tychris的個人專頁

朋友請食飯，話和三昧，不過我有覺得鐵板燒太油膩，佢話佢都成日食蒸和牛 ，都可以去試一試。好耐冇黎，環境裝修依然好有日本特色，仲有22樓高樓景觀，喺銅鑼灣區少有景觀。🍲 日本蒸A5和牛呢個真係亮點！兩人份有三大片，牛肉蒸得啱啱好，入口嫩滑，牛味香。唔想鐵板燒咁油，呢個都係一個非常好嘅選擇。份量雖然唔多，加埋蔬菜食完真係滿足，推薦必試！ 🍤 天婦羅天婦羅包括南瓜、菇同蝦，每樣都炸得好靚，外皮香脆，唔會過油。南瓜甜甜地，蝦新鮮彈牙，菇反而係我最鍾意。💡 小結：朋友請客，冇留意價錢，不過估唔到鐵板燒以外，其他嘅食物質素真係唔錯。地方乾淨企理，裝修有濃濃日本味，好似短暫飛咗一轉日本。…查看更多

朋友推介去試CoHee，整體感覺唔錯！環境文清有feel，地方唔迫，啱晒想搵個靜靜地嘆咖啡嘅人。🍝 蕃茄羅勒大蝦扁意粉蝦夠大隻又鮮甜，扁意粉煮得啱啱好，吸晒香濃醬汁，好滿足，推介！🍳 All Day Breakfast三文魚份量唔少，味道鮮美，加埋牛油果切得好靚，係加分位。不過成個All Day Breakfast無煙肉，感覺少咗啲豐富感。加上$140嘅價位，雖然質量唔差，但同中環嗰啲餐比起來性價比就唔算高。🍰 芝麻Cheesecake & 焦糖布丁甜品方面，焦糖布丁好滑溜，焦糖味香濃得黎唔會太甜，幾有驚喜。芝麻Cheesecake反而稍遜，質地比較實，無咁滑，但芝麻香味唔錯，唔算完全失色。☕ Dirty & Mocha咖啡部分穩陣，Dirty濃郁又順滑，飲完好醒神；Mocha帶少少朱古力香，酸度低，咖啡香味依然突出，易入口。小結：甜品同咖啡絕對係亮點，環境舒服，地方唔迫，適合慢慢Chill住嘆下午茶。不過All Day Breakfast性價比一般，$140呢個價位有啲高，如果純粹想試咖啡同甜品會更加值得。推介咖啡迷過嚟試試，影靚相同時放鬆一下～ 😊…查看更多

前排係報紙見過話旋轉餐廳變咗間新派西班牙餐由米芝蓮星級大廚主理，最近女朋友生日要諗地方食野就諗起呢間野。餐廳環境記得細細個最鍾意坐個觀光電梯，咁多年後都保留咗呢樣野，唔同既係電梯全面番新，摩登咗! 電梯大堂都裝修得美輪美奐。上到去餐廳設計唔錯，天花裝飾由無數木條排成圓形圖案，好有層次感! 未入黑前餐廳都好光猛，飽覽九龍一帶同中環一部份景色，雖未及九龍睇香港島咁靚，不過呢度有得轉，唔駛望死一個景加番分。據職員講轉一圈110 mins。入黑後餐廳暗咗，浪漫咗。不過我覺得可以再暗多少少。夜景當然好，可惜當天有雨落，而且潮濕…令到部份玻璃窗都濛茶茶。上去前其實最好check 埋天文台或者餐廳既網頁，View62個網頁都有show weather condition。食物點咗一個Six-course, 一個Eight-course dinner，分別在於一個snack & 一個pasta/risotto，值唔值就見仁見智了。Welcome Drink (8/10)好特別既cocktail。杯野分三個layers，頂層係暖暖既foam，中層係碎冰，底層有少量既酒。最特別既係第一層其實同第二層既原材料一樣，但造出黎既效果同texture 係完全唔同。飲法係一口氣飲野佢。入咗口會feel 到d foam同冰碎融埋一齊好特別，不過份量好少，一口搞掂。Snack 1 (7/10)名菜之一，有機溫室菜苗脆船餅 + 一支橄欖油。一支? 對，厨師將橄欖油改頭換面令流質既橄欖油變成有牛油既質感。食落有d 似cream, 都係一口可以完成既菜色。Snack 2 (8-course only) (6/10)特製Rasberry伴Vinegar，口感唔錯，表面有一層糖令到粒Rasberry外脆內軟。Bread (6/10)麵包都好新鮮，一黎到即食香脆軟滑。不過凍咗會有d 硬。Tapas (9/10)另一道名菜，21世紀Omelet。上既時候就咁睇以為另一杯cocktail，厨師將奄列分拆=>底層係暖暖既洋葱，中間係蛋黃做既沙巴翁，頂層係橄欖油+薯仔泡沫。食既時候要將匙羹伸進底層，然後取出既時候就可以一口氣食三層既野。入口味道確係薯仔，蛋同洋蔥但口感完全不同，好有特色。StarterKing Prawn (7/10)，有三隻，亦都有西班牙蕃茄凍湯伴上。蝦非常鮮甜，凍湯味道唔算濃烈，相信唔想蓋過蝦既鮮味。Foie-Gras (4/10)，呢度並唔係煎而係蒸上的，汁係豆做的。感覺似豆腐綠豆湯…鵝肝清淡軟滑...個人唔太buy 呢樣…Main Course 1 (10/10) (8-course only)有Pasta/Risotto 揀，我地揀咗Lobster Pasta。好好食，材料係法國入口既藍龍蝦，非常之鮮甜。Pasta 既汁都好好味，濃度恰到好處唔會overwhelm 咗龍蝦既鮮味。Main Course 2Pick 咗Pig Trotter, Lamb Shoulder。Pig Trotter & baby cuttlefish (6/10)，豬腳煮得好冧好入味，墨魚入口即化。可能用低温煮既野可以整到咁冧，鍾意食冧野既人一定會鐘意。但亦都因為太冧，想食質感既人有機會唔啱呢道菜。Lamb Shoulder(7/10)都係低温煮，不過今次有質感好多。肉都煮得好嫩，唔蘇。不過淨係肉本身會有d 淡，所以一定要點醬。醬由檸檬做，一共有五點醬，三點淺色少少用淨檸檬肉做，兩點深色d 既用埋檸檬皮做。混埋一齊食唔錯。DessertTiramisu (8/10)，呢樣幾好，又係Paco 拿手好戲! 又將原本tramisu 成份拆開=> 3 個layers, 第一層係coffee味既冰，第二層薄薄一塊似係壓實咗既平時既tiramisu，第三層係cream & jelly。食既時候都係一齊食。Strawberry (7/10)，看似strawberry芭菲，都係分3層。頂層有莓乾碎+foam，中層有Strawberry果肉+mixed berries jelly，底有d酒。食法會似21 世紀奄列…味道都可以但係食落相對地冇乜特別…Service (8/10)好周到亦都好nice, 每樣菜上到黎都有解釋….但係有個staff 背d資料唔夠熟同埋太細聲。Overall，可能因為分子料理原素，呢度野食唔係啖啖肉既感覺，雖然每樣細細份，夾埋一齊…都會食得飽。要keep in mind 食既係革新料理，味道不是傳統西班牙菜。餐廳環境good，service 都good。短期未必再黎因為餐牌選擇唔多，但係長遠都會再光顧。…查看更多