Casey Sze的个人专页

初頭睇呢間餐廳嘅裝修，以為會好貴，但係原來食物嘅份量好大份，同埋質素都好好，喺呢個地段，唔算貴之餘，位置都好方便。燒味飯外賣更加係抵，最平$38都有一個，喺附近返工嘅話，都係一個平靚正嘅選擇。餐廳裝修走傳統粵菜館風格：木系牆身＋中式花格木屏風、金屬吊燈、暖黃燈光、富中式意境嘅畫作、白色枱布、深色椅套、感覺古典又帶少少高級感，氣氛唔嘈，枱距夠開，有返咁上下酒樓格局但比傳統酒樓更乾淨整齊。入口位亦係木質櫃台、玻璃門設計，整體好適合公司飯局或者朋友食飯。🟡 八味一口豆腐外表係金黃色小方粒，一人一口啱啱好。外層香脆、內裡軟滑，配上香辣蒜碎八味粉，好香口。🍍 脆皮鳳梨咕嚕肉咕嚕肉都幾多肉汁、炸漿唔厚、醬汁係偏酸甜、帶光澤嘅果味汁，鳳梨份量足，整體味道開胃又唔會死甜。咁樣講好似將佢講low咗，但係佢口感同埋配嘅醬，食落會有少少諗起麥樂雞，但係係新鮮嘅肉整出嚟嘅版本，有fast food嘅惹味但係又有新鮮食材嘅感覺。🦀 乾逼拆蟹肉粉絲煲呢道係今日嘅亮點之一！粉絲吸晒蟹油、蒜香同醬汁，入口係濃郁海鮮味。面層仲有金黃酥脆炸蟹肉可以撈埋食，口感層次好豐富，而且「乾逼」做法令粉絲乾身，香、乾、入味，蟹肉份量，超級多，冬天食尤其滿足。🍠 香芋紫心丸外層香脆，一咬入去係好香芋味嘅紫薯蓉，內餡綿密香甜。鍾意芋頭甜品嘅人應該會好鍾意。…查看更多

觀塘海濱原來都有餐廳。沿途經過工廠大廈，去到海邊氣氛即刻變得好 chill，好啱坐低慢慢食嘢。Weekend 去，見到嘅客群幾多元：有情侶拍拖食飯、亦有三五知己飲緊嘢傾計，熱鬧得嚟又唔逼人，氣氛算舒服。而且餐廳係 pet-friendly，周圍都有狗狗同主人，感覺幾溫馨。餐廳室內環境偏向 工業風 + casual bar café 感覺：木枱金屬椅、暖黃色吊燈、Bar 枱位置有藍光燈帶，夜晚特別顯眼，整體係輕鬆、有種 semi-bar 嘅 vibe，唔會太嘈，適合同朋友聚下或者輕鬆食餐飯。戶外座位算寬敞，有木椅＋遮陽傘，望住海邊嘅行人道，吹下風都幾舒服。如果鍾意海邊環境，夜晚坐出面會仲 chill。係值得行過海濱時坐低飲嘢嘅地方。🍈 哈密瓜配火腿🥩 燒澳洲羊 T 骨羊 T 骨超大份，配蘑菇、忌廉薯餅、青豆角等，穩陣搭配不花巧。🍮 朱古力心太軟配呍呢嗱雪糕🧇 窩夫配榛子雪糕窩夫亦係超大份，撈埋雪糕食係舒服的甜味組合。…查看更多

🍉 雲映西瓜超幼滑粉紅色沙冰加上一層厚厚嘅奶蓋，加咗細細棵綠葉做點綴，造型超夢幻。真西瓜果肉味，清爽，唔會太甜，係食辣嘢時嘅完美救贖。🐷 啖啖肉燒香茅豬仔髀豬仔髀色澤好靚，外層微脆，以為口感會乾身啲，但食落原來入面仲保留住肉汁，同埋肉質都好嫩滑。伴碟嘅嘅泰式酸辣汁做得好惹味，開胃，為呢道啖啖肉嘅菜式增添咗清爽感。🍜 雞肉乾炒寬河粉估唔到碟河粉係有啲鑊氣，似係重火快炒炒出嚟。河粉係偏厚身款，但炒得唔會黏、唔碎，仍然保持到彈性。雞肉份量多，而且係嫩嘅、唔柴。配料加咗 玉米筍、菠菜、紅椒、甘筍絲，顏色好豐富，整體感覺比一般乾炒河粉乾淨健康同冇咁油。面頭灑嘅蒜碎令成碟變得更加香口。味道方面比較香醬香 加炒香味主導，食完唔覺滯，帶少少甜味調和，唔會太 heavy。…查看更多

十下火鍋位於銅鑼灣登龍街永光中心，入到去即刻感受到滿滿嘅懷舊氛圍：霓虹燈牌、花膠地磚、紅燈籠同吊飾，加上水晶吊燈同迪斯可波，將六、七十年代舊香港嘅味道還原得淋漓盡致。坐低仲覺得似去咗懷舊茶樓或者片場場景，好有特色，傢俬方面，多數係木圓枱配上不同款式嘅木椅，刻意做出 mismatched 嘅效果，令環境多咗份隨性同親切感，懷舊與玩味並存，打卡感滿滿。今次我哋點咗二人套餐，已經非常豐富：大刀手切本地牛頸脊（小）：手切牛肉紋理分明，肉味濃郁，涮幾秒就好鮮嫩。鴛鴦湯底（胡椒豬肚湯 + 木瓜蕃茄鮮魚湯）：湯底係飲得嘅，店員仲會先幫我哋每人𢳂半碗湯再加湯去打邊爐，好貼心。特別推介魚湯，真係有半條大大條已經煎香咗嘅魚放入去煲，魚肉亦都好鮮，可以撈上唻當餸食，唔洗加錢嘅湯底都居然咁足料。花雕醉雞：雞肉好嫩滑入味。十下三寶滑：係鋪頭自己手打嘅墨魚滑、蝦滑、牛肉滑，上面仲鋪咗大量蟹籽，好彩店員好好，主動唻幫我地撈勻再一細粒一細粒咁落落湯，如果唔係就嘥哂啲蟹籽。新鮮手打食落口感同味道真係唔同，係嫩啲彈牙啲。鳳城水餃：啲蝦仲大粒足料過酒樓蝦餃。三星蔥醬爆貢丸：貢丸會爆汁！入面係好香嘅蔥醬湯汁。麻辣鴨血：即食嘅，口感好細滑好軟，浸喺麻辣嘅醬料中好入味。懷舊果皮魚蛋：好驚喜，落湯淥完都仲係有好香陳皮味，而且細細粒，點綴得呢個份量咁足嘅餐好好。蔬菜拼盤：好大盤好新鮮，個餐咁豐盛有菜balance返實在太好。脆炸響鈴：個湯底絕對係要有響鈴吸吓湯食。服務方面非常好，店員不斷幫忙加湯、撇走浮泡、收走吉碟，照顧周到。仲有每日時令海鮮推介，會用酒樓手推車推出嚟，好有情懷，價錢都唔算貴。不過今次我哋二人餐已經夠豐富，就留待下次多啲人一齊嚟試。我哋六點到仲算清靜，但七點開始已經好快坐滿，一直聽到有人打唻book枱，睇唻生意好好，建議早啲嚟或者訂位。…查看更多

位於蘇豪區，餐廳整體以深綠、木色為主調，門口位置設有階梯式卡位，綠色軟墊配木格小几，氣氛有啲似首爾弘大啲文青酒館。內裡係開揚格局，枱距寬鬆、座位舒服，枱上已整齊擺好碗碟同燒酒杯。牆上掛住韓國傳統風格嘅圓形花窗畫，配上柔光燈飾，令成個空間既現代又保留到韓味。靠窗位坐低，可以睇到街景，氣氛靜中帶旺。🍲 Gamjatang + Jokbal + Perilla Oil Mixed Noodle Set（薯仔脊骨湯＋豬手＋豬頸肉紫蘇油拌麵）🥗 前菜前菜已經好impressive，尤其個泡菜，發酵時間、鹽味平衡、辣味層次、口感、香氣同新鮮感都控制得好精準。🫕 薯仔脊骨湯 Gamjatang湯底用菜乾煲成，味道濃郁又有菜香，香港人飲落會覺得特別親切，最唔熟悉嘅係佢份量真係非常之慷慨。飲完店員仲會主動幫你加。天氣開始凍，呢個湯湯料足又健康，心靈同個胃都暖。🐷 韓式豬手 Jokbal皮彈肉嫩、滷得好入味但完全唔會過鹹，膠質感好豐富，係我食過最好食嘅豬手。配生菜、紫蘇葉一齊包住食，油香中帶清新。店員介紹話豬手配嘅醬汁係每日新鮮即整，紅色係韓式辣醬、橙色係蝦醬，最特別嘅係透明嗰碗，係特登為香港人口味設計，味道好似港式燻蹄嗰種白醋酸甜蒜蓉醬，好清爽又解膩。配呢個醬真係有港式特色之餘又好有心思，因為真係好夾豬手。餐廳嘅店員同廚師大部份都係韓國人，居然可以咁完美咁樣製造出呢一個港式味道，好appreciate佢地融入香港所落嘅effort。🍜 紫蘇油拌麵 Perilla Oil Mixed Noodle麵條彈牙順滑，紫蘇油香清幽唔膩，面層灑滿花生碎、芝麻碎同蔥花。豬頸肉凍上，但完全冇騷嘅味，反而令豬頸肉嘅油香好清爽。雖然呢個套餐$900，但份量其實足夠四至五個人食，除開其實好抵。好有心思而又好低調嘅一個細節就係佢啲枱應該係特登訂做嘅，枱面乾淨簡約，係特登訂做嘅發熱桌。冇見到明顯嘅電線同加熱位，但係隔住發熱墊，鍋底可以持續滾住，安全又好睇。枱底嘅電線槽收得好企理，居然仲有內置木櫃桶放餐具——另外加咗一個細節，就係同好多港式嘅餐廳一樣，張枱下低會有一個櫃桶放餐具，韓式嘅乾淨，香港嘅慳位同方便，呢啲細節好睇到餐廳融入香港嘅誠意。🍺 Happy Hour （12:00 PM - 5:00 PM｜10:00 PM - 12:00 AM）draft beer 買仲有得一送一 🍻，喺中環要搵間有咁大空間、咁乾淨，又咁好食嘅韓式餐廳。店員亦好friendly，介紹食物時好細心，仲會主動幫加湯，我爭啲唔記得自己喺香港，呢間餐廳唔旺真係唔公道。…查看更多

香港嘅夜景，即使睇過一千次，第一千零一次睇，依然會覺得好震撼。Odyssée 位於 ICC 101 樓，光是高度與景觀已經足以成為體驗的一部分。嚟之前係想像唔到居高臨下角度望住維港夜景食飯，城市的光影流動於腳下，係一種點樣嘅感覺，整體氛圍靜謐，節奏從容，服務細緻但不拘謹，細節就如侍應介紹菜式，或者係幫手收枱，都有一種好斯文好細心嘅感覺。讓人感覺整頓晚餐就好似一場被精心安排的味覺旅程。🍴 Odyssée Experience Tasting MenuAmuse-Bouche三款開胃小食以長盤排開，如藝術展品。紅寶石色球體酸甜開胃，中間酥皮包著松露忌廉、外脆內滑，右邊一口小卷則香氣濃郁。小巧卻極具層次，好似一場微縮嘅展覽。自家發酵牛油與法包兩座螺旋塔形牛油外型精緻，食落係膏狀嘅絲滑，一款creamy、帶有奶香，另一款喺呢個基礎之上，有一種好似魚仔腸咁嘅辣味，淨係牛油意想不到咁好食，味道超出咗我嘅形容詞。配上外脆內鬆的法包，趁熱抹上，香氣撲鼻，簡單卻驚艷。Burrata CheeseSolliés 無花果、榛子與果醬搭配柔滑的水牛芝士，酸甜與奶香平衡得完美。榛子帶出堅果香，果醬的清新又令整體不膩。擺盤精緻，味道層次分明。French Onion Soup湯色似琥珀深邃。入口焦糖香氣厚重，鹹甜交錯。上枱時伴以一塊薄身酥餅，表面金黃，口感香脆，最驚喜係酥餅居然係叉燒嘅味道，甜與咸、舊與新，係充滿創意嘅一筆。Brittany Blue Lobster 龍蝦肉質緊緻彈牙，配以Bisque忌廉泡泡湯底，味道濃郁而不重。西芹與檸檬令整體更清爽，湯汁帶微酸提鮮。餐具選用石質厚碗，視覺上像自然雕塑，氣勢十足。Threadfin — Bouillabaisse / Clams / Broccolini香煎馬友魚皮香脆，魚肉保持濕潤嫩滑。魚湯底以Bouillabaisse為基礎，濃縮咗各種海洋鮮味。伴碟的蜆肉與嫩綠西蘭花苗平衡油香，味道層次清晰。Seafood Risotto燉飯米粒圓潤、帶微稠感，米粒吸收了蜆同八爪魚的鮮香，青豆點綴其中，增添清新口感。感覺調味並唔多，好似食緊食物嘅原型咁，而且係簡單嘅食材，但湯汁同米飯就融合得恰到好處好好食，低調但高手。US Prime Tenderloin 牛柳外層微焦，中心呈完美粉紅，柔嫩多汁。底層的芹菜根蓉滑順香甜，牛尾汁濃郁厚實。伴碟的是以炙燒椰菜包裹的蔬菜卷，湯汁清淡卻鮮香，襯托出主菜的深度與油香，口感層次豐富。Soufflé — Strawberry / Tarragon / Rhubarb熱氣騰騰的梳芙厘啱啱焗起就送上枱，香氣撲鼻，質地輕盈細膩，texture好似懷舊棉花糖機整出唻嘅棉花糖，就好似食緊雲朵嘅感覺。附上一張說明卡，圖文講解梳芙厘嘅食法，好別緻，係整頓晚餐最夢幻嘅片段。Mignardises最後以一組迷你茶點作結：馬卡龍、果仁脆餅、榛子小撻擺放於印有 Odyssée 字樣的玻璃盤上，如珠寶展般精緻。每一口都有住法式甜點嘅從容講究。Odyssée係一間值得成為一個香港景點嘅餐廳。…查看更多

隱身於厚福街的藍馬商業大廈二樓，爖月串燒居酒屋是一間充滿炭香與木色的樓上居酒屋。木枱木椅、暖黃燈影，以及開放式炭火爐台。 環境比一般居酒屋更闊落，枱距夠闊，氛圍 lively 但唔嘈雜，偷聽到隔籬枱似乎係熟客，同店舖關係仲似乎好好，睇嚟係一間可以去完又去嘅餐廳。晚市嘅串燒仲做緊特價，計返$18有一串，莫講話喺尖沙咀，香港嚟講都好少有串燒咁平。🥢 爖月三點 $168三款前菜擺盤乾淨利落，中間襯以深色長盤，整體非常精緻。磯煮鮑魚：味噌味醂調味，帶微甜香氣；鮑魚質地乾爽彈牙。吞拿魚他他配炸蒜片：吞拿魚魚蓉舖滿炸蒜片，入口滑潤中帶脆香，而且鮮味十足，微辣剛好提味，襯以紫蘇葉與紫菜片，更添清香。月見和牛他他：肉身細滑，油脂分布均勻，拌入蛋黃後滑潤如絲，淡淡甜味同肉香完美融合。🥩 美國肥牛燒薄切肥牛卷成厚實串燒，表面微焦，滲出油脂光澤。用七味粉調味，香氣濃郁，辣味細膩。入口時油花同炭香同時散開，呢種卷法令好薄嘅似都充滿咬感，非常滿足。🧅 蝦夷蔥牛肉串牛肉將嫩滑細蔥（蝦夷蔥，北海道出產，比一般青蔥味道更清爽）緊緊卷起。咬開時蔥汁滲出，蔥香同牛香混埋一齊。牛肉焦香、蔥味柔和，層次分明。🍋 柚子雞串燒雞皮香脆，雞肉嫩滑多汁。上枱時仍熱氣騰騰，肉心保持燙口嘅熱度，代表火候控制得好好。柚子香同辣味微微滲出，好食。🐔 雞皮串燒雞皮燒得恰到好處，一串裡厚薄交錯：厚的煙韌油潤、薄的香脆鬆化。配上細蔥與薑蓉，估唔到喺日式地居酒屋見到呢一種港式嘅配搭，但係雞同薑蓉真係絕配。🦴 牛骨髓串燒用心製作的 Z 形串法，令骨髓份量十足。比一般骨髓更實淨、有咬感，配上微酸蘿蔔蓉減輕油膩，而且有微微炭香滲入骨髓脂香之中。🍳 明太子玉子燒金黃色的玉子燒層層疊起，切面能見到粉紅色明太子。入口即化、texture如豆腐般嫩滑，但係呢個玉子燒又好熱，諗唔到咁熱嘅蛋師傅係點樣整得唔老。🥤 飲品甜品巨峰乳酸梳打：果香濃郁、酸甜平衡，飲一口即時解膩。青檸梳打：清爽簡潔，與串燒絕配。綠茶雪糕：茶香濃厚、質地細滑。曲奇雪糕：曲奇碎脆而香，奶香豐盈。氣氛輕鬆、食物精緻，價錢合理，服務亦都好好，去完一次好明白點解會有回頭客。…查看更多

喺香港想食韓燒，原來只係唔係喺正旺區/連鎖，就可以咁抵，好似炮台山地鐵站出口行5分鐘呢間，成個用餐體驗都好好。炮台山本身係傳統住宅區，非常舒服同本地嘅感覺，用餐體驗比起喺遊客區放鬆好多，另外就係呢區雖然唔算好旺，但亦都有啲人氣，主要係多街坊客，食完行吓啲民生店舖都唔錯。餐廳裝修走地道韓風，黃色金屬櫃加上BANPO發光招牌，有少少工業感。非常驚喜係餐廳播緊係90年代嘅kpop，歌曲好有一種熟悉又陌生、pop得唻又冷門嘅新鮮感覺。韓國人老細非常親切，英文流利，仲識啲廣東話，因為知道客人唔太會識燒，會主動咁幫客人逐碟逐碟燒哂所有肉。覺得餐廳有個幾好嘅做法，就係鋪錫紙，除咗啲肉冇咁易燶，例如啲醃咗嘅肉，因為啲醬汁有糖份，如果冇落錫紙，直接上鐵板應該會即刻燶。另外用錫紙可以將啲油引走，又保留到多啲肉汁，同埋食落去，感覺到肉嘅熱力會好均勻。秘制無骨牛排骨腌製豬肋骨牛大腸牛大腸真係太香，配咗飯我地太睇少自己，以為食燒肉會比較滯，但呢種燒法真係冇咁膩，原來個肚仲有空位。下次一定試$108／位嘅豬五花放題再食返夠本。…查看更多

餐廳設計乾淨簡約，以開放式鐵板檯為主，坐吧枱位可以近距離睇住店員現場燒肉，然後熱辣辣咁上枱。1️⃣ 極上牛舌（2件）＋松果牛舌芯扒（2件）套餐牛舌厚薄切得啱啱好，肉味非常濃。牛舌芯扒𠝹完花真係好似松果，入口出奇地爽彈有咬口，而且肉質更加細嫩，咬落去油脂滲出，送飯等啲油份慢慢滲入白飯，正2️⃣ 套餐B：三重芝士汁和牛漢堡扒（100g）＋微辛蕃茄汁和牛漢堡扒（100g）另外必點嘅應該就係佢地signature嘅呢個芝士汁漢堡扒，店員會即場幫你淋上濃郁芝士，再刨絲，最啱拎唻出ig story，漢堡扒外層焦香，內裡好多肉汁。呢個餐最正係另外有個蕃茄汁版本，因為食到最後多多少少會滯，但微辣帶酸嘅蕃茄汁減低咗油膩感，清新開胃，而且醬汁份量好generous，送飯會送哂成個飯。🍚 配餐每個套餐都有泡菜、日本蛋、味噌湯同珍珠米。以荃灣商場價位計，百零二百一個套餐就有和牛同牛舌，而且份量咁多，好抵食。…查看更多

九龍城新開咗間鐵板燒，睇咗餐牌，算係食過嘅鐵板燒中最平，菜式亦好豐富，新開張唔算太繁忙，食得幾自在。木質牆身配合水泥牆，有少少綠色植物點綴，成個鐵板區設計開揚，坐喺吧枱位可以近距離欣賞師傅嘅鐵板表演。裝修乾淨俐落之餘感覺好輕鬆。🥗 蟹棒沙律套餐以清爽嘅沙律展開。🍣 雜錦刺身刺身新鮮，份量好足。🦐 黃金老虎大蝦鐵板燒蝦係亮點，估唔到芝士沙律醬配咸蛋同蝦頭膏炒埋一齊係咁香口，蝦肉厚實彈牙，外層帶少少焦香，蝦膏味濃，師傅好貼心咁問我地會唔會驚太滯，但係因為太香，我地好輕鬆就食哂。🐟 挪威鯖魚煎得金黃香脆，因為火侯同個花都𠝹得啱啱好，魚肉保持到外脆內嫩，香口之餘食到魚嘅油脂，師傅簡單咁用鹽同黑椒調味，配埋檸檬已經好好食。🐖 日本黑毛豬用鐵板燒出唻嘅豬肉能夠好好咁鎖住肉汁，配上冬菇夾住翠玉瓜，清爽。🥩 美國牛柳牛柳厚切，外香內嫩，肉汁豐盈，牛味濃郁，入口嫩滑，最正係配返煎到好脆嘅蒜片，更加香口。🍚 蟹籽煙肉黃金炒飯炒飯粒粒分明，煙肉香氣同蟹籽嘅啵啵口感加埋一齊，最鍾意呢啲乾身嘅炒飯。🥬 日式炒時菜食咗好多肉類，炒菜可以平衡到成個套餐，而且吸收咗鐵板上面肉嘅香味。🍞煎多士原來鐵板燒仲可以煎多士，薄薄地脆脆地。🍮 甜品最後就係軟滑嘅雞蛋布甸。👨🏻‍🍳 食鐵板燒最開心就係望住師傅煮，好似睇咗場表演咁。餐廳水準唔錯，可能始終宋皇臺站比較靜，餐廳唔算繁忙，所以價錢相當抵，想試鐵板燒又覺得香港普遍鐵板燒太貴嘅話，值得試吓呢間。…查看更多

好鍾意上環嘅九如坊，街道好有特色之餘又唔算好多行人。呢度居然有$158 嘅午市燒肉套餐，有前菜、野菜拼盤、湯、兩款主打肉食，加埋甜品，質素同環境都好好。🥗 前菜 & 野菜拼盤前菜送上泡菜同海帶芽，酸辣清爽，非常開胃。野菜拼盤有厚切南瓜、翠玉瓜、白菌同甜椒，燒完香氣撲鼻，仲帶住少少焦香，夠晒平衡成餐肉類嘅油膩感。🍲 石狩西京魚湯湯底係帶微甜味噌香，飲落舒服暖胃，配燒肉正好。🥩 主角燒肉套餐可以揀兩款肉，我哋試咗：🐖 日本宮崎豚肉：切得厚薄適中，油花分佈平均，燒到微焦邊位，入口多汁又有彈性。🐂 薄切鹽燒牛舌：爽口彈牙，帶少少鹽味，燒一燒啱啱好，牛香十足。另一個餐我地揀咗：🦐 海之極味由北海道帶子同阿根延紅蝦組成，食燒肉時食海鮮最大嘅好處就係自己可以一燒完就食，趁熱食好鮮甜。🐂 日本和牛A4赤身另一個亮點係由日本和牛A4赤身。和牛肉質嫩滑，油脂細膩唔膩口，配埋芥末同柚子醋更突出鮮味。🍨 甜品最後以一球開心果雪糕作結，奶香濃郁，果仁味突出，係完美收尾。以 $158 價錢嚟講，喺上環真係算抵食。環境光猛舒適，午餐時間嚟食都可以慢慢嘆。係同區最抵食之一。…查看更多

位於銅鑼灣 Tower 535 嘅 Couch Club，Couch Club 嘅裝修走年輕潮流風，融合咗日系 café 與歐美 lounge 元素。高樓底設計，加上大面積玻璃窗，光線自然充足，木條與米白色牆身令空間更顯開揚。牆上有漫畫風、雜誌封面、浮世繪海浪圖同潮流燈牌，仲有滑雪板、Cushion 等元素點綴，打造出半休閒、半潮流嘅氛圍。座位有藤椅配皮坐墊，既 casual 又有格調，成間店打卡感十足，好啱朋友聚會、情侶約會，或者一個人慢慢嘆飲品。🍱 便當套餐便當套餐係自選，一次過可以食到多款精緻小菜：木魚湯烏冬：湯底清爽帶木魚香氣，烏冬煙韌彈牙，份量適中。三文魚沙律：三文魚蓉鮮甜，入口清爽，配合少少青蔥更添鮮味。味噌比目魚：魚肉厚實油香，味噌醬帶微甜微鹹，味道平衡。麻醬菠菜：清爽之餘，麻醬帶出堅果香氣，令青菜更有層次。明太子日式蛋卷：玉子燒滑嫩，配上鹹香明太子同魚籽，入口豐富。🧀 蟹黃芝士通心粉熱騰騰上枱，芝士香濃到位，帶少少蟹黃嘅鮮甜，邪惡得嚟唔會太膩，通心粉掛汁力強，每啖都好滿足。🥤 飲品開心果奶蓋士多啤梨奶：顏值高，分層色彩好吸引，開心果帶淡淡堅果香，士多啤梨果醬酸甜，混合後味道幾清新。黑糖烤奶：香濃順滑，黑糖帶微焦甜味，甜度適中，幾有驚喜。🍨 甜品 – 鯛魚燒芭菲打卡必點！一大杯芭菲配上抹茶雪糕、熱辣辣Custard餡嘅鯛魚燒、粒粒紅豆同水果，層次豐富。抹茶雪糕茶味濃郁，唔會過甜，食到最後仲保留清爽感，係一個完美嘅收尾。唔止打卡好睇，味道同心思都有水準。氣氛好Chill，亦唔算貴，係銅鑼灣區一間值得重訪嘅 Lounge 式日式餐廳。…查看更多

Bistro Bon Bon 位於佐敦庇利金街，裝修走輕奢風，初時以為只係一間打卡餐廳，但用餐後完全改觀。餐廳菜式有心思又具創意，味道搭配細緻，水準相當高。當晚我哋點咗兩份 4 Courses Dinner Set，由前菜到甜品都充滿驚喜。🥗 前菜松葉蟹肉春卷 一上枱就聞到熱氣香氣，金黃外皮薄脆到幾乎入口會「辣嘴」。內裡塞滿清甜嘅松葉蟹肉，還特別加咗紫蘇葉，入口鮮香層次分明。賣相亦特別講究，綠葉點綴透出春卷皮，好睇又好食。布拉塔芝士配小蕃茄漬 布拉塔芝士雪白飽滿，切開後奶香四溢。底層鋪滿新鮮沙律菜，上面配酸甜漬蕃茄，再淋上黑醋同柚子蜜。單食蕃茄會略酸，但配搭濃厚柔滑嘅芝士就剛剛好，既清新又平衡。🍲 湯品雜菜湯 以番茄為基底，酸甜清爽。湯中蔬菜切得細緻，入口柔軟帶點天然甜味。色澤鮮紅，熱呼呼嘅口感，飲落舒心暖胃，為主菜作好鋪墊。🥩 主菜澳洲草飼 M4 牛側腹肉（12oz） 牛排切件厚薄適中，肉質嫩中帶韌，咀嚼感剛剛好。牛味濃郁，表面灑上香料同碎果仁增添口感。最大驚喜係配搭嘅沙嗲汁，香濃惹味，東南亞風味同西式牛肉結合得非常出色，為整道菜畫龍點睛。澳洲羊頸柳配腐乳羊肉汁 羊肉切片粉嫩，口感軟滑，配上炸至香脆嘅羽衣甘藍，增添清爽對比。旁邊細小銅鍋盛載嘅腐乳羊肉汁堪稱靈魂，入口有點似蟹黃或奶黃嘅濃香，帶少少甜辣，卻唔會蓋過羊肉本身味道，反而提升咗層次，見到廚師對醬汁嘅用心調配。🍰 甜品芝士蛋糕配烤焦糖蘋果片 外表簡潔樸實，但口感卻有驚喜。底層厚實綿密，上層接近奶凍般柔滑，層次分明。配搭烤焦糖蘋果片，酸甜味中和咗芝士嘅厚重感，即使已經食得好飽，仍覺得輕盈可口。☕ 飲品咖啡（Long Black） 入口厚實圓潤，果酸明亮，回甘清晰，餘韻悠長，飲到最後依然順口耐飲。朱古力風味紅茶冰涼上枱，但朱古力香氣依然突出，與紅茶清香結合得宜，香濃而不膩，特色十足。…查看更多

餐廳外牆係石磚紋理，加埋大玻璃落地窗同暖黃色招牌「Lizto」，夜晚光亮感覺好 welcoming，仲有戶外細細張圓枱木椅，方便 casual 坐一坐。入到去主調係木系 + 米白色，搭配柔和燈光，好溫暖舒服。座位設計有弧形卡位同散座，既啱朋友聚會，又啱自己一個人慢慢嘆杯咖啡。開放式 bar counter 可以見到咖啡機同甜品展示，乾淨簡約，整體 vibe 帶有 日系簡約 x 北歐 café 風格，氣氛 lively 但唔嘈，chill 之餘又適合打卡。🥩 牛臉頰肉意大利飯 —— 必試！牛臉頰肉炆到超級稔軟，用叉輕輕一撥就散開，入口即化，肉香濃郁帶膠質感。意大利飯吸滿牛肉醬汁，米芯保留微咬口，濃稠而不膩，口感層次好豐富。🎃 南瓜忌廉湯 —— 色澤金黃，南瓜嘅天然甜味，忌廉質感幼滑，飲落暖笠笠。🍟 香草油炸薯條 ——最驚喜係配醬！除咗沙律醬，仲有一款紅色甜辣醬，味道似印度餐廳常見嘅醬料，拎嚟點薯條幾特別，好有心思。🧀 千層麵 —— 芝士控天堂！層層意粉片同肉醬緊密結合，面層芝士焗到金黃微焦，入口軟滑 creamy，仲有拉絲效果，芝士味香濃卻唔膩。🧀 吉列莫薩里拉芝士條 —— 外皮炸得金黃脆口，一咬即爆出熱辣辣流心芝士，鹹香邪惡。環境靚、氛圍舒服，食物水準都好有驚喜。推薦牛臉頰肉意大利飯，千層麵同芝士條亦係芝士迷必試。成間餐廳無論打卡定慢慢坐低食餐正嘅都好啱。…查看更多

跟米芝蓮《香港澳門指南 2025》必比登推介排過佐敦本店，的確值得排，心服口服。新開嘅中環士丹頓街分店，將本店人氣帶入 Soho區，環境更有格調：灰水泥牆、霓虹燈牌，日頭係地道泰式大排檔，入夜後搖身一變成泰式酒吧，供應雞尾酒、甜品同冰沙，好有泰國夜市 vibe。餐廳主打地道泰國街頭美食，概念同泰國名店 Thongsmith 相似，都係將街邊風味升級成型格餐廳。據講絕大部份食材同調味料都係泰國入口，還原正宗泰味道。🍤 虎蝦醉貓炒河 —— 河粉夠鑊氣，香得唻又滑溜，帶少少辣，虎蝦大隻鮮甜，入口啖啖滿足。🍜 和牛船麵 —— 招牌之一！濃郁湯底加上南薑、芫茜、炸豬皮，襯托出和牛嘅軟嫩油香，食完齒頰留香。🥬 飛天通菜 —— 蒜香同辣椒味道恰到好處，清炒爽脆，簡單卻最能突出泰式家常味。🍨 泰式椰子雪糕 —— 香甜清爽，冰涼解膩，啖啖新鮮椰子肉，食完重口味炒河同船麵嚟一球啱啱好。🥥 椰奶沙冰 —— 打得好綿滑，椰味濃郁，清涼消暑，好有夏日泰國街頭 feel。…查看更多