moonsilver's Profile

上星期六(2/11)嚟，但舖頭休息，專登嚟到但摸門釘。尋日(6/11)晏就想嚟食lunch，但中午12：30已經要排隊，由於舖頭太細，企門口望唔到入面有幾多個位，又怕等太耐，於是今日再嚟過。今日(7/11) 12：24到咗，比尋日早咗6分鐘，終於唔洗等位，第一次入到嚟先發覺堂食只有10個位。睇咗陣餐牌，決定揀全日套餐$64，以下係揀咗既A+B+C。A 精選沙茶麵 麵有微辣，表面有一層辣油，麵底係油麵，有豬肉丸條(3條)、蝦餅(3塊)、魚丸(好似係2粒)、豆卜(3粒)，好多丸類，幾好味，有嚼頭，口感不錯，沙茶麵底唔會過辣，但花生味唔太覺有。B 自製五香卷福建春卷，香脆料足，一整條炸好再切件，餡係豬肉碎同馬蹄為主，仲有少少䓤粒，覺得唔點醬都好味。C 自家製凍奶茶唔甜，夠滑，但茶味不足，如果茶味濃返啲會好啲。整體來說，呢餐幾好味，下次會再嚟食，想試凍咖啡…Read More

今日到大埔墟，見呢間舖試業期間follow 社交平台 半價，於是嚟排隊試試。本來想食南乳雞翼但沽清，最後揀咗飯餐，十分失望。韭黃芽菜炒鱔糊+鮑汁豆腐(2件)+熱情果玄米綠茶(凍) 原價$72，半價$36。食物上枱時只係微暖，明顯熱度不足，無哂菜飯，只能跟白飯，但用外賣盒裝白飯同配菜，食物仲要唔熱，已扣分。炒鱔糊有啲咸，似係用蠔油炒，鱔肉有14小條。鮑汁豆腐好普通，唔太啱心水不評價。全部食哂都唔夠飽，又唔特別好食，好彩半價36蚊，原價真係完全唔食佢。成個餐只有熱情果玄米綠茶幾好味，清清哋唔太甜，但無乜玄米味。埋單36蚊，整體嚟講味道好普通，食物無乜特別唔吸引，試業期間人手不足，如果客人走數真係無人留意到。…Read More

今日本來想試間小店，但太多人等位，轉戰食泰國菜。入去餐廳只係半滿但都要搭枱，睇咗陣餐牌，揀咗冬蔭公湯套餐$62，511冬蔭公海南雞鴨蛋麵，加$8轉香水檸檬茶，要鴨屎香烏龍茶底，盛惠$70。冬蔭公海南雞鴨蛋麵湯底幾好味，蕃茄酸甜唔辣，麵似平時潮洲粉麵舖啲麵，彈牙有咬口，但覺得麵既份量有點少。海南雞單食已經好入味，但套餐既雞份量看似多，但其實有一半都係雞皮，有至少4塊都係皮，下面無肉，如果餸分開另上會好啲，啲肉唔清楚係俾少咗定沉底，但揾埋個底都係得啲雞皮，呢樣勁扣分，下次點海南雞一定跟飯底。配料都係啲菇，芽菜為主，芽菜肥短幾好味。其實食完成碗都唔係好飽，但套餐有飲品，飲埋就夠飽。加錢既鴨屎香檸檬茶只有一片青檸，甜度適中好味，但飲到杯底有啲蜜糖沉底，如果一開始攪拌嚟飲應該會覺得太甜，無攪拌既情況下飲到尾，到最後先會覺幾甜。呢餐整體都好味，係海南雞份量少，用雞皮俾我呢個有啲扣分，下次唔會揀湯粉，因為唔抵食。如果可以揀既話，建議揀飯餐最抵，有飲品同例湯，仲要好快上枱，見隔離位食海南雞拼豬手飯幾正，料好多，下次想試。至於例湯方面，個待應又無講晏就食lunch有無例湯送，想揾佢問又唔知去咗邊，呢間食晏時間人勁多，要食就早啲嚟排，但預咗被人呼喝同搭枱。服務方面都幾麻麻，企響counter等埋單等咗近8分鐘，晏就趕時間返office的話真係唔會再嚟食。食飯儲分卡…Read More

今日落大雨，想揾間好坐啲既餐廳，呢間之前嚟東角bookmark咗想試，餐廳有用心設計，環境幾靚，有地下同二樓兩層，待應帶咗我上二樓用餐。今次食lunch試咗A餐豬湯檬($78)+熱越南滴漏黑咖啡($12)，但餐廳有加一收費，埋單要$99。A餐豬湯檬($78)跟香菜，香菜自動另上。湯檬好夠熱，湯底好濃郁好好味，扎肉好有咬口，口感幾好，豬肉丸都唔錯，其他配料都好味。食到中途加少少辣醬調味，但覺得自己做錯咗，碗湯檬本身幾好味，其實唔洗額外加調味已足夠。熱越南滴漏黑咖啡($12)之前試過其他越南餐廳既越南滴漏咖啡幾好味，今次加錢試埋，揀咗黑咖啡走甜，有點後悔揀咗唔甜，杯黑咖啡本身無豆味，太苦澀，一定要有返啲煉奶先可以中和到陣味。由於黑咖啡太苦，勉強飲兩啖之後放棄。今次既lunch幾好味，豬湯檬會想返嚟再試，注意餐廳有加一收費，同埋lunch hour都幾多人，可以晏少少避咗peak hour嚟試會好啲。…Read More

有幾間車仔麵店一直想試，呢間係其中一間，今次lunch嚟呢度食，中午時間都幾多人排隊，要門口等咗近10分鐘先有位。餐廳除咗車仔麵仲有飯餐，揀咗威風百麵($59)，已有選好咗既餸可以每樣試啲唔洗諗，另外加錢要咗杯凍酸梅湯($8)，盛惠$67。威風百麵($59)：每樣餸都好味，可惜雞中翼只有一隻。湯底可揀咗兩款，揀咗秘製辣汁(大辣)同瑞士汁，大辣辣汁幾惹味，唔算十分辣，瑞士汁太甜，覺得呢個唔太啱我。凍酸梅湯($8)：好解渴，甜度適中。甜品：食完麵記得同店員講要甜品，黃色牌甜品係免費送既，揀咗椰皇奶凍，細細杯，有上兩層，好味…Read More

今日晏就想食台灣嘢，記得呢條街有間細台灣餐廳就嚟試試。今次要咗個招牌滷肉飯+凍台式奶綠(加紅豆)，盛惠$57。招牌滷肉飯($42)：份量啱啱好，對大食既人嚟講份量有點細，滷肉份量適中，少少甜，有半條青菜，2塊薄魚餅，唯一唔好係飯温度唔夠熱，只係微温。凍台式奶綠、走糖($11)+配紅豆($4)，合供$15。本來想要珍珠奶綠，但竟然無哂珍珠？於是揀咗紅豆配料，飲品味道ok，入口幾滑，杯面有少少沖出嚟既奶泡。環境：舖頭面積細，座位窄，頭頂部冷氣機直吹，温度太凍，十幾分鐘內食完已經想走，唔想逗留。整體味度ok。…Read More

今日晏就落雨，唔想行太遠想食個quick lunch，嚟呢度食咗個豬膶鯪魚球米，雙併粉麵$37，唔包括飲品。豬膶：有3至4大塊，煮得啱啱好，但比起之前食開北角某間已執笠粉麵店，呢間唔係差但仲有差距鯪魚球：有兩大粒，正常無異味米粉：幼身，唔係我鍾意既粗身米粉，呢款幼身米粉我唔太鍾意，但唔抗拒湯底：清湯寡水，無乜味成碗麵都係靠加啲辣椒醬去調味，辣醬ok，整體嚟講呢間適合平同快食，餸既味道好過粉麵，價錢平都幾多人嚟食。…Read More

今日天氣熱唔想行太遠，見呢間舖面幾大，又自稱出名車仔麵，就入去試下，點知世紀難食，簡直中伏。揀咗豬小姐+熱奶茶，盛惠$69。豬小姐車仔麵餸：全部係豬，包括豬紅、豬皮、豬手、豬大腸、扎肉、貢丸)。豬紅普通，豬皮白烚一大塊無味，豬手係淋但唔入味亦食唔到有咩咁好味，豬大腸幾舊仔薄切，正常無特別，扎肉同貢丸係來貨無特別，啲餸無一樣好味，但間舖仲自稱馳名車仔麵？麵底：揀咗粗麵，但麵芯係硬，無淥透，入面仲有頭髮，跟住成碗麵無食，飲幾啖熱奶茶埋單走人。飲品：揀熱奶茶、選味濃，無茶味，太苦澀，茶底差，奶太多，大快活奶茶仲好過佢，一間茶餐廳連奶茶都咁差，永不回頭。$69車仔麵簡直係垃圾，呢間舖竟然仲生存到真係奇蹟，浪費我既錢同時間，明明大圍有其他好食既，竟然中大伏，呢間衞生差到，麵有頭髮，永不錄用。…Read More

今日放工好想食魚蛋，於是買一串辣魚蛋($12)嚟試，唔食辣既可要求唔辣，我食辣既緊係揀辣。辣魚蛋一串有10粒，估唔到買一串魚蛋都用透明膠兜仔裝住，舖頭真係幾肯揼本。魚蛋係陳皮魚蛋，細細粒，呢款魚蛋配辣醬最正。辣醬係辣得嚟有啲咖喱味，似係自製，辣味香得嚟有少少後勁，對我嚟講唔算太辣，如果唔係要留肚食飯，會想試埋椒鹽燒賣。呢間值得推介，真係好好味，見到舖頭有賣埋車仔麵，等天氣無咁熱會買外賣返去食，下次會再嚟試其他款。…Read More

今日Lunch試呢間生煎包，揀咗套餐皇牌4 S4，盛惠59蚊。套餐包括一碗迷你雞絲酸辣湯、生煎包6隻、凍豆漿一杯。落單後等咗5分鐘左右，所有食物就上齊。迷你雞絲酸辣湯：微酸，有胡椒味，好多料，雞絲好多好滑生煎包6隻：底係硬脆煎得有啲燶，入口係熱辣辣，好多湯汁，要小心食，食完6隻之後好飽，但返到office覺得勁口渴，飲咗勁多水，生煎包似加咗味精調味。豆漿：一般，無豆味，可能係叫貨嚟賣。呢間幾啱食quick lunch，由入門口到埋單走人用咗16分鐘，味道唔都ok，唔算勁好食但唔差，扣分位係味精調味。…Read More

上網見呢間多人介紹，尋日見未到12點半已勁多人響門口等位，於是今日放飯早啲出嚟，12:03左右到舖頭。想一次過試幾款餸，揀咗雲川米線($53)，已包括墨魚春卷(2條)、墨魚頭、麻辣腩肉，酸辣大辣(+$2)，熱檸茶(+$3)，合共$58。酸辣湯底既辣度係辣過譚仔三哥大辣，個辣有少少後勁，但食幾啖慣咗就唔覺辣。墨魚春卷：兩小條，無乜特別，不過不失。墨魚頭：量少，好碎好散，墨魚頭在湯中散開暢泳，要用筷子去撈底去揾。麻辣腩肉：師父好刀工，好薄片，極細塊，似一隻麻雀長方形size或稍大少許既麻雀，應該有3至4片左右(?)，好似食咗陣風咁呢間啲米線得辣度吸引，但湯底好口渴，返到公司飲咗好多水，除咗辣係值得可取，其他都好一般，啲餸咁既份量直頭有啲昆水，SPK咁多餐廳選擇，未必會再嚟…Read More

今日真係好凍，去咗呢間食羊肉湯拉麵。本來想叫多個小食，但lunch得一條友食驚食唔到太多嘢，無叫到招牌小籠包。羊肉湯拉麵$62，落單後等咗大約15分鐘，麵上枱後發覺羊肉係薄切，份量太少，麵係人手拉，粗幼不一，有啲煙靭口感，湯底係啲肉既濃湯味，但食唔出咩味，食咗一半之後，加咗半匙辣醬，同湯麵混合一齊食，辣醬幾開胃惹味，由於天氣太凍我又太肚餓，三扒兩撥食哂，由入座到離座用咗22分鐘。餐廳地方好迫，個待應叫幾次先睬人，食物都ok，但下次可能等少人啲先嚟，單點叫小籠包食算。…Read More

今日過去天后，lunch就翻兜再嚟幫襯第二次食米線。上次食蟲草花雞米線幾好味，但米線太淋太碎，今次就試下散叫，自選餸。金川湯自選$32，揀咗金川湯(酸微辣)，中麻辣、米線、墨魚春卷(二條)$10、台灣鴨血(六件)$10、頭抽雞中翼(二隻)$13、滷水魷魚$13，熱檸檬茶$8，埋單合共$86。呢間係朋友強烈推介，話係酒店廚師開舖，食完第一次真係好味，於是再嚟食第二次。價錢係有啲貴，但食物質素好好，絕對值得呢個價錢。湯底微酸帶啲辣，好好飲，我係成碗飲哂，無味精唔口渴，抵讚！米線既軟硬程度有明顯改善，今次啱啱好，唔會過淋，唔會筷子夾唔到。墨魚春卷唔同外面既外炸油皮，腐皮係軟身米白色，餡係墨魚肉，好扎實，好有咬口。台灣鴨血唔會一夾就散，但味道一般。頭抽雞翼自動用碟仔另上，雞翼幾大隻，十分入味，值得下次嚟再叫。滷水魷魚最有驚喜，魷魚鬚既部位好明顯係揀選過，唔會好hea咁得好少或者碎濕濕，仲要咬落好有嚼頭，份量適中。上次同今次都係揀熱檸檬茶，無加糖，估唔到連簡單一杯餐飲都整得好好飲，熱檸檬茶有檸檬味但唔會過酸，茶底同檸檬一齊浸但唔會過苦，連熱飲都係加分位由於呢間係小店，落完單要等大約十分鐘左右先上枱，價錢係略貴，但食完之後係覺得值得呢個價錢，對比過百元既日式拉麵，我都係鍾情米線，呢間好有水準，下次又要再嚟食！…Read More

今日天氣好凍，晏就想食車仔麵，但食開嗰間xx館太爆場，今日試咗呢間裝修幾靚既舖頭食車仔麵，諗住睇open rice點知一個食評都無，但照入嚟試下。舖頭用qr code落單，揀咗3餸麵，有啲食物要再加錢，幼麵，咖喱魚蛋，滷水雞翼(+$4)，秘製辣魷魚(+$4)，秘製辣汁(大辣)，要葱花，辣菜圃，埋單$44，免加一。等咗6至7分鐘左右，食物上枱，每樣餸都好味！秘製辣汁揀大辣但唔係好辣，十分惹味幼麵淥得幾好唔會過淋，咖喱魚蛋正常發揮，滷水雞翼有2隻，幾入味，魷魚份量唔多，幾爽口配辣汁好味辣菜圃得幾粒，唔太辣，幾好味喎整體食物質素不錯，慢慢成間餐廳都坐到滿哂，呢間係另一間新蒲崗好味既車仔麵，值得再嚟…Read More

前幾日睇社交平台見推介呢間古法拿破崙，話整餅師傅年紀大，應該明年1月左右唔會再製作出售。由於從未試過招牌古法拿破崙，諗住襯weekday過嚟SPK食lunch時想買一件，但1點半左右已好多人排隊買，有啲人誇張到一口氣買4至6件，未排到自己已經賣哂，估唔到平日lunch hour都買唔到。店舖職員話可以預訂，於是俾咗29蚊預留咗1件響2023年12月24日下午2點取貨。今日取貨嗰陣唔洗等，俾飛仔已即時取貨，拎完就行咗附近企埋一邊響條街食，拿破崙食落係好鬆脆，每層都有適量忌廉，對我嚟講有少少甜，但未算過甜，合桃粒份量較少，無想像中好食，可能本身社交平台過份吹捧，令人有太大期望，但食落其實好一般，唔會難食，又唔係十分好味，試一次夠了。…Read More