Twinkle_vi's Profile

小妹自成為人妻後，因為工作關係都比較少煮飯，大部份時間都去食同區不同的黃店。這次來到告急的溏串小町，限聚令有延長至農曆新年初六啦，食肆都錯過了聖誕新年黃金檔期，唯有出優惠外賣或跨區團購嚟幫補一下。小妹路過見到有一個全日外賣餐好抵呀， $88外賣壽司盒，有成12件咁多呀，本想多叫一個火炙壽司盒只不過係$98咋，來叫咗一個三文魚刺身10件$88 ，就成了兩口子的晚餐。小店都仲有好多選擇㗎，歡迎小黃人去面書睇下佢個全日外賣午餐啱唔啱食。小妹唔逐件評論啦，𩶘魚有少少筋，同埋小妹唔鍾意食吞拿魚赤身，總括嚟講味道同價錢係性價比超高，好過食x鮮鱒魚生，黑心既x尚或小氣啦～夜晚禁堂食令又點，小妹相信真香港人都會一樣咁支持良店的…Read More

停左一排寫食評，㸤完小妹嘅人生大事，會開始陸陸續續清返之前嘅食評債，謝謝各位同路人食評家等我喔！限聚令同埋六點後嘅禁堂食令搞到好多黃店都告急，呢一次特別為北極光Aurora 出山，因為情況實在非常緊急。小妹之前應承咗朋友過去幫襯，但原來六點後係冇西餐食㗎 ！所以買咗啲串燒返去食，味道真係驚為天人，同以前北上路邊攤既重口味（而家冇得北上去，更加唔會過去食嘢啦）係一模一樣㗎，估唔到食返呢一種味道！蔥蒜重勁香菜、麻辣味道樣樣齊！亞士厘道真係好恐怖，小妹嗰晚同朋友過去，條街行人真的十分零落。想起以前和朋友happy Friday，酒吧去完一間又一間，凌晨兩三點都好熱鬧，想起真的令人心酸。2020年酒吧經營嘅日子真係少過100日，正苦唔封關，酒吧迫埋單，唔係咁嘅話餐廳喺呢個地理位置係幾好的。所以隔個禮拜過嚟食西餐兼慶祝生日，仲訂咗烤脆皮西班牙乳豬食😋，想食嘅朋友記得提早三日預訂啊如果唔係即場order係未必有得食嘅。我哋仲叫咗兩個lunch set，有黑毛豬寬條麵，海膽吞拿魚魚腩蓉丼飯，西餐配南瓜餐湯，日式配茶碗蒸同味增湯，這間西日餐廳滿足晒心多多的小妹。豚肉意粉勁好味，夠稔唔會um, 配手工意粉同薯條份量夠曬，個汁令人飽得來又唔會太滯。再嚟係海膽吞拿魚腩蓉丼飯，佢個飯已經係醬油飯唔使自己加豉油，除咗擺盤靚外，用料亦非常新鮮，小妹非常怕食三文魚子因為萬一唔新鮮就好腥，但呢度係鮮甜既，值得一讚👍🏻因為三文魚子係難保存同埋食用期係非常短。脆皮乳豬1/4 隻要預訂，所以味道小妹是有期待的，果然味道不負所望，外皮脆口，肉Juicy ，有肉汁，不愧係招牌菜之一～ 小妹同朋友慶祝生日，餐廳冇收切蛋糕費，非常開心同埋驚喜，即刻比多左小費👍🏻由12點坐到2:30期間 ，中間午飯時間只係Full 過一陣，小黃人記得多多支持，一起共渡時艱。…Read More

小妹有一個好姊妹食齋，所以間中都會同佢去搵一啲特色嘅素食店。這間顏色認證嘅走肉蔬食研究所睇佢嘅Menu已經覺得好吸引所以就去一探究竟。先有茶餐廳系列嘅紅豆冰，係各式各樣嘅紅豆冰，真係堅正！睇咗每樣都覺得好新奇冇人都好想試吓但係無奈胃口有限點兩樣最想食嘅嘢啦，餐前嘅小食同湯係任裝，而且都好好味好開胃，未食午餐嘅小妹睇到餐牌更加肚餓，本來想叫個未來鐵板餐，但睇睇下煲仔飯又好似好好味所以就決定同朋友商量一下食乜好，因為乜都想試下。早黎既晚飯時間都要等下位，等左30分鐘左右入得～但係附近餐廳都係未坐滿嘅如果無耐心等嘅朋友可能已經去咗光顧第二間餐廳🧐等嘅時候又周圍望吓睇吓附近嘅小店手作仔其實時間都過得好快。佢哋嘅服務形式係咁既，先點餐付款然後攞個遙距器到自己位，個遙距器着燈就可以出嚟攞餐啦。出邊仲有不同嘅餐前小吃同埋糖水+檸水可以任添任食。全部小吃都非常開胃好味，食到差啲唔想食正餐（講笑哈哈）話咁快台式滷味拼盤就已經到咗，滷水汁比港式嘅甜，蘿蔔同豆腐好味，其他一般當然係唔夠肉食嘅大腸好味啦，個汁好香可以攞嚟送飯。話咁快煲仔飯就嚟咗，係窩蛋牛肉煲仔飯～個飯好香豉油汁好好味，蛋同素肉伴飯好正，上枱時熱辣辣，真係好有煲仔飯風味！！個飯話咁快就食晒，平日唔食牛，所以嚟到素食店點都會點一樣牛既菜式，但真係估唔到幾好味。我哋食完飯坐左一陣已經要快快交枱，因為仲有人等緊位，臨走時喺門口發現佢哋有自家素餃的宣傳牌，買咗一包芝士黑松露餃（一包有10粒）返去試吓，估唔到有幾好味喎下次可以再試吓其他味道。…Read More

和朋友到九龍灣辦事，本身諗住去食大渣哥，但係因為餐廳有乘客懷疑中咗武漢肺炎，餐廳關閉做深層清潔所以冇得食好傷心💔，所以去咗食光榮。以前人山人海喺荃灣等位，好彩分店過咗食飯時間人流較少入去即刻有位了。小店位置應該係服務附近嘅工廈，顏色店應該係遍地開花，時時記著「好食是良知」係心入面，服務一眾小黃人同朋友點左三萬完旦飯同埋開心浩園餐，齋睇個名都已經覺得你餐飯好好味。 其實就係三隻煎蛋拼雞扒蔥油飯，豬扒雞扒蔥油飯，再直白啲其實就係茶餐廳頹飯，不過你唔好理，點都要模擬壯志飢餐胡虜肉，笑談渴飲匈奴血😤情懷 。小妹細細個好鍾意食蔥油撈飯，可以食多一碗飯。不過今次啲飯太硬，叫左小飯都食唔曬，飯量少嘅美女們，記得叫少少飯就夠。蔥油係新鮮整嘅食落唔會口乾同好香蔥味，豬扒同雞扒用香茅醃過，翻炸有少少硬硬但係都OK因為啲份量夠曬餸咁大碟飯yeahhhA先生在他的 FB 專欄說，活到一把年紀，從來沒有恨一個人，像恨這個人那樣入心，又說此人作惡多端，欠下香港人的債，永遠都還不清，罪惡滿盈，到一個日子，上帝會審判她，香港人也會審判她, 每吃一口開心浩園餐都會諗地獄已留位置給她小妹也活到中女年紀了，A先生也說出了我的感受，相信也是很多香港人的感受，真的沒有恨一個人恨到這個程度，因為這些人所作的惡，直接摧毀了我們的家，如果唔係點會有三萬完旦飯呢？一個一百多年來幾代人努力建立的家。這債這怒火，她及他們怎樣也還不了！…Read More

平日會到葵廣掃街，而家除咗開顏色地圖之外，第一時間就會衝左去食九份嘅芋圓，以前都仲有間好好食嘅，但係已經執咗。所以間唔中想念台灣滋味就會衝左去九份，有種食咗當去咗嘅感覺。呢間小店，小店員工黃到金，應該多多支持，好似佢張飛仔寫住「從不缺席」～仲有做啲優惠去支持其他黃店消費，之前憑其他黃店消費收據珍珠奶茶買一送一🥰實行you jump I jump, 當時小妹身上冇收據，但唔緊要正價都照懲罰。芋圓有芋頭、紫蕃薯同黃蕃薯三種，全部小妹都鍾意食，配埋紅豆同埋仙草簡直係絕配，仙草係用粉沖嗰隻較平時食嘅港式涼粉稀少少，都好味既，紅豆又稔又香，呢碗外賣糖水我小妹成日返單，仲有佢嘅珍珠奶茶都好好飲，好有茶味珠又唔太硬～不過唔記得影相葵廣有好多小店都值得幫襯，但千祈記得去九份啊哈哈…Read More

炮台山的第二站就係去買嘢飲，小妹喜歡邊行邊看邊食嘢的日子什麼時候會來到呢，我連喺街邊飲一啖水都好似偷偷摸摸咁，因為唔想做罔顧他人生命安全嘅無良大叔大嬸。所以呢對街邊飲品店生意亦大不如前，同路人行過路過唔好錯過啊～記得慷慨解囊幫助小店幫得就幫。有冇看官好似小妹咁帶咗兩三個鐘頭口罩一定要除罩休息吓，去餐廳飲杯嘢，如果唔係會好頭痛好似缺氧徵狀一樣，頭痛到快裂開，炎炎夏日戴口罩真係非常唔舒服，到底應該怪誰？相信大家心中都有答案。唔通個個帶罩，個個都想戴口罩咩⋯⋯買一杯夏日限定蜜桃冰沙涼浸浸，係街上仲可以堅持多一陣味道係非常清爽嘅蜜桃味，不會太假的味道間中飲下涼曬，我見比較多人點飲珍珠奶茶，或黑糖鮮奶，果茶類比較少人點～ 見到有幾買醫療酒精消毒棉片收益捐612 ，喜～歡🥰這就是小妹幫襯的理由可以嗎？老實說小店嘅位置又唔近黨鐵站，亦唔係人來人往嘅英皇道，都係坐下附近啲街坊生意仔，再次呼籲同路人行過記得支持下！中女係長氣啲～ 哈哈 ，希望靠大家的力量雞蛋係城牆下可撐多幾回。…Read More

雖然食評已經一有空餘時間就開始還債，但係有陣時小妹會幫告急的小店先出食評，希望可以幫得幾多就幾多啦！德發就變咗較後先出啦，因為此良心茶認都算係區中數一數二，同區有花心的小妹最愛嘅閏家，同路人都可以去幫襯下。雖然都已經沒有了前些食評中的文宣，但電視播放是同路人最愛的VIU TV，已經非常足夠了，可以食餐安落茶飯，唔會TBB 假新聞台一直狂loop , 睇到冇晒胃口。因為工作接住落嘅關係，比較趕忙下食個快餐之中嘅頹餐，豬扒蛋出前一丁，豬扒肉質唔似膠水凍扒，有淡淡的香茅味，出前一丁有出前一丁味，蛋有蛋味，一個人的快餐除左碌下電話☎️外，真係唔知講咩好哈哈，整個心都在想工作上的事情，沒有好好享受當下，可能同是大部份香港人的弊病，要趁WFH時間好好反思。另外檸茶既茶膽係非常欣賞，之前嘅食評都話佢嘅晚飯小菜都好出色，希望下次有機會可以再嚟幫襯。…Read More

為食妹喺中學時代好鍾意去呢間港式粉麵店，但係咁多年來珍苑都非常有個性的，鍾意開就開唔開就唔開永遠都唔通知一聲，雖然有時都會被鬧爆，但第二日街坊又會繼續幫襯。自從佢轉左去新鋪，由二代去繼續經營，開門既日子較規律，雖然地方冇咁就腳，懷念這種味道的時候都會再去幫襯。好鍾意佢哋個湯底，大地魚味非常濃郁，次次小妹都會飲晒，而不口乾回味無窮，雖然而家新鋪湯頭比較淡但係都好味。第二回味就係佢地嘅辣椒油，不過依家已經轉用獨立包，唔係自家製嘅辣椒油啦。先食佢嘅雞全翼，滷水汁香雞肉嫩滑，唔會有雪味，維持一貫水準。再黎係食個雲吞，蝦肉肥肉豬油渣比例剛好，唔使大大粒好似乒乓波咁，一口一啖，啖啖回味。如果水餃拼雲吞嘅話係有成八粒（4+4）咁多，唔會似其他店雙拼少兩粒非常抵食。佢嘅水餃同埋豬手魚蛋都係非常有水準，胃口有限所以下次再嚟幫襯啦，良友仔有空可以過嚟一試。小妹唔食牛，但朋友話牛腩牛筋牛丸米粉係佢嘅糧尾之選哈哈，價格相宜又好味嘅良痁…Read More

正苦離地到寧願花幾個億去做全民檢測，都不肯一毫不花的封關，原因為何？就係將我哋所有好人禁足，又咁岩撞正選舉，又三萬thx 方便管理囉，不斷現場限聚令同堂食令，好多像小妹這種無飯夫妻十分難過活囉！ ！雖然間中煮飯都唔係討厭，日日煮就簡直係挑戰～～所以趁堂食令稍作放寬至晚上九點嗱嗱臨出去食個晚飯平衡下，餐廳亦都有每枱維持1.5米距離，傳播武漢肺炎機會較低～我地揀坐餐廳通風位置就安全得多（不過其實有啲熱）首先來鹽酥雞滷肉飯 ，令小妹想起香港人想起香港人嘅熱門旅遊地台灣，食左當去左一轉台灣啦～～～鹽酥雞配上熱風真的將坐在夜市的大排檔吃晚餐，趁熱吃真的好好味～ 第二道來的菜式就是滷蛋，溏心蛋真係誠意之作，配台式滷水汁，凍凍地食真的好開胃， 小吃還點了椒鹽花枝，係驚喜之作，又脆又香好快就食完左一份，再食一口滷肉飯簡直係大大滿足。小妹點左一擔仔米線，好鍾意佢比米粉更幼嘅質感，配上蔥同滷肉一起吃真的絕配哦！因為驚唔夠食所以叫多一份水餃，口感不錯但係相比前面嘅嘢食就略普通啦，如果胃口有限水餃就可以略過了 ：）。仲有好味珍珠奶茶，點解連呼吸的權利都沒有，普通出過街食飯都變得要好好珍惜，好似放監咁....限聚令快點過去啦…Read More

大黃埔係有好多嘢食嘅，包括左呢一間小妹認證暫時全香港最好食嘅良店雞蛋仔。街坊朋友話，小店高峰期買雞蛋仔要等成20分鐘，為左懲罰佢仲有好多同路人一齊等，秩序良好和平，等食期間店裏嘅電視都會播出頭條新聞啦，香港電台，訪問等節目，所以等的時間過得快。好好彩今日過嚟嘅時候等咗一陣就有得食，但係唔見朋友所講嘅人潮有少少失落。支持顏色經濟圈唔係一日半日嘅事，係行常持久每一日做每日每人幫襯一小店咁慢慢去壯大的，你的支持雖然微小但係都十分十分重要，齒輪雖小，但合作起來可以推動一架船航行，向更遠大嘅方向進發。我哋試咗將自朱古力同橙朱古力雞蛋仔，有一次係小妹自己單獨幫襯食咗一個玉桂蘋果醬格仔餅，飲過泰式珍珠奶茶，桃味梳打，全全部都好好味，格仔餅同埋雞蛋仔外脆內軟，泰式奶茶有香料味好特別，仲附埋茶包俾你越飲越濃茶味～ 正近幾個月雖然百業蕭條，各行各業都需要幫助，大家如果有能力嘅話同路人互相扶持一下捱過這個飲食業的寒冬。…Read More

呢兩日最忙嘅動物一定係馬同埋鹿，不斷咁畀人拎出嚟講，其實早前十四個幾月前已經講佢哋㗎喇！當時都已經覺得好多嘢都極度荒謬，但絕對估唔到可以荒謬到呢個地步！亦都估唔到有人可以蠢到以為可以改變幾百萬人嘅記憶，同埋無數咁多攝錄器材嘅紀錄！學TBB菊姐有一句:「我對眼就係證據！！」所有記憶都係我腦海度是不會磨滅的。😤😤😤所以化悲憤為食量，要食一餐好嘅補充能量先，好好善待自己，再同果班垃圾鬥長命！ ！我哋雖然勢孤力弱，自問冇前線手足咁勇敢，可以做貼紙師、寫信師、旁聽師、貨金買良式月餅食良店，每日一蘋果去感染Nancy父母，打國際線tweet，都係對手足的一份支持，停止鬥同顏色分化，每個人選擇支持嘅道路都唔一樣，而小妹今次來到傳說中環地庫的一間低調黃店，連開飯app同和你eat 都找唔到～～ ！所以小妹同朋友去一探究竟，抵食夾大件嘅低調良店。中午到店量體溫搓手後好快就被安排入座，目測入座率大約六成，的確唔係好多人知道呢間良店，除咗石燒之外，都仲有日式湯烏冬及丼飯選擇～小妹同朋友都係揀咗食石燒，朋友揀嘅係100 g 石燒牛 + 100g 䐁肉， 小妹揀咗食羊鞍。我哋都有追加食品，朋友加多咗100g 牛 ， 二小妹揀咗追加食日式年糕，溫馨提示追加食品要喺第一次落單，一次過落晒冇得後加的，仲有珍珠奶茶可以飲真係新奇又開心。滿心期待的等待食物到來，期間待應仲派咗兩件即棄圍裙，可防止啲汁彈上件衫，這種安排感到非常細心，真的十分抵讚。嘢食未到都可以去自助調味料吧自娛一下，有各式各樣的調味料配合石燒一流。仲有沙律🥗汁芝麻醬同柚子汁。小妹揀咗薄荷醬及英式黃芥辣配合羊肉黎食～ 淺嘗一口薄荷醬唔係普通超市買嘅薄荷啫喱，而係真係用薄荷葉加羅勒打成蓉造的，真的十分有誠意啊～而且仲有生蒜、黑松露醬蒜蓉、辣麵豉醬、芝士醬等比鍾意重口味嘅客人選擇，食牛梗係配粗鹽及即磨黑椒就最正～咁當然自助調味料吧一定都有提供啦這家是謂良店小妹觀察有二 ： 🤩就係電視上播嘅係杜生既為何深夜總是餓，同埋bob 叔教煮嘢食片，一直狂loop ，無TBB可以食餐安樂茶飯。另外🤩此小店係手足月餅銷售及自取點。雖然而家嘅良店都冇左文宣同埋連儂牆，但係細心留意嘅都一定分辨得到。死啦未開始寫嘢食都已經寫咗咁大段落，看官啊唔知仲會唔會睇埋落去呢🤭小妹嘅羊鞍，上枱時係未熟嘅，啲熱油發出吱吱聲，感覺非常治癒。朋友嘅牛都係一樣，不過無咁油～㷫到你覺得差唔多就可以食。每人既口味不一樣，而小妹比較徧好medium-rare or medium 而配一碗白飯任裝真係好邪惡。食完大家一致認為羊係比較好食嘅，因為羊嘅油脂係成日石燒出晒嚟，肉質較稔又唔會好蘇，牛如果再肥返啲啲係幾好味嘅，而豬就不過不失啦，可能煎得太耐有啲硬。日式芝士年糕有小驚喜，係幾好味嘅可以追加。兩個人捧住個肚走，成餐飯左加右加不同既追加後$300都有找，普通一個午市套餐，都係大約$70至$80左右，絕對值得黎同埋值得encore 。P.S.雖然有一屁股嘅舊債食評未寫，都想幫滿滿食堂寫咗食評先，因為好味嘅，大間嘅，都已經有好多人去幫襯，剩下落黎默默支持既我地都應該比更多關注給小店，（因為中環良店租貴，唔想被消失），一起為我地最L鍾意既香港🇭🇰加油💪…Read More

旺角是一個熱鬧嘅區食肆林立，但係要搵好味嘅嘢食真係寥寥可數，得知小妹最喜愛嘅飯堂開餐早前喺旺角開分店，即刻嗱嗱臨同朋友去幫襯試味一下。分店位於女人街，廣華醫院路口入直行到開餐門口，之前有民主女神同岳義士磨砂貼紙好易認，腥港國安髮通過咗之後就已經拆除左取而代之而家貼住連豬嘅「我哋真係好L鍾意香港」貼紙。或者店主都想大家堅守住，一齊擇善固執，一定會保護香港既未來支柱-我們的年青人。之前裝修前既相唔知邊個send俾小妹（比大家欣賞下），而家嘅裝修後係有少少改動不過都充滿親切感。唔知大家去開餐係咪每一次都食正餐呢！ ？但係小妹覺得佢嘅小食亦都同樣出色，就好似平時啲點嘅五大素球，同埋單骨雞翼。不過今次就呢兩樣都冇食，反而點左第一次在茶餐廳吃泰式無骨鳳爪（通常在泰國餐廳也會點的），炸墨魚丸，和酸菜蘿蔔，朋友就點帶子雞球喇沙一齊分享。酸菜蘿蔔係胡椒湯底，好好味呀，蘿蔔又稔又甜，酸菜又好味😋，如果講缺點就係一盅仔份量太少了哈哈！不過都仲有其他嘢食嘅，泰式鳳爪夠辣夠凍夠爽，個汁好開胃，食到差唔多食晒先記得影相哈哈，炸墨魚丸有一唔細碟仔裝蜜糖比客人醮，小店咁做都好高成本下～小妹覺得抵讚！朋友說喇沙湯底好濃郁，係港式喇沙嘅味道，仲要落咗幾舊有骨雞脾肉去煮，又香又滑。小二話遲啲佐敦分店都會有火腿津白同埋蕃茄牛肉湯津白（喺六月嗰時講嘅，估話現在菜式已經上線啦=） ）埋單都係$200有找，最近正苦的政策都係針對食肆，有良知嘅看官快啲大大力出手懲罰喺你附近嘅良店啦，同時封疫情快啲過去，捱過呢個經濟黑夜中的寒冬，一起迎接黎明來到。…Read More

夏日嘅長洲係非常炎熱，掃街時都令人熱到冇心機食嘢，不過夜晚就好唔一樣涼涼嘅海風為這個小島降溫了不少。夜晚食完晚飯之後就要出返城市了，所以找良店食晚飯先出省城。熾工房我哋已經食過幾次，質素保持一貫高水準。佢係未有開飯黃藍list嘅時候已經係良心黃店，所以諗唔到食咩嘅時候都會走咗入去。平日去晚飯有美味蘑菇飯，好食過藍店肯叔叔的雞多多聲。但係要注意，蘑菇飯星期六日及假期係暫停供應嘅套餐，只可以單點。我好煮嘢食嘅小妹一直都喺度研究點解佢啲蘑菇可以切到咁薄，你自己喺屋企煮嘅時候切極都切唔到咁薄既？！好啦，想食嘅時候唯有入嚟長洲食啦 …… ……朋友嘅另外一個餐係點單骨雞翼配厚切薯條，呢兩樣嘢比較似係冷藏食物，味道比較似泰國BP , 油溫夠熱，炸後風乾或翻炸一陣就會卜卜脆，雖然冇技巧可言，但係都好好食嘅～至少係屋企係無飯主婦嘅小妹間中都會買來食下，至少又係乾淨嘅，唔千年油嗰陣味，抵讚！小妹會建議看官可以揀烤雞，又冇咁熱氣，又好味嘅自家製作。呢兩小店好啱年輕人，座位仲有USB叉電呢！ 十分貼心另外飲品有不同嘅選擇，首先有不同品牌嘅手工啤，小妹今次揀咗飲利賓納梳打同埋菠蘿梳打，唔飲梳打都可以飲各種品牌汽水，下次入嚟長洲除咗掃街之外，都可以幫襯下呢類小店支持下呢！…Read More

長洲嘅第一站係搵午餐食，雖然已經過咗食飯嘅時間長洲嘅黃店都人山人海，實在可喜可賀啊！係熱辣辣嘅太陽底下，我哋揀咗食再熱辣辣啲嘅車仔麵，買外賣到朋友家中享用。小妹選擇咗蕃茄湯底魚腐同魚卷米線，朋友選擇咗豬骨清湯配叉燒及芝士竹輪公仔麵。首先小妹嘅蕃茄湯底真係好好味，非常足料，看官都可以喺湯底度見到好多蕃茄蓉，酸Mei Mei 咁好醒胃，可能行到返朋友家都要一段時間啦，湯比米線吸晒汁，不過依然好味，漁夫魚卷中規中矩啦。朋友話豬骨湯底幾好味，叉燒唔係霉叉燒，都幾有咬口。佢其實都好多特色送㗎不過我哋都冇揀，鍾意食啲冇益野哈哈，其他食評都有讚蜆湯好味。最近，小妹停咗一排寫開飯食評，原因係出咗「國安法」之後，都有好一輪嘅退出戰線的良店，怕被追究和找麻煩🤭，這間小店就是其中之一，因為在”hker” group 裏面良店系列這店已經剔除在名單外，小妹明白做生意的苦況，只祝願一句小店「兄弟爬山，各自努力。」大家仲幫唔幫襯就自己決定啦…Read More

話說周年紀念日到長洲諗住玩半日，點知起來已經就嚟到中午，都好嘅，趁着這個疫情假盡量休息，補足精神繼續前行，小妹發覺如果睡眠不足，連思想都會比較負面，要記住辦法總比困難多，休息是為了走更遠的路，我們都是堅持了才能看見希望哦！然後在烈日的中午，我哋仲諗住去掃下街呢，呢一個選擇係錯晒！因為咁熱係冇乜心機喺條街行嚟行去，但更慶幸的是，長洲每間黃點都是爆滿的，去咗幾間餐廳都話暫時未有位住，咁不如坐低飲杯嘢休息吓先，所以就走入咗長洲角酪了。這良店不知不覺光顧了好幾次，都保持一貫好味的水準，尤其讚佢個乳酪系列，配鮮果味道簡直一流，不過今次想飲sparkling 嘅嘢，所以揀咗夏日特飲桃桃梳打，甜度都係好似你咁甜話說我原本入去都冇乜人，一入去比完個錢啲人就係咁湧入嚟，可能嗰時船啱啱泊停啲人上晒岸周圍搵嘢食啦。桃桃梳打入邊有果肉，加上梳打水甜甜地都幾解渴，不過小妹比較推薦之前飲過嘅乳酪產品。之前呢度仲有明信片同埋貼紙寄賣，經過嘅同路人可以幫襯一下，支持優質飲品良店。…Read More