langweilig13's Profile

今日傍晚經過灣仔，想食素，馬上openrice睇下有咩餐廳，揀左呢間。位置在灣仔同銅鑼灣中間，都幾唔就腳，睇下味道係咪值得咁行過黎。食物：1. 羅漢齋炒麵諗黎諗去，都係食羅漢齋穩陣，有菜有菇，脆麵底一定無得輸。熱辣辣上枱，麵夠脆，調味夠，足料好味。啲菇真係炒得好香！2. 腰果露侍應話好多人特登叫外賣，好受歡迎。味道係幾純正，唔太甜，但亦唔算好濃。可以一試。服務：我去到，成間舖得一枱客，安排我坐在一邊沙發位。問題係天花個冷氣滴水，我食食下先發覺，滴到隔離menu都濕，接受唔到囉。服務更古怪，我叫一個炒麵一個甜品，侍應問我係咪一齊上。你覺得我食得邊樣呢？於是我叫左遲上，喺我食緊麵途中，佢再問左我兩次上得甜品未。我喺呢間餐廳共只係食左35分鐘食物ok，服務同環境就好需要改善啦…Read More

今日天氣極好，而且好熱，所以一早已經諗好要嚟食呢間小滿定律。叫咗個杯裝跟3個toppings。我就叫咗芝士蛋糕、咖啡曲奇同藍莓配蜜糖醬，朋友就叫啲fruity啲嘅，有藍莓、海鹽脆脆同埋蘆薈，配熱情果醬。因為天氣太熱，所以融得超快😕但無損佢嘅味道，好creamy好滑，yogurt酸甜味恰到好處。啲toppings 同醬就無乜特別🫢，但海鹽脆脆佢俾左好多塊。每次嚟西貢都要食佢呀🤣…Read More

第一次食係因為咁啱閒日早咗收工、剛剛買到。因為實在好好味嘅關係，今日放假再嚟買，不過今次要排隊。餅店每日有幾輪出爐時間，可以上FB或IG睇，費事摸門釘啦。不過啲時間12點，3點，6點，唔放工都好難買到。北角嘅街坊真幸福。今次準備充足，排左半個鐘到我。每人限買4個咋，如果屋企多人，記住叫多個人排。上次食咗原味同芋頭味，今次四個全部都買曬芋頭味😆買返屋企嘅話，記得食之前要焗一焗呀！我用氣炸鍋返熱，焗到個包脆一脆，布丁熱辣辣！原味都好食，不過芋頭味更佳！啲布丁動L動L，中間流心，奶香味重但唔會過甜，簡直係一試難忘！絕對有質素，想再食。…Read More

入西貢梗係要食海鮮，食海鮮我首選勝記。睇曬成本menu，好多都無寫價錢，係海鮮價。上次嚟食過佢個二人餐，一於再食。1）白灼海中蝦：新鮮嘅蝦，白灼係最好嘅品嚐方法。啲蝦好鮮甜彈牙，配埋少少辣嘅辣椒豉油，唔鹹得嚟又食得出鮮甜味，正！2）脆皮滑金磚：脆皮一啲都唔油膩，稍嫌厚咗少少🤏豆腐好滑3）自家製酒糟粉絲蒸帆立貝：食唔出個粉絲有咩特別，不過佢無灒啲油落去，所以比較清而且唔膩。帆立貝經細心處理過，無咗裙邊、腸、同埋好硬嘅嗰舊肉，非常好👍🏻4）椒鹽鮮鮑魚：味好唔鹹，鮑魚亦都係新鮮嘅，亦都唔算細隻👍🏻不過如果佢地再洗乾淨啲隻鮑魚就更好。5）金不換炒蟶子皇：蟶子唔老，好嫩而且有鑊氣！好鮮甜，連啲配料（洋蔥同青椒）都好好味。6）芝士波士頓龍蝦配伊麵：我勁中意食芝士伊麵，呢個配搭真係好好！龍蝦比上次嚟食再大隻啲，呢道菜性價比高，伊麵索曬啲汁，又入味又彈牙🤤🤤🤤7）上湯浸時蔬：清湯浸白菜仔，一人幾條菜已經食完，無咩特別。8）自家製甜品：三舊糕，分別係桂花糕、益力多糕（無食錯的話）同埋柚子糕，三款都無咩特別。店員服務唔係特別殷勤，不過都會幫你換碟、斟水、俾多幾張濕紙巾。之前嚟西貢有試過啲乜記乜記海鮮，同呢度真係完全無得比。勝記嘅海鮮真係新鮮，煮得真係好食啲。不過二人餐加價都加得幾犀利，早一兩年都係800幾，今日再嚟食就$12xx😵‍💫都真係算幾貴，所以都係呢間嘢無乜客人嘅原因？不過平得嚟嘥quota 同貴得嚟好食，我傾向揀後者😬…Read More

呢間cheesecake factory開咗一段時間，今日嚟食佢個happy hour tea set。人大咗食甜嘢嘅quota越來越少，所以兩個人只係叫一個cake set同一杯飲品。Original cheesecake：見佢最多人推介，order咗一件，有cream伴碟，啲cream好甜，所以無夾住嚟食。cheesecake比我想像中鬆散，唔夠實淨。芝士味亦唔重，個餅底有啲香料味，整體味道ok。佢個happy hour tea set其實幾抵，$77一件cake加茶或啡。下午茶可約埋三五知己嚟食。服務都幾好，侍應都好responsive。…Read More

揀咗喺唔駛排隊嘅時間嚟，下次再嚟可能要排好耐隊，所以今次就叫曬全部想食嘅嘢：1. 麻麻辣辣口水雞($88)：少少麻，啲雞肉粉紅色，骨有血水，如果煮熟啲就更安心。2. 涼拌萵筍絲($58)：蒜味濃郁、口感爽脆清新。不過可以少啲鹽。3. 姚姚酸菜魚($278 + $58 + $38）：叫咗二人份量，再加咗巴掌牛肉同寬粉。湯底就揀咗少辣，唔算好辣，亦都唔夠麻，下次可以叫中辣。湯好香，酸得過癮，下次可以揀少鹽。選用新鮮魚，魚肉好滑，無乜骨，亦都唔易散。牛肉好有牛味，不過份量稍嫌唔夠喉。寬粉彈牙，加一份僅僅夠兩人食🤭4. 紅糖糯糍粑($58)：糍粑唔煙韌，係一舊粉團咁，有啲油，食剩咗兩塊，下次唔會再叫。5. 彩虹烏龍冰粉($48)：呢個非常好味呀！冰粉係少甜烏龍茶味，好清新，就咁食都好好味。配埋啲花生碎、芝麻碎、提子乾、酒釀、紅豆、椰汁，夾埋一齊食口感複雜，既有花生嘅香口，又有酒釀嘅酸甜，又有提子乾嘅煙韌等，實在好好味！唯一唔好係嗰啲白色珍珠，無乜嚼勁。但我下次嚟一定會再叫呢個冰粉😋睇到呢度，你見到我講咗咁多次下次，就知我已經打算再嚟食🤤希望下次嚟唔駛排隊啦～…Read More

訂咗枱一早就嚟食，全場得兩枱，不過店員都提醒我地用餐時間只係75分鐘。Okay，一坐低我就好有效率咁揀咗個夏季限定午餐。1）湯-凍海鮮蕃茄清湯：係鹹嘅蕃茄味水，仲有啲橄欖油半凝固咁浮喺面，隻湯匙一「不」落去就痴曬啲油。所謂海鮮，亦只係有兩片薄切帶子。2）頭盤-八爪魚法式凍批：呢個味道都ok，有蝦有八爪魚，係啲啫喱一叉落去就爛曬咁啫。3）油甘魚薄切•梅酒漬車厘茄：呢個係額外再叫嘅，好腥，食兩塊已經唔想食😵‍💫4）黑松露薯條：呢個都係額外叫嘅。薯條唔係自製，係批發嗰種，不過勝在炸得夠熱夠脆，個黑松露醬就係一般嘅味道。個盤有啲似俾寵物食飯嘅兜😅5）主菜-安格斯牛柳：只得五成或全熟揀，點解呢？anyway，揀咗五成熟，牛柳都好味，唔韌。啲椰菜花就普通，南瓜蓉同香草牛油偏甜，但可接受。6）主菜-冬蔭大虎蝦海鮮意大利飯：都幾特別，有濃郁嘅冬蔭功味，不過有啲鹹。海鮮除咗一隻虎蝦外，其餘應該都係急凍貨。7）甜品-薰衣草雪糕配熱情果慕絲：雪糕有淡淡嘅薰衣草味，唔甜，配埋熱情果mousse，好清新，唔錯嘅～ 成本有好多去咗啲裝飾花度8）係無第8嘅，呢個$398午餐係無跟飲品，要飲品係要加錢嘅🙈個餐嘅份量唔算多，我加埋薯條先夠喉。環境係幾好嘅，望住個湖，不過見唔到小白鷺😅 服務嚟講，我見到一位侍應喺水吧無戴口罩，仲要用手捽鼻捽眼、再戴返好個口罩、再去傳菜😵oh no.. 我接受唔到! 而且某幾個侍應個身都有煙味，係咪我聞錯？總括而言，普通，唔好太大期望。…Read More

千里迢迢入到嚟大埔，見啲x周刊x假期推薦大埔美食，總有佢上榜，唔係唔食呀？1）燒賣：係一舊粉團，完全食唔到魚肉嘅味道，但係有魚骨! 相信佢真係有魚喺入面嘅😓可惜真係極唔好味，買咗十粒，食剩五粒，都費事嘥quota🥶2) 粉果：十二蚊三粒嘅粉果，阿姐竟然送多一隻俾我，所謂阿婆走得快，一定有古怪🤨佢撩咗幾粒上嚟，又掉返落去，揀嚟揀去終於揀咗四隻。一試，哇！原來皮又硬又爛又乾，一啲都唔軟滑煙韌，又無乜餡，而且餡料亦唔香。配個辣椒油，得個辣字唔香。失望！！搭綠的嘅時候同local司機大哥傾計，佢都好認同其實係出面啲人吹捧到好好食👀總括而言，好中意食燒賣嘅我，對呢間嘢極之失望，一定no next time 👋🏻…Read More

開宗明義講一句：唔會再嚟食！今日第一次嚟呢度食點心早茶，亦係最後一次。唔講咁多，即嚟食評：1. 櫻花蝦脆網腸粉：個脆網極油，油到唔脆，腸粉皮好厚，蝦差不多食唔到😵‍💫2. 山竹牛肉球：一籠四粒，街邊貨色，無牛肉嘅感覺，底下墊咗啲腐皮碎，有少少油益味😵‍💫3. 豉汁蒸鳳爪：好鹹😵‍💫4. 稻香蝦餃皇：一籠四隻，有一隻塊皮爛咗，皮好厚，蝦唔彈牙😵‍💫5. 川汁抄手：又係好鹹，皮好厚，啲抄手又係街邊貨色，errrr，可能街邊嘅都好食過佢😵‍💫6. 鳳爪排骨飯：唐記都好食過佢，好離譜😵‍💫7. 蟹籽春蛋燒賣：呢個擺得入口嘅，算係無咁難食啦，但都無咩特別。總結：話曬我都係惜食之友，自己叫嘅就算唔好味都會盡量食曬，呢個真係搞唔掂，非常抗拒再食，所以最後都仲有剩😵‍💫相都無咩點影呀，唔會再嚟👋🏻 如果大家只係想觀摩下點樣自助沖茶，睇相就得，唔駛去食咁睇唔開…Read More

等～寂寞到夜深～呢間鋪頭五點鐘開，我五點鐘嚟到，人龍已經有一個圈😑😑喺鐵皮屋下等咗一個鐘！無風扇，一滴風都無，汗流浹背！可惜，入到去仲要等多八個字先有得食😵‍💫既然等咁耐，一定要叫曬全部出名嘅嘢食！1）酸辣米線：聽聞係逐煲煮，係幾濃味，但都係一碗酸辣米線咁嘅味2）炸雞球：似日式炸雞，想點沙律醬3）炸蝦膠豆卜：炸到勁脆，小心刮損個口4）野菌腐皮卷：好味，腐皮有豆香，入面啲菇好香5）腩肉、豬軟骨：either好肥或好柴總結：味道ok，但絕對唔值得等一個鐘頭八個字去食佢離開嘅時候，人龍依然好長…… 大家真係知道自己排緊乜？…Read More

荃灣！我最愛嘅美食之區之一！無實力嘅食店真係喺荃灣站不住腳。今日嚟食呢間人氣cafe，唔知佢點樣喺荃灣站得住腳呢？1）Expresso Tonic：好飲！層次分明，上層係咖啡，下層tonic water，唔知佢用邊隻tonic water，酸甜好味，唔知可唔可以自己複製到呢？😝2）日本櫻花蝦蟹肉蘆筍扁意粉：好食！櫻花蝦好香口，唔油膩，蟹肉份量唔算多，不過都叫做有肉眼可見嘅份量，個意粉掛到汁，味道恰到好處！3）自選吐司：呢片吐司啱我口味，酸種面包好有彈性、煙韌。我揀咗炒蛋、牛油果醬同慢煮安格斯牛板腱。個牛肉好出色！好有牛味！正！4）Dirty Tiramisu ：呢個就普通啦，個餅底唔夠酒味，無索到酒所以仲係硬硬哋，整體頗甜，啲朱古力醬同Oreo 可以唔駛加入去，但份量都幾足。食物質素唔錯，不過環境就有啲逼。呢間cafe絕對可以返cheuk！…Read More

長洲之旅第四站，行到好攰，見到呢間新開café，無乜人，唔駛等就試下啦！1）紫薯芋泥肉鬆吐司：餡嘅量無想像中咁多，芋泥質地比較稀，唔夠飽滿，溝埋啲肉鬆都ok嘅。吐司烘得唔夠脆，可以再烘耐啲。2）香茅檸檬味巴斯克芝士蛋糕：店員落力推薦就試下，頗甜，質感軟滑，食完個口十分驅蚊。3）中央開花三十目：err，隔咗一陣再打食評都幾乎唔記得咗佢咩味，大約係酸酸甜甜咁，上面有啲cream。4）星空之柚：簡單嚟講就係一杯柚子梳打，加上紫色蝶豆花水，同埋勁多乾玫瑰花瓣同星形糖，上面隻蝴蝶係食得嘅，但我無食。非常少女心，但味道就係柚子梳打。兩杯嘢飲都有好多糖星星…影相打卡係一流嘅。店員幾殷勤，服務都幾好。環境都舒服，唔算逼，廁所乾淨。…Read More

之前睇訪問見過呢間小店，難得黎長洲一於試下。午市嚟到都要排一陣隊先入到去，一坐低就叫咗幾款特色餃子，每款四隻嚟試一試味。1）蒸蔥爆牛肉餃：有蔥同牛肉嘅味道，都幾夾幾juicy。2）半煎炸印第安餃：微辣，洋蔥肉餡，有一股香料味，但成隻都係炸嘅，只能說唔係好啱我口味。3）半煎炸黑白土匪餃：模仿土匪雞翼嘅味道，即係孜然味，係少見嘅雞肉餃，不過都係炸得好勁。4）煎惹味咖哩薯仔餃：係exactly將咖哩薯仔放入隻餃咁嘅味道，味道好味，煎得唔脆又好油。5）蒸蜆肉芫荽餃：呢個係好驚喜，好出色嘅餃！好清新，唔需要點醋點豉油，就咁食都好好味，蜆肉清甜無沙，加埋芫荽味道好夾！因為係咁好食，就留到最後先食，無咁熱都唔會腥，係幾唔錯！6）腐竹薏米糖水沙冰：幾好飲喎！名副其實將個糖水雪凍打冰呀！整體嚟講，蒸好食過煎或半煎炸，半煎炸太油膩了！食兩個已經夠皮。環境嚟講，要有心理準備，超逼！得幾張枱，雙人枱逼到連腳都坐唔入咁滯，一啲都唔好坐。不過佢每張枱都放把風扇仔，環境都無咁侷。…Read More

呢間嘢嘅裝修充滿住鐵漢柔情，有龍珠又有九十年代女神，真係曝露年齡系列呀😅 食物方面，是咁的：1）桂花蜜漬車厘茄：估唔到份量咁少！約十粒車厘茄😳 漬物唔係醃嘢咩？呢個好似係將啲桂花蜜淋上啲切半嘅車厘茄，無醃嘅感覺。不過啲車厘茄都幾新鮮嘅😅2）脆脆平安包：係炸過嘅流心奶黃包👀特色係平安兩個字，長洲嘅感覺即刻湧出嚟。味道不錯，無炸過龍，係真。流心3）串串金蠔：係一般金蠔嘅味道再加啲桂花蜜，整體偏甜。六十幾蚊一串，值唔值就見仁見智4）酥炸墨魚嘴：脆嘅，但有啲雪味，唔夠新鮮5）霜降一口牛：淋滑，不過無牛味。6）五花腩肉：薄薄一片，無咩特別。7）翠肉瓜：好juicy的三片。8）豚肉秋葵卷：秋葵好味。整體感覺就係一般嘅串燒店，似乎蔬菜類比起肉類處理得更好。大部分串燒都係加孜然粉。小店有好多item未試得晒，都叫有創意嘅。總括：係食情懷嘅…Read More

每次嚟長洲都會去啡寮，但唔係次次嚟都有得飲椰青冰滴咖啡。上一次嚟店長話啲椰青唔靚，所以無得飲。今次再嚟，所謂念念不忘，必有迴響，終於有啦！我同朋友都叫咗椰青冰滴咖啡，不過兩個椰青嘅椰青水味道唔一樣，所以兩杯嘅味都有啲分別。一杯甜啲，一杯青啲。我嗰杯嘅椰青水就無咁清甜，所以無咁好飲。不過整體都係唔錯，好解渴又好透心涼！咖啡味同椰子味平衡得幾好，每次嚟都要飲佢呀！上次黎試過佢個菠蘿冰滴咖啡，酸酸甜甜好解渴，仲飲到少少果肉，非常好味。下次可以再試下其他。…Read More