eatiswow's Profile

公道講，間野野食係唔錯嘅，價錢都合理，但成個用餐體驗非常差。❌ 安排混亂 - book左位但去到話個位比人坐左，叫你等多30-45分鐘

今次去食係早一星期經OpenRice 訂位，去到食果日朝早都自己打去confirm一下，經電話溝通店員都問左話會安排好室內位。
book左7點30分，準時去到，問一問店員示意book左枱想入座，但店員一臉唔耐煩嘅樣叫我同朋友企係出面等下先，以為佢係清枱，過左幾分鐘都反應就問另一個店員，先至幫我地check，我見到佢本簿度都有寫低我個訂枱同mark左室內，然後話我哋個室內位比人坐左(我同朋友都???)，如果係要坐入面等多30-45mins，唔介意可以坐室外（果晚係得13度左右），咁我同朋友都冇計一場黎到照坐室外試吓會唔會好凍。結果都真係凍到暈，凍左半個鐘左右先安排返室內位，途中仲好似嫌我哋多要求。❌ 漏單問題 - 連薯條都差唔多成個鐘先到其實當日已經係平日嘅夜晚，見餐廳嘅人手其實足夠，有7-8個樓面員工要招待10幾枱客左右，但可能炒散為主，人多手腳亂。而喺兩次落單時，店員都冇係用任何野mark低我哋嘅點餐，搞到兩次落完單過一陣店員又再黎confirm點單，既然5-6個items都記唔到不如用筆/其他野記底？仲要連續兩個店員都係咁。
當然都不意外有漏單問題，我哋8點30左右點完餐，所有野食都要 9點15分後先到，難怪同場都聽到有其他食客不耐煩開始同店員大聲理論，搞到好似要大大聲呼喝你哋先會做下野咁。
不過公道講，除左剛入座時果位中年男士店員嘅態度差外，其他店員都態度幾好，只係時間同其他安排上實在太差。…Read More

2015年已經開始知道一鍋堂呢個名，由間餐廳本身喺荃灣用竹籠盛上火鍋配料嘅年代，覺得呢間火鍋店性價平極高，到佢後來開分店到旺角都仲有支持。不過隨住餐廳素質同價錢愈來愈唔成正比，同埋多左其他選擇後，都少黎左一鍋堂。今日有機會同同事黎到葵芳呢間相對新嘅分店，咁耐冇嚟食本身都對佢有d期望，點知得來只有失望。公道嚟講，純粹野食質素上冇乜好大問題，普普通通，唔難食，但又稱唔上好食，飲品種類都算多，亦有自家製嘅茶飲都唔差，但講到想要追求環境同服務嘅你，而家嘅一鍋堂絕對唔係你要去嘅地方。服務差，應該話係肯本冇服務過你，又開頭book左位已經等好耐都冇人招呼你，去到食嘅全程，空嘅火鍋配料碟全程冇人收過，一直都係自己服務自己，經過嘅店員全程當無視你。環境差，今次一同6人，已經一早book好枱，安排嘅位置係全餐廳最近門口嘅枱，近門口通風差熱住咁食，旁邊都不斷有食客出入。而餐廳設計上，6個人係坐得一坐卡位枱，未放火鍋料時，位置已經十分擠逼，去到火鍋配料上碟時，枱面根本冇空位去放。而迫不得已之下，問店員會唔會有個小茶几放下配料碟，當然係不秋不睬。好不容易先而自己去喺店內搵到張椅子去放碟。而6個人食，只係得一個細鍋係中間，實在食得太辛苦。當然成餐大家都食得好唔滿意，好似嚟到貼錢買難受，仲要成$3xx一位，晚餐嚟講，唔係話好貴，但服務同質素上絕對有其他更多更多嘅選擇。…Read More

灣仔一帶餐廳都算多，但人更多，所以唔打算周圍行就打電話去book 左12:45，但去到人齊都未有位，要等佢搞左一輪先入座。入去到環境都算正常，夠冷氣，但會上層都有陣異味。我哋一同4人都係叫左當日嘅午餐menu lunch set。叫左嘅食物全部都有個通病，就係完全唔熱，甚至係凍，平時都冇乜幾何食個焗飯黎到會係完全唔熱，只係碗米線相對微暖。而另一個問題係送餐速度比例控制差，理論上都係點lunch menu嘅幾個餐，送餐時間都差不多，當焗飯都送到同埋同事食完時，我點果份炒河追問左兩次情況下都未到，結果時間關係，要趕返公司同避免要其他食完嘅同事等，就決定cut單，都淨收杯檸水成$3x蚊，飲到一肚氣。當然店員態度惡劣，我追單時已經不耐煩，仲寸返我話只係過左2x分鐘... 所以結論係當掉左幾十蚊，冇咩事唔洗食呢間😂 有興趣就試下伏…Read More

價錢同嘢食質素係OK嘅，店員都有禮，但安排上覺得實在有少少混亂。下午6點入到餐廳，覺得都算係正常晚餐時間。但自問自己係都幾心急嘅人，所以入店嗰陣都有問係咪ready可入座，見店員示意ok。而入到去果陣店內暫時得我，心諗應該即刻煮嘅話都唔使等好耐，等左20分鐘都未有任何上菜，而隔離位都開始坐落其他客。當去到接近點餐後30分鐘，我點嘅餐終於上菜，而緊隨其後坐喺隔離嘅客過多幾分鐘都有餐上。係有少少計較嘅，但心諗備餐時間使唔使差幾遠，覺得餐廳如果未準備好食材嘅話，一係店客入到嚟嘅時候講明備餐會耐少少，唔好搞到個差距覺差咁多。另一個問題係圖不對餐，因餐廳係用QR code落單，所以Menu嘅嘢都係睇電話睇圖睇字，今次叫左鮮蕃茄輕醬油濃湯，見到幅圖係有叉燒配菜同蛋，咁我點左大大廣島蠔，照常理咁諗都係配菜配蛋掛(?)，點知嚟到碗嘢係冇蛋，一問之下原來加錢轉蠔反而就會冇咗蛋，咁我都表示無奈，覺得應該要喺個app度寫清楚你哋配搭，唔好搞到令到科技搞到實行上仲倒退。…Read More

喺灣仔一帶返工，最近見到呢間新開嘅餐廳，望落環境唔錯，就去左試試，點知就係中伏嘅開始。今次Lunch Time時段嚟食。首先食物唔衛生，佢有設餐廳沙律吧，但擺放嘅位置十分開揚，變相變左烏蠅嘅放題，攞野食間期都見到烏蠅到食物表面飛來飛去。而味道方面，平時都預左西餐嘅食物會比較濃味，但同行幾個朋友異口同聲都話野食太咸，飲品又太甜。叫左野食唔多但埋單每人$2xx，可以話係好睇唔好食，適合打卡，想令條脷受苦嘅話可以嚟一試。…Read More

今次嚟食雞煲，店主介紹呢度嘅辣雞煲係用左墨西哥辣椒，所以食辣嘅話要比平時食低一級。本身唔算太食得辣嘅我，點左bb辣，有冇比想像中咁辣。雞件滑而多肉，今次叫嘅時候同時加咗鴨舌，令雞煲嘅味道更加豐富。鴨舌嘅份量都算幾多，煮得夠入味。即叫即炸餐肉條，炸得外表鬆脆，入口食落唔算太乾，仲保持到Juicy。豆腐紙：個人幾喜愛嘅一樣配料，食法就好似響鈴咁點一點湯就食得，但口感個人覺得比響鈴更加豐富，同埋可以沾到更多湯。瀑布芝心牛丸，同個名一樣，食呢粒丸嘅時候要小心，因為一咬啲芝士真係會喺口入邊湧出嚟。安格斯封門柳，賣相好新鮮，入口好嫩不失牛味。最後都叫咗個，田園雜菜籃，今次有三款菜，生菜娃娃菜同油麥菜，今日嘅油麥菜比較出色十分鮮甜。餐飲叫左珍寶凍檸茶，嚟到嘅時候都幾驚喜，個份量都比想像中更珍寶。…Read More

呢間喺紅橋新開左一排嘅漢堡店，以貓為主題，除左店名叫貓毛，門口都放咗個mon播住貓嘅有趣短片。今次分別叫左兩個套餐同加左小食。貓霸漢堡，係兩塊牛肉配上菠蘿同生菜，令每啖都好juicy，配搭蜜糖芥末醬令味道帶起左少少甜味。貝羅菇漢堡，賣相十分豐盛，店主有個建議食法係另外再加芝士，令口感更加豐富。而黑松露醬唔會太搶味，反而同菇同肉十分配合。唐揚魷魚鬚，炸得夠乾爽，切成一粒粒方便食；水牛芝士條都好惹味。薯條同薯餅就不過不失，份量都算幾多，不過建議有加醬嘅薯條應該更美味。貓毛朱古力，見到個menu寫住必飲，果然都冇失望，朱古力夠濃，成杯飲品又唔會好”傑”，另外Oreo Millshake都唔錯，唔會太甜，較重奶味。…Read More

紅橋嘅餐廳bar，環境好寬敞，坐滿約1x人左右，燈光唔太暗，所以都算幾適合同朋友三四個一枱食晚餐傾計。生蠔拼盤，暫時餐廳做緊個優惠係$188包一個生蠔盤同埋一杯酒。每份有三款生蠔，每款兩隻，店員亦有介紹可分成三個層次去品嘗：由最淡色，到中間的肥美加肉質較creamy，到最後的比較重海水咸味，全部都冇平時廉價生蠔的臭味。蘑菇湯，好足料而有濃厚嘅蘑菇味，湯嘅濃度適中，唔會”傑”到好似汁咁，都埋最緊要夠熱。炸物拼盤，雖然都係常見嘅雞翼、薯條同埋蟹鉗等等，但不得不提炸得好有心機，唔會炸到太乾同”鞋”身，每款炸品嘅時間控制得剛好。卡邦尼意粉，餐廳做法係屬於較濃味嘅做法，意粉軟硬度煮得唔錯。最後餐飲點左420同埋City Hall Cooler，前者以tequila, Whisky等等較重酒味嘅cocktail，後者就較清新，以Lychee Yogurt混合Soda的無酒精飲品，相當醒胃，賣相好吸引。…Read More

黎到呢間一直想試嘅日式餐廳，大雨為環境上增添一份清幽，亦好彩因落雨緣故冇乜人胡麻秋葵🥬秋葵配上胡麻醬，面頭鋪滿木魚絲，作為前菜夠哂開胃豆腐唐揚🍞今日最有驚喜嘅一味菜式，平日都算少食到嘅豆腐煮法，唐揚豆腐即係炸豆腐，外面鬆脆，入面保持嫩滑，而家炸得好夠熱雞軟骨黃金燒🐤 + 黑豚五花腩🐷燒得剛剛好，雞軟骨面鋪上層薄薄黃金蛋黃，食法幾新鮮，混埋雞油食味道唔錯大啡姑芝士燒🍄大啡菇同芝士本來都好匹配，而佢哋將啡菇煮到夠入味又夠淋，入口每啖都有濃厚嘅芝士包住啡菇汁，令呢個配搭更昇華左牛肉湯稻庭🍜牛肉湯幾濃味，味道中規中矩，份量充足厚燒玉子🥚入口蛋味夠重，幾特別嘅係個伴碟蘿蔔蓉，沾上麵豉醬嘅配搭，加埋玉子咁食又幾新鮮…Read More

而家疫情去唔到旅遊，想去台灣唯有去d台式餐廳食左當去左。今次呢間位置都幾方便，朗屏站行5分鐘左右就到，位於元朗廣場嘅地下。除咗餐廳之外，門口都有個專賣外賣茶飲嘅counter。店嘅人流都算幾多，好在時間早等左一陣就有位。首先叫左滷水蛋滷肉飯套餐，小食配手拍小黃瓜同涼拌黑醋茄子，肉同飯嘅比例均衡，配搭住小食酸酸辣辣咁好開胃。然後叫左d小食，首先台灣烤香腸，幾有台式腸風味，香口又夠味，美中不足係缺少左生蒜片；然後有桂花雞翼同鹽酥雞扒，炸得幾金黃同埋夠熱。飲品叫左百香多多梳打同蜜桃烏龍多多，係以平時外賣杯形式咁上，大大杯又夠凍，個人叫左少甜覺得甜度都夠。…Read More

位置幾方便，位於棉登徑嘅地庫，由尖東站行幾分鐘就可到達。門口簡約，以簡單一個霓虹燈嘅招牌寫住店名，係一個有做lunch+dinner嘅餐廳bar。Book位果陣唔為意，落到去餐廳嘅大堂，發覺呢間餐廳bar有d似曾相識，就係港版大叔的愛嘅其中一個場景，劇中成日出現嘅一間餐廳。店內空間都算大，主要分成兩區比客人位，一區就係劇中成日見到比較似bar格局嘅座位；另一區就比較悠閑嘅復古風，以一些乾花作擺設同裝飾。食物種類選擇正常，有當日嘅dinner set或散叫，set方面主要有幾款扒類同埋意粉類，再配搭小食同甜品，而飲品就要另外加。首先黎沙律配餐湯，擺盤好細緻，湯夠熱同濃味，仲有d薯仔蓉嘅忌廉湯，不過份量有d少。自家製蟹肉燒賣，賣相幾精緻，外皮係脆脆嘅春卷皮質感，包住裡面滿滿嘅蟹肉幾好食。燒西班牙黑毛豬鞍，煎得唔錯，肉質入口唔會太實，份量幾大塊。Nachos同Fish and ChIps，兩者都唔錯，食落更加覺得份量夠多，同朋友食極都仲有，用嚟配野飲一流。飲品點左Gin & Tea Tonic同Rainforest，前者充滿著烏龍茶味嘅G&T，但茶味唔會太搶；後者就好fresh，係mocktail嘅水果smoothies，酸酸地好開胃。…Read More

去過尚八已經好多次，之後都係勝在價錢相宜得嚟野食又唔算差，但近幾次嚟好似一次比一次差。相隔幾個月再嚟，首先係佢哋嘅menu，我同朋友每次嚟都係食佢地最經濟果個餐，假期嚟嘅話係138+1價位，以前都會連餐附送幾款牛類，但而家成個餐cut到完全冇牛，感覺似迫d食客要食貴餐咁。第二係食物同飲品方面都愈cut愈少，最初嚟到都會有一d例如雞軟骨等等嘅小食類，同埋飲品方面選擇都愈黎愈黎少。以上兩樣都明白嘅，始終要抗通漲，所以都唔求得咁多。不過好似除左選擇少左外，質素都隨住降低。不過真係唔試過唔知，食之前見到有人留comment話間野經理態度好差，諗住都係極少數嘅唔好彩，但似乎係常態。我同朋友book 2點食，食90分鐘，心中有數都會幾趕，但入座時都冇講實係幾點交枱。但直至食到尾段果陣突然經理走過嚟好冇禮物咁講話過2分鐘後交枱，我同朋友都呆左，話我哋早左嚟要早d交枱，但事前完全冇提早提示我地要交枱。咁我哋都知自己衰，都無奈地失左預算令食物唔太燒得切，諗住睇吓有冇得通融下燒多幾分鐘唔好咁浪費，因為同場都仲有幾枱係到燒緊。2分鐘後，我哋仲好努力燒埋剩番果幾片肉，點知個經理走埋嚟一下熄左個爐，”好好” 咁 ”請”我地離開，咁我地都唯有走啦，但真係好浪費，好似為趕客而趕客咁，唔講以為間公司得罪左個經理想間餐廳快d執咁…總括嚟講，食物質素差左，調味太濃，唯一好嘅係餐廳抽氣係幾好。但眼見間餐廳愈做愈差，咁樣趕客走唔怪得同場嘅食客食一次同一次少人。…Read More

平時較少嚟天水圍，咁岩約咗天瑞朋友搵食，發現原來天瑞都幾多餐廳，成個商場就似個food court咁。去到小豆島，門口係簡約嘅淡木色裝修，店內環境都算寬敞同大，坐到唔少食客。主打日式料理，主要食物包括壽司刺生，店員介紹最近店內推緊個單點壽司/刺生半價優惠，都幾抵食。首先上左刺身，點左三文魚、三文魚腩、帶子同油甘魚各一份，擺盤都好精美，刺身望落幾肥美，融雪岩岩好，入口都仲好新鮮。壽司都唔錯，叫左十款左右，餸同飯比例合理，其中芥辣八爪魚軍艦夠”攻鼻”，食到我同朋友都喊咁滯。另外佢哋都有唔少款式嘅小食，食完冰冷野想食番d熱野，就叫左炸蝦天婦羅，炸得唔錯，伴碟仲有炸菇幾juicy。…Read More

喺屯門新墟一帶嘅Gogo mall開左已經一排，不時都要過嚟搵食，發現都多左唔少小店。見到有間叫Habib’s 嘅中東餐廳，就位於gogo mall food court嘅入口位置，由門面到店員都幾地道，喺該區嚟講都算少有同類型嘅餐廳。今次買左外賣返屋企食，叫左無骨牛油雞嘅薯條，同埋烤牛肉沙律。無骨牛油雞($72)幾岩唔食得辣嘅人，醬汁夠濃味，今次叫左配薯條；如果配飯食應該十分夾。烤牛肉沙律($70)炸牛肉同菜嘅份量夠多，配上沙律醬食好juicy。…Read More

呢排天氣開始轉涼，又係食火鍋嘅季節，上網搵到喺元朗呢間牛知己，主打火鍋放題，見環境都價錢都唔錯，就決定去食下。佢同一般市場嘅放題火鍋一樣都分左唔同價錢有唔同級數嘅肉同食材，咁我就揀左中價位嘅澳洲精選牛板健，同配埋有幾款海鮮。店內環境都算唔錯，平日夜晚嚟到，入到店舖內唔會一片煙霧，地面都唔會一地油淰淰，只有依稀嘅火鍋味。點好湯底，揀左雪濃湯配古早沙嗲湯，開始時店員都好快咁上左跟餐嘅一客刺身同埋幾碟牛，牛嘅質素都算唔錯。呢度嘅熟食盤都幾有驚喜，雖然款式唔算多，但係食嘅途中炸物都有keep住refill，保持到新鮮同熱。而丸類同其他火鍋配菜都可以喺出面嘅自助吧到攞到，種類都幾多，整齊咁放喺冷櫃。最後甜品有個人幾鍾唔嘅乳酪雪糕，值得一讚係乳酪機都保持到夠冰凍，唔會未食已經溶哂。…Read More