Priyam CC的個人專頁

泰式小食拼盤裏面有四款小食，分別係香茅雞翼，泰式蝦多士，紅磚豆腐同埋炭燒豬頸肉。炸雞翼嘅外皮非常鬆脆，食落去嘅時候雞翼嘅肉汁仲鎖咗喺入邊。泰國蝦多士嘅蝦好大條，多士亦都炸得好酥脆。紅磚豆腐係用咗天然嘅植物染色，用咗紅菜頭嘅顏色，佢令到豆腐嘅外皮上左紅包。炭燒沙嗲牛串燒沙嗲醬係微微辛辣，食落去好香滑。中和咗肉類串燒嘅油膩感。泰式椰子鮮雞湯餐廳真係真材實料，有椰子條喺湯裏便。食嘅時候如果想椰子嘅味道更加突出可以連埋椰子條一齊食。裏便亦都加咗幾塊香茅，所以咁落去嘅時候會有一絲清香，同埋香草嘅味道。酒香火焰骨上菜嘅時候會喺紅紅綠綠色彩繽紛嘅火焰骨上面倒上一層酒，點咗火之後非常Instagramable 。睇落去真係好似火山爆發有火焰嘅感覺。綠色同埋紅色嘅指天椒真係有啲辣，但係配埋肉質軟滑嘅豬腩排骨，食落去就會冇咁沉悶。泰胡椒和牛炒糯米河我都係第一次食由糯米整嘅河粉，食落去黏黏糯糯咁樣，非常Q淡同埋煙靭。和牛同啲河粉都炒得好有鑊氣，大火快炒可以食到牛嘅肉香。大家記住趁熱食唔係嘅話糯米河粉會黐埋一舊。…查看更多

二人餐$248烤汁手撕豬蒜爆漢堡用咗燒烤汁黎做調味，燒烤汁用咗美式嘅做法，食落去除咗甜甜地之外仲有燒烤嘅煙燻味道。濃稠嘅醬汁，所以掛到上去啲肉絲度，食嘅時候會濕潤同埋味道豐富。漢堡包嘅餡料加咗好多蒜頭粒，嗰啲蒜頭粒仲係炸過嘅，所以食落去風味十足。安格斯牛肉芝士漢堡嘅牛肉扒煎嘅火候掌握得好好，食嘅時候好juicy。切開，裏面係粉嫩嘅pink 。嫩滑嘅牛肉再加埋芝士片，食落去口感到位。炸魷魚鬚炸得係好脆身，而且魷魚上面灑咗一陣紫菜粉。食落去完全冇臊味，同埋如果外賣咁樣食嘅話佢個炸衣都做得好輕盈所以唔會太過腍。餐廳準備時間好快，而且即叫即整，同埋位置非常方便地鐵站天橋一落去轉過彎就已經到。…查看更多

餐廳開啟深水埗嘅地方，門面裝修得非常之有氣派。鳥海山鐵板餐（二人餐）$1198 入到去叫咗一個人氣之選嘅鐵板燒套餐，佢有龍蝦、鮑魚同鵝肝食之餘仲可以係二人份量！前菜係麻醬沙律，之後就入到去冷盤。冷盤有四種精選嘅刺身：墨魚、根白、白鯛、油甘魚腩。餐廳會同你介紹食刺身嘅次序，令到你可以好好咁樣享受刺身嘅層次同埋味道嘅遞進。活鮑魚可以食到清酒灒落去煮嘅味道，大火之下加清酒可以鎖住鮑魚嘅海洋咸香，同時間提鮮。鐵板燒將鮑魚表面燒得金黃超脆，火候掌握得好好鮑魚食落去仲保持濕潤仲有彈性。活龍蝦做得非常之出色，佢用咗龍蝦膏同埋清酒去煮龍蝦醬。煮完之後浠稠度掌握得非常之到位，龍蝦膏嘅醬裹住每一嚿龍蝦肉。非常之鮮甜仲可以食到龍蝦膏嘅甘香。$1198除咗龍蝦之後竟然仲可以食到鵝肝。鐵板燒高溫之下鵝肝好快咁釋出濃郁嘅油香。自烤過嘅多士成為成道菜味道嘅載體，佢出收咗鵝肝嘅油脂同埋牛油醬汁。食落去會有鹹甜交錯嘅味道。…查看更多

尖沙咀重慶大廈入口嘅隔離有一個隱蔽嘅電樓梯，下便嗰個商場收埋咗好多嘢食。今日嚟試吓呢間越南嘢，位置夠寬敞，所以就算係食飯時間，都唔需要等位等好耐。河內特色綜合河粉$98試左個河內特色綜合河粉，餸菜方面佢有生牛肉，牛腩片，扎肉，雞絲，香葉卷。份量非常足，而且非常大碗。覺得可以兩個人share嚟食之後再叫啲小食都得。 香葉卷唔係好多地方，佢其實就係用香葉包住啲炒過嘅豬肉碎。放湯嘅形式咁樣食更加可以食到佢嘅原汁原味。牛腩片都好慷慨，大大塊牛腩片，加埋牛骨湯底一齊食，味道好濃郁。上湯灼田園菜$22出街食飯，好容易會食唔到菜。餐廳加嘅灼菜都只係$22，加埋一齊食嘅話又健康又夠飽肚 杞子龍眼茶$8熱嘅杞子龍眼茶，裏便有好多龍眼，飲完嘢飲之後仲可以食多啲龍眼。…查看更多

餐廳開喺西貢市中心，好多時大家去西貢嘅度假村又或者係露營嘅時候一定會經過西貢碼頭。大家重新貢碼頭小巴站行10幾步就到呢間餐廳。佢哋有非常豐富嘅食物種類，從飽肚嘅正餐去到小食仲有甜品佢哋都一一提供。陳皮魚蛋配秘製449咖喱汁$12陳皮魚蛋嘅陳皮味好突出，食落去會有陳皮嘅甘香。配埋餐廳秘製嘅咖喱汁，味道好豐富。咖喱汁嘅辣到調校到係香港人嘅中上程度，香辣嘅口味道，而且後勁十足。超值套餐$42今日叫咗一個印尼撈麵，配燒賣套餐。成個餐只係$42非常抵食，而且燒賣加埋都有4粒。小食店嘅嘢食係即叫即整可以新鮮滾熱辣。同一個餐裏面總共有埋手打檸檬茶。成杯檸檬茶份量都好大，檸檬肉被打到散咗，所以飲嘅時候都會咬到檸檬肉。…查看更多

餐廳開係厚福街，約friend食飯就最方便！餐廳環境舒服，枱同枱之間空間感十足，傾下偈上黎都好舒服。火炙半熟三文魚伴紫蘇莎莎 ＄148三文魚好鮮嫩，經過火焰炙烤過之後，有啲charcaol嘅味道，同時又有三文魚嘅肥嫩。紫蘇沙律有清新嘅日式紫蘇葉、對半切嘅番茄仔、洋蔥粒，同埋少少檸檬汁。微酸嘅味道中和左三文魚嘅油膩，食落去好清夾開胃。佛羅倫斯蕃茄燉牛肚＄138 依到經典嘅意大利家常菜都食到！牛肚用慢火燉煮到柔嫩入味，佢吸收晒滿滿嘅蕃茄醬汁，滑嫩之餘又帶有嚼勁。加埋啲濃郁嘅蕃茄醬汁，每啖都好rich。餐廳都好地道咁有提烤過嘅法包去送個牛肚。蕃茄嘅酸甜同麵包上嘅橄欖油好融合，醬汁入面嘅herbs淡淡咁襯托住，成個菜點更加有層次。 牛肝菌露荀意大利飯＄208 意大利燉飯以濃郁嘅牛肝菌作為靈魂，入口嘅時候帶有一種天然嘅木質香同溫潤嘅菇類鮮味。啲飯燉得岩岩好，索滿晒菇香同高湯嘅精華。露荀好清新，食落去有一種綠意同微脆嘅口感。餐廳用左cream同parmasan cheese收尾，大片大片嘅芝士令整體味道更豐富同厚身圓潤。 8oz美國頂級西冷＄318 8oz 嘅份量恰到好處，2個人一邊傾偈，一邊食就好perfect。肉扒厚切上枱，肉香撲鼻，扒嘅表面經過高溫煎烤至微焦之後完美咁鎖住肉汁同油脂香氣。美國頂級西冷嘅質地厚實帶嫩，充滿住肉汁，口感飽滿但係唔肥膩。西冷肉味夠濃，只需要簡單嘅海鹽同黑椒去吊出牛肉本身嘅味道已經好足夠。…查看更多

難得係依區有一間麻辣燙嘅餐廳，好似車仔麵咁，不過配菜嘅選擇多好多，而且配菜嘅份量都可以自己決定！ 首先入左去之後，從消毒櫃中拎一個籃子同夾，乾淨得黎又衛生。你就可以去3個雪櫃到揀你鐘意嘅配菜，種類非常之多，有打邊爐嘅丸類、肉類、豆腐製品類、蔬菜類、麵類等等。依種可以完全自己決定嘅食物類型一定fit 晒所有人，由配料到麵底到份量大家都可以自己控制！ 餐廳嘅特別之處係連個湯底客人都可以自己決定係乜，餐廳嘅湯底係自己炒同煲出黎，佢地嘅招牌藤椒湯底同港式鉥鉥雞撈係其他地方搵唔到架！你仲可以自己撈湯底，調較你鐘意嘅味道。有咁多野可以自己調較之餘，啲醬汁都有自助區，你想隨時加辣又得、加味又得、加toppings又得。 上菜好快，依間揀直係返工lunch必食之選！咁多野可以自己控制，出餐都好夠快。…查看更多

紐西蘭肉眼扒$138叫左一個晚餐套餐，有個扒、餐湯、沙律、甜品。其實依個扒餐嘅份量好大！塊扒有大過一個手掌，肉眼扒整得留淋，非常嫩滑。肉質柔軟、冇根、風味濃郁。叫左個5成熟，切開都真係依個熟度。以冰室/餐室嘅程度黎講，茶舍嘅水準比預期好！配菜方面，你會有炸薯粒、粟米、娃娃菜、菠蘿。如果介意鐵板啲汁加左之後會飛到周圍都係，你可以揀用碟上。雞湯杞子浸娃娃菜$22 好大份加配嘅小食，有4個四分一大細嘅娃娃菜。平時其他餐廳加配嘅小食多數都係細細份，但係茶舍唔係！成棵娃娃菜係齊到。朱古力香蕉蛋糕食完主食同前菜之後仲可以食甜品！甜品仲要係咁豐富嘅蛋糕。食落去真係有香蕉味，而且mouse 到都有埋朱古力粒。除左味道好融合之外，口感上都好配。…查看更多

呢間飲品店開喺旺角行街area嘅中心佢全部嘢飲都係即叫即整，而且你可以親眼望到佢將啲生果或者蔬菜榨汁。之前就聽佢嘅乳酪奶昔非常之出名今次行街經過就即刻試吓。香蕉麥片乳酪奶昔$36 店員整緊杯嘢飲嘅時候，我已經聞到好香嘅香蕉味。佢哋真係真材實料香蕉切粒，然後加入攪拌機去打個乳酪奶昔出嚟俾你。餐廳製作呢杯嘢飲嘅時候，combination 非常之好。香蕉同埋麥片非常之夾，嗰種厚實嘅口感，同埋好實在嘅味道好夾。私心推薦大家一定要加埋碧根粒，香蕉仲有碧根同埋麥片食落去好有營養，而且好健康。加埋乳酪奶昔，簡直就係一個好健康嘅餐點飲完之後唔使食飯飽晒。開心牛油果乳酪奶昔$52 開心果平時大家成粒食嘅話就會好脆，而且硬口。但係加咗入去奶昔裏面之後就會變得好滑順，而且帶有天然嘅堅果油脂香味。成杯嘢飲本身就唔會好甜，乳酪嘅微甜就足夠襯托牛油果Nutty嘅味道。呢一種健康係嘅奶昔非常推薦大家買嚟飲。…查看更多

餐廳設立喺深水埗鬧市之中，但係佢營造到一個好舒服嘅環境俾人喺度飲吓嘢chill吓。有戶外嘅環境亦都有室內嘅環境，戶外嘅環境以木質嘅柔和色調做主題，而室內就有質感嘅石灰牆同埋木枱做主題。環境非常舒服！餐廳座位同埋座位之間都好寬闊，非常適合朋友過嚟傾偈。松葉蟹肉扁意粉$138蟹肉嘅份量非常之多，每一啖意粉都可以同到蟹肉一齊食。除咗蟹肉之外餐廳都加埋蟹籽作配襯，兩種海鮮嘅鮮味非常豐富，意粉變得額外鮮甜。龍蝦明太子egg drop $98非常推薦食呢一款三文治，裏便嘅龍蝦膠份量非常之多，每一啖都食到有海水味嘅龍蝦肉。除咗龍蝦膠嘅口感之外，蟹籽清脆嘅口感同埋鮮甜嘅味道亦都非常之盡責咁樣配襯出龍蝦嘅鮮甜。非常大份量嘅滑蛋滑溜嘅口感食落去好滿足。榛子特濃可可拿鐵$60 可可同埋榛子嘅味道同牛奶嘅味道好融合，好順滑咁樣將可可同棒子帶入口腔裏面。黑芝麻拿鐵$55 叫咗一個比較特別嘅飲品，黑芝麻做飲品嘅底調非常少見。餐廳真係用黑芝麻磨成漿去混入飲品裏面。…查看更多

Jeju set menu B 罈子五花肉 450g + 炸醬拉麵 2-3人 $376 餐廳選用濟州島空運直送嘅五花肉，佢哋會由生嘅肉開始烤。佢哋嘅五花肉食落去肉質特別紮實，肉感細嫩，而且油花亦都好均勻。每一位都會有專人幫你去烤肉，火候掌握得非常好。煎完之後嘅肉會變得Q彈多汁，簡直滿足我大啖食慾嘅願望。非常推薦，大家食肉嘅時候點埋濟州鳳尾魚醬、包飯醬和鹽麻油醬。地道嘅濟州人食烤肉嘅時候都會配襯呢一個醬嚟一齊食。涼拌魷魚亦都非常之好味，有魷魚嘅獨特鹹香配埋韓國辣醬一齊食。鮮甜之餘又有辛辣嘅感覺。蕎麥冷麵$88 冰涼嘅蕎麥冷麵係夏天消暑嘅必食之物！蕎麥麵Q彈有嚼勁，因為啲麵會有薯仔澱粉做，所以咬落去會有「咬」勁。餐廳都好地道韓國人做法地送餐時比埋較剪比我去方便剪斷啲麵 。酸酸甜甜嘅湯底令人一食開胃，鹹鹹地嘅拌冷麵汁又帶黎另一種風味。 接骨木花梳打$30 接骨木花有一種獨有嘅芬香，而且淡淡嘅甜味飲落去清新怡人。冰凍嘅梳打氣泡感十足，輕微嘅酸味可以解一解燒肉嘅油膩。青檸百香果梳打$48百香果熱帶水果嘅甜味，唔會太膩，反而幾開胃。梳打水嘅氣泡感整體感覺係酸酸甜甜、清爽解渴，令人飲完想再飲一啖。…查看更多

Dinner set $688/位椒鹽溏心鮑魚角.脆銀魚乾.琥珀核桃前菜非常豐富一嚟已經有椒鹽糖心嘅鮑魚，鮑魚非常鮮甜並且新鮮。咬落去口感好腍同埋糖心做得非常之好，低溫烹調嘅火候令到鮑魚內部呈現半液態嘅狀態。銀魚乾亦都係用咗椒鹽調味食落去非常惹味同埋開胃。琥珀合桃晶瑩剔透，色澤睇上去，好似琥珀寶石，糖衣甜而不膩。花膠海參魚茸羹餐廳每一日都會去選購當日新鮮嘅魚類去熬呢一個魚羹。飲落去魚羹真係有魚肉剁碎淆底出嚟，滑嫩度掌握得非常好。配料方面花膠同埋海參都選品得非常之好，成碗湯非常之有鮮味。蟹黃銀針燴玉帶帶子非常大嚿，而且煎過之後非常香脆。蟹黃嘅湯底有埋蟹肉，所以食落去除咗有鮮味之餘仲有口感。20年古月龍山花雕蛋蒸虎蝦球由國宴級別嘅中國黃酒調味嘅蒸蛋味道馥郁芬芳，發酵之後嘅糯米味道帶出虎蝦球嘅鮮味。蒸蛋有過濾過蛋液，所以食落去非常滑嫩。拔絲咕嚕肉材料方面有拔絲豬肉、菠蘿、蝦球。每一個材料都係外脆內軟，酸甜嘅口味配搭非常開胃。香煎一夜鮮馬友魚一夜先嘅做法非常有效咁樣將魚嘅鮮味保留喺魚肉裏面。鹽水浸泡再經過過一晚嘅風乾令到魚肉更加紮實。甜豉油嘅配搭辟走魚嘅腥味，並且再加多一層風味。麻油魚嘅外皮煎得非常香脆，所以香脆嘅魚皮再加軟腍嘅魚肉，味道更加有層次。蝦子花膠濃雞湯. 拌菜苗、手工拉麵花膠浸泡得非常徹底，再加上蝦子嘅調味更加能帶出佢嘅鮮味。奶白色嘅湯底一睇就知道煲煮嘅時間有足夠嘅長。手工拉麵有Q彈嘅口感，而且麵條亦都冇結塊，食落去非常之滑溜順口。黑芝麻石獅子食到餐廳特色嘅石獅子甜品。有黑芝麻雪凍咗形成石獅子嘅形狀非常之有中國特色。而且石獅子嘅形狀非常可愛，做得非常之精緻。…查看更多

開心牛油果乳酪奶昔 $ 52 呢杯嘢飲喺真果乳酪奶昔系列之中係最受歡迎嘅，佢足足有差唔多500 mL咁多。佢哋係真材實料用大大嚿牛油果放入攪拌機入邊整杯嘢飲出嚟，而且開心果嘅乳酪味道亦都好濃烈。食落去嘅時候開心果嘅味道蓋咗牛油果嘅嗰浸草腥味，飲落口非常Creamy，而且開心果嘅堅果香味非常突出。雖然冇得揀甜度同埋冰嘅量，但係餐廳推薦嘅正常甜度亦都唔會太甜。佢係飲落去又牛油果、乳酪同埋牛油果打出嚟。個人鍾意飲嘢嘅時候加啲配料有啲咬勁。飲品本身已經會灑咗一浸開心果嘅果碎上去，但係我都仍然推薦大家要添加Extra嘅開心果碎。因為額外添加嘅配料會加喺杯底下便，所以你飲嘅時候唔使等到飲到七七八八先飲到啲果粒。雪糯糍粑食落去嘅size好似椰果咁樣，係長方形有條一粒粒咁樣。但係咬落去就係好似年糕咁樣煙靭，比起平時食開嘅糍粑更加煙靭少少。…查看更多

餐廳為左慶祝10週年而搞左個醬油蟹無限任食，你仲可以揀係要雄蟹定雌蟹添。個活動可以比你任叫排骨湯、炸雞、年糕香腸串、紫菜飯、飲品。醬油蟹有豐富嘅蟹膏，非常肥美鮮甜！餐廳嘅醬油調味唔會過鹹，幫手辟腥，蟹肉厚身，而且肉質滑嫩鮮甜。用醬油生醃嘅生蟹肉晶瑩剔透、味道一流、啖啖鮮味。配埋麻油紫菜飯，越食越香！鐘意食油脂感同油潤感重啲嘅朋友可以揀醬油雄蟹，佢有豐富嘅蟹膏，口感黏稠多一啲。而偏向鐘意蛋香同綿密口感嘅朋友可以食醬油雌蟹，佢嘅蟹黃質地細膩啲，同味道帶有多一絲鮮甜。排骨湯用左大醬黎做個湯嘅底料，豬大骨燉左好耐，肉質軟爛之除仲非常入味。只需要用匙羹輕輕撥開，啲肉由骨就即刻分開，完全唔痴骨。微辣嘅調味令本身已經好吸引嘅排骨湯更加之濃香四溢。由第二碗再添加嘅排骨湯仲會有拉麵麵條係湯入面，湯頭聚集晒排骨嘅精華，配埋麵一齊食可以食到排骨嘅豬骨濃郁，仲可以用到麵嘅 Q彈。…查看更多

海賀盛夏祭 $648/人三文魚親子沙律有好多三文魚子同埋三文魚刺身粒。配埋已經調製咗嘅柚子醋，沙律非常之Refreshing並且開胃。刺身三點有冬季時令嘅三種刺身：真鯛、洋蔥鰹魚、甜蝦。真鯛作為白身魚，味道清淡優雅，肉質比較細膩。甜蝦細小嘅身形同埋甜美嘅味道，一入口已經感受到佢嘅嫩滑。鐵板燒帶子 配 香橙西班牙辣肉腸汁，刺身級嘅帶子用大火快速香煎之後佢獨有嘅堅果味油然而出。香橙汁嘅微微果酸味襯托帶子額外甜美。鐵板燒白鱈魚 配 燈籠椒煙肉汁，白鱈魚肉質厚實、脂肪含量較低，所以煙肉汁嘅肉香巧妙地為依道菜添加立體感。燈籠椒辣度溫和，為魚肉抹上異國風情。鐵板燒大蝦 配 紅咖喱蝦醬，虎蝦經高溫炙燒後，外層焦香、蝦殼微脆、蝦肉保持彈牙。淡淡嘅紅咖哩蝦醬唔會搶左蝦嘅風頭，相反蝦醬帶出海鮮鹹香。同天然虎蝦嘅鮮甜交織，鮮上加鮮。鐵板燒美國牛肉眼薄燒首先係煎之前包裹左日本幼蔥同埋蒜頭粒，幫手鎖住肉汁。切成薄片嘅肉眼散發天然嘅牛脂香味，表面焦脆內裏柔軟。想再加強風味深度，可以搭襯炸蒜片一齊食。蕃茄醬煙肉炒飯揀選左日本米做炒飯底，飯粒分明而且飽滿。高溫快速拌飯，令啲米係短時間內吸收醬汁，每粒米都帶煙燻香。柚子雪葩有獨有嘅柚子柑橘芳香同埋微苦嘅清爽感。柔和順口嘅果香令到口感輕盈，入口即化嘅雪葩可以中和餐後油膩感。…查看更多