Yui Tsukimura的個人專頁

之前響社交平台 見到網友話呢間烘焙店「士多啤梨脆脆鮮果蛋糕」好好食，透過相片目測士多啤梨脆脆應該用士多啤梨乾做，見賣相靚及都幾特別，加上蝦子餅黎緊生日，於是決定用社交平台Inbox訂蛋糕🎂今日取蛋糕時，店主有禮及叮囑蛋糕剛剛做起，所以小心留意生日牌便可，一望到蛋糕，真係好多色彩繽紛生果，店主仲叮囑生果餡會有驚喜，如果可以，不妨影相回圖及給予評語（無論好與壞），因為佢地都好想知道是否需要改進。返到屋企，生日主角一打開蛋糕，大家都被水果吸引住，估唔到蛋糕餡都有好多生果，老爺奶奶都話蛋糕食落好有蛋香味，夾埋士多啤梨乾整出黎既脆脆+蛋糕面生果一齊食，真係好正，雖然望落去好似好多cream, 但食落唔覺好漏，值得推薦❤️後來透過社交平台了解，原來店主定期都有派贈麵包俾長者，咁有心既小店，大家都不妨有機會支持下…查看更多

差唔多四年無寫食評 萬萬想不到今次經歷 足以令我經OpenRice 向大家分享不愉快經歷😵‍💫😵‍💫先講環境，鳥籠設計獨特，絕對係打卡位，其餘座位位置寬敞舒適，就係因為呢一個重大原因，所以我地經OpenRice 訂位晚上7pm, 並註明「慶祝生日」，以便俾驚喜師姐當晚6:35pm左右，我同好友預先買定蛋糕入餐廳，並請職員代為處理蛋糕後入座與朋友聊天等齊人落單食物質素整體黎講平均都有「中上」水平，特別係羊架及牛扒，不得不讚明明餐廳晚上十點關門，但當晚九點疑似經理及自稱張先生話要準備清潔，即時俾張單我地check及叫我地即時埋單，我哋話有個蛋糕仲未切，自稱張生黑臉話「我以為你地係拎番屋企食，況且我見你地係咁傾計傾咁耐，如果一早知，就會早D上蛋糕俾你地切啦」之後我見收據無切餅費，同張姓職員講，職員話：「切餅費$90架喎」，我地話無問題後，就氣沖沖行開，仲即時響背後大聲講客人壞話及責備職員點解唔留意客人帶左蛋糕等等第一：朋友出黎食飯 梗係會傾計 仲要因為疫情而多年無見 加上當日入座率只有五成，我地都無掛住傾計阻住你地做生意，仲要呢餐五位都埋單二千蚊，點解要受到不禮貌對待？第二：入座前職員無講限時及提早關門，職員張生九點鐘就要求所有客人埋單因為要清潔（同場亦有另一檯兩位客人都應該因為職員處理手法而即時表示不滿），其實我地唔介意提早埋單，因為明白要截單埋數及做善後工作（包括清潔），但你貌似趕走客人，仲要話我地傾計傾咁耐及埋怨客人唔早講要切蛋糕，其實攞得蛋糕入黎餐廳，都好大機率響餐廳切蛋糕慶生，如有任何疑問，點解職員無主動問？總括嚟講 我地並非要求五星級服務 但至少起碼要有基本禮貌及尊重 如果一間餐廳食物質素就算有幾好、餐廳幾咁華麗都無用 因為只要有一粒老鼠屎響個煲裏面，我都唔會再幫襯…查看更多

一年多前已經想去三品 燒鳥 專門店用膳，可惜遲遲都無機會，今次難得同蝦子餅二人世界，所以蝦子餅提議到呢間餐廳慶祝生日我地透過Openrice預約晚上20:45，當晚20:30到，入到食肆已坐無虛席，於是響門外等了5分鐘便可提早入去享用晚餐經侍應細心介紹下，我地決定揀一份「精選一人前」（$498）及散叫其他串燒試下現先講部份一人前包既串物：北海島鱈場蟹腳：味道鮮甜甘香，散發淡淡海水味，而且新鮮，正煙肉日本蠔卷：本身我地對蠔感覺一般，但食左呢串蠔卷簡直另眼相看，因為蠔味濃郁及飽滿，味道鮮甜新鮮，與煙肉一併食味道非常夾，值得推介雞肉棒棒：味道香濃美味好好食以下是部分散叫串物評價：白粟米（季節限定）：我地揀左一半燒，一半生食，白粟米本身非常香甜，兩種食法都好好食，值得一試汁燒白鱔：外脆內軟 燒到恰到好處，正花魚開邊一夜干：必食 無得輸黎形容 因為香脆可口 感覺零捨不同明太子雞肉釀冬菇：味道都幾好三品燒鰻魚：醬汁香濃 好好食整體黎講食材新鮮 仲有罕有食材俾食客選擇 師傅非常健談好客 客人樂在其中 下次一定再Encore…查看更多

一講荃灣嘉樂冰廳，荃灣居民無人不曉，更何況我本身就係蛋蛋怪（無🍳不歡），幾年前我響荃灣返工時就間中幫襯嘉樂冰廳，但係由於店舖超細，位與位之間太逼，門外又經常排長籠，所以當時唯有叫外賣返公司食，時至今日咁啱需到荃灣辦年貨，故特意晨早帶奶奶去幫襯，我們三個人叫了以下食物：火腿小奄列：必叫之選，雖然話小奄列，但份量一D都唔細，厚厚嫩滑雞蛋+美極鮮醬油作點綴，超有滿足感咖哩牛腩意粉：咖哩汁香濃，牛腩份量比市面茶餐廳多，正酥炸鮮蝦雲吞：即叫即炸夠足料，配埋泰式雞醬，必叫阿華田脆脆：凍阿華田面加上阿華田粉，阿華田更香濃，無得輸叫左咁多樣野食，最終只需$150埋單，個人覺得超值，不過宜家都多左旅客聞風而來，所以如果幫襯就建議早D到…查看更多

對於返通宵更既我黎講，早餐=正常人晚餐，所以一定要飽肚，無奈早餐種類選擇並唔多，一係茶餐廳或酒樓食點心，再唔係就魚蛋麵白粥油炸鬼，食得多都會嫌悶不過自從頌富商場翻新後，進駐左不同類型食肆，其中一間食肆要推介既就係呢間亞萊泰餐廳面積尚算大及座位寬敞，早餐種類亦多選擇，而每次我光顧都必叫「泰式雞扒冬陰功湯公仔麵」，因為冬陰功湯底酸辣度夠晒惹味，配埋煎香美味既雞扒簡直係絕配，所以大家有時間都可以試試除此之外，泰式香茅豬扒雞中翼金邊粉味道都唔錯架，大家不妨都可以一試…查看更多

探完囝囝回家之前，覺得有少少牙痕，所以特意去聰少買甜品返屋企食去到門口，大大張Poster有幾個Promotion,主要以外賣自取為主，於是叫左一碗鮮什果椰汁涼粉、椰汁椰果西米露及芒果布甸回家食，三碗糖水合共只需$56，真係抵到爛返到屋企打開外賣，發覺每樣甜品都超足料先講鮮什果椰汁涼粉：外賣碗比平時市面大及高身，裡面裝有滿滿鮮果，份量十足，椰汁味香濃，八折左後只需$34，真係抵食到爛，必食之選椰汁椰果西米露：椰汁味香濃，西米大大粒，糖水內超多椰果粒，無因為價錢$12而偷工減料，讚👍🏻芒果布甸：香滑足料，只需$10，唔錯市面上一般甜品都要起碼三、四十蚊落樓，就算價錢平，材終都無咁足，始終明白舖租人工材料樣樣上漲，難以取得平衡，難得此店可以做到平靚正甜品🍮，所以值得推介…查看更多

大約8、9歲時我就住響永年士多附近，由於當年附近除左有間好正茶餐廳外，就無咩特別美味食物，所以有段時期無論早餐（以前有豬腸粉魚蛋食架），抑或午餐都會幫襯永年士多，因為貪佢又近又正想當年永年士多午餐時間已經大排長籠，假日時間仲試過誇張到有名貴跑車響士多旁出沒，所以我一般會揀11點就落樓下買，當時一般由高佬負責夾餸，真係快而準，雖然當佢遇到猶豫不決的客人時會有不滿態度（因後面一大堆客人大排長籠），但間中佢會額外俾多幾粒魚蛋雞翼尖請你食，人情味極濃，每次落樓一定必叫豬腸時至今日舊地重遊感覺完全唔同，又有特飲及套餐，仲要電腦化，門口有收銀姐姐收錢，裡面有一大堆職員夾餸，雖然少左份人情味，不過豬腸配少辣汁依然超正，不過份量真係少左好多，始終「往事只能回味」黎形容…查看更多

每次響天水圍食飯，必然首選泰聚，其一環境舒適特別室外，其二食物水準穩定，其三鄰近天水圍西鐵站及有免費泊車。由於約了姐夫到屋企幫BB影生活照，為避免BB過於勞累，故特意安排全家上下到泰聚食生日飯，我們共六個大人點了以下菜式：酸辣椰汁湯：今次比較香辣，味道香濃，唔錯醃酸辣無骨鳳爪：味道夠酸辣，必選開胃前菜醃肉碎生菜包（豬肉）：味道唔錯金柚子蝦球沙律：今次柚子味道比較苦澀，大大影響整體味道，頗令人失望泰式小食併盤（大）：味道唔錯炭燒金沙骨：好香炭燒味，配惹味醬汁一絕，每次幫襯必選菜式之一，值得推介馬拉盞炒椰菜苗：味道唔錯泰式炒粉絲：雖然味道唔錯，可惜粉絲炒埋一撮，質感過於乾身泰式咖哩炒蟹：咖哩味香濃，難得蟹味道香甜味美，值得推介炭燒三文魚頭：三文魚頭燒得夠乾身，配醬汁一流泰式海鮮炒飯：味道頗淡焗蒜蓉包：味道普通今次每樣菜式份量比過往多，碰巧八月份閒日做八八折及生日正日送上紅酒一枝，當堂成個人開心晒，仲要打包四盒野返屋企食，希望繼續保持食物水準…查看更多

今日難得與姑奶一齊放假，之前曾聽聞過屯門呢間餐廳食物質素唔錯，所以特意帶埋奶奶及BB行街享用美食雖然餐廳裝修普通，但我被黑板上文字吸引住視線「人等麵 麵不等人」的確好有意思，亦非常認同呢份堅持，衷心希望呢間餐廳繼續努力我們三人決定Order Pizza套餐慢慢品嚐，當中包括日式胡麻火腿雞蛋沙律、濃郁芝士卡邦尼焗柺子麵及夏威夷海鮮Pizza日式胡麻火腿雞蛋沙律：食材新鮮用料足，胡麻醬汁香濃及夾雜著香草味，雞蛋味道濃郁，連我呢隻食肉獸都被佢馴服，正濃郁芝士卡邦尼焗柺子麵：每食一啖柺子麵都有濃郁芝士味充斥著口腔，非常滿足，雖然要趁熱食，但享用時小心被芝士燙咀，值得推介夏威夷Pizza餡料有菠蘿、粟米及其他海鮮，用料足，餅底非常香脆可口，正店員話由於Order左三杯飲品，所以送沙律或雪糕糯米滋俾我地，我地揀左雪糕糯米滋，不過無諗過每人兩粒咁多，所以最終我地驚食唔晒，每人要一粒就算，唔做大㗰鬼呢間餐廳真的價廉物美品質高，食左咁多野每人只需$100左右埋單，大家有時間不妨試試…查看更多

Yoho Mall I 新部份終於開張，元朗西鐵站開通左條路直接駁過去，以後行街真係方便好多，除此之外，新部份開左好多不同類型既食肆，令好多元朗人感到非常新奇，一時之刻都難以選擇，由於國際知名泰菜食府Mango Tree Cafe進駐入黎Yoho Mall I, 咁梗係與家人試下啦到埗時間尚早（晚上6:45左右），所以不需等位情況下直接步入餐廳，餐廳地方非常大，裝修設計令人感到非常舒服，位與位之間亦有一段距離，我地四個大人揀左以下菜式：招牌黃咖哩蝦兵蟹將：略嫌唔夠咖哩香味，味道比想像中淡口，感覺好普通雜菜炒粉絲：味道都唔錯芝麻蝦多士：必食之選，配白醋醬汁一絕招牌帕泰薄餅：餅底比較軟身，味道都幾特別，餡料竟然有豆腐，值得推介是拉差醬燒豬肋骨：醬汁惹味，豬肋骨表面雖然燒得乾身，但肉質都腍身，唔錯整體表現黎講，其實真係略為失望，因大部份食物味道屬普通水平，並無驚喜嘩然感覺，特別係個咖哩，完全無咖哩香味，其實話晒著名泰國食肆，馳名既咖哩菜式竟然欠咖哩香味，難免失望，所以今次食評只屬普通水平，希望下次再試時會有所改善…查看更多

自從頌富商場裝修完後，進駐左唔多菜式餐廳，尋日經過時發現皇冠餐廳大排長龍，門口有個小小檔口賣蛋撻麵包等小食，不過昨日無緣一試，所以今日特意過去試一試今日食客明顯少好多，一入去即時有位，地方都算大，不過座位之間都略為逼迫，環境都算唔錯睇完餐牌，由於早餐種類與其他餐廳分別唔大，所以特意揀E餐（白汁白菌雞絲螺絲粉配火腿炒滑蛋及牛油豬仔飽），起碼望落特別少少白汁白菌雞絲螺絲粉：醬汁雖然濃，但味道唔夠香及略為淡味，材料都算豐富火腿炒滑蛋：純粹普通炒蛋，並非滑蛋奶茶：味道香濃，唔錯餐廳令人最訝異既地方，就係座位上竟然又毛髮及乾飯粒，明顯無人清潔過，衛生程度略嫌不足，希望好好改善…查看更多

多年前生命中曾經出現一位「過客」，當時佢介紹我食Delifrance火腿芝士酥(Croque-Monsieur)，真係一試難忘話說Croque-Monsieur是一種法式熱三文治，原材料有切片麵包、火腿及芝士，最早於1910年出現於巴黎咖啡館餐牌上時至今日，天水圍竟然開左間Delifrance, 身為芝士控既我就算啱啱食飽早餐，都忍唔住買返半件火腿芝士酥過下口癮落左單後，櫃面侍應貼心問我駛唔駛加熱，所以一返到屋企就食到熱辣辣既火腿芝士酥呢個芝士酥外脆內軟，餡內芝士可能因為內有白汁關係，就算凍左都會有流心效果，非常美味，十年前廿幾蚊一整件，宜家$23得半件，唯有少食多滋味喇…查看更多

我本身好鍾意食大阪燒，鍾意既程度係會間唔中到一田買唔同類型大阪燒餅粉去整，連去旅行時見到大阪燒餅店都會走入去試，所以當知道香港開道頓堀御好燒專門店時真係開心到彈起，但可惜開張個陣陀緊BB, 好多檢查要做，加上好難訂位，試過有一次訂位時只是打電話問朋友時間啱唔啱，短短5分鐘又錯失一個大好良機，難免心中會有一個遺憾⋯⋯今日終於機會黎喇，有朋友可以收早一齊去試，梗係試下早D攞籌walk in入啦，我17:15左右已到店外，由於限時90分鐘，朋友最早18:00到，我唯有門外呆等先，不過同步都有其他人都同我一樣等埋朋友先至入，所以絕不孤單，但亦擔心被同行捷足先登，心情竟忐忑又緊張最終大約18:30左右入去，由於入餐廳前一早諗定食咩，所以點餐過程非常順利，我地兩個人點了以下菜式：牛舌：一碟有七塊，簡單用蔥及少少黑椒調味，就咁煎香食略嫌淡味，幸好檯面有鹽，加鹽後味道唔錯道頓堀豪華七品：餡料有豬、牛、雞及海鮮等材料，煮法非常簡單，只需將碗內材料攪拌後倒在已搽油的鐵板上，每隔5分鐘反轉一次，合共反轉3次，需時15分鐘，之後落燒餅醬汁、蛋黃醬、紫菜粉及鰹魚粉便完成口感味道都好好食蒸雜菜：只需擺鐵板上蒸10分鐘便可，不過我覺得略嫌生肉類雜錦炒麵（醬汁/鹽）我地揀左鹽味，因諗住醬汁應該同燒餅味道差唔多先落油炒熟所有肉類（內有雞、牛及豬），同步另一邊可以炒定所有菜，全部熟晒後炒埋一堆再落麵及壺湯，落埋調味醬（即鹽汁/炒麵汁）完成由於份量都算多，我地分開兩份，每份落唔同醬汁（因炒麵醬就放響餐檯上），所以同時可試兩種味，兩種味都好好食，值得推介軟芝士厚燒班戟：先倒班戟漿落鐵板（不需落油），整左個形後每邊煎兩分鐘，合共反轉3次，共6分鐘，最後落士多啤梨忌廉醬就可以食，好好食可能我地得兩個人既關係，叫左咁多野食，食埋都仲有20分鐘剩，其實時間尚算充裕，服務方面都好好，不過由於比較忙關係，侍應送餐講解煮法時比較快，不過都唔駛太擔心，唔明既可以問其他侍應或參考檯面指引，所以呢間餐廳又有得大顯身手煮野食呃like影相，食物質素及味道又好，值得推介…查看更多

記得先排第一次幫襯呢間食肆時見到有好多長者嚮門口派隊，好奇心驅使下就上網了解，意外發現此食肆多年前已開始免費派飯俾長者，難得有此良心企業嚮鬧市出現，梗係要再Encore啦搭正八點一開門，基本上大部份座位已經坐滿，所以會出現搭檯情況，座位與座位之間比較狹窄，不過意外發現閒日上午及下午茶時段會有八折優惠，咁著數梗係叫多D點心醫下個肚啦鮮蝦腐皮卷：餡料以韮黃及鮮蝦為主，腐皮煎得非常香脆可口，配唿汁食簡直一流酥皮香麻蘿蔔餅：此餅新鮮炸起，咬落好香芝麻味及非常香脆，配蘿蔔絲好香，不過始終是油炸食物，所以都有少少油膩黑胡椒柱侯金錢肚：金錢肚煮得好腍及好香，醬汁惹味，正荷香臘味糯米飯：糯米飯質感軟硬恰到好處，味道唔錯北菇棉花雞：芋頭蒸到好香好腍，吸左棉花雞D湯汁精華，味道唔錯瑤柱海皇灌湯餃：見到湯底有魷魚乾碎及蜆仔，所以味道鮮甜，灌湯餃餡料塞到脹滿，好有咬感醬皇土魷柏葉：醬汁超香濃惹味，魷魚牛柏葉大大件，蘿蔔吸收晒醬汁，感覺好似食緊咖哩三寶咁，非常爽口濃湯魚肚鮮竹卷：最清淡的一道點心，鮮竹卷餡料有菇及肉，味道唔錯其實以呢個地段及食物質素，仲要有八折優惠，真係非常抵食，仲要呢間食肆係良心企業，希望其他食肆都可以效法，幫助更多弱勢社群…查看更多

朋友話想響荃灣食泰國菜，即時諗起呢間泰國餐館，所以二話不說即時向朋友推介後訂位，因為三年前此餐館既第一篇食評都係由小妹操刀，所以都好奇現時餐館食物質素情況，順道可以開心share裝修擺設無太大改動，可能因為早食關係（到達時晚上6:15），所以人流未算多，由於小妹懷孕已8個月關係，侍應特意安排一個既稍為寬敞又安全既卡位俾我地，我地四人Order以下菜式：椰奶雞湯：小妹除左愛好冬陰功外，就係呢個椰奶雞湯，餡料除雞肉外，仲有蕃茄仔及菇，飲落有椰奶香之餘，仲帶有蕃茄少少酸甜味及南薑香茅味，未試過既朋友可以一試金坊柚子沙律：柚子香甜，沙律內有花生碎，味道唔錯馬拉盞炒椰菜苗：原本打算叫蒜蓉炒椰菜苗，有位女侍應建議馬拉盞會好食D因椰菜苗本身淡味，果然夠惹味及與椰菜苗味道好夾，正香濃芝士蝦丸：上台時嚇到呆左，完全無諗過咁大粒咁足料，勁濃郁芝士味，超正馬拉盞海鮮炒粉絲：海鮮配料唔多及味道一般，不過反而粉絲好香好惹味泰式青咖哩：少少辣，味道OK蒜蓉飽條：每條麵包充滿金黃色及濃郁牛油蒜香味，值得推介印度薄餅：味道普通結帳前奉送甜品（送完即止），只收水錢（每位$3，無論有無叫飲品），免收加一（除非餐牌指明公眾假期日子外才收加一），以此單為例，免加一起碼平左$70，加上侍應送菜勤快，所以無論價錢、服務及食物質素，都係超值之算，值得推介…查看更多