laubak's Profile

星期日下午兩點到埗時無位，於是攞飛喺門口外等位，隨後亦有另外兩人攞飛等。等咗大約五、六分鐘有人埋單出嚟，我諗住等店員執埋檯先叫號碼，點知哩個時候接連有兩組人直接行入去座低咗，我同店員講，你哋頭先俾咗籌我，點解其他人無攞飛就先入座？然後兩個店員就互相鬧交，阿姐A問阿妹B，咁多位做乜要派飛？B就話啱啱先有位，頭先係滿晒，但我就揸住張飛企喺度睇佢哋表演。咁啱有張二人檯食完我先至有得座(打尖入去果檯已經嗌完嘢食)，叫咗個火車頭湯河加蒜蓉牛油雞翼。碗火車頭啲生牛肉係咁嘅：超熟，超韌，超嚡，硬到成塊黑板咁。其他餸無乜嘢，無驚喜亦無大問題之後差唔多食完碗粉個蒜蓉牛油雞翼先至到，味道本身係OK，都脆口嘅。餐牌寫6隻但我哋得到7隻。但成碟雞翼都係俾油浸住。我知你係叫蒜蓉牛油雞翼，但係咪真係要成碟油咁俾我呢？仲有係我座咗喺廚房門口位，每次有員工出入我都俾佢撞到，成個由入座到食完嘅過程都令人不愉快，應該無下次了。…Read More

情人節翌日，想去食西餐，哩間之前網上睇到咁多好評，所以今日第一次到訪。星期六中午去食晏，兩個人都一齊點咗西冷牛扒五成熟。先嚟湯或沙律就幾好嘅，賣相同味道都OK，一心仲以為有食神，點知……！！到塊牛扒嚟到，擺盤都OK，點知第一啖食落去已經feel到出事。唔好話無煎香或炭燒味哩啲奢侈嘢，塊扒本身就係完完全全無肉味，食得出係超平價冰咗好耐果種肉，而且調味得個死咸嘅味道，又韌又多渣。食到我哋兩個黑晒面…西冷牛扒五個差老實講哩塊牛扒嘅唔好食程度連平價港式扒房、茶記甚至連鎖快餐店都好過佢，喂你夠膽賣 $178蚊，星期六日仲要加一，唔係俾份咁嘅嘢我食呀？我本身好想同佢講份扒好唔掂，我老婆叫我算啦講少句，無下次，當買個教訓。最後我同老婆要猜包剪揼睇下邊個埋單，唔係因為孤寒，係根本兩個都唔願意俾成四舊水食啲咁嘅劣食。絕對絕對唔會再幫襯。我實在唔知其他食評話好食果啲人嘅味覺出咗咩問題。…Read More

講明先，哩個食評碗麵我只係食咗四啖。因為準備第五啖嘅時候發現碗湯有隻蟲，然後我就無再食落去。話說我係牛雜迷，見佢個招牌都有牛雜兩個字就入咗去試吓新嘢，五香牛雜粉37蚊，我點咗加牛舌雙拼(+$10)。碗麵一上檯我見到碗黃色帶咖哩味嘅湯同咁少餸(得兩小塊牛舌)我已經覺得少少中伏。第一啖試個湯，真係咖哩味嘅，仲要相當濃味。見佢menu係有咖哩腩/雜，但我無叫咖哩喎，說好的五香牛雜呢？再嚟食第二啖食咗牛舌，唔焾，係硬身嘅。可以話佢有趙口嘅，但我expect佢會係炆入味果種囉，所以點都應該焾返少少呀。第三啖試牛肚，正常發揮，都軟身嘅。但俾個十分咸嘅湯搞到我食唔出咩味。個河粉正常粉麵檔水平，無乜好講。就係我繼續夾麵嘅時候，就見到碗湯入面有隻飛蟲屍體，係已經浸咗落去一段時間，唔係啱啱飛落去嘅。我停咗咀嚼十秒，畢起咗隻嘢呆住咁望，店員見到我咁就問我咩事，我俾咗佢睇，佢話換過碗俾我。老實講呢我本身都唔係十分之驚哩啲蟲仔，有時喺外面食飯見到啲小昆蟲我都係整走佢繼續食。但最重要果個問題係而家你碗嘢唔好食呀！所以我同店員講，我唔想再食啦，我唔俾錢而家走，得唔得？佢同意所以我就起身撇，然後去第二檔牛雜粉再食過……Read More

朋友話開年飯想食小籠包，特登揀咗間上海菜，點知食到全部人黑面。首先我下午打去訂檯，問佢八點有無檯想訂位，接線嘅人話“有位，嚟啦！” 然後乜都無問就收咗我線，我仲估佢會唔會用來電顯示呢？但都唔駛咁無禮貌呱。結果我哋八點到餐廳，佢話無任何booking 🙄等咗十五分鐘檯，終於有位，然後第一樣嘢order小籠包，無嘅？問個阿姐，佢話過完年第一日開，師傅未返無小籠包🙄 OK fine, 叫第二啲囉，但話想用嘅朋友就有啲失望。我哋叫咗酸辣湯，雜錦鍋巴，醉雞，油炆荀，蒜泥白肉。其中最尾三樣係涼菜，我suppose應該好快有得食。點知等足30分鐘一個菜都未上。哩個時候已經距離我原本預嘅開飯時間遲咗45分鐘。第一個到嘅係醉雞。哩個通常都唔會難食嘅菜竟然可以做得難食。難食在雞係完全無酒味，佢哋只係將一份白烚咗嘅雞放咗上一兜醉雞汁度。真係·一·啲·味·都·無。第二樣係油炆荀，公道講句，好食嘅。無嘢要彈。第三樣係蒜泥白肉。但係得三粒蒜蓉喺上面，白肉本身無咩味，但overall食落就毫無蒜味。第四樣係酸辣湯。哩個係重災區，我未飲過咁令人覺得靈肉分離嘅湯。佢係一個只有辣味但同時又淡而無味嘅「湯」。哩個時候我哋已經食咗一個鐘頭，鍋巴仲未到，同時隔離檯有位女士都喺度等菜等到發脾氣要取消。我哋都決定取消個鍋巴，等一個鐘頭仲要難食真係好Comment Like Share.唔好意思因為真係好難食所以無啲好正統嘅食物相，但都補一張證明我係真係食過再如實報導。食到把幾火，取消完個鍋巴之後即刻埋單，決定揸車去第二間再食過。開年飯搵著佢真係大件事。絕對要黑名單。完…Read More

之前睇哩度食評咁多人俾笑，於是特登揸車試吓。先講結論，我真係唔知係因為科學園無嘢食定係啲食評係買返嚟，因為哩間韓燒真係前所未有咁難食。因為太唔好食所以連影相都費事，純文字討論。我同朋友叫咗頂級果個任食course, 見佢有幾款聽落高級嘅牛肉同刺身。先講牛肉，牛肩肉同牛阪腱係無醃嘅，但兩者都無肉味又無油白，不過至少像嚿肉。橫隔膜肉有醃嘅，味道同出面野火燒烤場啲下價牛扒一樣，不予置評。最瀨嘢係牛仔柳肉，一客兩大塊，好大塊但真係十分難食，除咗咸，只食到鬆肉粉味。全部所謂頂級牛肉叫咗一round之後根本已經唔想再加單。今晚成間舖其實得5檯人，幾個鄉音阿姐都不斷搞錯order，漏單，錯單，不斷送錯隔離檯啲食物嚟我哋檯，而我哋個刺身又要追兩次單先到。講到刺身，三文魚我哋得到一堆好似角切咗嘅魚碎，吞拿魚仲食到冰兼變到淺粉紅色，䲞魚啲筋仲多過頭先塊牛阪腱根本食唔到，哩一好食少少嘅白玉豚叫咗兩round, 想再加佢話無晒...然後到“頂級海鮮”，我終於明乜嘢叫「頂」級。帶子同魷魚係發水，無味之餘仲有擦紙膠嘅口感。扇貝無咁膠，但一樣係完全無味。蝦係算好果樣。我哋因為見到阿姐攞錯隔離檯果碟五花腩過來而無叫，因為我哋見到有70%都係肥膏嚟。其他肉類仲試咗，雞脾肉OK，梅頭肉OK，雞腎係全部食物中最出食嘅果一項，豬頸肉無醃但尚算OK...另外佢啲份量真係唔知佢點預，刺身叫4客佢俾3塊，豬肉雞肉叫1份佢俾一大兜，牛舌一次係五蚊銀大小，另一次係手掌size。仲有一樣嘢要提嘅係，啲阿姐不斷用行動催我哋快啲走，以免阻住佢哋收工咁不過咁都仲未係最神奇。阿姐執檯時見我哋兜生菜同蒜片無食過(一入座佢就自動擺低果啲嚟)，佢執檯時竟然唔係收落執檯車而係成碟攞返入廚房。。。雖然以任食嚟講佢收費係平，但要平我寧願去食隔離街個日式牛肉飯，哩間真係唔會再有下次。…Read More

食開嘅茶記無開，於是隨便咁入咗喺哩間大豐收。首先我要講咗個結論先。難食唔衛生絕對無下次叫咗個乾炒牛河，等咗成十幾分鐘都未上。期間隔離枱都有一齊催單。終於上菜嘅時候我翻開晒成碟河粉，得兩塊半完整嘅牛肉片，我有個掙扎過好唔好問佢哋係咪正常，但係都係算數了。點知一食入口，河粉好硬好似未煮透咁，又勁重燶味，中大伏了。第二樣嘢就係佢哋居然攞晒啲蔬菜出堂食區切菜，一路食一路聞住啲菜草味。仲有幾個廚房師傅唔著衫唔帶口罩走出走入。咁你哋個廚房要嚟做乜？最大鑊係連最後杯奶茶都難飲，無茶味嘅。早知去七仔叮杯麵好過。…Read More

家人生日，唔想食傳統蛋糕，所以提早預訂咗哩間嘅靜岡蜜瓜拿破崙。本身已經喺WhatsApp預訂時覺得個餐廳負責回覆嘅人唔係太專業，下午問佢地價錢，到凌晨12點幾突然先至回覆，我問咗句要如何預訂，估唔到回答嘅係一句“可以同我訂呀”。叻豬仔，唔通我去搵天后娘娘訂咩。所有對答都好似踢一踢先郁一郁，佢話預訂要網上付款，我唔開口問又唔俾付款link，點做CS呀？個蛋糕不過不失啦，但我對聲稱嘅靜岡蜜瓜就有點保留，完全唔甜唔鬆軟，感覺同大陸瓜差唔多。當然啦起晒肉我係完全無辦法知道貨源係咩，純粹個人感覺吹水啫。個餅底就OK啦。只係OK，無驚豔，無差評。壽星公表示佢係開心嘅，但整體的確係令買cake嘅我覺得失望。最後，送嘅蠟燭如果可以高質少少嘅話相信觀感會好啲。overall嚟講，我下次應該都係買返隔籬東尼黃嘅拿破崙。至少人地加寫字牌都唔駛加$30蚊，哈哈。…Read More

通常喺香港食幾十蚊份嘅鰻魚飯，都只係食到下價急凍大陸鰻魚，又削又韌。所以我本身對哩間喺日式超市嘅外賣店本身都無乜寄望，點知試過就知原來我錯了。由於只做外賣，所以攞到返屋企熱度一定會下降少少，好彩我住附近，十分鐘左右就食到。鰻魚靚唔靚，其實用筷子一夾落去已略知一二，果然入口鬆軟，帶魚油香同炭燒香味，食咗第一啖，我就開始後悔遲咗一年先發現哩個新大陸。好好食呀。皮有脂肪，肉鬆軟，油香肉香汁香炭燒香，連個飯都好食，最後一粒都食埋。我通常食嘢唔會寫食評，但喺無得飛日本嘅日子食得到日本鰻魚飯嘅水準真係又驚喜又感動，點都要寫一次㗎啦。希望哩間舖長做長有啦！…Read More

食開附近果間日本嘢星期一休息，個mood都係想食日本嘢就去咗哩度試吓。嗌咗個lunch set嘅極上海鮮丼($110), set有沙律(生菜相當乾唔新鮮)，茶碗蒸OK，湯正常。我都未開始食茶碗蒸個飯已經送到，但一嚟到就覺得有啲中伏……超細兜，呑拿魚蓉無乜味，海膽得一舊細嘅，所有餸份量都唔多，但最慘係個飯就更加少。我一向都唔算大食，但食完哩碗飯未夠一個鐘已經想再食其他嘢就真係想喊出嚟。仲唔夠飽過食一般嘅八件壽司。至於味道就普普通通啦，唔係話好差，亦無驚喜，但整體感覺十分唔值。sorry無下次lu。…Read More

我唔係官塘常客，偶然去到果邊做嘢，見到哩間喺火炭出晒名嘅外賣店開咗分店舖已經大喜，重點係終於有得堂食，而附近其他餐廳多人到太過恐怖所以即刻就入咗去。見到門口好多人等外賣攞咗個餐牌嚟睇，點知原來堂食係另一份menu。午市選擇套餐唔多，而家以返工lunch嚟講價錢就少少偏高。我揀咗個塔香松露台式燒雞，原來仲有好多配菜。第一時間帶(手)套扯啦喂。嘩，脆皮到kok kok聲，無油膩感，超鬆脆😍😍我好耐好耐無喺香港食過如此有水準嘅燒雞，而且松露醬超香，不過真係好難揀，又想直接嘆雞嘅原味，又想夾埋松露醬嚟食，開頭以為半隻雞我會唔夠食，點知食吓食吓就飽咗，仲好鬼滿足。仲有台式飲品送，其實我哩種食慣茶記嘅大叔好少似台式茶，但覺得佢好鬼清新，正。仲有一個重點係佢嘅裝修令我覺得好舒服，如果陪靚女嚟慢慢嘆真係賞心樂事，比起附件嘅逼爆餐廳好太多。我好少寫食評，但今次真係好食到要寫返個紀錄…Read More