Tonyhaha2008的个人专页

好久沒寫食評了，這次真的想寫寫，因為真的是滿心期待的。我非常喜歡吃麵，當然也吃過不少麵，而【陝西油潑麵】，是我的第一位。知道了這家餐廳是西安人開的，當然不試不可。久未寫食評，沒拍照，就長話短說好了。首先座位太少了，就準備客人都外賣嗎？油潑麵的寛麵條，可是一放就會粘在一起的，不太適宜外帶的呀！我點了一個套餐，有【金牌油潑扯麵】【肉夾饃】【豆漿】，再另加一份【金牌陝西涼皮】。這店的【金牌】，一般都是指最簡單，沒什麼配料的基本級菜。先講豆漿，豆味濃，甜味適中，但沒有隔怎麼渣，杯底冇渣，但這樣粗糙的家庭式豆漿，我能接受，但相信不是出名挑剔的香港人所能接受吧。然後說說肉夾饃吧，那個包的口感是挺特別的，一看就知道有下過心思的，喜不喜歡見仁見智，我就覺得還不錯，能夠感覺到這是老闆想做出的感覺。肉嘛，口感也不錯，不會乾乾的，也不會過鹹，符合陝西風味的一份肉夾饃味道不錯，但對香港人來說口味就稍微單調了一點。再來要說的就是【涼皮】了～涼皮口感非常正宗，加了份量適中的青瓜絲，加添了清脆感。加了放在桌子上的涼皮汁，味道馬上正宗起來。點點的辣，點點的清脆，軟軟但完全不會粘在一起的涼皮，事實上真的好吃。但是味道寡了一點，加了涼皮汁，吃了一口就馬上發現了，差了什麼？ 就是少一份突出的香味和味道，真希望店老闆能看到這食評。。。。。細剁一點新鮮蒜頭放在粉皮中吧（是剁，不是磨），這樣味道香味口感也會升華到另外一個層次了我把【油潑麵】放到最後說，當然因為這是重點了。陝西人都吃麵食，這個麵是非常重要的。一家店值不值得去，就看麵了，而油潑麵更是重中之重。記得內地名導演張藝謀說過，在外拍完戲，回到老家，第一件事就是吃一碗油潑麵！！！油潑麵就是陝西第一麵，也是我最喜歡的～油潑麵非常簡單，重點就在麵條。扯打好麵，放水裡煮熟，隔水放碗裡。麵上放一點點青菜，辣椒面，點點花椒粉，鹽，味精。。。一勺滾油到上表面，真是香氣四溢～看看眼前這碗麵，問題來了！ 麵表面這些豬肉是什麼意思吃一口，味道不差，但這不是應該存在的東西吧！這是不想讓香港覺得太單調所以才加的東西嗎！？ 我不想見到它，馬上把這些豬肉都吃掉了。。。。。可以把麵跟調味料拌均勻了。。。。。。吃一口麵，口感不錯啊，麵條的味道也不錯香香的辣椒以油粘在麵條上，碗底的水不算太多（如果多了，辣椒就粘不去麵條上，會沉底了），是一碗挺不錯的油潑麵～ 真要讚一下，因為一碗好的油潑麵，這店就已經做的不差了。但問題出現在幾點上，首先是太鹹了！！！這個問題是最嚴重的，一吃就覺得鹹，加一點醋再吃，還是覺得太鹹。會是因為那些肉的肉汁嗎！？還是鹽真的放多了！？如果能清淡點點就非常好了～～～第二個問題是性價比太低了。。。就是說麵的份量太少了，這也扯上價錢相對偏高了。我是為了吃這碗麵而去的，這個份量根本吃不飽！如果吃兩碗就差不多120蚊，這也太貴了吧！我不知道這是店鋪租金太高，還是店鋪定位，不知道。但我覺得，如果定價在35蚊一碗，份量再加一半，最少能讓人吃7成飽就更好了。。。。。因為這店的麵做得不錯，所以是很有生存空間的，但我說的問題，就真的要改善了。…查看更多

好耐冇入元朗了，突然心血來潮就上咗巴士了 不過真係唔啱時候，因為天氣實在太熱了。。。禮拜日呀，條街感覺上都冇咩人 求其搵間購物中心行下都冇宜家咁辛苦 餓喇！就發記啦。坐咗冇幾耐我點嘅【蠔仔粥】就上檯喇，試試味道先。。。淡咗少少，加啲鹽先。。。都仲係淡，，再加啲胡椒粉，再加鹽。。。。。。。好清淡呀 天氣已經咁熱，啲粥又咁清淡，點算呀 都係老婆煲嘅粥好味啲 不過啲蠔都仲算有份量然後係【豬潤腸粉】。。。一樣咁健康，不過啲豬潤都仲算新鮮，煮得仲算嫩，切得都幾大件，就係淡啲囉 食到差唔多，見到坐隔離嘅阿叔，都叫咗豬潤腸粉。。。佢先問咗店員攞咗個碗仔，我想，一個人食粥，駛唔駛攞碗咁多餘呀。。。之後我見佢攞起支醬油就倒入個碗度，然後就夾起件豬潤擺入去了。。。。。。。。。明白了，學到野了 係時候走人了，不過應該冇下次了～…查看更多

早就聽過哩間鋪嘅大名，但間野嘅地點真係唔太就腳，尤其係嗰邊附近冇咩好做，所以一直都冇去嘅打算最近因為新工作關係間唔中就喺附近出沒，但都係日光日白一個人，就隨便買份早餐吧。粢飯凍豆漿就係我今日嘅早餐了。好大一個粢飯見到就精神。一咬落去就有一股熱氣湧出黎，晨早流流真係令人精神一震 嗯(⊙_⊙) 好脆嘅油炸鬼，熱辣辣，又香口，軟軟嘅飯，加上味道正宗嘅肉鬆。我食過唔少食店嘅出品，從質量，飯 肉鬆油 炸鬼嘅比例，哩間所賣嘅粢飯，係我食過最好的！！！ 本來覺得有啲貴，但真係物有所值 豆漿夠凍，甜味亦適中，飲得都好舒服…查看更多

舅父一家住喺西貢，所以我同老婆得閒都會黎哩頭行下的。我老婆中意食粥，之前又唔多識煲，所以每次過黎哩頭都好似上癮咁想黎開飯 最近老婆終於可以煲出一碗又棉又香嘅粥了，所以再返黎試試哩間嘅出品午飯時段，已經滿座，唯有排隊啦，等咗10幾分鐘先有得入座呢，好彩仲有個哥仔得閒就出黎安撫下我地望望餐牌，哩間啲野其實唔係好平，一碗粥平均20蚊左右，再加份油器腸粉之類就已經30幾了，以街坊早餐黎講一啲都唔便宜啊老婆中意食魚，所以次次都食【魚腩粥】 我本來想叫碗白粥試清楚哩間嘅粥底，但都係叫碗【艇仔粥】吧，好多年冇所謂食過了～再黎份【炸兩】吧，屋企煮唔到的粥黎喇～試啖粥，材料份量唔少，亦幾新鮮，魚腩幾甜，艇仔嘅魷魚亦有質感，但粥底感覺上唔係好香啊。。。但因為材料量多，所以真係食唔出粥嘅真正味道，但整體黎講味道其實唔差的【炸兩】就真係好味喇～油炸鬼足夠脆，腸粉夠香夠軟，撒上蝦米同少少蔥花，即叫即蒸熱辣辣，最後加羹豉油～大大份好有質感，食完好有滿足感，好正食到差唔多，老婆同我講佢碗粥大部分都係仔仔食的，唔夠飽啊我個衰仔幾時大食咗咁多架 適逢其會，就黎多碗【白粥】啦，等地可以試清楚個粥底【炸兩】味道唔錯， 再要多份【大蝦米腸】吧哩間嘅腸粉真係唔錯，唔係好滑嗰種，但口感適中，份量夠，食得好舒服，好滿足，唔怪得之每個叫外賣嘅都係叫腸粉炸兩之類嘅野啦終於可以試試個粥底了，粥上檯。。。聞聞，冇乜粥香啵。。。。。。食番啖。。。淡而無味冇乜米香，口感亦好奇怪，唔稀唔稠亦唔棉，反正唔好食 加啲鹽亦唔令到碗粥好食啲，真係好失望。。。…查看更多

煲咗飯但我又突然冇心情煮餸，老婆又唔想煮，咁不如落街食吧。去邊間呢？隨便一餐，就【大快活】啦，味道唔錯價錢又合理～老婆食咖喱食上癮，出親街都想食，就先黎份【咖喱雞飯】吧，我就要【焗豬扒飯】～俾完錢，阿姐除咗飛之外仲俾咗塊牌我，話搵個位坐坐，佢同事就會將我地點咗嘅餐送過黎架喇～ 大快活幾時開始有送餐服務架，太驚喜喇 特別服務嗎？彩德邨的位置以前是石礦場，地理位置高，風景還真的不差，下面就是九龍灣地鐵站，大快活內一幅幅嘅大玻璃，非常開揚我地搵個梳化位坐低，話咁快我地點嘅餐就送上黎喇～ 一向對【阿活咖喱雞飯】好有信心，之間又試過好多間餐廳嘅咖喱，好耐冇黎食過，就再重溫下哩間嘅出品吧～望住哩份咖喱飯就記起之前沙田連城廣場嗰間【嚐味】嘅出品，【嚐味】嘅雞係一粒粒的，哩間係一件件的 一件件的，煮得又入味，咖喱味又香又濃有層次感，完全冇寡寡嘅感覺！連鎖快餐店嘅出品居然比大部分餐廳都要好，確實不太正常 啊係，碟入面嘅紅雞蛋係哩間分店開業5週年大食會，係某啲店員特別送給某啲老客戶的 【焗豬扒飯】味道亦好，洋蔥菠蘿番茄配料樣樣新鮮，份量亦足。焗豬扒飯嘅豬扒當然唔會太厚的了，但肉味夠具質感，加上炒蛋飯，配合番茄醬嘅味道十分令人滿意 啊係，加配椰菜小番茄一份…查看更多

因為要同杰少去聯合醫院覆診，所以今日早起未食早餐。突然發現哩度原來係有飯堂wo，適逢其會，就去試試哩度嘅出品啦飯堂處於地牢2樓（B2），出電梯跟住指示行到尾，遠遠就見到哩個裝咗光管嘅入口了。哩度係由【大家樂】負責餐飲的，所以餐單會有多少熟口熟面，同外面嘅快餐店唔同嘅係，哩度有員工價同訪客價，咁當然訪客價會貴啲啦（有啲仲貴8蚊添）決定想食咩就排隊俾錢喇，就黎份【雞扒火腿多士餐 配 凍檸茶】啦～唔知係唔係醫院嘅關係，地方好乾淨過咗早餐時間，所以冇乜人，每張檯都好夠大食野，雞扒好細件啊，又冇咩味，煎得亦香，同蒜蓉汁一齊食，味道還可以啦。 火腿亦差唔多，好彩有兩片 多士亦只有一片，軟軟的都幾新鮮，塗咗少少蒜蓉，食落都算舒服。 凍檸茶冰唔太多，容易拮抵讚～檸檬有5片呢 不過份量真係少咗啲，唔多抵食，食完都唔飽，價錢又唔便宜，應該冇下次了。。。。。。…查看更多

路過觀塘，老母話附近有間麵鋪幾好，不如去試試。啊，係咩，我唔多黎哩頭，你決定啦～咁佢就帶我黎哩度了一間我之前冇聽過嘅老字號，不過既然自稱有40年歷史，我都放心啲老母話要碗【牛雜河】，我都唔知食乜好，聽落唔錯，就前後兩碗啦～上檯喇～賣相唔錯，一件件擺得好整齊，試試啲湯先～ 湯幾濃，但腩汁俾我感覺有啲寡唔夠香，味道ok，但冇乜驚喜，起碼我屋企嘅老母牌牛腩味道好過佢，不過算啦，開檔做生意，同屋企煮嘅牛腩又點一樣吖，屋企煮落嘅配料都多啲啦～ 牛雜都幾入味，件件都煮得好淋，但因為腩汁寡係死症，冇得夠，早知要多蔥，多多份清脆感 不過已經唔錯了～ （唔記得幾時開始牛雜入面會放【肺】的，冇記錯我細個食嗰陣牛雜係冇哩樣料的，宜家周街都有了）河粉係幾令人滿意嘅一環，窄身嘅河粉煮得軟得黎又保持到口感，唔錯，果然係老字號，有水準～整體黎講真係唔差，對做街坊生意嘅鋪要求唔好太高，灣仔【華南】牛腩味道俾佢好得多，但亦貴得多。一分錢一分貨，將貨就價，可以收貨了…查看更多

聽講當年蔡瀾試過哩間嘅出品後居然留低幾隻字咁稀奇，午飯時間，咁啱冇野搞就黎試試吧。第一次黎唔識規矩見到位就坐低睇餐牌了，坐低後聽到有個姐仔用擴音器叫其他客人落嘅單，發現原來係要先去搵佢 ☞報坐位 ☞落單 ☞俾錢，然後再坐低等食的 講真我唔係好中意俾所有人知道我 ☞食乜，☞駛咗幾多錢 ，哩種服務模式的。不過既然人地定咗哩個規矩唯有無奈接受囉聽講哩個係假日特別安排就要杯【咖啡紅豆冰】同一份【咖央西多】吧～換個位坐坐，就睇到一杯杯預先好嘅紅豆蓉了，睇黎【紅豆冰】真係哩度嘅當紅飲品啊飲品先到，攪攪幾野，飲啖先～飲唔到咩紅豆，未均勻，用埋鐵羹再攪！ 再飲，依然未夠均勻，起勢咁攪！！！又攪又撈。。。總算好啲。。。哩個就就係紅豆蓉放底嘅問題了，攪極都覺得仲有紅豆喺底 咖啡味道沖得仲算ok，但奶味就唔夠香了。。。冰太多了，所以就算我點努力都好，都唔能夠將啲紅豆同咖啡完全混埋一齊，飲起黎感覺咖啡還咖啡，紅豆還紅豆咁 不過當我飲多啖之後都覺得無所謂了，反正飲落覺得咖啡同紅豆味根本完全唔搭，勉強冇幸福！ 成杯飲完之後仲有大半杯冰留返喺度，咁唔駛講，多多少少都仲有啲紅豆蓉壓喺冰底啦。。。非常失望 （評分 : 2/10）唔係啲咖啡味還可以，我真係想俾零分佢！！！【咖央西多】終於上檯了，顏色均勻嘅西多士，加上表面微溶嘅牛油同分量適中嘅糖漿，一見就興奮 試試先～ 一拮住，再手起刀落，切開一刻已經聞到香味，再放入口。。。好香～西多士煎得好靚，內軟外有質感（有啲野真係唔一定要脆脆的） 。麵包用雞蛋稍為浸過，係傳統方式，浸嘅份量同時間亦好適當，令人食都蛋香但不見其型。煎多士嘅油份量亦控制得啱啱好，一啲都冇過量，碟底完全冇油留低，以一件西多黎講，幾乎無懈可擊～但所有讚許係以一件西多嘅角度黎講的，我暫時都未提過味道呢 事實係太甜喇！如果我叫嘅係一份普通【西多士】嘅話，份量適合嘅糖漿同牛油，多士新鮮軟軟的，夠熱又香，的確無可挑剔 但我叫嘅係【咖央西多】啊，本來係甜度適中嘅西多，宜家加上咖央醬之後就太過甜了。。。廚房某程度唔夠細心呢 之前試過深水埗【維記】嘅出品就冇哩個問題了～ 但老老實實，哩間嘅西多士的確不凡！！！ （咖央西多評分 : 8/10 ，傳統西多士評分 : 10/10）P.S. 最後嘅笑臉評分係俾【西多士】的，同【咖央西多】【咖啡紅豆冰】完全無關！ …查看更多

真係好耐冇黎過【大家樂】了，午飯時間經過就入去食試試吧。就黎碟【豬扒肉燥飯】跟【羅宋湯】吧～肉燥味道不錯的，味道冇乜特別，但調味適中冇過鹹太淡，肉燥口感軟軟的，送飯一流，表面仲有蔥花呢 半只雞蛋一睇就知道老咗少少，但快餐店嘛，要求唔好太高，拌入啲肉燥度送飯食其實ok的～ 講真一句，豬扒味道真係唔錯，軟軟，熱辣辣的，幾香，炸得亦唔錯，冇炸過火 就係細塊啲囉跟餐嘅羅宋湯就差少少喇，味道唔係話差，但覺得味道單調咗少少，可以配料唔夠新鮮，味道唔夠出吧 飲完亦覺得有啲口乾乾的。整體味道不過不失，但相對直接對手嘅水准黎講，冇衰到好似亞視咁已經好好了…查看更多

真係好多年冇食過韓燒，年紀大了，新陳代謝減慢，食嘅時候好過癮，食完要減返就唔係咁容易了，何況咁熱氣，上次已經係8年前嘅事了。最近阿媽返咗黎香港，我老婆之前又冇食過韓燒wo，適逢其會，我地3大1嫩，就去過癮一次吧～ 今日嘅目標係觀塘APM旁邊，One Pacific Centre 9樓嘅老牌韓燒連鎖店【韓和韓國料理】了步出升降機，當堂眼前一亮，【韓和】兩隻大大發住紅光嘅招牌出現喺眼前，配合乾淨得發亮嘅黑色玻璃反光幕牆（其實係黑色牆磚外加大幅強化玻璃），真係氣派非凡！令人眼前一亮啊～角落放住一個廣告易拉架，各分店嘅地址電話，營業時間，分段時間收費等等資料都清清楚楚咁列明，簡潔易明～ 今日係禮拜三午市時間，係最實惠嘅時段步入正門，置于眼前嘅係食物擺放角，三張超過10米長嘅深灰色長檯平衡擺放，碗碟調羹等等餐具亦簡潔地安放喺長檯面下方櫃格入面。高樓底嘅假天花配合上圓形嘅巨型燈罩，非常地有時代感，同時極具派頭！ 真係有啲懷疑我係咪入錯星級酒店嘅西餐廳 喺我依然身處迷幻當中嘅時候，禮貌嘅侍應小姐就引領我地入座了，相信因為帶有嬰兒手推車嘅關係，當時餐廳只有大約3成滿嘅情況下，我地依然被安排坐喺全餐廳最角落嘅卡位嗰度，的確非常細心～大小適中嘅平板電視，置于同門口招牌一樣嘅黑色反光幕牆之中，再配合上淡顏色嘅木牆，設計非常醒目，華麗中不失溫馨，我真係非常欣賞！卡位旁的是大幅強化密封玻璃窗，我地身出9樓，景觀非常開揚～ 每個卡位窗邊都放置一盆盆栽，令整體感覺非常舒服～ 設計師功力十足，如果窗外嘅係維多利亞港嘅景色，而唔係重建中嘅觀塘→_→ ，真係難以置信我正身處一間實惠嘅平民化餐廳黑色反光檯面，入檯式燒肉爐，黃色烤爐外框連抽氣孔，紅色嘅檯紙，純白色嘅圓碟加醬油碟，黑色杯筷。。。配合起黎頗有格調，紅黑兩色主題從門口開始練貫到檯面，設計師功力令我再次深感佩服 加上內置抽油煙機嘅烤肉爐，能夠非常有效地將油煙抽走，食完唔會成身燒肉味，哩種體貼真係。。。有一種本來就應該係咁架啦！該死的點解我地以前要忍受食完之後滿身烤肉味嘅無奈！！！ 安排坐喺最入面令到BB無處可逃，但又有個窗檯位俾佢玩同睇風景，我同老婆終於有啖好食了 不過從哩個位行到出食物擺放檯就遠咗啲喇老婆肚子餓了，先去給她拿點開胃菜吧～ 涼拌木耳青瓜小番茄Kimchi都醃得不錯，不太鹹辣嘅味道雖然欠缺個性，但大眾化嘅口味令人食得舒服冇脾氣 切成一件件嘅火龍果同西瓜就睇都覺得精神。【椰汁西米粟米糕】【芒果布甸】【杞子糕】甜品應有都有 雪糕今日分別有【香草】【朱古力】【Cookies】3種口味，都屬食得舒服嘅大眾化口味。食物碗碟擺放得井井有條，我最欣賞嘅係包住燒烤肉食嘅生菜同蒜頭，好新鮮，韓燒點少得佢呀生肉方面，牛肉雞肉豬肉魚肉魷魚選擇繁多，切嘅方式亦好有創意～ 以雞肉為例，有普遍嘅雞件雞翼雞柳條，最特別嘅係廚房居然將雞腿用電鋸連骨切成一件件，令每細件雞腿中間都連住一細粒骨頭，造型非常可愛 肉亦醃得好醃啱好，唔會太鹹，樣樣都好好味，我最欣賞嘅係【牛仔骨】同【龍脷柳】，牛仔骨一向好評處處，龍脷柳又厚又嫩，我阿媽同BB都話好正食物種類繁多，可以post上黎嘅相又好有限，我就點出令我印象深刻嘅其中幾道菜吧～ 其中一樣就係哩味【豬腳薑】，之間嘅雞蛋為保持形狀煮得唔入味可以不提，但啲豬腳就真係好好味，可能係用高壓鍋煮的吧，豬腳煮得入味得黎又夠爛，令我年紀漸老嘅阿媽食得好舒服，味道亦唔錯（評分 : 8.5/10）第二樣星級菜係哩道甜品【薏米糖水】，煮得偏稠口感一流，味道清清甜甜，類似土茯苓嘅味道非常香，啖啖嘅薏米用料慷慨！如果喺外面食，30蚊一碗都覺得值得 食得非常窩心 （評分 : 9/10）跟住要介紹嘅係無心插柳嘅【熱豆腐花】，我一般食自助餐都係習慣東食食西試試，務求試勻每一味餸，當我食哩味豆腐花嘅時候只不過抱住隨便試試嘅心態，但一食就愣住了。。。好滑，真係好滑，令我想起【公和荳品廠】嘅出品 再試一啖，我係冇加糖漿同黃糖的，令我可以試清楚碗豆腐花嘅味道。。。。。。錯覺嗎？是味覺有誤嗎？哩碗豆腐花嘅豆味比【公和】嘅出品豆味更濃！！！ 又夠熱，感覺上佢比名動香江嘅【公和荳品廠】嘅出品更加出色啊 （評分 : 9/10）最後不能不提而容易被遺忘嘅就係哩道【海鮮辣湯】，哈哈，一定係因為費事俾人批評話【冬陰功】冇哩樣冇嗰味料而改哩個咁嘅名吧 哩碗湯煮得好夠味，海鮮味好濃好甜好香，辣味唔重，真係好好飲，飲得好舒服 值得一提嘅係連啲配料都煮得好入味又唔乾，切小片辣椒嘅辣味已經被煮曬出黎，一啲都唔辣，取而代之嘅係海鮮味，瓜呀，魚柳呀都煮得又嫩又入味，值得一贊 最難忘嘅係啲蛤蜊，一般海鮮辣湯入面嘅蛤蜊係又細又乾巴巴根本唔食得的。哩味湯嘅蛤蜊size有人大有細，大嘅唔講，就連啲細粒嘅都俾廚房煮到嫩嫩的 真正值得推薦嘅一道湯！！！（評分 : 9/10）埋單每人低於200蚊簡直超值！…查看更多

投openrice今年最佳餐廳嘅時候發現咗哩間餐廳嘅存在，又咁啱有事出觀塘，路過嘅時候就走入去食試吧。睇過啲食評，有人話哩間嘅雞有時會烤得有啲乾的，所以我有考慮過食【巴東牛肉飯】架 但記得上次去荃灣嗰間好出名嘅【正宗山西刀削麵】，因為我個人唔係幾中意刀削麵嘅口感，反正嗰段時間我又經常喺嗰邊，所以食咗醉雞菜飯，結果大失所望。結果到宜家都仲未有機會返翻去，令我有多少耿耿於懷添 今次唔博喇，就要大受歡迎嘅【印尼黃錦飯】啦先食右上角嘅豆。。。辣係第一感覺，醃辣咗嘅豆令旁邊嘅飯都變辣了 但其實並唔係太辣，辣得黎保仲留咗豆本身嘅清甜味，豆口感嫩嫩的～可能係因為廚師知道豆算偏辣，唔係個個人受得起，旁邊放咗兩片新鮮青瓜協調一下，非常唔錯 黃飯帶少份量嘅薑令到啲飯唔會有單調嘅感覺，亦唔會搶走其他餸嘅風頭，口感乾中帶軟，廚師深明此中之道啊因為食咗啲辣野，所以我想試試左下角嘅瓜，連帶食咗啲椰絲。哩隻瓜感覺係節瓜，軟軟的，調味甜中帶鹹，但唔會過濃，感覺上就似祖母輩嘅出品，食得舒舒服服 椰絲係橙色的，味道同一般白色嘅椰絲唔一樣，稍為甜少少，感覺上就係白糖同黃糖之間嘅分別 但辣豆係辣的，同瓜嘅甜味完全唔同，就好似食緊兩道菜咁，令我有種怪怪地嘅感覺。但我唔知道正宗嘅【印尼黃錦飯】係點嘅，所以覺得怪歸怪，但不予置評當然同時亦試埋旁邊嘅花生，甜甜的，係蜜糖花生，一粒粒嘅花生本身夠香，俾啲清甜嘅蜜糖粘住，整體嘅味道又香又甜 我唔知哩味花生係唔係自製的，但味道真係幾好之後試嘅就係右下角嘅【巴東牛肉】了，之前喺灣仔【莎巴】食過，兩者感覺好唔同，【莎巴】嘅出品味道好濃，非常地濃，牛肉粗中帶軟，同油酥餅一齊食覺得好好味，但真係好濃，同濃過龍嘅感覺只差一線，好有個人風格 哩間嘅出品就完全唔一樣喇，牛肉嫩嫩的，煮得好入味，係甜中帶鹹的，感覺上係紅蘿蔔嘅甜，加上牛肉味，配合得認真地好，好舒服，平易近人得多 汁嘅份量亦俾得啱啱好，冇過多亦冇唔夠，有經驗食完濃味嘅牛肉，就想試試隻蛋了。試過其他地方嘅滷蛋，唔係黃到爛，就係哩隻，一般睇到哩種白色都打定輸數。因為要保持到外黃內白嘅靚樣之後仲要入味係幾有難度的 我一啖搞掂佢。。。嗯。。。都幾好味啵 意想不到，滷味食落舒服，口感結實。白色的蛋白，淡黃色嘅蛋黃都咁夠味，真係有啲匪夷所思最後要試嘅就係左上角嘅烤雞了，係一件雞胸肉，哩個部位嘛，烤得唔乾就收貨了，試啖，口感偏實，未算乾嘅程度～燒烤味的，味道中規中矩吧。整體味道都幾好味，試下冇壞，但總覺得好似少咗種親切感，應該冇下次喇～…查看更多

難得撞正朋友忠哥放假，我一家三口就入沙田探下佢吧。午飯時間，我地由瀝源行到去連城廣場，都唔覺得有咩特別想食，去到盡頭見到哩間食店，感覺上比較實惠，就入去試下吧～坐低安置好BB，就睇下有乜好食先。忠哥話想食【豬手飯】，老婆喺南非嘅時候食過幾次印度人煮嘅咖喱之後就中意咗哩味野了，加上食過 大快活 嘅出品，就成日想食了，就【咖喱雞飯】吧 我睇黎睇去都唔覺得有咩特別好食，就黎碟【牛脷飯配洋蔥汁】吧，除咗忠哥想飲奶茶外，我同老婆都想試試佢地個【例湯】～先上檯嘅係【豬手飯】，賣相唔錯啵，豬手上有榨菜粒，唐生菜鋪底，旁邊有粒小番茄，青瓜片，仲有個醬汁添～加埋有一碗分量嘅油飯，感覺好豐富啊 試試啲豬手先～夾一件點下啲汁。。。其實味道唔差的，豬手本身嘅味比較寡，但連榨菜粒加醬汁一齊食，味道就合理得多，整體上就算係食得過了雖然有啲位唔係太易咬，但口感軟中有咬口，經濟飯餐，要求唔好太高，其實算係咁喇～（評分 : 6.5/10）跟住就係老婆嘅心頭好咖喱雞配白飯了。但賣相唔係幾吸引啵，啲雞好似好細件咁，切成一粒粒容易入味嗎？ 分量感覺上亦唔夠多，聞落亦唔多香。。。試試味先。點講呢。。。。。。唔係話難食，但味道一啲都唔突出，細細件嘅雞，加上平平無奇嘅咖喱汁，可以話。。。冇風格囉，食飽個肚行出門口都唔記得自己食過啲乜嘅感覺囉。。。 整體黎講就係寡囉。。。冇乜好食囉。講真！不如【阿活咖喱飯】（評分 : 4.5/10）最後上檯嘅係我隨便叫嘅【洋蔥汁牛脷飯】了，眼睇都唔差，3片正常size嘅牛脷上面淋上洋蔥汁，再搭些許大白菜，飯嘅份量都唔少，應該可以好好開飯喇呱。洋蔥汁係普通茶餐廳嘅正常味道，汁煮得啱啱好唔會過稀，調味亦正常好感動啊，終於食到啲冇投訴嘅味道了～～～（洋蔥汁都煮唔好嘅話仲學咩人開鋪呀）但份量就真係少咗啲喇，我正常咁食，食咗半碟飯，一件牛脷，同啲淡而無味嘅大白菜之後就冇曬汁喇，搞到最後要乾啃。。。牛脷本身輕輕煎過，口感唔錯，但味道偏淡，可能煎嘅時候冇薄薄咁灑少少鹽呱，但冇煎乾，感覺上已經幾好了。但喺洋蔥汁唔夠多嘅情況下，原汁原味嘅煮法就會凸顯咗牛脷嘅特有``風味 '' 囉，所以我老婆試咗啲啲就放棄咗喇 啊，啲白飯口感正常，亦冇隔夜餿味，令我倍感安慰 （評分 : 7/10）最後講下今日例湯【椰子雞湯】吧，雞湯味唔鮮亦唔甜，普普通通，味道正常，比上不足，比下有餘囉～例湯哩味野，差起上黎真係可以令你完全唔想飲加嘛 哩碗湯味道再一般呀，都仲有好幾片椰子可以咬下吖，幾真材實料呀 （評分 : 6.5/10）食完就走人喇～但老老實實，連城廣場哩個位嘅租金應該唔低，以佢地咁嘅食物質素，哩間野究竟憑咩喺哩度立足架？？？ 真令人費解…查看更多

齋腸。。。熱熱的，軟軟滑滑的腸粉一向係我老婆嘅心頭好，每次見到都想食 今日一家三口路過【南龍粥店】，老婆又想食了，因為BB都中意食佢食得慢又坐唔定，我就入去買份外賣吧～買完出黎交俾老婆，放好啲散紙，連個銀包都仲未擺返入袋，就已經聽到老婆嘅投訴聲了 有冇咁差呀 我黎試試。。。哦～明白了，煙煙韌韌粗礦嘅腸粉好有口感，非常真材實料～厚厚的，好濃嘅米香落足本 溫度屬微溫程度，將燙傷喉嚨嘅機會減到最低，非常貼心，俾BB食之前都唔使先吹凍了 淨係見到BB食到開開心心嘅表情都心滿意足啦～ 有啲想入返去擺低tips添 好！可以去評分了 。。。。。。…查看更多

早上10點左右經過，未食早餐有啲餓添～就買啲飽定下肚吧。望下價錢。。。比一般麵包鋪貴少少，冇所謂啦，買完即走，趕時間，快！就黎【黑椒雞肉燒餅】【雞尾包】【菠蘿包】各一啦。呵呵，個燒餅造型唔錯～鹹中帶甜黑椒味夠，又唔會太辣，ok啵～ 咬開可以清楚睇到一點點嘅黑椒同雞肉絲，食落似雞蓉，但依然食得出軟軟嘅雞絲，味道複雜，燒餅型嘅包口感到唔錯，唔乾，值得買黎玩下菠蘿包就差咗啲喇，味道偏淡我唔批評，一黎我嘅味覺可能俾先食嘅黑椒包影響咗，二黎年輕一代講少鹽少糖講健康。但包嘅口感就真係差咗啲喇，同隔夜麵包差唔多吧 雞尾包就好少少，但都相差無幾，5蚊個架，俾啲質數好wo，要我幫手俾租都要我俾得心甘情願嘛。…查看更多

朝早起身，望下窗外，當堂眼前一亮，之前一段時間都天陰陰的，今日居然有陽光wo，一於出去曬下太陽吧 好耐之前睇過蔡瀾嘅一個電視節目，知道上環有一間非常唔錯嘅粥店，老婆意思係想去啲好少去嘅地方，適逢其會，就一家三口一齊黎試試哩間【生記】嘅出品吧～去到上環，12點半午飯時間。。。又唔係喺哩頭返工，早唔到遲唔到，我地居然哩個時間到，排隊係無可避免架喇，就睇下要排幾耐囉 【生記】喺哩個角落係有3間鋪的，我地本來排喺粥品門口的，排咗陣有個員工同我地講隔離麵店門口冇咩人，排嗰邊啦，一樣架咋 好好好，我地就轉移陣地，走咗過去排喇，就排多5分鐘左右就可以入去喇～坐低後就即刻落單喇，我老婆中意食【魚腩粥】，就黎碗啦，再黎碟【炒米粉】吧。。。黎到咁遠，要多份【煎魚餅】吧。。。反正都係喇，俾埋碟【皮蛋】我 （食到差唔多，問咗老婆大人意見後，再補多碗【魚腐米線】，但一黎我俾碗米線嘅評語比較多，二黎屬於米線鋪嘅出品，所以都係喺米線嗰邊開多個食評吧）先上檯嘅係炒米粉，調味適中，鹹度啱啱好亦平均，配料嘅肉絲應該有先炒過，所以碟米粉味道一啲都唔寡，口感係偏軟嗰種，唔係話好好味，但睇得出配料配搭方面有認真考慮過，紅蘿蔔絲，椰菜，青光菜，榨菜肉絲等等應該有都有了，每樣份量都唔太多，控制成本得黎，亦唔會顯得配料多過米粉，但就真係好碎囉，冇條長，食得唔係咁方便，嚴重影響咗口感炒米粉食到差唔多就上【皮蛋】喇。老實講句，見到就唔開胃，中間蛋黃睇落感覺上霉霉地咁，試啖先。。。隱隱約約咁透出一股阿摩尼亞味 嗰種令人惡心嘅味道唔算好犀利，我相信如果切碎佢，掉落去煲粥應該冇特別問題嘅，但就唔適合就咁食或者做涼拌囉 皮蛋哩味野，真係要試清楚先決定好唔好攞出黎奉客呀！好難頂加嘛 跟住上嘅係煎魚餅（本來係有4片的，老婆手快，都未影相就冇咗兩片了，佢真的餓了，BB亦餓了） 哩份魚餅嘛，味道中規中矩，冇煎得太乾，保留咗魚本身嘅味道，但可能已經一早煎定，所以唔係好香，口感偏軟，生意好成咁，唔好太大期望每次去西貢我老婆都好掛住【金山粥店】嘅出品，價錢便宜味道又好，魚腩新鮮又大大件，粥底雖然唔係非常香，但煲得都算綿，已經算係中上之作了 雖然我對粥冇乜情意結，但確實係有期待的 等咗咁耐，魚腩粥終於上檯了～試試先，粥底煲得算爛，但食落唔係好綿，米亦唔夠香wo。。。魚腩份量都唔少，亦算新鮮，但煮得過火咗少少，影響咗整體口感，有種唔係咁好食嘅感覺。。。得罪講句，味道其實唔差，但係真係冇乜特別，對唔住我俾出去嘅38蚊囉最後總結，從【炒米粉】到【煎魚餅】到【魚腩粥】再到我後加嘅【魚腐米線】都俾咗我一個強烈感覺，食物配搭的確花過心思，有今時今日嘅名氣睇得出原因，但出名喇，生意好喇，就顧唔到品質喇。。。。。。算啦，走喇，埋單。…查看更多