勇者王的個人專頁

好朋友生日見食評都唔錯所以試下.去到樓下櫃枱已經一個職員都無,行到上樓企正係入面都只見職員好忙咁係面前行來行去仍然無人理,要叫先有人來帶位.之後安排坐係大廳塌塌米,環境都算幾有特色好有日本風味. 特上牛肉併盤-牛肉有筋,西冷牛的血水有點腥,牛舌口感爽爽地但味道個人覺得又唔係講到真係咁出色.而且入面無一種是能食到和牛入口即溶的感覺.整體味道只屬不過不失不及之前去過既和牛店.燒螺片-都算幾新鮮厚薄適中食落爽口,只是味道略為淡了一點.猪肉片-切成薄薄的已經調過味,所以燒完之後幾香口唔錯.海鮮鍋飯-成個飯係被蛋汁包住煮到淋晒完全無想過會係糊仔來,而入面只得一隻蝦同一隻斬開左兩邊既蟹腳之外就只得少少既微形蠔同元貝係度,食落口無海鮮味之餘還有點味精味.完全唔掂.環境係幾特別,但地方唔夠又要做塌塌米大廳,我朋友放在路邊的鞋經常被職員踢飛左去.而且永遠無人來加茶,每次都要叫先做.個爐燒到火紅都無人理,所以一下唔覺就會燒到過熟,但隻碟一吉佢又會見到仲好快手識得即刻同你收走個喎…最激氣係7點入坐食到7點50分已經走來問我可唔可以買左張單先,我一星期前book枱明明話比我食到8點半喎.咁都算喇,點知我一點頭佢原來已經準備好係右手成張單放係我面前.嘩!如果我話唔好你係咪會void返張單?我走時個場又唔滿,去到門口只得兩個女仔等位,有無需要趕客走?收得咁既價錢,都預左比客舒舒服服慢慢食架啦,居然坐耐少少都唔得一個鐘唔夠就趕客走,當正自己做茶餐廳咩…服務差之餘食物又只屬一般,真係以後都唔會再來光顧了.…查看更多

於電視上得知有土荀凍這個特色食品,所以於網上搜尋到這間小店一試.土荀凍比想像中細件,相比起一個迷你蛋達仔還要細一點.切開入面見到一條條的沙蟲都幾嚇人.但一放落口發覺好滑好彈牙,有點好像吃田螺般很鮮甜,再配以酸酸辣辣既醬汁如果你唔知係沙蟲來其實又真係幾好味喎!灼墨魚墨魚本身已經煮熟再雪凍,口感好似食日本剌身,非常鮮甜爽口配上與土荀凍一樣的酸辣汁非常好味.蛋煎麵線炒麵放在煎蛋上面,一食落去第一個感覺好鹹,初時以為鹽未熔化聚埋一邊所致,再細看下原來炒麵入面是放滿了帶有鹹味的小蝦乾,當蝦乾聚埋的地方便會好鹹,如果能平均分佈會好些.煎蠔餅好足料,真係蠔多過蛋,所以一夾好易散開,而且蠔仔肥美又鮮甜.正!五香卷-賣相好似燒鵝,其實係炸得很脆的腐皮再包住猪肉.幾香口唔錯.燕皮餃湯好薄好薄的燕皮包住猪肉,燕皮薄到食落係感覺唔到,一咬落去只像吃猪肉,但燕皮令猪肉丸表面變得更滑,淡白色的湯底加有冬菜,蔥花,但我就覺得有點兒味精湯的味道.香芋盒炸粉下的芋泥做得很綿很軟滑帶有少少甜味配以中間帶咸味的九菜幾特別.唔錯.整體感覺第一次食夏門菜,感覺以油炸香口小菜為主,間中來試試感覺新鮮野味是不錯的選擇,但多吃便會覺得肥膩.服務方面店員親切及很落力地介紹地道食品.價錢以小店型式及份量來講不算便宜,但可能材料比較獨特地道所以尚算可以接受.…查看更多

跟同事慶祝生日訂左枱第一次來試試火山卷壽司一放上枱好大個,面頭有個蟹子小山丘,入面就包滿蟹柳,蟹子,青瓜絲,蛋等材料.生日既同事真係未食見到都已經開心,食晒都飽左三分一.牛油魚壽司個面既質感有少少一粒粒咁,但食落就好滑,魚味唔係咁出,都新鮮不錯既.八寸長三文魚壽司見到三文魚咁長已經好開心,只係覺得薄左少少.不過都幾新鮮,把成條三文魚卷返住整件壽司來食,好味! 鰻魚炒飯我覺得炒得唔夠熱同香,材料都算足,味道賣相都尚可既.天婦羅手打烏冬天婦羅有蝦,茄子,蕃薯等. 烏冬方面就可以自選湯底,可惜選錯甜豉油,甜到好似糖水咁變左好”漏”,不過手打烏冬本身質感唔錯好彈牙.只係差在配錯湯底.燒三文魚頭連魚鮫個魚頭都幾大個,外層燒得好香入面又有好多肉,食落口唔會太油肉質仍然好滑又唔會太咸味道剛好.真係煮得好出色,食完都仲好回味.超正!!服務方面:佢每張枱都有個水壺放係枱面自己攪掂,所以都唔算有乜特別服務.但整晚就不停問我地要唔要試佢個日本運到既秋刀魚剌生,但秋刀魚生食,唔係好敢試喎.價錢方面:某幾張大路既信用卡有九折優惠都算合理.整體感受:限時一個半鐘,不過佢上菜都好快,連平時係出面食要慢燒既三文魚頭都唔知點解可以好快上枱,但就因為差唔多一次過所有野放晒上枱,所以個鰻魚炒飯好快就放到凍左.火山壽司跟八寸長壽司大大件咁,大家見到都已經好開心,呢度真係好適合跟朋友慶祝生日.…查看更多

跟三個同事放工第一次去試,夜晚九點幾行入大廈,入面既店舖都已經拉晒閘走廊黑漆漆的,仲要行落地庫都有些少戰戰兢兢.好在入到間舖都幾光猛.蕃茄牛肉撈蛋麵加左蛋入個蕃茄湯度口感好滑, 但個人覺得個汁會變得杰左些少,賣相又無咁好睇.蕃茄餐肉煎蛋麵個太陽蛋黃好似日落咁係碗蕃茄湯入面好靚,而且個湯又唔會變杰,好清楚飲到蕃茄的酸甜味,隻蛋又煎得好香好好味,唯一係個麵煮得唔夠彈牙,如果唔係就一百分.蠔油煎雞翼食落就唔多覺有蠔油味,比較似老抽加豉油王雞翼,好有屋企煮既味道,都OK既.煎牛丸牛丸開邊上碟, 望落去好似話梅咁賣相就差左少少,睇佢應該似係炸出來既,食落都幾香口OK既.如果用原粒去炸多返些少肉汁可能仲好.奶茶有朋友話好正,但我就覺得茶味唔夠濃,又唔係特別滑,甜度適中,不過不失啦.整體來講個蕃茄湯的確唔錯,值得再試,其他你當一般茶餐廳質素來睇都OK既.環境方面-好有懷舊感覺既茶餐廳.加上地點有些少江湖味道.都幾特別.…查看更多

本來訂左枱食炸猪扒，後來怕熱氣朋友又話呢間唔錯所以轉左食呢度。酸辣無骨鳳爪沙律因為大家都唔食得辣，又得呢個同柚子沙律的醬汁先可以分開上所以叫左呢個。但估唔到個汁好香酸酸地又唔係好辣，個辣味係個口度慢慢帶返出來好好味，鳳爪凍凍地本身就無乜味但就幾爽口，加埋個汁好開胃，唔錯！炸蝦餅炸得個面幾香脆，但個餅心就空既，如果佢可以做返個蝦餅心肥滿ｄ，食落個口感彈牙ｄ就好喇。攬角肉碎炒蜜糖豆攬角肉碎帶有好濃好香既咸肉味好正，個蜜糖豆都好爽脆，但入面就帶有少少草青味，兩者配合一齊食一清一濃又可蓋過草青味非常好。其實如果用肉碎撈其他麵飯食都會相當好味。咸蝦醬猪肉炒飯唔記得叫左個攪角肉碎係帶咸，仲驚緊兩個都帶咸會食唔到，點知放到口邊有好香既咸蝦味但食落又唔會太咸反而帶有少少甜味，成個飯都炒得唔錯。環境方面，因為坐左入舖都ｏｋ，如果坐出面商場走廊位可能好嘈就麻麻喇。本來估佢會無九龍城的泰國菜咁有風味，但食落都有佢自己既特有味道比想像中好，份量都可以接受，整體幾度菜都唔錯，有機會會再來試下其他。…查看更多

我本人唔係好鍾意食CROSSOVER既糖水.所以係九龍城食完飯上網見到呢間食評幾好又比較老字號既糖水店就去試下.叫左三碗糖水:蓮子腐竹清心丸(凍)腐竹馬蹄沙(凍)蓮子腐竹蛋(熱)凍既糖水佢加D冰粒係度都可以接受,但糖水本身真係好水,尤其熱飲好似飲滾水咁,好淡又唔甜又無腐竹味.真係好唔得.佢好標榜自己蓮子大王,的確蓮子真係煮得唔錯,好淋,好清甜.但係個名有蓮子個兩碗糖水都只得3粒蓮子又好似少左D喎...服務態度都幾好,但糖水來講真係麻麻地.…查看更多

與同事一行三人到九龍城食野,去到大約7:00剛好滿座,唯有一邊等位順面係附近既泰國雜貨店行下,大約20分鐘到就有位喇.因為等位時係廚窗見佢好有心機咁慢慢係度鹽燒烏頭魚,好似好美味咁,所以一入去即刻叫左呢個先.之後再慢慢睇下食乜.最後叫左以下幾道菜:炸蝦餅外型同一般既有D分別,整到好似炸洋蔥圈咁,食落好夠熱,都幾彈牙又夠蝦味,唔錯!菠蘿炒飯賣相就普通左D,仲有三片好似臘腸既野係度,但食落原來係肉乾味,個飯都幾足料既,味道就般啦.泰式木瓜沙津比出面食開既辣好多同埋香茅味都幾重,青木瓜都好爽口, 鍾意食辣既就岩晒,我本身唔係好食得辣,但都覺得都幾好味既.蒜蓉炒椰菜苗椰菜苗好爽口帶少少甘甜味,個汁又教得岩岩好唔會太咸,呢個真係好好食.鹽燒烏頭雖然個面係落左好多粗鹽,個魚肚又放滿香草咁去慢慢燒,但係個咸味同香草味又唔係好帶到入D魚肉到,加上魚肉本身都有些少”鞋”,所以扣左少少分,不過條魚本身都啖啖肉同埋都食到鮮味.都OK既!鴨胸河粉一放上枱見到有兩舊猪紅係到真係估佢唔到,食落去個湯好咸,個粉都幾碎,鴨胸又比個湯浸到無晒鴨味,麻麻地.環境方面-一般茶餐裝修,都尚算整潔.整體來講雖然食物無預期中好,但價錢同份量都尚算合理.…查看更多

我一行四人本來想去舊店食,但見門口企滿人等位,所以走左去分店.去到門口見企左十幾人以為有排等,點知一入去就即刻有位,可能佢地係等大枱掛.環境方面:比舊舖大,牆上貼滿藝人既相片,裝修就普通茶餐廳咁啦.咖哩牛腩完全唔覺辣,牛腩都幾淋.但就少左份突出既地道風味.不過不失咁啦!清真併盤每樣野上面都加左麻油,好野味,壞處就食落好似油左少少.但每樣都好入味.唔會太咸. 個人比較喜歡牛展,牛肚同牛根片,由其牛根片食落去膠膠地滑滑地咁,口感唔錯.正!小籠包夠熱,外皮厚度適中加上入面既鮮肉有好多肉汁.正!雞絲冷麵凍凍地,麵條比較長加埋個底有好多麻醬,唔錯!不過夾時要好小心,因麵條長,醬汁好易彈到成身係.牛肉包食呢個要小心d熱.個皮煎得好香,一咬開,嘩!入面既鮮牛肉加上勁多既牛肉汁,可以當湯咁慢慢吮,好味!家鄉煎餅我個人覺得煎燶左少少,食落有少少燶味,個心就軟軟地帶少少咸味,用來點之前叫既咖哩牛腩個汁來食都唔錯.唔知係唔係好肚餓既關係,樣樣都覺得好好味.需然人客源源不絕,但又唔會吹落單吹賣單,可以同朋友邊講邊食都算係咁.價錢方面: 四個人加埋三百七,大家都食得好飽,都算合理.總括成餐都食得好開心,下次一定要試下舊店先得!! …查看更多

去元朗玩完,夜晚經過見話米芝蓮推介,見咁出名就入去試下.個裝修保留以前舊式老店風味,幾有懷舊感覺.雲吞撈麵-雲吞又實又細,餡料普通到得猪肉加蝦粒,味道極普通無層次,出面任何一間麵舖都好過佢,係個麵彈牙無鹼水味幾好!蝦子撈麵-朋友叫的,我無試所以不作評語.但佢地話不及澳門的多蝦子又無聽見佢地話好食,相信都係一般.淨水餃-唔覺特別好食味道又普通好似屋企包果D咁,見人寫話個湯好正,但我都飲到有味精味...服務方面:落單時個阿姐問我地個麵要唔要剪,我停左一秒去諗,佢即刻轉身用好唔友善既語氣同我講"你諗好先再叫我!"就走左去,咁既態度真係好唔得,唔知係唔係米芝蓮關係,所以唔憂做咁!價錢方面:$38一碟麵真係幾貴,就算個麵幾得,d雲吞唔掂都扣晒分,何況出面普通一間麵舖既雲吞都做得好過佢.整體來講除麵好食以外其他野都好普通,可能佢想保留最原始以前既味道,但就唔應該用呢個價錢.再加上服務又唔得,點配得上米芝蓮個名,相信唔係有人要求都唔會再試.…查看更多

係九龍城食完飯,同朋友四維行下,咁岩行過入去試下:CHOCOLATE TRUFFLE一入去個廚櫃見到有好多唔同SIZE既CHOCOLATE TRUFFLE,見大SIZE既全部都比人訂晒都知道一定要試下,叫左個最細既,一切落去好軟身,望個樣見到面頭果層朱古力以為係好甜好漏果隻,點知一食落去朱古力味好濃又一D都唔漏喎,中間仲有D脆脆係度,超好味呀!!下次必食食!!!MIXED BERRY NAPOLEON店員話呢個好好賣所以試下,食落去甜度適中幾好味,只係覺得酥皮唔係好夠鬆脆.雖然唔算平,但呢個水準都算合理!…查看更多

因為朋友上次6:00去到都已經要等位,所以今次5:30到,但一個人都無...坐到6:00後開始多人之後爆晒!我地4個人叫左8樣野:木瓜沙律- 第一口覺得幾辣,但食食下又覺得ok喎,酸酸辣辣咁好開胃!泰式咖哩蟹- 個咖哩超好味!!蟹就好多膏,連個蟹蓋都頂晒膏,可惜就無乜蟹味,而且個汁好快就變凍,不過味道真係好好蒜蓉包- 面頭有d蒜蓉粒,整得好香口,加埋咖哩蟹個汁來食,超好味!!一定要咁配搭泰式通菜- 我個人唔係好食得辣,覺得辣左少少,不過都好味!生蝦刺生- 蝦都算新鮮,肉質就唔係話彈牙果隻,點左個汁之後其實都蓋過晒d蝦味,都ok既.沙嗲串燒- 成晚呢個最差,叫齊猪牛雞來試,個面燒得唔夠香,肉又唔夠滑無咩汁,差左d炸蝦餅- 炸得好香,食落幾彈牙,唔錯!炭燒魷魚- 魷魚個面都燒得幾香,不過點左佢個汁就會蓋晒個炭燒味,反而點咖哩蟹個汁仲好食.環境方面: 街市大排擋,無要求啦! 唯一係個地板成晚係咁震...唔知平時係咪咁呢...服務方面: 大排擋都預左無乜架啦...唔趕人走食得開心無氣受就ok!價錢方面: 除左以上既食物,每人仲叫左4杯野飲,另因有朋友生日,除左3份,埋單每人$18x,都ok呀!…查看更多

同幾個好耐無見既舊同事出來食飯,其中一個朋友訂左枱去呢度食,我都係第一次試呢間...我地5個人,等左15分鐘就入得,但佢比左張4人枱我地,所以其中一個要坐路口位,D人行來行去都幾迫下…叫左幾個餸:甜酸豬軟骨-酸甜適中,幾開胃,豬肉都幾淋既,味道就一般啦…柱侯蘿蔔牛筋腩煲-好好味! 牛筋好淋,蘿蔔夠淋又清甜,用埋個汁撈飯正!!清遠雞- 細細隻咁,都OK滑既沙茶醬蒸排骨-食完都無咩印象,一般啦…例湯- 唔係味精湯已經唔錯菜心&生菜- 無咩特別甜品:藍莓糕&芝麻糕- 都幾有藍苺同芝麻味,都幾好!!桂花糕.- 好唔掂,無桂花味之餘仲要個樣都唔係透明既,食左都唔知係咩糕咁…可能係門口等位時見幾多人,朋友又話係人地介紹去呢度食,所以好大期望啦,但食完又唔覺得特別好好食喎!係有D住家味道咁.坐就麻麻地喇,因為都幾迫下.服務都OK既,個阿姐仲幾好咁主動幫我地切開D糕比我地分來試.…查看更多

之前睇開雜誌,見寫用料幾好,正宗日本煮法,所以去試試.6點幾去到唔洗等直入,但7點幾走時已經有4,5班人等位.兩個人叫左兩個定食:廣蠔定食$9X & 猪柳定食$15X-炸蠔好好味,SIZE都OK,好鮮味.但佢教我用果個芝麻汁就太濃味喇,盍過晒D蠔味,就咁食仲好-猪肉都幾軟,但係又係用個芝麻汁太濃味喇! 點少少好, OK咁啦-生菜太少(以我去開日本人地係成坐山咁高,有D仲任加既).但淋生菜既wasabi汁好似太多,又太濃太咸,攪到太濕.好在個碟有個鐵絲網升起,所以D汁唔會整淋炸物(都算設計得幾好!)-飯話用新潟縣既米來做,每粒米都好有光澤唔錯.唔知係唔係查左油,都OK既!服務方面:仕應成日跑來跑去好似好忙咁,但又唔係好多人,有D煩...埋單都幾耐下.價錢就覺得略貴左少少.…查看更多

見幾得意同朋友去試下食.我地5個人,我一個人早到左去攞位先,點知佢話要過半數先入得,但入面其實有位又無其他人等都唔比我入,咁我問門口個姐姐比張飛我先, 佢好唔想咁比張飛我,然後好悔氣話過3分鐘無人要再攞過,下!!咁都得??之後我d朋友到左,我地5個人話比張4人枱我地,有一個加位坐路口,咁我地話坐住先,有枱再轉,帶位個姐姐又話坐底左唔比轉,下!! 咁唯有等6人枱,入去時個侍應踏左我朋友一腳,對唔住都無一聲就走左去~~激氣!!食物:咖哩牛肉飯-- 個碟好淺,份量好少,又唔好味.海鮮烏冬-- 呢個賣相最靚,味道ok咁啦,雞肉湯麵-- 呢個都係一般啦,其實D湯麵同屋企住加D材料落去無咩分別蕃茄抄意粉-- 份量好少,唔夠熱又無蕃茄味,朱古力冰-- D冰好粗粒,中間有d紅豆,出面除左雪糕正常d之外,仲之就係放d差唔多色既野落去,D材料又怪又唔好食,味道又唔夾,只係為求攪個效果,用來玩多過食. 總結: 枱面"立痴痴"既, D食物又唔夠熱,份量又少,味道又麻麻地,唔值呢個價.服務方面好唔得個個女侍應都好無禮貌,反而加水個男TRANEE仲有禮貌D,真係貪得意去玩下,當去食裝修參觀下都ok既,但一次就夠……查看更多

因為太熱想食d凍野,有朋友記得附近有間日本菜,所以試下!一入門口等位,見到右手邊貼左d老細同明星合照既相,左手邊就有個冰櫃不過放得兩三條魚同一隻螺,心諗係唔係比人食晒呢...等左大約10分鐘就有位,坐正廚房則邊,可以睇住師傅整野都幾好~~特上刺身盛 $390: 有海膽、三文魚腩、牡丹蝦、鮑魚、吞拿魚、赤貝等等.每樣都幾新鮮! !尤其三文魚腩,好肥美入口即溶好好味!! 唯一係有隻唔知咩魚(張相最右邊白白地果隻)係用左有根既部位.麻麻地,其他樣樣都唔錯!好味~~蕃茄素麵 $5x: 賣相幾靚,有少少肉粒係度,,蕃茄汁好似帶有少少酒味,同麵都幾配合,凍冰冰咁夏天食好舒服.味道ok!蟹子沙津 $4x: 望入去廚房,睇住佢切青瓜,撈埋d材料,都幾新鮮,都ok啦~服務方面: 清一色男侍應,禮貌ok,只係差不多次次都要叫先來加茶, 價錢: 用某d信用卡找數,食滿特定價錢有折.整體食物都幾好,係上菜慢左d,如果唔趕時間想同朋友傾下計,佢又唔會趕你走咁都ok! 不過唔知點解個蟹子沙津係要最遲先到...…查看更多