boyastro's Profile

行過見到裝修咁靚，就同朋友去試一試，週末，竟然得一兩枱客，已經覺得中伏了。硬着頭皮，坐低睇吓個餐牌，點知，冇餐牌的，所有都係海鮮價，都唔知點叫。想叫個炒飯、炒河粉，全部冇價錢的，根本就冇餐牌。啲職員話，呢度係海鮮酒家，係咁㗎啦！咁啲海鮮價錢呢？都係海鮮價，每一樣都要問，都有啲驚！海鮮都OK，新鮮嘅，唔會差得去邊！但係小菜同炒粉麵，就真係把鬼，小菜喊到不得了，炒粉麵，仲衰過茶餐廳，一碟楊州炒飯，仲要收我兩舊水，問過職員，佢話見我哋多人，同我哋加大半份喎！全晚都係得一兩枱，伙記就多，個個都懶懶間，叫夥計沖返壺茶，凍嘅！明明未到收工時間，就已經開始在你四周圍不停拖地，開行冷氣，跟住仲要熄埋燈趕你走！個廁所仲要臭到不得了！成間酒樓咁大，男廁只係得一格，仲要個職員霸住半個鐘頭，反鎖喺入邊，唔俾人用。都唔知係咪做生意嘅！…Read More

聽人講呢間餐廳有啲歷史，就去試吓，唉，服務真係差，尤其係澳門，間間餐廳的服務都超水準，真係有好大落差。員工就多，眼見都有六個，客就得一兩枱，都冇人理的，佢哋淨係顧住嗰一台熟客，同佢哋嘻嘻哈哈，嘈喧巴閉。我四圍行吓欣賞吓餐廳內嘅佈置啫，有兩個員工，一路抹碟一路口噏噏廟晒嘴，我行到邊，就啤到邊，真係唔知道自己有啲乜嘢得罪咗佢哋！食物就一般啦，食咗個沙律，同一個炸馬介休球，朋友跟住想叫個主菜，我就叫埋單好了，真係坐多陣都唔舒服。…Read More

終於知道點解香港人返晒內地消費，去過呢間咖啡店，真係大開眼界，服務差到冇人有。去大美督行吓，見到附近有間咁有特色嘅咖啡店，諗住走入去望一望，入到門口，仲以為自己去咗白金漢宮，立即俾人攔住，話要先買咖啡才可以進入。我同朋友話，我哋想睇一睇環境，再決定，他們回應，唔買咖啡，就不能來進。俾人當乞兒，一肚氣，於是，我們每人買了一杯咖啡， $70一杯，我叫了一杯latte，朋友叫了一杯普通Americano。兩杯齋啡放到面前，我問，可唔可以俾啲奶我，回應話，我們沒有奶的。我再問，咁又冇糖，回應話，我們亦都沒有糖。已經不是要求咖啡糖，一間咖啡室，話知你係韓式，在香港開咖啡店，連砂糖和奶都沒有，態度還非常惡劣，見過鬼都怕黑，大家認住呢間咖啡店，生人勿近。…Read More

通常入大尾督，都是幫襯泰國菜館，不過今次是在晚上去大美督，覺得吃西餐會比較有情調，見到這間ENT餐廳，門口裝修得很有特色，地方乾淨舒適，就入去試一試。打開餐牌，食物種類繁多，除了一般西餐食品之外，更有墨西哥菜、意大利菜、泰國菜等等，非常有特色，最驚喜的，就是價錢非常便宜，每份大多都只是一百元左右，在這個旅遊旺區，難得！我們兩個人，叫了一個海鮮pizza，和一份墨西哥豬肉Taco，及開了一支紅酒。前菜豬肉墨西哥Taco, 相信豬肉是混合了一些火腿，有淡淡的鹹香味，我把鍱上用作裝飾的紫椰菜加到夾餅中，除了鹹香，更帶一點甘，作為紅酒的小食，一流。主菜的pizza，海鮮份量十足，啖啖都係海鮮，更配上我喜歡的黑和青橄欖，色香味俱全。看到其他食客的食物，都非常有水準，全部都做到色香味俱全。除了食品質素滿意之外，服務更是一流，老闆不時便走過來為我們倒紅酒；看到我的餐紙巾污糟了，便給我換上新的，非常貼心。埋單嘅時候，和老闆閑談了幾句，原來整間餐廳已經開業差不多十年，由最初的裝修，牆紙、地板、餐牌、菜式，以及眼見的一切一切都是由這對尼泊爾夫婦一手一腳打理，真的不簡單。ENT, 是Eat and Talk的意思。餐廳設有戶外和室內兩部份，不論戶外戶內，裝修都非常漂亮，座椅舒服，值得推介。…Read More

曾經聽過一位前輩講過，西方人是酒的文化；而中國人就是茶的文化。一直以來，都對品茶有興趣，但了解不多，朋友介紹了這一間餐廳，以品茶為主，便約埋兩個知己去試試。入到餐廳，環境非常漂亮，佈置華麗，有着一點夜上海、又帶點時尚的設計。一開門，餐廳經理李先生立即走過來迎接，帶我們去到一間紫色佈置的獨立房間，差點以為自己身在上海歷史悠久的和平飯店。在未決定品嚐那一種茶之前，李先生預備了三款茶給我們試，是十多種茶選擇之中的其中一款紅茶、綠茶和烏龍茶。我們最終選擇了紅茶中的麥芽香滇紅大金針。茶具非常講究，每一個茶杯都是景德鎮人手繪畫和製作，每一個茶杯和杯墊都是獨特設計，杯墊是超過50年歷史的銅製品，托茶盤是從京都買回來的頂級漆器。煲水用的水煲，是純銀鑄造，是二戰時期，某日本公司駐台灣時的成品。水煲蓋，還有株式會社的字樣。當年在日本公司工作的人，退休時都會獲贈一個銀壼作為紀念，銀壼越大個，代表那位退休人士的地位越高。而我面前的這個銀水煲，就曾經屬於一位地位非常高的人。至於點解要用銀水煲，因為銀壺煲水時所釋放出來的銀離子，能為人體起消毒殺菌的作用，同時用銀壺煮水，能使水質變軟變薄，有助茶葉釋放茶香；而且銀器在遇熱時化學性穩定，煮出來的水，不會影響茶的味道。亦有聽說過，用銀壺煲水喝，甚至能預防心血管疾病。煲水用的水煲已經那麼講究，到茶壺了。時常聽到人說紫砂茶壺的故事。小弟所認知的，就是用紫砂茶壺泡茶日子久了，茶壺會吸收茶葉嘅香氣，之後就算倒入清水，都會聞到陣陣茶香，所以用紫砂壺，最好就只用一種茶葉。但我們今次用的茶壺，並不是紫砂茶壺，而是一種特別物料的陶瓷，忘記了物料的名稱，李先生說，他的密度，比起紫砂壺更高，保持熱力更強，更能令茶葉嘅香氣完全釋放。茶 - 一共泡了四次。分別放在四個玻璃瓶內，每一個玻璃瓶，都用熱水座熱保持溫度。由第一泡，初芬；第二泡，香濃；第三泡，濃郁；第四泡，餘韻。有點像欣賞香水、也有點像品嘗紅酒的感覺。我們選擇的麥芽香滇紅大金針，有着淡淡的番薯香，對，你沒有看錯，是番薯的香氣。茶葉是沒有加工的，香氣、入口的口感和味道都是純天然，各種茶葉有着自己的個性特質，這就是每一種茶葉的獨特之處。我們點了每人一份花膠點心套餐，加上南非吉品鮑魚和焦糖番薯。平時去茶樓飲茶，點心都是主角，茶只是配角，甚至茶介全免，連配角都不如。很多朋友寫食評，都很少提及那杯茶。所以今次，以品茶為主的餐廳，就給「茶」，當一次主角！點心和主菜都很出色，味道都會較清淡，主要是不要影響味覺，破壞品茶的雅興吧。因為茶才是主角。在菜餚方面，我都不深入評論，繼續品茶。吃過美味佳餚，李先生端來一杯桂花香玉桂冰茶，用紅酒杯承載，紅酒杯發揮其作用，正要品茶的時候，茶葉的花果香氣已向鼻子撲過來。精神為之一振，入口冰涼、茶味清甜。李先生最後端來另一杯冷茶，用shot glass承載，他用調皮的眼神，叫我們閉上眼，先聞一聞。我把茶杯端到鼻旁，頓時睜開眼睛，什麼，是威士忌來嗎？李先生笑道，這是泥煤香玉桂，這是它的特色，入口還會有一陣煙熏味，很像單一麥芽威士忌的香氣。精彩！茶，中國人的文化。一般人認識的普洱、壽眉、香片、水仙…。只懂得消滯解渴、清熱、抗氧化、保健…。但只要用心，深入地去研究、體會、欣賞…，原來是一門無底的學問。…Read More

有幾張酒樓現金券，月尾到期，諗住約兩個朋友，在到期日之前用晒佢。怎知惹來一肚氣。已經知道用現金券，一定要點選正價餸菜，不能夠用在套餐或特價食品上。於是便選擇餐牌的單點餸菜。當其時，酒樓每20分鐘便會有廣播，說每一台人客均會獲贈乳豬一份，之後有一個女夥計走過來，告訴我們，除了乳豬，可以選擇其他燒味拼盤。為免之後有爭拗，我告訴她，我們是用現金券的，也有這個優惠嗎？誰不知，大件事了，那個夥計，立即黑面：「咁就梗係冇啦，仲有啊，頭先點嘅餸，要全部再點過。」之後她便很晦氣地行開了。過了一會，那位女夥計，很晦氣地把一張影印紙，所謂餐牌放到我面前，把其他餐牌，全部收起：「呢張先至係你地可以點嘅。」我眼見，所有嘅餸菜，大概加多20至 30%價錢，冇所謂吧，便告訴夥計：「剛才點的餸菜，照舊吧，價錢你們自己處理，我會照俾這個價錢。」那個夥計，晦氣兼黑面：「梗係唔得啦，你要全部再點過。」之後，在我面前，把之前的手寫落單卡撕掉。繼續很晦氣的說：「呢張唔用得㗎喇，你要全部再點過」之後更走開了。等了差不多10分鐘，我大聲地說，唔該我要點菜。之後那個晦氣的女夥計又走過來，要食啲咩啊？我告訴她：「其實就係頭先我點果啲，一模一樣」女伙記：「都話咗頭先嗰張單唔可以用囉，你再講過啦！」之後又走開了。於是，我就在這張影印的餐牌上，逐一找回我之前點的餸菜，其中有兩個餸菜，在這一張影印餐牌沒有，剛巧有一位男夥計走過來，我就問他，剛才另一張餐牌有兩個餸，這裏找不到。他告訴我，如果普通餸菜，總之最平都要$128，如果冇，都係$128，之後又走開了。又等了一會，那個女夥計又走過來問，可以點菜了嗎？當其時我已經一肚氣，食餐飯，想開開心心，所以一直忍。我告訴她：「芋頭南瓜煲…」女伙記用極度惡劣的語氣：「乜嘢號碼呀！」我回答：「冇號碼個喎，呢張紙冇呢個餸。」女伙記繼續用佢惡劣嘅語帶，用支筆篤住張紙：「呢排咪係號碼囉，你講個號碼俾我聽啦！」我回答佢：「我唔知呢個餸嘅號碼係乜嘢，總之我要呢個餸。」剛剛那個男夥計經過，就告訴她，呢個餸菜，張紙冇㗎，你寫$128啦。之後我繼續點菜：「沙巴龍躉仔」女伙記：「乜嘢號碼！」我告訴她：「238644」女伙記：「幾多錢呀？」我心諗，乜嘢事呀⋯⋯！女伙記用支筆大力篤張餐牌，「一百六十八蚊，我要寫埋價錢㗎，你要講埋俾我聽。」我繼續忍繼續落單，「咁比多個237455」女伙記：「你俾個號碼我做乜嘢，你食乜嘢？」我回答：「波士頓龍蝦兩隻」女伙記繼續用佢極度惡劣嘅語氣：「幾多錢呀，你點菜，要話俾我聽個號碼，食啲乜嘢，同埋幾多錢，我要咁樣落單㗎！」此時，我的忍耐力已經超過極限，要發火了：「我要波士頓龍蝦兩隻，沙巴龍躉仔一條，其他嘅嘢我唔知，不如你坐喺度食，我做埋你嗰份，我做埋落單好唔好？」個女伙記：「咁我係要咁樣落單㗎嘛！」我回答：「你點樣落單係你嘅事，不如你教我落單，我幫你做埋佢。」之後個女夥計口噏噏，走開咗。隔咗幾分鐘，又走過來，把一張落單收據飛在我的枱上，係「飛」在我的枱上，「你張單啊！」我睇一睇張單，都唔係我叫嗰啲嘢，我就立即叫佢返嚟，話呢張唔係我嘅單，跟住佢話，「哎呀，搞錯咗喎！」呢個時候，我啲朋友都忍無可忍，「點做嘢㗎你，有冇搞錯啊」我哋叫左芝士龍蝦，三個人，只係比一份刀叉，同埋一個鉗。之後又要問佢攞多兩份刀叉。我食咗啲龍蝦殼，佢哋唔係同你換碟，係直頭收咗個碗同埋隻碟，冇再俾番一套乾淨嘅我。我都唔想再同啲夥計講嘢，就用咗我朋友隻碟嚟繼續食。除咗芝士龍蝦，沙巴龍躉仔，仲食咗芋頭南瓜煲，同埋蜜餞燒骨。食物是OK的，但成餐飯，真係背脊骨落。我哋差不多八點開始食飯，得寥寥數枱， 9:30得返我哋一台，就突然間全場熄晒冷氣，好明顯，就係叫你哋唔該快啲走。我個朋友忍唔住，立即戴上口罩，叫大家一齊走，根本留多1分鐘都非常難受。想俾人虐待，不妨幫襯。…Read More

朋友先去搵位，另外兩個朋友等車位，接到朋友電話，通知我話餐廳員工告訴他旁邊有車位可以泊車，便把車駛到餐廳門前。落車問一問門口的服務員，可以泊在哪裏？服務員回答：不知道。入去餐廳搵朋友問過究竟，朋友再問其他服務員，每一個都話不知道，找回答應他的那位服務員，服務員告訴他，原來冇位喎！又駛回停車場等位。三個人，叫了一份羊扒，兩個叫pizza，Pizza寫到明toping有蝦和anchovy (鯷魚鹹魚仔）。餐飲問清楚了服務員，可樂是汽水機的、還是罐裝或樽裝？服務員回答，是罐裝的。OK，就叫了可樂。餐湯，服務員問，要紅定係白（一字一句，沒有多也沒有少），心諗，紅湯就係羅宋湯或者雜菜湯；白湯就係忌廉蘑菇湯之類。我就叫了紅湯，另外兩個朋友就叫了白湯。奇怪的事發生了，先來兩杯餐飲，係兩「杯」可樂，並不是兩罐，而且兩杯可樂，份量相差有一寸，就像是其中一杯有人飲過一啖一樣。算了，小事。餐湯來了，三碗湯都是紅色的，朋友出聲，我不是叫了白湯嗎？服務員說，紅湯就是雜菜湯，白湯就是蕃茄湯，真係世事無奇不有！主菜來了，羊扒正常；我和朋友選擇Pizza，我發現有啲唔妥，不過唔想出聲，希望求求其其食完餐飯就走，見到個朋友不停望住個Pizza，反轉又睇下，翻開啲芝士又睇吓，我忍不住出聲了，你是不是在找anchovy?他說，對啊，完全看不見，而味道一點鹹味都沒有。原本都冇諗住影相，亦都冇諗住寫食評，諗住好嘅一餐唔好嘅又一餐，不過到呢度真係忍無可忍，立即影低個Pizza，除咗蝦同埋一啲炸蒜頭之外，啲anchovy真係唔知去咗邊。叫個服務員來問過究竟，竟然說，anchovy已經打碎混合在Pizza的醬料上，他一定覺得我們是弱智的，anchovy是深啡色的，而大大個Pizza，就只有白色的芝士，沒有什麼醬料，餐牌寫住toping係蝦同埋anchovy , 什麼醬料？？？知唔知道什麼叫做toping? Toping 和sauce 的分別是什麼知道無？忍無可忍下，影低張相片作為紀念。食到一半，其中一個朋友去了洗手間，羊扒食晒，仲有很多西蘭花同埋配菜，服務員就走過來，問了一句，唔要啦呵？之後就想收碟。我哋立即告訴他，我朋友去了洗手間，我不知道他要還是不要。過了1分鐘都冇，另一個服務員又走過來，今次佢問都冇問，就想收走個碟，我望住佢，同佢講，嗰位先生去咗洗手間，你可唔可以等佢返嚟，問一問佢先收呢？呢間餐廳嘅服務真係大開眼界，話佢哋冇禮貌咩，又唔係，反而係唔該前唔該後，好似好有禮貌咁，但係服務就差到加零一，直頭係劣質，差到不能再差！…Read More

去開的餐廳，質素下降，得知原來大廚自立門戶，就在附近開了一間小店，今日就去試一下。餐廳和食品都是以花為主題，未落order，廚師已經端來一份用青瓜、蟹柳和雞肉做的小巧前菜，配上不同的七彩小花，差點不捨得吃。原本想吃羊扒，賣晒，就轉了牛扒，朋友叫sea bass。先來一個南瓜湯，濃香加上甜酸的味道，非常開胃。主菜配上不同花卉作伴碟，七彩繽紛，看見已經食指大動。Sea bass配上一粒大帶子，醬汁做得好好；牛扒的醬汁亦都做得香濃。還有一個自助沙律吧，紅蔥頭沙律、水牛芝士、南瓜...配上三種不同嘅醬汁，任君選擇。牛扒的質素只是一般，不過冇投訴，因為有自助沙律吧、特製嘅濃湯、餐飲、小巧嘅前菜、加埋主菜，每一件都像是一件藝術品，（主菜旁邊嘅配菜係一流，不是那些薯條雜菜行貨東西），都係百幾蚊一位，仲要冇加一。位置偏離大街，人流可以話零，真係要朋友介紹先至會去找。相信多人認識了，生意好了，會有很大嘅提升空間，會繼續支持用心嘅廚師，而唔係求其煮熟一舊野出嚟俾你食那些。加埋！…Read More

以往十幾年都係幫襯大美督最大果一間泰國菜館，但近來他們的食物質素大不如前，連續兩次吃的咖喱蟹，都是死蟹；伙記服務態度就一向麻麻地。終於都決定同佢分手，幫襯另一間叫Pattaya的泰國餐廳。已經幫襯過幾次了，就決定寫一篇食評。首先，呢間餐廳，伙記服務貼身好多，只係幫襯過幾次，一見到我哋，已經知我哋要飲乜，同埋知道我哋嘅口味，食得有幾辣，唔使次次講。他們的食材也非常新鮮。我們喜歡吃蟹，可能因為市道近排麻麻，他們都冇入貨，頭兩次都吃不到，老闆就話，下次預早一日打電話俾佢，佢會幫我哋買，真係照顧周到。首先介紹嘅係咖喱大頭蝦，一份有兩隻，如果唔話俾你聽，仲以為係食緊龍蝦，蝦肉非常爽，咖喱汁很香，不辣的，我們用蒜蓉包來點咖哩汁吃，美味非常。咖喱蟹嘅咖喱汁，同大頭蝦係一樣嘅，但係啲蟹膏容埋落啲咖喱汁度，所以啲咖喱汁就更加香濃，蟹係預早一日打電話俾老闆叫佢幫我哋買嘅，所以保證新鮮。我哋仲食咗無骨鳳爪，配菜很美味，辣味十足，如果食唔到辣，預先講就得；仲有推介臘腸蝦餅；酸辣魷魚；泰式春卷，我哋親眼見到老闆娘自己包的；泰式拼盤；海南雞也做得不錯。甜品我哋食咗芒果糯米飯，糯米飯係有白糯米和紫糯米倂在一起。以後去大美督，呢度都會係我哋嘅飯堂…Read More

之前一向幫襯開呢間餐館，價錢合理，食品質素，在附近眾多餐廳中，比較能夠接受。因為屋企人話佢杯奶茶好正，雖然食物冇乜驚喜，但係都會如常幫襯。但係近幾次，食品質素真係每況愈下，直頭難以接受，與此同時，服務態度更非常惡劣。叫了一個酸甜大蝦，非常不新鮮，蝦肉已經梅了；咖喱牛腩，牛腩又乾又鞋，咖喱汁水汪汪；牛肉沙嗲串，以為自己在吃湯渣；冬陰功湯，我懷疑是用冬陰功即食麵的粉包開的，只是一些辣水，當然蝦也是梅的；咖喱青口，超市買的急凍青口都新鮮過佢。唯一大家肯收貨的，是魚露滑雞，但半隻要$160；能夠保持水準的係一杯奶茶。除咗食物品質插水之外，服務態度亦非常惡劣，問服務員攞啲碗仔同埋調味料，佢回返我哋一句，我依家好忙，唔得閒住。之後淨係攞啲碗仔嚟就立即閃，還來不及叫住她卻已經走開了，又要再問另一個夥計攞調味料。因為大家對防疫都比較敏感，想話要啲濕紙巾抹下枱，個夥計卻回一句，啲濕紙巾係要你哋食蟹先會俾你嘅，之後就黑口黑面好唔願意地掉在我們桌上，如此被人羞辱，立即叫個夥計過來，叫他把濕紙巾拿走，說我們不用了。那些濕紙巾如果咁矜貴，其實可以收錢的，或者索性告訴我們沒有，用不着給說話我們聽。總之奉勸大家，想受氣，想背脊骨落就去吧。相片都冇心情影了，只是初頭來的兩客影了相，其他的都沒心情影了。…Read More

第一次來，見裝修很漂亮，播著八十年代英文歌，好配合餐廳名字，以音樂做主題的Amplifier，服務員告訴我們晚上有live band的，可適我們只是午餐。叫了一客焗田螺做前菜，香到不得了，一上枱，立即全部吃掉，完全忘記影相。白酒係來自Marlborough，只是三百多元，價錢非常合理。牛肩有來自澳洲和美國的，但套餐的只有澳洲，肉質鮮美肥厚。雖然夏天生蠔唔係太靚，但係細細隻，鮮味十足，非常新鮮，他們有來自法國的和日本的可以選擇。另外那個焗薯蓉亦是一讚。需要改善的是那海鮮意粉，那些青口實在非常不新鮮；還有那個焦糖燉蛋，應該放了一段長時間了吧。…Read More

未見過一幢甘靚嘅金融中心，竟然有一間那麼九流的餐廳。食品和服務質素不好嗎？又不絕是。事情是這樣的。剛剛在附近工作，見到那麼新的一幢商廈，入去看看有無食市，就找到這一間餐廳。近落地玻璃的全部海景位置話做緊清㓗，所以要客人躋在幽幽暗暗又迫的角落，人家話做緊清潔，無法。見個menu有生啤，就叫兩杯. 個待應話生啤是支裝的。人生第一次聽到支裝生啤，送到面前，跟本就是兩支16X4啤酒，生什麼啤。接著，看到窗邊話做清潔的海景位置，原來是給員工開飯的，旁邊的其餘六張枱全部不準客人坐，怕客人打擾他們吧。我們在暗角吃著fish and chips,他們滿枱蒸排骨、炒菜心，白飯任裝，還動高腳，廖廖牙，不知幾爽。叫了Fish and chips和芝士薯條。Fish and chips係無他他醬，也無沙律醬，只有一包麥記大小的茄汁，真係要省住用。而且只给我一隻义，好體贴，可以單手用隻义又切又吉。朋友看不過眼，問拿多把刀。那個待應才拉開枱底的抽屜，應該是示意我們弱智的嗎，自己喜歡什麼就拿什麼吧。最驚嘆的一件事，起初我沒有為意，我朋友食食下告訴我，覺得自己在垃圾站吃東西。我問此話何解？原來在我背後，在餐廳的水吧旁，餐廳的正中，放了一個垃圾站用的那種綠色超大垃圾筒...。只此一次。…Read More

初頭見裝修幾得意便入去食個下午茶，入面一個客都無，覺得奇怪。不過好快知道原因了。其服務差到不能再差。食物就已經一般，來了一杯不熱，只是暖暖的奶茶。我很有禮貌地要求伙記幫我用微波爐丁番熱，都已經無要求換一杯。點知等左十分鐘，再問一問個伙記。個伙記就大聲告訴另一個伙記：「去微波爐攞番杯奶茶比個客，個客話要好熱，我已經丁左兩分鐘。」好明顯比說話我聽，同埋，丁一杯奶茶丁兩分鐘?有病嗎？果言，杯奶茶送到我面前，杯邊已經濃曬，乾到只剩下半啖。一肚氣，叫那過伙記來，想叫佢自己睇下，佢同緊另一個伙記傾計，話吾得閒，叫我等下。我等左一陣，佢仲傾緊計，真係佛都有火，立即埋單走人。以後免費都米洗只意我再去。…Read More

之前老闆話可以預訂私房菜，見又打風又黑雨，想近近地，就膽粗粗打電話去問6個人做吾做私房菜生意。老闆一口就話「無問題」。（預早一天就可以）👍🏻。一坐低，先來一個杏汁菜膽豬肺湯，大大件豬肺和骨髓，足料喲，大家飲了兩大碗😋🍲聖子皇，蒜頭豆鼓蒸，爽口，無得輸。特別特別推介佢地隻招牌炸子雞，老闆話師傅要一天之前便要預備，沈湯再釣乾，老闆話雨未停過，隻雞今日吾夠乾，失左D準🐔。...唔！真不知道如果無失準，可以再點。太好味了，皮脆，好似豬肉紙一樣的簿脆；肉質卻好似白切雞一樣的滑，同平時去飲宴吃的炸子雞完全係兩回事。👍🏻👍🏻👍🏻大班兩味，抄球和蒸頭腩。班球無骨，啖啖同，我最喜歡；老友中意倫骨，就吃蒸頭腩，成條魚掃清曬。🐟咕嚕肉，師傅特別切得細件，炸皮非常簿，一件一口，好特別。😻最後上枱的，又一個特別推介。荷葉蒸雞飯。D雞油落曬D飯，籠底有片大荷葉，散發出陣陣荷葉香味，真係一路食一路講好味講左十次。🍚可以whatsapp去訂座：6583 5300，方便我呢D要快嘅人喲…Read More

估不到荃灣有一間那麼有水準的小店。火鍋加刺身，一冷一熱，配合到絕。一行只是兩個人，實在忍不住什麼都想試。先來了一個小的刺身倂盤加一條活魚刺身，新鮮，好味，就連賣相也靓到久久不捨得吃。價錢仲...，超值。吃過冷盤，叫來火鍋，一定要試響零和炸魚皮，因為係師傅即叫即整的，一般集團式酒樓無乜可能吃到。肥牛，有本地，有安格，有日本，其實真係吾識分，伙記好好人，講解原來喜歡入口即容的，就吃安格司或日本牛；想有D咬口，肉汁較甜就本地牛...，明白。真係吃到不能再吃了，和伙記傾了一會，原來預早通知，師傅更可以為大家做一枱私房菜。於是立即預約了中秋做節，比個人數，預算價錢，師傅就會過一兩日比張菜單我先過目，正。伙記比埋鋪頭whatsapp ，當然好野講比大家知啦 59349177，卜枱又好，訂私房菜也好...，whatsapp就掂，因為至怕打電話。最後點了支紅酒再慢慢嘆，一樂也。…Read More