財經閒人's Profile

近期懷舊概念嘅茶餐廳開完一間又一間，南龍係其中之一。正如之前嘅眾多食評所講，南龍嘅懷舊裝修係值得一讚，但作為餐廳仲有其他好重要嘅因素要注意喎！晚飯去南龍叫咗健康餐，侍應亞叔話餐飲嘅樽裝奶賣晒，揀其他飲品啦，我揀凍鴛鴦，佢話凍飲加3蚊，我話加就加啦；事後睇吓餐牌，樽裝奶賣18蚊而凍鴛鴦亦係賣18蚊，南龍亞叔咁都要多收我3蚊雞，嚡！等緊餐嘅時候，有新客尼到，侍應要我轉枱讓位俾新客，我諗南龍有兩層樓咁大，e 個時間冇可能滿晒座，跟住發現唔知幾時開始南龍晚市唔開上層; 但淨係開下層，邊夠位應付晩市呢?? 後來，又有新客到，今次就叫另一張枱嘅人兄轉枱，咁佢就面黑兼投訴喇！南龍你上層嘅租就已經俾咗，但係就唔開，要坐低咗嘅客人轉枱，咁嘅行為係趕客，真係要不得！講完服務就講食品 :個餐嘅多士係完全唔熱嘅! 凍多士梗係唔好食啦，放涼太久，多士變淋，唔趣囉!而個蛋加沙律就更加係凍到雪櫃雪咗一排咁嘅溫度，咁"冰感"嘅沙律遇到味蕾，味覺就會有些麻木+遲頓，結果呢蛋就冇乜蛋味，沙律亦冇乜沙律味!至於個蕃茄通粉，顏色就紅得好靚，但係茄味就好淡! 符合邏緝嘅解釋似乎就係 : 好靚嘅紅色主要唔係來自蕃茄，而係醬料；通粉就煮得唔夠淋，係煮嘅時間唔夠!結論 ：淨係裝修好係唔得嘅，食品及服務係更加重要，南龍真係要檢討吓!!…Read More

買咗 Petite 嘅團購。位置好方便, a short walk from 太子 MTR, 好容易揾。裝修時尚, 好新淨, 坐得舒服。侍應係年青全男班, 服務態度良好!但係一上菜就出事喇! 先尼香檳, 從未見過咁少汽嘅香檳; 比平價嘅 sparkling water 仲要少汽嘅香檳, 你見過未? 色澤好淡, 味亦淡; put it this way, 佢唔講你唔會覺得係香檳囉!!跟住嘅食品, 全部份量縮晒水, 同團購網上照片頗有距離, 差別最大嘅係 pizza, 網上照片嘅 pizza 係用圓形鐵盆盛載, 但真正奉客嘅 pizza, 係幾片正方形 2吋 x 2吋, 有如瓦通紙皮嘅嘢, 同網上照片差天共地!!此外, 煎或炸嘅食品都有同一問題 (包括上述 pizza), 顏色深啡, 乾晒, 甚薄, 口感好硬, 冇乜味, 用瓦通紙皮去形容, 相去不遠, 可能係煎、炸時間過長所致!! (註 : pizza 通常唔應該係煎或炸嘅, 但係上述 pizza 有煎或炸過).結論 : Petite 住置方便, 裝修時尚, 坐得舒服, 服務良好, 但食品份量同質素需改善!!…Read More

位處 i Square, 幾方便, 店嘅面積都幾大, 設計時尚, 坐得舒服, 環境唔錯.Book 位時, 聽電話阿姐頗為晦氣, 語氣不佳. 晚餐當日準時到達, 門口接待員望一望登記簿, 就話冇訂到, 跟住就唔理, 想行開, 咁我就自己揾, 好快就揾到, 接待員竟然巴閉成咁, 都算大開眼界!!2 人團購餐有小籠包, 內有湯, 味道OK. 雞絲粉皮, 不過不失, 味較淡. 上海炒麵, 味道適中, 口感可以. 高力豆沙, 唔錯, 但係細粒咗d.樓面侍應係全女班, 服務幾好, 有禮貌, 會主動加茶.結論 : 上海婆婆真係衰得唔抵, 竟然衰在接待員手上! 大家都知啦, 服務同食品係同樣重要架! 個喊臉係俾果位超 Hea 服務嘅接待員嘅 (唔肯定佢同聽電話果位晦氣阿姐, 是否係同一個人)!!…Read More

位置好方便, 近地鐵. 裝修普普通通, 可以接受.當日食咗軟殼蟹, 火車頭, 海鮮喇沙及三色冰. 軟殼蟹份量足, 明顯比一般食店嘅 portion 大, 味道唔錯. 而火車頭亦係明顯比喇沙大碗, 味道OK.雖然招牌寫明係東南亞料理, 但係越式食品, 明顯係味道同份量都好 d, 咁仲唔係擺明大細超!服務方面 : 侍應全部係年青人, 中規中矩咁啦.結論 : 越式食品味道比較好, 份量十足, 大食一族如果身在灣仔, 可以諗諗佢!…Read More

店嘅面積都幾大, 餐枱有枱布, 坐得舒服, 環境唔錯.套餐有豆湯 + 沙律 + 土耳其烤雞飯 + 土耳其茶.豆湯附送檸檬, 幾得意, 新口味. 沙律就普普通通. 烤雞幾好, 有燒烤味, 但係飯就唔得, 過硬. 土耳其茶, 正! 有 after taste, 但唔會太濃. 睇尼佢哋 d 土耳其嘢做得唔錯, 其他嘢就仲需要努力!服務方面 : 侍應態度好好, 但有落錯單嘅情況出現, 可能因為係新店, 經驗未足.結論 : 祖家嘢 (土耳其嘢) 做得唔錯, 睇得出佢哋係有 heart 做好, e.g. 有枱布, 豆湯附送檸檬, 服務態度, 等等. 俾 d 時間佢哋喇, 明天會更好! 如果想試吓土耳其嘢, 可以諗諗佢. 有 heart 做嘅食店, 應該俾笑臉!…Read More

印象中以為佢係日本過江龍嘅香港店. 幫襯之前, 忘記睇 openrice, 結果…….!!!!!6:15pm到達, 冇乜客, 裝修中規中矩, 環境合格.套餐包括小食 + 拉麵 + 蜜桃特飲. 先尼小食墨魚丸, 超細粒, 冇乜味. 跟住係魚介拉麵, 無論湯底, 麵身及配料都係普通港式拉麵舖水平. 至於蜜桃特飲, 淨係飲到甜味!最大鑊係之後幾口渴, 嚡! 應該係味精囉!服務方面 : 係茶記水平結論 : 冇睇 openrice, 後悔已太遲.…Read More

門面好新淨, 應該係新裝修過, 雲石牆加馬賽克磚, 好企理, 最 cute 係金色餐牌套, 幾高貴.先尼小食拍青瓜, 新鮮, 爽口, 微辣, 好食.跟住係滷肉雲吞蝦子撈麵, 麵身幼, 入口滑, Like. 至於滷肉同雲吞, 就係普普通通, ｅ個係由於一個千載不變嘅定律, namely, 一分錢一分貨. 佢正價雲吞麵祇係盛惠 $25, 俾咗靚麵你, 咁d 雲吞就冇可能用麥X記水平嘅蝦啦! 世界就係咁簡單!服務方面 : 有位疑似老板娘嘅中年女士, 爽快健談, 服務好.結論 : 麵身幼, 入口滑, 坤記麵係靚!…Read More

位於屋苑, 不單止被住宅大廈包圍, 直情係屋苑內嘅住宅大廈 ground floor 地舖, 心想必定係以街坊生意為主, 會唔會 d 嘢求求其其呢?入內一睇, 裝修實而不華, 都幾企理.2人套餐好豐富, 有好多選擇 :-冷盤選了花雕雞同埋素鵝, 做得正宗, 味道唔錯.-頭盤小籠包, 夠熱, 包內有湯, 好食.-湯選了雲吞雞, 不算好特出, 味道可以.-主菜選了糖醋魚及手撕雞, 糖醋魚味道調得適中, 唔似有 d 港式上海舖, 唔係過酸, 就係過甜.-菜飯味道唔錯, 口感佳.-飲品豆漿就偏甜.服務方面 : 侍應服務幾好, 主動加茶, 態度有禮. 見到男侍應 (可能係老板) 同 d 熟客用上海話傾偈, 大家不亦樂乎, 一片街坊食肆風情!結論 : 錦江軒係水準唔錯嘅街坊食肆, 值得俾笑臉. …Read More

間舖幾窄, 檯櫈又放得密, 坐得比較迫。第一印象就覺得佢都幾牙擦, 首先自稱係最好食嘅雞飯, 兼且全店差不多衹賣一樣嘢, 就係雞, 仲貼出告示, 寫明歡迎自備外來飲品, 即係話廢事賣埋叻啡、奶茶、檸水。唔通真係賣一味嘢就養得起成間舖咁巴閉???我個套餐係雞飯連湯。個湯好清, 冇油浮面, 飲到有籃瓜味, 唔錯。雞幾滑, 唔肥, 雞皮下面差不多冇脂肪, 好味。油飯味道調得適中, 幾好食。當日見佢客似雲來, 中午 12:20 pm 左右, 已經坐滿 8 成, 真係有 d 捧場客噃!服務方面, 待應全是中國大媽, 帶 d 鄉音, 但係訓練有素, 服務好。聽到佢哋同客傾偈, 講吓幾重同幾大嘅雞最好食, 邊一部分嘅雞肉最滑, 同埋邊一部分嘅雞皮最好味, 真係有 d 專家 feel 噃。結論 : 柏檔味道好, 服務佳, 抵佢牙擦!…Read More

間舖有 high ceiling 及落地玻璃, 有天然光, 舒服光猛, 亦有大量卡位, 可以望吓街景。個套餐包括芒果沙律 +天婦羅蕎麥麵 +柚子蜜。天婦羅做得好好, coating 薄, 又唔會油冧冧, 兼且温度適中, 水準之高, 我真係有 d 意外。另一意外之作係 Wasabi, 佢哋唔係用一般日式餐廳嘅 Wasabi, 而係你食到有纖維嘅 Wasabi, 我唔知果ｄ係唔係鮮磨 Wasabi, 但我肯定佢唔係一般日式餐廳用果種 paste like 嘅 Wasabi。 連 Wasabi 都咁講究, 係有 heart 嘅表現!飲品方面 : 柚子蜜有好多柚子絲, 有嘢飲又有柚子絲食。服務方面 : 侍應係年青男女, 大部分服務好好, 但個別無厘表情, 影響整體表現。結論 : 天婦羅水準高, Wasabi 有 heart 之作! …Read More

買咗越一嘅團購。間舖係新裝修, 乾淨光猛, 有大量卡位, 坐得舒服。套餐包括越式粉卷 +火車頭 +飲品。粉卷夠熱, 皮薄, 味道亦唔錯。火車頭好足料, 所有配料連同九層塔都落齊, 你要自己加嘅就祇係檸檬汁, 海鮮醬或辣醬等。枱面有幾樽醬, 侍應主動逐一介紹, 相當落力。額外另叫越式豬頸肉, 有少少肥肉, 所以口感啱啱好, 唔會覺得硬或乾, 味道亦不錯。飲品方面, order 咗椰汁三色冰, 椰汁味濃, 好味。全男班嘅侍應, 並無一 d 餐廳嘅老毛病, 呢度嘅伙計並不麻甩, 佢哋服務好, 有禮貌。結論 : 如果你身在上環, 想揾地方食飯, 越一係食品同服務都不錯嘅選擇。…Read More

見佢ｄ食評普普通通, 所以祈望不高.位於商場內, 光猛整齊, 卡位好闊落, high ceiling 加上落地大玻璃嘅開揚街景, 感覺幾舒服. 先厘兩杯茶, 杯內係有茶包, 唔係茶餐廳果 d 水壺倒出尼有色但冇味嘅茶, 算係有 d 誠意. Good start!團購二人餐包括 :-蜆湯, ｅ個係真材實料, 味道好, 蜆大有肉.-Sushi, 普普通通, 唔算出色.-咖喱吉列魚飯, 做到日式咖喱嘅風味, 唔辣但幾香, 吉列 coating 剛剛好, 唔會太厚, 魚亦冇煮過龍, 唔會又乾又嚡; obviously, good timing in cooking. 份量亦足夠, 冇偷工減料.-雞玉子飯, 蛋煮得幾滑, e 個啱晒口味清淡嘅人喇, like me!-飯後仲有咖啡, e 個真係 unexpected. 味好兼且有回甘, 唔係茶餐廳果 d 咖啡, 係 Cafe 級數嘅咖啡.我順便睇吓佢個 menu, 正價 set dinner 有 6至 7 款選擇, 都祇係由 40幾至 50幾蚊, 仲連咖啡茶, 接近茶餐廳價錢, 亦衹係貴團購價少少. 匠可以係果d ‘無飯夫妻’作為日常便飯嘅好選擇.待應全是年青男女, 制服整齊, 期間主動加茶收碟兩次, 服務有禮, 感覺良好。匠值得我俾笑臉!…Read More

間舖位處 i Square對面馬路嘅 Woodhouse 商場, e 過地下商場比我估計嘅大, 好光猛, 好新淨, 裏面有ｄ品牌店, 而食店除倉吉外, 有自家烏東, 蘭芳園, 瀰月屋等, 都算係 d名氣店, e 個場都值得一行嘅。講番倉吉, 一字記之曰 Fun :- 由落單叫嘢開始, 即係去果部高個人頭嘅日本拉麵店售票機買票, 已經有身在東京之感。- 座位係日式自閉形設計, 你基本上係俾 d 板圍住, 等你專心一意食麵, 不受打擾, 食完就走, 冇得四圍望。- 侍應 take order 係在你面前嘅紅布後面伸手出尼接單及同你傾偈, 你係會見到佢對手而見唔到佢個口嘅。- 同日本嘅拉面店一樣, 你面前有齊晒你要用嘅嘢, 包括筷子筒, 調味品, 水杯, 水龍頭, 要用乜嘢就任隨專便, 自己搞掂。- 食物方面 : 廣島蠔有海水味, 唔錯。海石葵, 幾爽口, OK。豚神拉麵, 麵條比一般拉麵幼, 有ｄ似中國嘅陽春麵, 我過人口味係鐘意幼麵多過粗嘅麵, 所以 like。豚肉連住一圈嘅脂肪, 好林但唔太肥, 最啱我ｅ個 porkaholic, 好食! - 臨尾送你一小杯檸檬汁, 佢慌死你唔飲, 仲要加張小字條話係解肥膩之用, 飲完之後, 酸到眼都撐唔大, 你真係唔會忘記佢臨尾都要玩多你一嘢至俾你走, 都算係 Marketing 嘅其中一招尼架!結論 : 倉吉係日本拉麵店嘅 Copycat, 的確夠 Fun!…Read More

如果大家有睇過以往嘅食評, 都知道從前北方餃子源係食得唔舒服嘅地方, 因為山東老闆同客人斤斤計較嘅待客之道, 真係劣評如潮。近日聽聞山東老兄已經不見出現, 換了新人, 又剛巧見到佢哋做團購, 就買咗個 2人餐, 睇吓新人事, 有冇新作風先。2人餐包括 :前菜共 3款 : 選了鴨胸、醬蹄及肴肉。餃子兩款 : 選了翠玉瓜猪肉及白菜猪肉餃。麵兩款 : 選了山東手撕雞麵及芝麻醬冷麵。再加飲品 : 山楂茶或豆漿嘩! 個餐有 8樣嘢咁多, 睇厘好大堆頭喎。但係 d 嘢厘齊先見到 moment of truth! 結果 3款前菜份量奇少, 係用一隻 size 最細嘅碟裝得晒。餃子兩款各得半客, 即係加埋至得一客 (共 10 隻)。兩款麵各得半碗, 即係加埋至得一碗。Summing up, 個餐實得 : 前菜一小碟 +麵一碗 +餃子一客。但 e 個係 2人餐, 如果 2人食量少, 算係剛好, 但如果食量大 d, 就唔夠食。 味道方面, 3款前菜唔算特出, 味道祇係普普通通。芝麻醬冷麵, 芝麻味弱, 失敗之作。手撕雞麵就雞肉偏淋, 唔算好食。餃子方面, 肉汁不多, 但算皮薄。正如之前"阿咩"嘅食評所講, 真係 "祇有餃子比較好"! 服務方面, 因有 2位家人同行, 就致電訂 4 位, 職員答覆, 同行嘅 2人要最低消費共 $80。記憶中北方餃子源係冇最低消費嘅, 為何要特別對待 (又稱 "歧視") 團購客呢? 唔通佢哋覺得個 2人餐係多到夠俾 4個人食? 餐後嘅結論係從前山東老闆果種同客人斤斤計較嘅舊思維, 仍然揮之不去至真! 此外, 入座時係 off-peak time, 全店得兩枱客, 見有兩張 4人吉枱, 但侍應堅持要我們坐圓枱, 果張圓枱坐 3人已經算迫, 坐咗 4人後, 結果係我攞豉油時就碰到人哋隻杯, 人哋攞飲品時就碰到我隻碗, 咁點會食得舒服吖! 直至埋單走人, 果兩張 4人枱仍係吉枱, 睇厘又係從前山東老闆果種同客人斤斤計較嘅舊思維仍在作怪喇! 結論 : 1. 食物祇有餃子比較好, 其他並不出色。 2. 山東老闆同客人斤斤計較嘅舊思維仍在作怪, 北方餃子源依然係食得唔舒服嘅地方!…Read More

買咗韓城林嘅團購。位處寶勒巷, 係地舖, 唔難揾, 但門面有 d 兜踎, 黄色底嘅噴漆招牌, 加幾支射燈照住就算嘞, 真係似橫街嘅雲南米線店多 d !二人套餐包括 :人參雞 : 有好多雞肉, 但唔見條狀或片狀嘅人參, 祇見到小碎塊狀嘅人參, 飲吓個湯, 夠熱, 飲到有參味, 亦有雞味, 味道不錯, 而雞肉亦唔嚡, 幾好!韓式煎餅 : 新鮮熱辣, 有蛋味, 口感佳, 唔錯。牛肉石鍋飯 : 牛肉普通, 但煮飯嘅時間就控制得好好, 鍋底剛好形成飯焦, 由於飯焦好薄, 唔硬又唔燶, 食落脆洛洛, 正!服務方面, 侍應中並冇韓國人, 唔駛講英文, 服務唔錯。結論 : 韓城林門面比較兜踎, 但係厨藝足以搭夠。 …Read More