帶子配三文魚子開胃嘅前菜👍師傅冇將帶子過分調味，可以食清楚帶子嘅鮮味。龍蝦湯——好多地方食龍蝦湯一係就太稀再唔係就好鹹，呢間餐廳嘅龍蝦湯係非常濃郁，但係完全唔會覺得鹹。連骨西冷——我哋有三個人，所以叫咗一個三人份量連骨西冷，令人驚喜嘅就係雖然我哋叫半生熟，係有血嘅，但係都容易入口，唔會有好多血肉黐實而令到好難咬。黑松露薯條——我就唔係好號黑松露，但係朋友就好鍾意，薯條炸得好脆，上碟溫度夠熱辣辣。心太軟——基本甜品，冇乜問題，但係性價比就未必好高。…查看更多

青山灣漁港今日同朋友慶祝生日，一致決定去三聖食海鮮。青山灣漁港係間新裝修嘅酒樓，有卡位啱晒四個人，正。沙薑雞腳——上碟嘅時候熱辣辣，一碟有七至八隻，浸得都幾入味。紅燒乳鴿——好正，我哋特登開邊，乳鴿入邊嘅肉汁仲保留得好好，最衰叫左好多海鮮，唔係可以再拍多半隻。海鮮炮製——全部都係水準之上，雖然我哋係叫起佢冇跟我哋嘅指示，但係所有煮食嘅方法都係好好味，完全發揮到自携海鮮嘅特色。尤其係龍蝦，從來未食過咁脹卜卜。砂鍋海鮮炒飯——食晒咁多海鮮之後都竟然仲可以食到兩碗，你就諗到究竟啲碗炒飯可以有幾好食。足料，夠鑊氣！桂花椰汁糕——竟然連甜品都好食，想唔肥都唔得。…查看更多

搭巴士途經青山道成日見到有一堆人喺呢一間舖頭排隊，今日決定一試！時間大概係下晝兩點，好好彩一行三人仲有四人枱。簡單嘅餐牌有四個等級嘅魚生飯選擇，有朋友揀咗最平嘅嗰種「梅」，另外有親戚揀咗「松」。前菜——魚生片，坦白講魚生片就冇乜特別有啲花生醬調味咁樣，釋法指引教我地先食一片，OK嘅，正常發揮。海鮮丼——呢一個魚生山令所有食客都冇辦法招架，個個拎部相機出嚟就係打卡，係誇張嘅，整個山嘅高度同盛載魚生飯嘅器皿差不多高，魚生味道好新鮮，大概有蟹子蟹柳三文魚子貝類帶子三文魚吞拿魚同其他魚類共10至11款，超級好食。手卷——釋法指引教我地將適量嘅海鮮和白飯放在紫菜入邊當手卷食，可惜紫菜唔夠乾身。茶漬湯飯——侍應生幫我哋加咗一碗湯，連埋剩低麻醬嘅魚生放入去碗入面，呢一味最好食。呢一餐十分滿足，終於明白到點解青山道長期出現一對人去排呢一間餐廳。…查看更多

幾年前曾經去過小白鷺餐廳，好耐已經冇嚟過，今日再嚟發覺餐廳已經大翻新。餐廳仲提供一個非常之抵嘅匯豐信用卡專享優惠，今晚嘅晚餐真係物超所值。裝修擺設 - 新淨係要加分嘅，擺設配色都十分令人舒服。金牌釀蟹蓋 - 呢個菜式係大型酒店都食過無數次，但係今晚食嘅係咁多間最大份同埋最多蟹肉嘅。👍菜膽竹笙燉花菇 - 真材實料，冇用味精，花菇同埋竹笙都準備十足。羊肚菌燒大蝦 - 隻蝦真係好大，應該係燒巨蝦，雖則知道隻大蝦可能未必新鮮，但係師傅都整得好好食。蜜餞欖角脆香骨 - 個人最喜歡蜜糖，脆香骨熱辣辣，完全沒有油膩的感覺。蘆筍百合炒時菜 - 炒百合都幾高難度，欣賞師傅唔係一味落油落鹽，蔬菜炒得啱啱好。金瑤蛋白炒飯 - 美中不足嘅地方就係未食完前面嗰度菜已經拎咗嚟，溫度下降左就冇咁好食。楊枝甘露 - 正常發揮。…查看更多