一個人的午餐's Profile

今日有老友約我入元朗，所以今期由一個人的午餐，變成兩個人的午餐。哈哈！老友介紹，說呢度係食新鮮雞嘅！今有食神。嘻嘻！舖仔細細，冇位坐，咁有人帶我地去隔離....巷仔嘅地舖，拉埋道門外面見唔到入面，應該係偷雞嘅呢邊。唔埋啦，好味咪得囉！餐牌有分新鮮雞和冰鮮雞，唔使唸緊係食新鮮雞啦！叫左醉雞湯米$47和醉雞湯伊$50，加一件新鮮豬扒$25和一支自家制菊花茶$15。兩個人$137，每人六十幾，食新鮮雞，新鮮豬扒，一D都唔貴。不過太心急唔記得呢度可以自選部位，結果來了一份雞脾，一份雞胸。雞胸雖然啖啖肉，但有得比我揀當然會揀雞脾啦！更何況雞脾搭多D珍肝。睇到呢~幾多珍肝！鮮雞果然唔同D，有雞味又彈牙！醉雞汁濃度剛剛好，唔會搶左D雞味！一流！件新鮮豬扒貴就貴左D，但係好香蒜蓉味，煎得；剛剛熟，唔會煎燶D蒜蓉，又 juice ！湯米同湯伊應該都唔使點形容，係雞湯底，冇味精。緊係啦！佢一日煮咁多雞，D雞湯仲使落味精咩！我倒一半酸雞D汁落個湯度仲正！至於呢杯自家制菊花茶，睇D色水就知幾足料啦！整體都好有水準，有野好“彈”，一個字“正”！值得推介！…Read More

話說之前係另一間食早餐唔飽，之後上左商場間三聯打書釘打左粒幾鐘，肚餓行返落黎搵野食。見到呢間D相幾吸引，行入去食件北京餡餅加一個紅油抄手就應該夠飽喇！。先來個餡餅，料好足，不過唔係即叫即煎，事關佢裡邊冇肉汁，但係入面層粉皮已經濕水發脹晒。唉~最怕食發水麵包......今日冇乜食神。跟手試個抄手，A~幾好咁喎！皮滑，餡鬆，汁好味！美中不足係D餡鬆就好鬆，但係加太多野以至食唔到豬肉味！應該係話個餡冇乜味至真，所以係咁點汁。唔要求太高嘅話都OK架！…Read More

話說上次來葵芳，係因為想影紅花風鈴，結果末開花，失望而回。事隔兩星期再來，花開了，相影夠。咁應該去嘆個美味早餐啦！就近走入去新都會廣場，見到最大間果間就入去睇怕冇死啦！點知............望下個餐牌都幾多野食，又有中式粉麵，就叫個牛肚米啦！先來杯熱奶茶，OK 嘅！唔太差。再來碗牛肚米，得果五條牛肚，碗野又細碗，唔係呀麻！雖然我知道呢個係早餐，早餐份量係細D我都知，但係佢得碗米粉再加杯茶咋！去生龍食早餐叫豬肝米，雖然碗野都同呢碗差唔多份量，但係人地有跟餐肉+蛋+牛油方包架！大家都係收三十幾，呢度係咪小得過份呢？唉~中伏不過呢度有得任加辣菜甫但一打開...........嘩！成陣嗅襪味！即刻蓋番佢，當冇見過。牛肚米食完，奶茶飲完。味道不過不失，食完冇乜印象果隻。但係.....唔飽！…Read More

呢排韓風好勁，荃灣呢處都開左幾間韓國菜。行過大班西餅門口，有個人派傳單，原來樓上開左韓國菜，真係留意唔到喎。見傳單上D午餐都係四十幾五十幾銀，即本上去試下。上到去得幾枱客，緊係啦！呢個位唔顯眼嘛！呀水知道有間韓烤咩！點了個鉄板牛助肉粉絲。呢度要彈一彈落單個呀姐，我話要粉絲，點知佢幫我落左白飯，另外佢問我飲咩？指住加$6特飲，佢問得我飲咩，我就以為套餐送野飲啦！之但係佢指指加$6特飲，咁我就問下佢有冇D唔使加錢？之後佢指特飲下面果欄熱飲，咁我咪叫左杯熱個囉！等緊食果陣再睇下個餐牌，飲品果度上下兩行都係加$6喎！呀姐，你玩我呀！收到張單，果然要加$先黎涼菜，有泡菜、涼拌波菜和海帶，三選一。我要左波菜。但我想讚一讚個湯，通常例湯都冇乜期望，但係呢個豆芽湯，飲到小小咸魚味！感覺似係真係韓國人煲嘅！講返轉頭個粉絲，呀姐入錯左白飯，黎到我緊係要換啦！不過呢度D服務係真係幾好，一般會拎走個白飯，加番D粉絲，不過我等左好耐，原來佢地重新煮過比我，黎到個鉄板熱辣辣，出晒煙，“正”！呢間D醃料好正宗，跟在韓國食到嘅差唔多。牛肋肉又多，粉絲又入味！一流！差唔多食左一半，另外一位待應走埋來問我有冇入會？我話冇哦！心唸：等一次來幫襯，入咩會呀！點知佢指下“Storellet”個 logo。A~我有入喎！叫PHD外賣用嘅！入左會用續分換野食嘅。佢話我入左會有個芝士生蠔或者咩辣湯送。咁我就揀個蠔啦緊係！佢仲幫我開個爐燒呢四隻生蠔。黎到賣相好吸引，好大隻蠔啊！佢話燒到干水就食得喎！點知D生蠔出勁多水，幾時先燒到干水？到燒到干水己經變了蠔士啦！另外D芝士干左水都拉唔到絲，只係一個芝士汁。送嘅就唔好計較咁多，不過要比$的話我就唔會叫喇！整體都好滿意，係正宗韓風味。下次想就下個石頭飯。…Read More

一個人的快飯就係搵間唔使等位，快食完快走人嘅食市。今日的主題係 ~ 咖哩。呢間清湯腩食過無數咁多次，但每次都係快食快走，連影相都唔記得，所以寫唔到食評。今次雖然記得影相，但貪平，所以有小小中伏嘅感覺。呢處D清湯腩好味就係人都知，事關呢處係用新鮮牛腩，當然係唔同d啦！平時我除左食清湯腩之外，都好鐘意食巴基斯坦咖哩薯仔牛腩飯，呢款咖哩香料特別多，冇落花奶或者椰奶，無一般咖哩咁滑，但香料味就特別濃。平時食開單叫一個巴基斯坦咖哩薯仔牛腩飯都要$65，都幾貴！今日細心睇下個餐牌，見咖哩安格斯牛腩飯套餐都係$48！乜平咁多嘅？問下呀姐呢度係咪得一種咖哩，佢答我話D咖哩汁得一種。咁我就好放心咁叫了呢個餐。點知黎到，D汁係一樣，冇錯。但D牛腩就真係........唉！係炆得林嘅。不過同平時食開果D直係差天共地。係我自己衰，冇留意“安格斯牛腩”呢幾個字，睇落“安格斯”以為好高級，忙記左美國牛就必然係急凍架啦！急凍牛又點同新鮮牛比呢？安格斯都係咁話啦！根本唔同 level。原來一直食開靚野自己唔知。咁下次唔好貪平，$65就$65啦！返唔到轉頭啦！…Read More

本來今日係來葵芳村影紅花風鈴的，但係今年天氣反常，又冷又熱，搞到D花期亂晒！來到得幾朵花，離滿開可能仲要兩個禮拜。大失所望，咁去搵間野食個 Tea 飲杯咖啡， Hea 下啦！本來冇乜期望，入到黎反而眼前一亮！裝修和佈置都係我杯茶，好有懷舊文菁 Feel！可以輕輕鬆鬆 Hea 下。Lunch set 和 Tea Set都有幾多選擇，特別係呢度個 Lunch set 做到 5:30。我呢~ 就叫左 Tea set 食小D又食平D。不過呢個蜜桃海鮮蕃茄蓉意大利粉就真係叫人失望，話明蕃茄蓉，我一粒蕃茄都見唔到，個汁係用茄汁開嘅.........雖然D蝦仁幾大隻，但係得七成熟，仲要凍凍地。我平時自己炒蝦仁都唔會全熟，大約九成熟，咁先會脆口D，但呢幾隻對我來講就真係太生喇！份量比較少，不過 Tea 黎講都OK嘅！反而杯 Latte 就唔錯，拉花拉得幾靚，咖啡豆新鮮，冇煙味，唔太苦，唔加糖都OK！雖然餐要加$6轉嘅，不過都底比。見到隔離枱碟沙律都幾ok，我唸呢度唔食廚房野，叫輕食嘆咖啡都應該幾唔錯！…Read More

聽人話呢間D刀削麵幾好，一個人開飯，就算中伏，都係一碗姐！試下無妨！一個人開飯勝在易搵位。十二點幾來到，已經有幾個人在等緊位，我得一位即刻有，唔使等！叫了個豬軟骨刀削麵+熱奶茶$46豬軟骨用鹵水炆，炆得又“林”又入味，軟骨爽脆，真正連骨都食埋。湯底味濃。刀削麵，麵底唔錯，又多又大碗，食完超飽！坐底到食完離坐，都係半粒鐘，正宗快、靚、正！不過呢間真係好旺，差唔多一點已經見門口大排長龍喇！要黎試呢間的話，最好避開煩忙時段好D！…Read More