gwegweguagua's Profile

九龍城出名多打邊爐餐廳，今次響OpenRice誤打誤撞隨便揀咗呢間火鍋頭。人唔多，餐廳有兩層，樓上係有間隔嘅大枱，每台有板隔開，私隱度較高。湯底入味，嗰晚九個人，叫咗兩個雙拼湯底，杏汁豬肺拼冬陰功湯，四川麻辣平蕃茄牛腩，淨係飲湯都覺得好掂。火鍋材料新鮮真係好有驚喜，連蔗水都煲得好好味。…Read More

印象中看過幾個介紹依間小店既報導，今日去果欄途中見肚餓，專程拜訪。好鍾意台灣既早餐店，特別係三文治店，烤得脆脆的吐司，永遠夾著多得爆開既餡料。滿心期待著的⋯店子不好找，找到了才發覺是一家很小的店，廚房佔了店百分之八十的位置，勉強坐四個身型苗條的客人。絕對唔係比你坐低慢慢嘆既all day breakfast店。店裡就一男一女在廚房幹活，店裡坐著兩位啃著三文治各自各忙著低頭玩手機的食客，店外站著一位等著外賣的奶奶，廚房裡都已經夠忙了⋯麵包是用我們在超市裡都買到的嘉頓三文治方包，成本不低。沒關係，看看菜單，等外賣order準備好了，到我點餐。菜單上各種三文治，還有多士，炸薯條，麵等等。最後選了一份手撕雞炒蛋三文治。三文治一份分兩袋上，麵包自動烘底同飛邊，麵包烤得脆脆的，除了手撕雞和蛋之外，三文治裡還夾著拌了蛋黃醬的薯仔沙律，芽菜和生菜。味道唔錯，可以一試。尤其是住附近買外賣做早餐就更幸福了。…Read More

經過媒體報導依間咖啡店之後，趁農曆新年假期前來拜訪下。咖啡店同投注站同一條街。離遠已經見到條隊。龍唔係太長，排第四組，不過感覺咖啡店無限時用餐，亦無需要人齊先可以入座，等候時間比較難估計。無所謂，預左要等位。門口有一小段咖啡店活化前舖頭既歷史。咖啡店前身大和堂參茸藥行，1932年創立，有上80年歷史。餐廳門口擺左個餐牌，等位期間已經有時間揀定食乜嘢。餐牌除左expresso base既咖啡之外，仲有手沖咖啡同埋唔少茶既選擇。食物方面比想像中多好多選擇，對個雞蛋仔炸雞好有興趣😜😜。終於有位喇⋯其實店外面係有兩張高凳可以坐，不過一場來到，當然要坐店入面影吓個百子櫃啦。咖啡店係以櫃檯先點餐付錢後送餐到座位安排。提醒番係只收現金既。今日點左一杯flat white，一杯cappuccino，一份eggs Benedict，一份自家製牛油果多士加半熟蛋。咖啡唔錯，同連鎖咖啡店比係好好多。驚喜點在於食物。牛油果多士做得好好，牛油果上面鋪車厘茄，多士烤得脆脆地，加錢加一隻半熟蛋，感覺清新健康。eggs Benedict個Hollandaise sauce 有驚喜，Benedict個底都係多士，一樣烤得好脆，每一口都好治癒。會再來，下次要試個雞蛋仔炸雞😆😆😜。…Read More

灣仔道莊士敦道交界三角位有一棟特色大廈，是晚行過抬頭見到，令我諗起紐約第五街嘅熨斗大廈，哈哈。經過灣仔道入口，比樓梯口個1963木十豆寸招牌吸引左，走上兩層樓梯，發現原來係台灣餐廳。橫掂都行左兩層樓梯，就入去食埋飯啦。餐廳裝修好懷舊，門口兩道木門既門柄係舊式電話嘅聽筒。入到餐廳入邊，見到有個擺滿舊相機既櫃，男女廁中間掛住個理髮店門口嘅紅白藍旋轉燈柱，燈柱旁邊有一座字粒印刷檯，十足十個博物館咁。終於有人帶位喇，餐廳都幾滿座，座低發現木檯原來係舊車衣機，物盡其用。晚餐有套餐亦有單點選擇。套餐一位199起，決定單點。兩個人點左滷肉飯、麻醬麵、燙青菜、酒蒸蛤蜊、三杯雞。燙青菜有好多滷肉鋪面，酒蒸蛤蜊好好味，三杯雞略嫌太濃味。滷肉飯細細碗不過鋪好滿，飯面放半隻滷蛋，半片黃蘿蔔，正👍🏻。麻醬麵既棉質彈牙，同麻醬撈埋好夾。食物質素整體滿意，可再來。…Read More

有去日本旅行既朋友都識得蟹道樂，銅鑼灣蟹慶雖然無蟹道樂既規模，不過都係專門食日本蟹既餐廳。餐廳坐落喺銅鑼灣SOGO隔離澳門逸園中心地牢，好易搵。星期三晚上八點到餐廳，所有卡位都坐滿，只係剩返餐廳中心嘅枱。難得餐廳唔大，但侍應好多，需要服務嘅時候都好快有回應。兩個人點左一個中價蟹餐，因為想試個蟹釜飯。頭盤係一個兩層木架前菜，好得意，有魚生茄子咁樣。第二道菜係蟹茶碗蒸，啲蛋好滑好好味。之後個蟹菜式係蒸日本毛蟹，原隻毛蟹幫你剪開晒d殼，蟹膏放喺太蓋上面好易食。毛蟹好新鮮，加埋d日本蟹醋真係好好味。除咗蒸嘅蟹之外都有燒嘅鱈場蟹蟹腳，一樣鮮甜。天婦羅有蝦亦都有蟹腳，仲有個魚湯，好濃，飲得出用好多魚餚出來，冇魚腥味。最後上釜飯，響檯面煮大概10分鐘之後，撈埋啲黑松露醬就有食啦。套餐包埋既甜品係綠茶布甸。完美。…Read More

今日路過添福，諗起添福個黒椒漢堡，要食！一個黑椒漢堡盛惠19大元。芝士漢堡加三蚊，食原味好了。即叫即煎既漢堡扒，得我一個order，等左5分鐘左右，不果企響車多大巴多既長沙灣道食住塵等，感覺好耐。但係攞住個熱辣辣既漢堡包之後就覺得一個字～～值！芝麻包似係嘉頓出品，由細食到大，應該無認錯。簡簡單單夾住漢堡扒同茄汁，無需要加生菜、番茄、酸瓜，就係傳統快餐店式既漢堡包。一啖咬落去，漢堡扒夠厚，有咬口，好香洋蔥味，聞都聞得到，黑椒呢？當你吞左一啖落肚之後，就感覺到微微暖喉黑椒味。即場在車來車往既長沙灣道ko左個成漢堡，好滿足。唔使去Five Guys、Shake Shack排長龍啦。…Read More

Applegreen曾經係同朋友飯聚既指定餐廳，尤其係一班姊妹飯聚，打正健康沙律旗號，最啱成日話要減肥嘅女仔。就算男女混合一大班人聚會都適合，男嘅可以點扒、薄餅、仲有好多香口嘢可以點。香港一直欠缺主打沙律做主菜既餐廳，Applegreen既自選沙律配料概念好得我心。雖然Mr. Steak都好似有，不過因為對我來講唔係幾就腳，所以好少去。最記得以前響Applegreen 點沙律會跟一片banana bread，暖暖地既香蕉蛋糕伴沙律真係正到爆。印象中全盛時期全港九新界都有分店，新世紀廣場、銅鑼灣千禧廣場、加拿芬廣場、九龍城廣場同荃灣都有分店。我真係成日去。近幾年Applegreen一直縮減規模，最後剩返尖沙咀呢一間，而我最愛嘅banana bread都欠奉。而最近一兩年餐廳嘅經營模式已經變咗，沙律唔再響menu上面，而係變咗做任食沙律吧。百幾蚊一位沙律吧， 點一個主菜就包一位沙律吧。一個最平嘅主菜價錢，其實同齋食沙律吧價錢差唔多，所以大部份人都會點份主菜免費食沙律吧。沙律吧嘅選擇都唔錯，沙律菜起碼有成四五款，另外有餐湯，凍肉火腿，麵包可以揀。不過對上幾次去親食完個肚都唔舒服，加上主菜味道偏鹹，所以停咗一排冇再幫襯。因為聖誕同新年假期食多咗，今晚諗住清清地再去Applegreen幫襯吓個沙律吧。星期六晚八點幾上到去，得兩張枱有客，已經感覺有啲唔妥，生意真係差左好多。睇吓個餐牌，唔少主菜加咗價，而且每位客人有最低一個沙律吧價錢嘅消費。兩個人點左兩份牛扒，每份扒送一款配菜，揀咗薯條同埋海鮮飯，加埋五百幾蚊，還可以。去攞沙律嘅時候，發覺以前有四五款嘅沙律菜，而家變咗得番兩款，另外有一款粟米日本椰菜花一盤南瓜一盤菠蘿，將以前幾款沙律拆開來放，而我最鍾意既紫薯粒粒就冇咗，感覺蔬菜嘅選擇係少咗嘅。主菜嘅牛扒鐵鍋上都唔錯，夠熱。配菜揀咗松露薯條，松露味唔係太重，不過食到底啲薯條鹹到食唔到，太多鹽，扣晒分。另外一個海鮮飯配菜須然有好多蜆，不過啲飯好硬，好似雪左幾日咁，都唔好得去邊。今晚食完之後，又有一排唔會再幫襯。唔知依間餐廳仲會唔會有重振雄風嘅一日呢。…Read More

香港唔多正宗馬拉餐廳，自問唔係馬拉菜專家，亦未去過馬來西亞旅行，未敢評論菜式是否地道。不過餐廳裝潢都可以講得上係帶南洋風。大門口掛住一道木門木牌坊，記得新加坡唔少賣肉骨茶既地方都係咁既門面。餐牌都幾精緻，中英文全。是日公眾假期，下午三點半取飛，大概等位20分鐘。餐單大分小食、麵、飯、肉骨茶同飲品幾大類。麵類以喇沙為主，仲有蝦麵，乾撈麵。點左個福建蝦麵。配料除左三隻蝦之外，仲有兩粒白魚蛋，兩片豬腩肉，蔬菜同半隻熟蛋。湯底遍油，唔敢飲太多，但配料本身無醃過，唔連湯食會無味道。飯方面可以話係色彩繽紛，有白色、藍色、黃色既飯。椰漿飯、藍花飯、敲門飯，辣死你嗎、辣死他啦、辣死加多，太複雜，都係點個怡保芽菜雞飯算了。雞同湯麵既送一樣，本身無味，雞要靠點墊底豉油先有味。跟雞既黃薑飯夠色，不過味道一般。為咗試吓個肉骨茶嘅味道，點左個细细碗既豆腐卜金菇肉骨茶試下。肉骨茶係深色重味道嗰種，終於有一道菜係夠味道。最驚喜係飲飲下有湯加，感覺好低飲😬😬。小食方面點左一份黃金炸魚皮，炸魚皮同黃金醬分開上，個黃金醬係無鹹蛋黃味既，好失望。反而咖央多士同拉茶係值得推介既。餐廳樓面唔太細心，響三組客人搭檯既情況之下隨便放低食物就走人，等同檯食客自己攪掂。仲有一名堅持只講普通話既樓面，好攪笑。落單操作係食客自己將食物編號寫落order紙然後交比樓面落單。點雞飯既時候在備註一欄用英文寫左”drumstick “（因為➕$10可以要雞鎚），不過結果都無加落單度⋯⋯亦無人翻來問個備註係乜意思，唔知係大意漏左定係懶得理你。或者下次寫中文會好d啦⋯⋯從裝修、餐單可以感覺到餐廳老闆幾有熱誠。今次初訪點既幾樣嘢都一般般，希望樓面服務整頓下，食物味道調整下，不至於浪費左老闆一番心血。…Read More

平安夜辦公室既工作氣氛低落，不如落中環食個平安夜午餐然後收爐專心慶祝啦🤩🤩L Place既電梯安排比較差，等電梯需要好有耐性，上落一樣要等⋯⋯餐廳環境唔錯，平安夜午餐來講可以話好清靜。午餐走set lunch菜單，按主菜定價，包咖啡茶。頭盤有點caesar salad既，有點bone marrow既，有點pumpkin soup既。bone marrow製作需時，午飯趕時間既要避免。一般bone marrow都跟麵包或者多士伴食，依度跟scone（或者老美叫biscuit)，係我最愛🥰🥰。沙律同湯都唔錯，份量適中。主菜點左fish fry，其實係fish &chips，份量好大，有三大塊炸魚。炸魚既batter好厚，炸得尚算唔太油膩。反而薯條好夠乾脆，值得一讚。Order medium rare 既hanger steak煮得有d過火，變得太乾。燒雞同燒魚賣相都唔錯。甜品兩款另加$30供應。點左Apple pie 共享。Apple pie 係一定要跟vanilla ice cream 先好味。餐廳既vanilla ice cream 都好好味。服務方面，侍應非常友善，不過奈何廚房操作有d慢（解釋話樓下有個大event）。如果午膳時間有限既都係唔好揀依度lunch。另外值得一提既係佢哋嘅cocktail。好靓，好好味。唔方便來食午飯都可以考慮夜晚來飲杯野。…Read More

一行八人食飯，朋友推薦依間蠔吧，因為星期一有vip優惠，生蠔十蚊一隻👍🏻👍🏻。老實講，對十蚊一隻既生蠔期望唔高，不過打正旗號做蠔吧，應該唔會太差掛⋯坐低點左一打當日生蠔，店長有介紹個名，不過已經唔記得喇😅。生蠔好對胃口，係清爽海水味比較重既生蠔，真新鮮，好好味，最後一打點完又一打，encore 左三輪😬😬除左生蠔之外，主菜都唔錯。當晚點左一塊18安士既ribeye，medium rare，煎得好好。另外點左一份豬扒，一份豬手，個個讚不絕口。意粉點左龍蝦扁意粉同埋蒜片蜆肉意粉，都可以。反而前菜好似沙律、雞翼、啤酒薯條就一般般。朋友vip優惠，星期一打個七折，低食！唔怪得星期一都爆檯啦🤪🤪…Read More

過江龍星加坡天天海南雞飯在銅鑼灣開業已經一段時間，初期無時無刻大排長龍，所以一直未有勇氣拜訪。今晚經過唔駛排隊，即管一試。去過星加坡天天既來到香港天天都肯定有以為去錯地方既感覺😅😅⋯⋯原本響Maxwell Food Center 裡面賣SG$3.5一大碟海南雞飯既大排檔，來到香港變左新潮酒吧餐廳，格局同星加坡完全唔同。一坐低，侍應問我地要有氣水定係無氣水，我呆左幾秒，之後點左個薏米水🤔🤔。見個餐牌係一本相冊，好似本雜誌咁，覺得好奇怪，開始醒覺香港天天走既其實係高級路線😌😌。餐牌除左星加坡都有既海南雞之外，仲有燒雞同好多其他香港特有菜式選擇，但係獨欠碟頭海南雞飯。海南雞係必點既，兩個人食例牌可以，飯要另點。飯既選擇有白飯、雞油飯，仲有個龍蝦脆米泡飯，全部石鍋上。點左一個白飯，一個龍蝦脆米泡飯。另外點左好有香港特色既小炒皇。總體食物味道可以既。海南雞都有星加坡既水準。不過兩人埋單五百幾，同響星加坡天天食一餐價錢差近十倍。如果你去天天係想回味Maxwell Food Court既風味的話就唔使去啦😎😎…Read More

朋友係超級AP鴨迷。從讀書到做野都有儲AP鴨物品，以前細個每年送依個AP鴨迷朋友既生日、聖誕禮物都離不開AP鴨精品，由筆、月曆、毛巾、Tshirt、到行李喼都送過。隨住年齡增長人變得實際左，加上AP鴨無再出新精品之後，朋友對AP鴨既熱情都變淡左。知道AP鴨開限時cafe之後第一時間同AP鴨迷朋友分享，仲馬上約定飯局😄😄星期三晚唔算人多，七點四左右到餐廳，職員寫左張飛話要七點九先有位。無問題，餐廳門口好多AP鴨家族紙牌背景比你影相打卡，眨下眼就有枱喇。餐廳可以話係AP鴨overload😌。檯面、餐紙、飲管、杯墊Menu全部印滿AP鴨個樣。所有餐廳既食物都有AP鴨影蹤⋯⋯撊咗一輪之後終於決定點個二人套餐。套餐包甜品2選2、主食3選2、特飲4選2。主食點左咖喱飯同卡邦拿意粉，甜品係芝士餅同流心桃蛋糕。真心覺得味道一般般。日式咖喱飯好難做得差，義粉好足料，超多火腿。兩個甜品味道一樣，而且未融曬雪🤔🤔。兩個飲品都係一般吧。驚喜當然係所有菜都帶AP鴨裝飾。咖喱飯個白飯壓成個鴨樣先上菜。蛋糕都倒模AP鴨個樣。意料之外既係真係好多AP鴨迷呀⋯⋯個個都瘋狂影相，不論男女老少都不停拍照拍照，真係好忙。餐廳有最低消費，埋單時可以抽AP鴨噤章。總括而言，如果你係AP鴨迷的話，就一定要來朝聖👍🏻👍🏻…Read More

無印Cafe其實係食堂式既餐廳，攞咗位之後排隊買餐。帶位同點餐既職員都好有禮貌，照護殷勤，底讚👍🏻。今晚點左五點套餐，包兩個熱盤，三個冷盤，一碗湯同埋飯一碗。最鍾意個紫薯沙律。另外點了大蝦帶子湯義粉，海鮮味好濃。甜品點了一份栗子戚風蛋糕，唔錯。…Read More

中環夜食，一般回去翠華。翠華旁邊開左間越南粉，朋友間對餐廳負評唔少，不過自己覺得蔡瀾肯出自己個名開餐廳應該唔會差得去邊掛⋯⋯當晚同友人一人一碗越南粉，再share個越南包。點越南包既唯一原因係貪平。出面大部分賣越南包既餐廳都買都賣到$70-90一份，蔡瀾賣$28，都試下啦，果然係$28貨色。小小法包加肉一片加甜醬我對自己點既生牛肉牛筋河評語係用料吝嗇。生牛肉兩三小片，牛筋係一粒粒上，好奇怪。牛河份量對女生來講剛剛好。唯一碗湯落得最多。湯底好甜好甜，甜到有d唔自然，好似落左糖咁，有別一般牛骨湯既清甜。雖然個人覺得食物質素一般，當晚餐廳都客滿，不過我就未必會返轉頭喇。…Read More

一大班人食飯，有人建議食依間私房菜。一行15人包場。晚飯既菜單只有私房菜式既套餐，每位自選兩款唔同嘅頭盤，食材都唔錯，算新鮮。我揀嘅頭盤係醉蟹蓋加海膽蟹子同埋煎鵝肝帶子。蟹蓋入邊填滿蟹肉，蟹肉帶微微酒香，鋪喺面嘅海膽好大羹，唔孤寒。不過鵝肝好多筋，應該唔係高價貨。全晚重點兩道菜，蝦蟹山一道，啲蟹多到成座山咁。另外一個醬油鴨糯米飯，成隻醬油鴨鋪係糯米飯面。侍應放低碟飯俾大家影相，影完相之後會拎走拆肉，鴨肉撈埋糯米飯一齊食，好味到不得了。晚飯嘅菜式好特別，講唔出係邊度地方嘅彩，叫做fusion吧。餐廳日頭係做日本菜既，佢哋嘅旋風蛋包鰻魚飯都好似幾出名。十幾個人搞飯局，budget有番6-7百蚊嘅話，依間餐廳都係唔錯嘅選擇。…Read More