kurufai's Profile

位置：川龍/兆和 交界的那條小巷（之前係「韓X」）時間：接近深宵店舖：新開張兩週，光鮮！座位數量：五至六用餐：蛇羮+家鄉菜飯套餐（小）糯米飯（小）好榮幸能成為貴店第一篇食評 小店係地鐵hsbc天橋落到地位置。開到凌晨12點。好高興我地荃灣人又有個夜宵選擇。價錢牌人手寫，字體唔工整（sorry 老闆 ）但呢個唔重要因為佢地獨沽一味的套餐已經有辦您睇。賣想十分ok！加上本人又凍又餓所以趁新舖人少少二話不說揾番個好位。呢度比較適合兩三人組合用餐。飯菜好快上枱，雖然一早有辦我睇，但第一眼有種跟價錢牌字體好違和的感覺 。有無見過响蛇王店食過醬油撈得咁勻ge糯米飯？臘腸都撈埋入去，仲唔油膩！葱花細切，蛋絲不少，花生亦十分香脆！唔咪未食過，好似响酒樓囉…細蛇羮啲料多到高過水平線，菇、木耳、蛇肉粗粗滿滿。蛇肉彈牙份量唔少，啖啖都要口趙，但唔會有骨仔（聽講有啲係有）。老闆話佢地用福建蛇場急凍落黎，所以依然有新鮮的質感。家鄉菜飯係福建菜飯，有紅蘿蔔乾絲同其他料，記憶中好似有芋頭蝦米，少少ge鹹香，軟滑的飯唔好意思太餓而且跟蛇湯（蛇骨+雞肉煮成）一齊食好好味所以無仔細查看。老闆介紹，佢地廚師係酒店出黎，蛇羮餐的製作方法係跟地道舊派的有分別。原來係佢嗰種「細緻」 跟價錢牌唔夾。老闆話，開張兩個禮拜，家陣午市成日滿座，係入夜對面生果店一閂，巷仔暗左就無人流。佢個價錢，夜晩時段都屬每人40-50的平均消費額，而且敢講菜色味道級數性價比真係無同類供應。所以唔怕無市場也。調味品方面，脆脆同檸葉都有啦，菊花就不應奢望啦！唯一係估計脆脆好似有啲色素，落左羮度有點變黃。一般黎講我真係會收埋唔講，但見你真有需要多啲人知，想揾多啲正能量，見你咁好相與先破例，祝你地大展鴻圖，業主鍚哂你 ！…Read More

過去幾年，經過呢家店無數次，由眼望望決定過而不入，入而不再，到今天心思思又想番黎食，心路歷程係：1. 幾年前佢價格相對貴；2. 佢無供應理所當然的前菜小碟；3. 佢無韓國餐館自助飲水機（當然家陣香港韓式餐館都唔係間間有）；4. 事實真係無乜客；及至最近：5. 隔離貴左，相對佢又唔算貴；6. 呢期世界杯佢將營業時間臨時改成24小時仲有電視睇；7. 宵夜ge小菜的確大件好味夾抵食；8. 員工醒目左好多，老闆一如既往的勤力認真仲親力親為；9. 人真係多左！「唔正宗」係最初唔想入ge原因，飲品唔係無柚子茶，但例牌餐茶真係港式ge咖啡或茶，接受左呢個事實之後，對佢ge港式飲品給予「中上」評分。上次食係上星期：韓式牛肉石窩飯，好足料，蘿蔔絲、牛肉、麻油大豆芽、泡菜、蔬菜、香菇絲（45蚊），宵夜可以12蚊配多個甜蕃薯，連餐飲，凍飲加3。食左呢個石窩飯之後，發現「泡菜」ge泡菜都好好食、麻油大豆芽好香又入味。如果佢有小碟，一樣唔會走樣夾失禮。於是開始接受佢本身特色。琴晩再黎，凌晨兩點多，入去見到7成滿，大部分靚仔靚女（除左我啦！），亦都知道左德國對法國1:0。老細老老實實話，如果你唔趕可以坐住先轉頭點菜，因為依家仲有好多枱等菜上。有波睇無所謂。最後點左上圖嗰個，辣度可自訂，豚肉薄薄的但肥瘦適中香軟，豆腐配上可能係爆香過的肉碎，令到個湯有陣肉香好鬼誘人。豆腐都唔係水汪汪嗰隻，再多少少都唔區，豆芽都好多添。甜蕃薯一點再點就知佢好好食。短期間食兩次，客亦見越來越多，相信佢食物性價比實在係越黎越高，有機會旺落去。但觀乎老老實實ge老細八成人滿都做得咁頻撲，起菜速度未招呼到可能再多的一兩成客，咁除左宵夜唔介意打躉ge客可以常來之外，如何能再應付早午夜飯市ge常客呢？真心的希望佢生意興隆！…Read More

試過觀塘德星ge火煱團購，好欣賞佢大排檔。喜見德星又响土瓜灣頂左譚魚頭個位。地方乾淨闊落過觀塘多多聲！大排檔又大又乾淨！有公司幫佢出團購，緊係入番幾張。註：今次呢個兩小時團購不包生蝦（觀塘嗰次真係好生猛的）食左兩次，好淡爭持。第一次，9點入。大排檔d熟食早在上輪食光，無註明咩菜色，唔補充又無清理，就咁放响枱度，不知情ge我攞左湯汁湯渣，俾侍應調侃一輪，先知原來無得食 早幾日上過去見到豬手、花生雞脚.....呢d，嗰晩全部欠奉！so sad！第二次，早半粒鐘8點半入。收銀員小姐話唔得，張券要準時入機。我解釋早收情況，原來佢話係10點半收食物飲品熄少少燈，但走哂人都仲有看更，坐到11點無問題也！10點半後，真係走淨我一枱、看更、同一間雀局房。俾我地食到11點，又算係對板ge！但係10點半攞定ge任食阿波羅雪糕，又點能等得到最後11點食？個人心目中，德星一向品質最好最穩定的：農場雞件（第一次少肉多血，第二次好好肉好好食）水餃！正！不過叫左第一輪俾得兩舊，第二輪再叫，侍應話無了！大排檔：五香鹽焗蛋（無註明咩名，我幫佢改）/反沙芋（响觀塘見識過）/笑口棗/饅頭/壽包...都好好食！肥牛：有人話肥，我就ok夠大夠新鮮！肉無發黑。酒水：七檸、百事、芬達、獅威是冰凍的駝鳥肉：第一次好新鮮好食，第二次有三分二發黑。（請問有無人話我知點解會發黑？）丸：手打丸都好靚，叫得到的其他丸都俾到，質素ok！（觀塘店有時尾輪都無哂手打）蔬菜：切得份量很好，品種、新鮮度同乾淨程度，好過哂觀塘店（觀塘d蔬菜麻麻地）。糖水：芝麻糊/紅豆沙 得番紅豆沙 好食！但芝麻糊應該更好食。（觀塘店通常响尾輪入坐都無哂糖水）基本上bbb團購形容的食物，响第二輪全部食得到，買相一樣咁靚。地板、廁所都好清潔！服務就充滿人情味，好講互動性（係米好耐人尋味呢？）睇得出部長好緊張食客反應，侍應亦都好肯幫手。拉勻哂俾75分。好希望德星响土瓜灣做落去，事關佢d點心真係俾人食ge！…Read More

幾個禮拜無黎，又想去永發。夜晩八點幾，人比往時多了，未知是否天口慶多左人入黎食面飲啤酒？未入已經掙扎中：食腩河好定香妃雞飯好今日香妃雞輸左，腩河一上枱，哇，份量多到吖？！比以前更甚！見相：註：已經食左兩舊腩同一注河粉，15蚊。食耐左，飽肚左好多，個人覺得佢加左份量。同伴食ge水餃河一樣照舊咁好食，不過都係咁飛象過河，仲想呃我話電視套新戲幾好睇，趁人唔為意偷人地d牛腩食！下一次我一定會食香妃雞飯..再補相片。…Read More

BAKER'S CHOICE 傍晚有八折七折係人都知，但如果想襯呢個時段先買圖中呢隻鮮牛油吉士包，絶對唔係話要就有試過問清楚出爐時間、打電話問職員..有時都未必肯定放工會入到貨。所以有時正價八蚊都要買。講真包本身質感比較乾身，唔係好軟腍同麵粉香，但件鮮牛油配烘吉士，唔會似菠蘿油個菠蘿皮過甜ge通病。趁新鮮咬落去....哇.......有鮮牛油包瘾ge朋友，食過你會明白佢有幾正！另外佢ge曲奇都好鬆化，特別係杏仁片朱古力味，好可惜已經係過去式，但好彩ge話會突然見到佢踪影。另一隻值得一讚ge係瑞士卷，好鬆軟、多層cream。呢隻供應比較穩定。講到底，以本人個人口味，每次黎baker's choice，都要好似撞彩。…Read More

本人唔好牛雜，對於下述兩位朋友的講法不予評價。幫襯左佢好多年，算係熟客，點解今時今日先黎讚，皆因又係無良業主逼我出手。呢間小店唔起眼，舖面窄，光線岩岩好，驟眼睇有d up dup，未必有吸引力，唯一係平。唔係專業食家，唔識形容佢點好法。由食佢個鎮店貴妃雞開始，佢唔肥膩、皮爽、肉滑...到後來逐一發現，佢個碗水餃麵獨有芝麻香兼夾大量爽口木耳兩粒寸長大蝦仁牛腩（其實係牛坑腩）肥廋適中，軟腍酥香...油菜淥得爽脆每次幫襯試下其它口味，都覺得野食做得好好。老闆兼大廚要求認真嚴格，老闆娘親力親為一路睇舖一路湊仔。好多熟客黎呢度睇電視飲啤酒, 氣氛好融洽..向來唔會好似佢其他客咁口花花 側聞佢地個業主狂加舖租（嗰頭d舖炒到周圍大量食肆結左業！）跟老闆娘傾下計，我話你地生意夠唔夠做，唔夠我幫你地响開飯度讚下你地。佢講佢地好多熟客，葵涌、屯門、青衣、元朗都會番黎買淨牛腩、雲吞、水餃、貴妃雞。老闆娘話，佢個湯底除左有大地魚、豬骨之外，亦都落埋雞，建議我有機會要朝早11點零黎食麵，呢個係佢湯底最好味的時候。不過佢建議我米星期六、日朝早，因為d客唔洗番工就會貢黎，出面排哂隊逼實！…Read More

餃子店....淨係食餃子...頂多俾個上海面過你…但係又有好多品種ge餃，唔係過江龍而係本地個體戶小店，咁夠薑緊係入去試試。唔好食都係蝕15蚊啫！特登揾大坂王將同佢比較，於是叫咖喱煎餃，個廚房開放式，見到師傅好有心機咁做，勁在油煙味唔係幾埋身。等左七至十分鐘上枱 ---- 六隻、大件過大坂王將、皮厚過大坂王將，但緊唔係實激激ge面粉feel，至緊要係好香，仲唔算油膩，一咬落仲係脆添！入面個饀仲奇，雖則叫咖喱，之但係佢唔係好黃，唔係叫辣，但係好有咖喱香。入面係加左粟米、蘿蔔粒等等ge雜菜肉碎，加埋適量肉汁，大件得黎一d都唔滯口。係咁就好快食哂，夠哂飽。店內坐得十個客左右，佈置簡潔明朗。空氣都幾清爽流通。夜晩9點幾入坐，客得兩三個。坐左半粒鐘多d，見到1. 食鹽多過我食米ge伯伯（似老街坊）自己叫左個餃子加面，20蚊。2. 一個女客入黎叫外賣。3. 一個女客入黎，都未坐低就已經柯打左個餐。唔洗多分析，呢種現象，假如佢品質無價錢無大改變，會係佢係牛市ge先兆。…Read More

呢間台式連鎖茶店新開幕，做緊特價8蚊！要趁特價多D黎試。柯打時，記得清清楚楚大大聲聲咁同收銀講自己要：熱定凍、凍ge冰度（多冰/少冰/去冰）、糖度（全糖/少糖7成甜/半糖5成甜/微糖3成甜/無糖），加珍珠/椰果/咖啡凍/蘆薈（3-5蚊）。要求多多者落完單即刻check一check單，佢會註明凍熱度同甜度，有錯即改。否則又要收銀煩一輪就揾黎搞。入面5、6個員工好有熱誠，服務態度都好好，好似台灣人嗰種…但係間野生意咁好，真係做到咩熱誠都蒸發哂，兼且唔係好夠電，所以難免有錯漏架。大約有57種冷熱飲品，分7大類：調味茶、世界產地茶、道地台灣茶、拿鐵、奶茶&可可、養生茶、鮮果汁及咖啡。正價最平係細杯ge大吉嶺紅茶，賣8蚊；至貴係所有大杯裝拿鐵系列同埋大杯裝益力多檸檬，17蚊。特價飲品，係「招牌珍珠奶茶」（細杯裝，原價10蚊）/ 「玩火」（中杯裝，原價12蚊）。家陣最抵飲ge「玩火」係調味茶：玫瑰+金盞花+日本煎茶。試過熱ge少糖、熱ge微糖同走冰ge凍玩火。三次ge風味都唔同，基本味道有少少似蜂蜜綠茶。玫瑰味要熱少糖先比較突出。熱微糖同凍反而得番茶味。招牌珍珠奶茶，d珍珠全部都又滑又大又圓少少靭、微微通透。佢話係用雀巢三花奶精，奶精味唔算好重，紅茶味都幾出下，少少鞋口。同輕鬆飲比，後者奶味多D香滑好多兼大杯d la，但comebuy 就強調用美國乜牌濾水器，水質懶係有保證咁。差唔多9、10點，佢d珍珠有時會話賣哂，咁佢就會改做椰果或者咖啡凍。試過咖啡凍奶茶，佢個咖啡凍好香，crossover ge 味道重好過珍珠。係一個驚喜。杯面註明：要一粒鐘內飲用先至最好味，呢句唔好唔信。本人好鬼怕凍，所以從熱飲角度睇，佢杯熱飲真係好夠熱，凜凜北風中竟然可以暖足一粒鐘，雖然始終無煨蕃薯咁好，但係好過熱維他或者熱雀巢囉！下次可能會試：竹山金萱、京都八寶茶、暖薑奶茶同埋葡萄柚綠茶。…Read More

上週，行銅記行到無哂電，已經踩上去IT SPREE，都要飛奔落地面，過對面街、落地庫。幾乎想有乜要乜：新地$5, 汽水+熱狗$10、爆谷$3、軟雪糕$2.5、脆洋葱牛油粟米$6、小杏TART$9。成個「全餐」7道菜夾埋都係35蚊之麻，不過又怕太誇張。收銀員好關心顧客…本來無叫熱狗，但係佢諗諗， 同我講話加3蚊買餐已經多隻。最後都只無要小杏TART同新地。但係勁滿足！樣樣都平令正：爆谷係戲院質素、牛油粟米好過M記，加埋脆洋葱更加香口、軟雪糕都好過M記，比得上富豪；熱狗腸又長又脆又夠熱，加埋汽水（PEPSI、7-UP、DIET PEP）。最緊要係樣樣野都係我飛佛，食完醒番哂！唯一唔好：地方細、枱DUN少，人多起黎，加埋d芥醬/茄汁樽同醬汁响你面前飛黎飛去，分分鐘食得辛苦過掃街。唔怕麻煩拎過去維園食都OK ge。同埋如果多個員工經常洗理下嗰兩張枱就好啦！成日都一dart紅一dart黃咁……Read More

點解夜晩曾經咁好生意，响我過去幫襯過ge經歷都十分好ge好好味，經過一輪裝修，竟然响呢度會一個好評都無？竟然最終還是要結業？？？定係好似我上次佢裝修時ge另一次誤會，只係「疑似結業」？可能基本上本身唔算太挑剔，除非實在係感覺同待遇太差。呢度個老闆仔真係幾好相與，好忙都可以同你講下笑。係試過响人流比較少ge時段，得番一個叔叔企堂，突然遇著我地一大班人，就出現過n次「落一個人柯打、入一張單」 ge情況，我地覺得好慢好哂時間兼夾煩，但叔叔都未覺得辛苦同煩喎。未確定係米真執粒，所以趁唔知係米仲有用。我都講一講呢度我個人最中意同欣賞ge飲品同菜色：青苔特飲+芝士豬扒撈丁，同埋佢ge炒丁。尤其是青苔特飲，唔知自己係米唔算食得好多地方。呢杯青苔特飲，係涼粉+抹茶奶+冰+忌廉上審抹茶粉。佢抹茶味好香濃，就好似築地杯抹茶特飲加涼粉咁你話幾好味？！除左响呢度，其他地方未見過。已經好耐無入屯門，無乜機會再黎呢度，上次專程幫襯，但又賣哂！無影張相留念推介都唔得。佢d芝士撈丁，芝士味好足，又大dull，食埋其他小食就食唔哂碟麵。佢ge豬扒都幾多幾好味。但漢堡扒就鹹左少少啦！佢ge豬扒炒丁都一樣係好香好好味。自己喉痛所以唔敢食得太熱氣，但朋友一點左上枱，自己都唔會忍得，要挑幾注黎食。哎......好好味究竟係老闆發逹上左岸、定係又裝修抑或搬遷擴張、還是舖租逼人?點講都好…都係我ge損失。…Read More

佢豆花豆味唔算足，唔夠公和（深水埗）滑，又都未算好鞋。外賣7蚊一大碗。响荃灣食完夜飯想揾豆花止咳? 得呢度（富華中心同河背街間公和我未試，估計應該早閂）一般開到成12點。一絶！正因為咁，我唔會評佢做：ok 一試無妨！另外試過佢ge五花茶，比較甜，五花茶味唔算好足。講環境，舖面好細但當然係同所有路德圍食肆咁開露天位。快食快閃格。所以憎二手煙者黎呢度食就祝你好運。總結：如果成個荃灣有一間更好ge豆花店，日間時段我會評興記做「OK」甚至「差，一次就夠」！ 夜間開飯時段，我會評佢「正，開飯之選」…Read More

參加一個令女朋友ge生日會，佢同佢條仔係呢度常客。有電視睇，有vip房（三四張大枱共用）。blue ice 15/3、生力細枝22/3、kirin 大枝22。大致黎講係好味架！好似佢地話齋。d粟米真係好好食，好甜好爽唔痴牙，實在好難得！叫左麻辣同豬骨兩個窩，每個40。麻辣聞到好香，我唔食辣但係佢配一dd野，例如麻辣南瓜都ok好食。豬骨湯底都夠鮮味，用黎烚枝竹好好味。肥牛、羊肉一碟大約有十塊，都好完整同大塊，但烚完比較粗身，係咪因為切得比較厚所致？菜，好新鮮好味！佢唔係「自助」形式，而係任你用點菜紙點菜。琴晩平均黎講，前前後要叫四碟南瓜，先得四舊南瓜（一份四至六舊）。粟米就上得幾足，但係如果係咁真係可能好多野都甩單，我地都未發覺。九個人去，每人150。兩粒鐘，未停過手，中間有兩三次「等熟」時間，食完都未算飽咁，番屋企全身同個背包（入面）都有鹹鹹ge邊爐味。…Read More

愛好豆品ge我，成日行經咁大間ge人和，從來都無幫襯過佢…自己都覺得好奇怪。日前行到攰攰地，岩岩經過佢門口，順便入去坐下飲下豆漿試下煎釀豆腐，俾個機會大家。叫左個餐：菜肉雲吞+豆漿+煎釀豆腐煎釀豆腐一上枱，白雪雪，油令令，已經心知不妙。哎....放到入口，熱就夠熱，但個魚肉連豆腐係油浸又煎唔香，青白色ge！豆漿，明明都只係黃豆加水加糖，但唔知點解坊間就竟然有唔同味道ge豆漿。呢間人和，亦都照樣係咁，又係另一種陌生ge「豆漿」味，好難理解！啃完個油淋煎釀豆腐，再飲呢杯豆漿，成個人低落哂！菜肉雲吞，夠大隻，菜好爽，湯稍鹹。OK啦！不過等左好耐先上。一路食一路心諗：難怪自己每過其門而不入，直覺有時真係有用！唯一好處就係：光猛、廿四小時營業；係佐敦道除左M記外ge最佳打躉等人度日ge地方。…Read More

今個中秋有兩名好友，不約而同先後請我地食AGNES B. DÉLICES 出ge「七星伴月」。7粒星型朱古力月餅伴住一粒圓滿滿ge大朱古力月餅。月餅心有四種味道：石榴﹑香蕉﹑黑芝麻及姜都亞鳥結糖；朱古力係黑朱黎，盒內有說明書，講明咩款ge係咩味饀料。第一個朋友請ge我揀左香蕉味，我一口咬哂，流質ge香蕉饀都幾甜下，我食得太快，食完都仲係淨番香蕉味响口度。第二個朋友請ge，我按圖索驥，揾隻石榴味朱古力月餅黎試。今次實行慢慢品嚐，一咬入口，淨係知道d朱古力都幾好味，以後第一啖食到心，好清香ge味（但係第一下係仲未意識到係石榴），慢慢再食…心裡面找尋石榴味道，嗰d石榴味隨住意識加強，亦都越黎越出，小小苦多多甜ge朱古力跟十足十ge清香石榴味結合埋一齊，好陶醉亦都好開心。食完，我跟朋友講：「唔睇張說明書，唔知佢係石榴味係無辦法食得出；但係形住形住咁食，佢就出哂黎！戀愛咪就係同佢一樣咁樣，形住形住，就有架啦！」周圍三個fd都 O哂咀，但呢個係我 真感覺（老實講我仲未响咖啡度feel到）！無計 至於咁樣黎講個月餅係米叫「好食」，就係題外話啦 ！多得呢位朋友，就係呢個「月餅」，我揾到少少戀愛ge感覺，仲贏到openrice ge戲飛添！…Read More

嗰次幫襯三叔，十分急趕，見佢未有食評，自己又食過。咁初步介紹一下。豬扒包：為左證實全澳門ge豬扒飽都係有質素，照例叫左一個食，實在依然係豬包鬆脆，個扒薄得黎好有味，唔會醃得太咸亦都唔係好鞋口。另加一個茶餐，咖啡好香，唔酸。個意粉就見仁見智啦！佢位於氹仔官也街十分鐘路程，如果餓得滯行唔到去大利來或者其他食肆，若非太奄尖者，不妨入去頂住先！都ok架！…Read More