sora_sora's Profile

本人住咗喺粉嶺十年有多一直都知北區冇乜好拉麵食（山下近年越做越差、嗚屋還好、爵士我已經寫過，大伏👎）最近喺地區group見到好幾個人推薦呢間拉麵兔（らーめん兎）諗住近近地就去試吓，點知一試從此愛上，依家一個星期去食三四次😂首先，未入去見到門口寫住「湯底採用真材實料熬製」，已經有啲期待。Menu好簡單，主打豬骨湯，三款湯底+幾款小食。三款湯底我都試過，要我排我會揀魚介>蕃茄=黑蒜油魚介湯一入口有驚喜，竟然有魚乾😳問過店家，佢哋話係專登加入魚乾同香味油一齊炸，等味道層次再豐富啲，所以係專登冇隔走～呢樣嘢我係幾鍾意，雖然啲魚乾有啲難咬，不過食落係幾香幾惹味蕃茄同黑蒜油都各有特色，我認為三款湯底都值得一試👍🏻最抵讚嘅係佢哋嘅醬汁（タレ)，食得出好香嘅醬油味，我平時最鍾意點多醬汁，啱晒我呢啲重口味人士🤣湯底亦都食得出有落豬油，有陣陣豬油嘅香味👍🏻麵就同台風有8成似，無論係粗度定口感都好相近👍🏻溏心蛋真係「溏心」，唔係「流心」😂而且都醃得好入味同埋佢俾夠一隻，呢個價錢有原隻蛋食，抵👍🏻叉燒就還好，食得到肉香，肥瘦均勻，不過覺得可以再大塊啲就好啦～整體而言，我認為呢間拉麵兔有8.5分/10分👍🏻食得出無味精，湯底夠濃，有醬油香+豬油香😋仲要呢個年代少可有拉麵店仲會提供冰水，非常抵讚唯獨是門口時間有啲唔穩定，試過好幾次放飯去食飯摸門釘😂同埋如果有埋幼麵揀，有多一至兩款湯就更好啦Btw已經2025年啦，我認為港式拉麵係舊時代嘅產物。呢個年代邊個仲會想食一陣鹼水味嘅拉麵+用濃縮劑開出嚟嘅湯底呀🤡唔好再話嗰間爵X拉麵係粉嶺區代表啦我作為一個粉嶺人，講出嚟都覺得7呀（肥牛粟米鹼水麵收$100，離唔離譜啲）🤡粉嶺區拉麵我只推薦拉麵兔👍🏻…Read More

我都真係好耐冇喺OpenRice寫食評今次專登寫，都係為咗警告世人唔好再中伏！我就住粉嶺嘅，聽過有啲人講話聯和墟有間爵士拉麵唔錯，又話係日本人主理今日就終於嚟試吓佢到底咩料一入去坐低，格局幾有日本feel望到餐牌，定價都係非常進取，講緊一碗拉麵要差唔多一百蚊，轉其他湯底仲要加錢😨咁好啦，一場嚟到就試吓佢個爵士拉麵，加2蚊轉埋佢個味噌湯啦落完單就要即刻俾咗錢先，兩碗中爵士拉麵轉味噌湯，茶水加$1，Total $202咁等拉麵都等咗差唔多三、四個字中間越等就越對佢有期待，見佢又有自家釀製梅酒，好似好正宗咁😳點知碗嘢一嚟到，我內心真係有啲崩潰因為碗嘢勁似我中學附近食嗰啲港式日本餐廳嘅拉麵咁如果你唔明我講緊咩嘅話，你就當係好似味千拉麵咁嘅款為咗方便大家睇，以下我會列點式咁樣寫出佢嘅伏位1️⃣湯底極淡本身講緊味噌湯底已經要加兩蚊，又寫明係濃，自然對佢有期待。點知飲第一啖已經覺得好淡，仲衰過出前一丁味噌味嗰隻湯底，喊出嚟。2️⃣啲麵係鹼水麵！呢個真係X出聲，按照道理收緊$101一碗，你無理由係俾出面嗰啲「港式拉麵」我㗎吓嘛？😨講緊台風都係$78 㗎咋，但人地個麵食得出係手打，唔係鹼水麵。你俾鹼水麵我你就唔應該收我呢個價囉。3️⃣配料質素差肥牛係打邊爐cheap cheap肥牛一條仔蟹柳海帶、粟米叉燒有三舊，不過不失，唔太難咬，但稱唔上好味‼️總括而言，呢間爵士拉麵伏嘅指數係十粒星🌟🌟🌟🌟🌟🌟🌟🌟🌟🌟係我呢世人裡面食過數一數二伏嘅餐廳💩收得$101一碗，俾嘅質數完全對唔上呢個價錢如果你話俾我聽呢碗野$38嘅，我會覺得冇問題但呢碗係味千質素咁嘅拉麵，收我$101，我會建議大家真係慳返啲錢食其他好過香港有好多好高質嘅拉麵店有日本人主理唔代表啲乜野作為粉嶺人，成個區最出名嘅拉麵竟然係呢間咁嘅「爵士拉麵」，真係覺得好羞恥…Read More

已經嚟串燒妹食過好多次，因為上水宵夜選擇不多，基本上宵夜時間都係好多人。今次嚟叫咗酸辣粉（$24）、燒羊架（$33）、燒韮菜（$10），本身仲想食燒蠔，但姐姐話賣晒，推介我食餃子雞翼（$16）。其實佢啲調味真係幾好食，係正宗大陸燒烤風味，上菜速度都算快。但正當我滿心期待試吓姐姐介紹嘅餃子雞翼，咬完一啖，一望，竟然係生肉！我即刻將我咬咗個啖吐返出嚟，可惜我吞得太快，只吐返一半出嚟同裡面負責燒烤、無口音嘅姐姐講，佢只係話燒過隻俾我，反而另一位負責樓面（？）、口音唔正嘅姐姐同我講咗幾次唔好意思。其實嘢食真係唔差，不過真係提提大家唔好一路食一路玩手機，唔係食咗啲咩落肚都唔知…Read More