AntoniaM's Profile

英國🇬🇧返嚟探親， 朋友首選泰國菜，梗係幫襯返「香港小泰國」九龍城嘅鋪頭啦！ 一定揀泰皇閣👍 我哋下午2:30去到，包場咁🫣 幾乎冇人， 食食吓，同店員傾吓偈，原來而家香港各行各業都好差，尤其係飲食，大部分人都北上食元素周期表料理⋯ 😪一開始叫咗三個餸先1）明爐青檸蒸盲鰽～👍👍👍因為英國冇烏頭食，返嚟香港都想懷念吓個陣魚味，店員話冇用烏頭好耐，原因係貨源唔穩定，唔知供應商會唔會混入啲「明渠烏頭」，真係食死人，所以索性唔用烏頭，用鹹水魚嘅盲鰽，成本仲貴過烏頭添！味道一樣咁正，尤其係底部嘅椰菜，塑咗湯汁好淋冇渣，魚同菜全部都食晒，抵食。2）胡椒粉絲膏蟹煲～👍👍👍上枱時陣陣桂皮，香葉味，聞到已經好想食，唔識形容，好有兒時同長輩做節食飯嘅味道，粉絲足夠3人食，隻膏蟹真係不得了🤤， $428咋！難以置信！我問店員會唔會係「明渠蟹」😂， 佢話係菲律賓膏蟹！（補充，隔咗兩日去親戚屋企食飯，有同親戚分享今次返香港嘅行程，原來菲律賓膏蟹街市賣都唔平㗎！ 佢哋都話$428咁大隻，有埋粉絲，超抵食）3） 冬陰功炒飯～👍👍 正常味道，之前係冇冬陰功炒飯㗎，所以試吓，個人少食炒飯，食開撈汁嘅飯，所以覺得炒飯偏油，大家落單時可以要求少油。之後再叫咗燒牛肉配青檸汁，泰式燒魷魚🦑都係食食吓先記得影相📸😅4）燒安格斯牛配青檸辣汁～👍👍👍出色💯🎊睇相已經知道好味5）泰式燒魷魚～👍👍👍都係💯我哋好好彩，食到一條有魷魚春嘅，成條魷魚都燒得啱啱好，一啲都唔韌，仲配有泰式辣汁，味道好夾。今次encore泰皇閣，冇失望👏🏻👏🏻👏🏻下次返嚟香港一定會再食佢！…Read More

做咗第一個寫呢間食評嘅人 😌小籠包，味道正常，包皮都唔易穿，幾個餸最好食係呢個。酸辣湯$42，都夠味，冇𡁻口，我覺得$42一碗，只夠一人份量，就貴啲D，同埋冇酸辣湯麵揀，淨係做酸辣湯。韭黃銀芽炒麵$80，都好夠鑊氣，正常味道，不過價錢都係偏貴，九龍城好多食肆都有得食，仲平D。樟茶鴨$168，我第一次食，老公喺其他地方食過好多次，佢話好好味，所以我都好期待呢個主菜 ⋯ 點知 🥺 你哋覺得呢？😅 先睇賣相已經大打折扣，色澤都唔吸引，我估係叫貨翻熱，唔係全部自己醃製，當時我立即上網search過都有袋裝散賣，自己翻熱就食得。講返隻鴨，有少量骨，碎濕濕嘅肉，而味道鹹鹹哋，冇乜好突出嘅味，乾爭爭，有啲皮嘅位就有少少🤏咁多多脆，我好後悔叫咗呢個餸，因為我覺得唔好食，而老公都話食過咁多，最差係呢間。做小籠包呢類食肆，有茶提供係基本，但係佢冇，我哋問佢，佢話只要熱水，仲 sale 雪櫃有其他汽水~~ 大佬呀！ 都唔夾⋯ 門口貼紙話 「試業期間，免加一」，如果之後要加一，我就唔會再嚟，因為本身價錢都係偏貴，又冇茶提供，加埋一就有啲伏。…Read More

做完身體檢查，空肚咗咁多個鐘，就選擇去食韓燒滿足吓 🤪 位於K11 商場 ～ 食完仲可以shopping添餐前泡菜，蓮藕好甜， 椰菜唔夠辣，其餘2碟都係偏咸少酸。凍冷麵，麵嘅份量足夠，好多冰，就算撈咗醬汁都溝淡咗好多，個銅碗好冰凍🥶 因為夠冰，𡁻落好煙韌👍，可惜隻蛋係冇咗一忽，好似畀人咬咗一啖咁，不過我估應該唔係嘅。因為太肚餓，所以燒咗D肉先記得影相📸️因為呢2日皮膚敏感，所以我哋揀咗豬肉套餐，全部位置都好淋，冇痴牙，我用D豬頸肉包住D泡菜食，冇沾醬汁都好夠味，值得試吓。美中不足係有幾隻螞蟻🐜喺枱度爬來爬去，最尾一張相紙巾上面有隻螞蟻， 不過我哋冇同員工講，細細隻，自己用紙巾抹咗佢就算。呢個set 連加一 $500 有找，環境舒適坐得舒服，我哋冇叫飲品，因為佢哋嘅水都好冰凍，整體都ok, 係餐前泡菜味道麻麻哋。…Read More

雖然今日端午節假期，但係德福商場唔算多人，因為有一定人群係去咗睇龍舟/應節嘅地方。 揀咗 ~越南錦麗~ 食個lunch, 排隊都等左18-20分鐘， 差不多14:00入座，手機落單，上菜都好快～ 先講返點解標題咁可悲，「錦麗」呢個名喺越菜界都算知名，標榜正宗，好味，但係今日我想舒服啲食餐正宗美味嘅越式午餐都唔得😰。排隊等位唔緊要，香港地方係咁架啦，入座時見到張枱間到咁細，要面壁，我同老公都提議可以等多陣，坐張正常啲，叫多啲野食，員工都話冇，二人枱係得呢啲 🥺 你哋話可唔可悲呢？ 商場喎，唔係街鋪。講返個實際情況，我同老公坐喺左方位置4人枱，中間打橫放隔板，同時有另一pair一齊入座，我圈住個位置有張二人枱自成一角，加放一張圓凳，職員話係有三人先安排個張枱，大家見到其實個位都好細，由我哋排隊等位直到食完嗰一刻，嗰張枱都冇人坐嘅。而我哋用餐途中，就有兩位員工放飯，好舒服咁坐喺後面四人枱⋯⋯ 再睇下我哋用餐位置 😆 你哋話點叫多2個小食呢？！我覺得點解唔打對面坐，又可以用少一張隔板，而家好有食飛機餐嘅感覺 😆（壓迫感）評價返啲食物先，我個生牛河湯底好甜，唔係肉汁個種甜，係加咗糖個種，所以我叫侍應畀D 青檸粒辣椒個辣我調味， 越式滴漏咖啡正常味道，而老公碗豬扒撈檬&咸檸靑檸梳打，味道都冇話特別出色。 份量偏少，圖中牛河份量就係咁多囉，因為少，所以特登叫老公影低佢。我知香港吋金呎土，租金又貴， 但做生意係咪咁做呢？ 雖然冇加一，我哋2個粉，2杯飲品，total $222, 我相信同枱另一pair 都係差不多價錢或者更多添，因為我同老公order呢2個粉都唔係貴嘅菜式， 但係，食咗都冇半小時，另一pair 比我哋早走6-8分鐘添，喺半小時內，呢張枱已經有$500生意，在商言商，佢哋一定有得賺嘅，喺香港租金貴，呢啲情況都避不過，但係我唔會再幫襯囉，唔係價錢問題，而係食得好唔舒服🤢，自己員工食飯都坐4人枱，有張二人枱放3張凳都唔坐啦⋯⋯唉！香港生活好可悲，好好一日假期又被破壞氣氛。…Read More

放大假喇，同老公先嚟東涌某酒店staycation 3日2夜先再飛曼谷 😂🫶🏻，第一餐試咗間泰菜，真係麻麻哋（已經出咗食評）之後2餐，我哋都嚟呢間 稻城 ，唔差喎，小籠包真係要 encore 👍因為食咗2次，所以group 埋一齊評價。 小籠包皮薄多汁，鮮甜，2餐都有order, 好味！ 紅油抄手唔算好出色，醬汁偏辣帶點辣，唔食辣嘅人應該都接受到。擔擔麵～少少辣，都有好香花生醬味，加埋濕濕碎碎嘅配菜，連麵一齊𡁻，好豐富，飲咗一半湯底都冇話好口乾嘅感覺。嫩雞煨麵～～同樣，飲咗半碗湯底都冇話好口乾，好多菜粒菇粒，我鍾意呢款麵，又滑又軟。賽螃蟹～～我比較鍾意有粒蛋黃喺中間個隻做法， 味道會香濃D，滑D。呢間D蛋白炒得都係好滑，唔差，要落醋一齊食會好味啲，否則就好清淡。麻婆豆腐～普通，偏辣唔夠鹹香味，油咗啲，味道一般般，我覺得可以多啲肉碎。腐皮卷 （涼拌前菜）～ 值得再試 👍 中間包咗啲蔬菜紅蘿蔔，唔會好咸，腐皮夠軟，好香豆味。酸菜鱸魚～味道一般，勝在有誠意 😁 有埋個座熱盤，一路熱住，溫度可以keep 到味道， 減低魚腥味。奶油津白～津白好清甜，少少creamy, 加上少少金華火腿碎，好香！ 撈白飯簡直係絕配👍 我同老公都一致認為呢間性價比高可以再食多幾次！…Read More

～～放大假喇 ～～同老公先來一個東涌3日2夜嘅酒店staycation 先，之後飛曼谷🥰第一餐就揀咗泰國菜食 環境，裝修都好靚好舒服，再睇下食物相，都賣相精緻吸引。玫瑰紅奶茶，泰式綠奶茶，凍飲嚟講，個杯嘅容量真係偏小，外間凍飲通常杯身高D，呢間真心細杯。味道正常。越式生牛肉河粉，燒豬頸肉撈檬粉， 呢間餐廳係越、泰 cross over ～ 燒豬頸肉燒得唔差，色澤均勻，味道都唔錯。但生牛肉就好韌，好多位咬唔爛，逼住整塊牛肉片塞晒入口，𡁻咗好耐～ 湯底普通，食過有好幾間嘅牛河都比呢間出色小食拼盤入面，春卷，蝦餅最好食，讚👍 。柚子沙律用醬汁兜上，好似吝嗇咗啲，好細兜，同埋個汁又甜又鹹，感覺好似食剩嘅餸頭餸尾， 因為之前食開柚子沙律嘅醬汁唔係咁㗎，呢個係偏鹹，普遍做法都有蝦肉，但呢兜只係碎濕濕嘅柚子粒mix 咗醬汁咁就真係好似食淨咗嘅嘢 😞米紙卷入面有好豐富嘅菜，一定要沾醬汁先有味，不過我食嘅時候，重疊位置既米紙已經硬硬地，食唔到。沙嗲串燒，肉係冇問題嘅，有問題係兜沙嗲醬，我食到少少啲咁多多酸，我仲同老公講係咪滴左啲冬陰功湯上去，但佢就食唔到有酸，佢話正常沙嗲應該冇酸味，咁我哋就繼續食，最後嗰晚我哋各人都屙咗兩次😅。我哋冇keep度單，亦唔算肚瀉得嚴重，所以第二日都冇同餐廳反映。總括嚟講覺得呢間嘢食個環境，而食物質素同價錢相比的話，有待改善喇。…Read More

送完機順便去東涌Outlet 逛逛，個商場都好多人，見到呢間西餐廳環境唔錯，就一於試吓佢啦！假期午市都咁少人⋯其實都唔知會唔會中伏🤣不過貪佢個環境。價錢中上，散叫冇set, 佢signature 係 handmade pastas, 我哋叫咗2款試吓左：Maccheroni 羊肩通心粉配意式香草醬及榛子右：Spaghetti Carbonara 卡邦尼意粉 意大利火腿 巴馬臣芝士賣相似乎伏伏哋😞 試完都認為係伏咗🤣羊肩肉係肉絲，所以都淋嘅，冇痴牙，有羊味，但應該係烚熟，碟粉好水，而且羊肉入面都冇醬汁味，香草醬同棒子都係分開加入，做法好似好簡單。卡邦尼，好少醬，唔夠creamy , 完全冇咗卡邦尼又香又濃嘅感覺撈埋面頭嘅芝士碎，都只係得咁少醬，根本cover 唔到所有意粉☹️ ，仲有menu 寫「意大利火腿」，應該要寫「意大利火腿粒」！！！真係得幾粒。講返佢2款 handmade pasta, 質感都可以嘅，唔會好淋。Tea Garden: $70 薰衣草，青檸mix soda，無糖，幾酸吓，適合鐘意食酸野嘅人，薰衣草味都出嘅。但以 $70嚟評論，係偏貴！English Breakfast:$45 正常茶包，但茶壺手柄真係好熱😞…Read More

呢2日熱辣辣，特登揸車入九龍城，本身諗住食泰菜，再去按摩。點知行過呢間門口，畀佢個tea set吸引咗😅 因為好耐都冇high tea喇，望入鋪冇乜人，又有大梳化椅坐，於是就改變主意喇！tea set 份量唔多，只有兩層，味道亦一般， 2粒最細嘅 mini berries canele, 我唔識欣賞囉，其他不過不失，鹹點正常發揮，冇乜特別。茶我哋揀咗 healing garden (香茅薑）& earl grey , 茶壺份量可以倒2杯半，亦keep 到溫度，唔會好快凍，可以慢慢傾偈。 呢個tea set $400有找，份量唔多，亦唔算好貴。…Read More

本身諗住簡單食個tea ，呢間喺 outlet 最頂果層，仲有個狀闊海景，環境舒適，食物碟碟都好大份，叫唔到太多，今次只叫咗2種1）芝士蛋餅，我同老公二人，根本食唔晒😅 好香濃芝士味，有拉絲，3種以上嘅芝士，好滿足，餅皮亦焗得剛剛好，不過真係要趁熱食，喺有冷氣底下，凍得好快，食第二件口感已經好大分別。2）蜜糖味炸雞，可以揀有骨或無骨，我揀有骨，我覺得會好味啲。雞味冇乜，但醬料好夠，食韓炸雞，都係至在佢個醬汁啫，上枱仲好熱辣辣好香脆，呢度真係要約多幾個朋友一齊嚟，因為碟碟都好有份量。…Read More

因為想食泰式炸豬手同而家喺曼谷好heat 既蟹肉奄列，所以揀咗呢間泰菜餐廳，點知中伏😪佢唔係正宗做泰菜，又夾埋啲西餐～～飲品都好花巧，傳統簡單嘅泰式飲品種類好少。呢間用錢買打卡位，想要食有水準嘅食物，就建議其他，可能西餐佢會好味啲。先睇張單，價錢中上，當日午市，泰式炸豬手同滷水豬手都話賣晒😨 竟然⋯？ 一定唔會啦，我估係冇師傅做，有啲失望😞冇豬手食，好彩都有蟹肉奄列，但係完全2樣野黎嘅，煎炒蛋入面冇蟹肉，只得面頭幾粒，網上求其一間，都唔會係佢呢個做法！ 真係超失望☹️！ 味道唔洗講啦，普通家庭主婦都做到！粉絲大頭蝦煲～ 太鹹～ 重手咗，亦冇泰式個種味道。😪跟set 加錢嘅雞翼， 係小朋友口味，正正常常，有色有鹹味，但一定冇用香茅，胡椒之類醃，唔係泰式。羊架配咖喱～ 店員有問我哋羊架幾成熟。羊架應該係煎完之後放入去，咖喱都好味嘅，有香料，有小豆蔻，係呢餐最好味嘅1個餸。泰式凍奶茶，正常發揮。（以上全是個人意見）…Read More

呢間印度餐廳位置有啲隱蔽，喺酒店商場地下，價錢有點貴，但幾好味。有2個餐牌，呢款Sev Puri (Indian Street Food) 會喺 South -India menu見到，涼食，脆口，薄荷醬汁好出味，唔辣㗎，酸甜，薄荷味，味道豐富，一次連食3個，finger food size, 配酒精飲品應該好夾，不過今次揸車過嚟東涌，所以冇飲酒。佢仲有幾款puri, 下次可以試埋。2）pizza 咁大塊嘅蒜蓉包，好香好好味！我見佢廚房有個好傳統嘅石屎焗爐，高過一個成年人。麵粉麵團似係自己搓，好煙靭！正呀。3）印度炒紅米飯，不過不失，都乾身，冇特別強烈味道4）羊肉菠菜咖喱～ 冇羊嘅臊味，菠菜咖喱係唔辣，有D忌廉味，口感creamy, 厚厚嘅咖喱醬撈飯，沾蒜蓉包好好食。不過好快就飽肚，有食濟嘅感覺。5）印度奶茶（拉茶）印度獨特嘅紅茶葉香味，久唔久飲一次，都可以滿足吓味蕾。…Read More

10年前食過，印象唔差，所以再來一次，但似乎冇進步，之前食過好幾間新品牌都出色過佢。叫咗四種食物。 1）小籠包～肉汁偏淡，肉碎粉粉梅梅嘅質感，水準一般。2）子薑水晶肴肉～4種食物呢一款最好味，子薑偏甜帶點酸，可以全部食晒，唔會話食兩三塊就酸到唔想食，肴肉都夠味，鹹度適中。3）雞絲粉皮～味道偏淡，粉皮較乾身，食落去只感覺到花生醬味，雞肉毫無味道。4）酸辣湯麵～足料嘅，仲有竹笙絲，但味道差一點點🤏，鹹味夠，酸辣味可多D，自己加左啲醋調味，唔算好差。我哋坐卡位，位置舒服，但牆身有點污糟，有待改善。…Read More

午市套餐，燒牛肉伴溫泉蛋定食$148落單前職員話牛肉大約7-8成熟，但上枱時其實都已經9成熟，有啲失望😞，好少汁，入口牛肉味都係一般，所以更加失望😩 而且沙律🥗菜好多生銹，變色，所以我只食咗粒車厘茄同中華沙律。淨係溫泉蛋冇問題。北海丼午餐定食$158（冇溫泉蛋，蛋係屬於上圖）刺身新鮮，份量正常，呢個set嘅沙律🥗好好多。我仲叫咗個甜品，雪糕配mochi, 太心急想食冇影相，味道可以。牛肉唔靚都唔係大問題，可能失手，重點呢間鋪真係冇service, 位於大型商場，靚靚裝修，對出就係公園景觀，有收加一服務費，但係客人自己落單，用手機scan QR code，而且員工係唔會幫客人倒茶，水壺入面係清水，（和民都有茶/水畀客人選揀啦）埋單時，員工示意出去櫃檯畀錢⋯⋯（茶記？）另外，佢哋嘅餐具，杯碗，牛肉定食嘅碟都係膠，（魚生飯碗係陶瓷）感覺呢間店99%似元氣！總結～～整體食物質素及價錢，同「和民」差不多，但服務真心不及「和民」…Read More

友人話新開，口碑幾好，所以特登試吓！店員都好nice, 會自動拎前菜畀客人，$30幾蚊再加一，如果唔要就記得提早講聲！不過大家可以試吓，個醬鹹鹹地，好重魚香味，好正，配新鮮嘅蔬菜條食好夾，店員好細心講解，我幾鍾意❤️櫻花蝦炸豆腐豆腐好滑，淋咗汁上枱，外面唔算太脆，唔油利，可以送清酒食，唔會搶味。三文魚丼，正正常常，冇乜特別，但我自己就覺得三文魚親子丼好味D，有三文魚子鮮味好多刺身拼盤5款，全部刺身都新鮮好味！蝦頭可以加$40滾湯或炸整體而言，一分錢一分貨，店員友善，環境舒服唔拘束！大家可以試試。…Read More

今日去咗九龍城同心，員工全部都係泰國人員，店內環境有點舊，冇特別裝飾，而且碗筷都係放喺枱上面，任食客取，好有泰國路邊小店feel, 不過疫情下就有點不安，因為久唔久都見到有蚊蟲飛過。1）泰式船河 （青檸梳打另叫）有豬潤，炸豬皮，豬肉丸，豬肉片，白蘿蔔，冇咗豬紅，大部分應有嘅材料都有，但係個滷水湯超鹹，顏色好深，但味道感覺同豬手飯個例湯差唔多（比例湯濃味，偏鹹）2）滷水豬手飯，香茅凍飲 （午市套餐 $56）豬手夠淋夠軟滑👍，但係就好鹹，份量足夠，因為豬手汁本身好夠鹹，下面嘅咸菜沾埋豬手汁後，真係要配埋酸醋一齊食，中和一下！之後狂飲水😅豬手飯個例湯，我放棄咗，因為太鹹，味道似用滷水湯加水，加芫茜。香茅凍飲冇問題，可能食咗太鹹嘅食物，感覺杯凍飲好正😂整體都可以，味道濃厚，餸菜冇任何裝飾，似足泰國路邊小店，但真係偏鹹，相信佢煲滷水汁都足料，滷咗好長時間！鍾意食重滷水味嘅人可以試吓！…Read More