9walker.foodie's Profile

最近做緊promo晚市套餐平左好多，獎勵自己黎食餐好嘅。薯仔波波中間嘅吞拿魚赤身同幼滑嘅牛油果蓉同香甜嘅蜜瓜好夾，內裡軟綿creamy，係好新鮮嘅配搭。蜜柑鯛三文魚籽茶碗蒸感受到三款食材分開處理嘅用心，各自都係佢哋嘅最佳狀態，茶碗蒸滑溜、三文魚籽脆卜卜、蜜柑鯛岩岩熟，好味。靜岡縣白鮭魚比起普通三文魚脂肪含量冇咁高，味道更清爽。大分縣池魚魚味濃，撈薑蔥嘅經典組合完全唔會腥，享受到濃郁甘香嘅魚味。赤貝好厚實彈牙，裙邊脆口，貝身嫩滑。燒北寄貝比起平時食到嘅更加柔軟，係好純粹嘅鮮甜。第一次食炸嘅黑陸魚，估唔到厚身得黎好滑，即使加左濃味嘅蛋黃醬同魚子醬都冇蓋過魚味。拖羅手卷有多重脆口，紫菜包住拖羅、天婦羅同醃蘿蔔碎，料多過飯，肥美嘅拖羅蓉冇得輸。燒銀鱈魚飯鱈魚燒到表面金黃微焦，內裡雪白細緻，撈飯一流。…Read More

對天丼一直有鋪癮，但遠赴京都唔係次次好食，金子半之助可以話係穩定嘅美味。天丼有小柱魷魚天婦羅餅、溫泉蛋、海苔、莢豌豆同埋菇菌，升級左虎蝦，大大隻肉質鮮甜。 天婦羅炸得金黃酥脆，一啲都唔油膩，我鍾意醬汁另上保持脆口，每款配料都真材實料。 重點係溫泉蛋嘅蛋汁好滑好香，同天丼甜甜地嘅秘製醬汁好夾，每一啖嘅口感同味道都有唔同層次。牛肉紫蘇天丼炸得外脆內嫩，牛肉的鮮味同紫蘇的香氣完美融合，食落好清新，牛肉幾靚，唔會蓋過牛味。 其他配料同天丼大致上一樣，有齊蝦、小柱魷魚天婦羅餅、溫泉蛋、海苔同莢豌豆，啱晒想試新嘢又鍾意原版嘅心。南瓜蕃薯天婦羅外脆內軟綿，天然嘅甜味好突出，味道簡單但有驚喜。日本產帆立貝天婦羅炸得岩岩好，保持到裡面鮮嫩，突顯出特製高胡麻油炸成嘅香氣。…Read More

呢度嘅signature係將即場捲嘅大棉花糖球燒到溶化，再加入和牛同壽喜燒汁，好特別。 鹿兒島黑毛和牛油花似大理石紋咁均勻，大大塊涮幾秒夾起，肉質嫩滑得黎帶點彈牙，入口即融。 棉花糖嘅甜味同蛋汁提升咗和牛嘅香氣，有日本食嘅感覺。豆腐同蔬菜其實都係重點，樣樣新鮮爽甜，尤其是油揚同烏冬吸哂精華湯汁，係壽喜燒嘅完美收尾。串燒都做得唔錯。 雞胸肉肉質juicy水潤，少少柚子胡椒食落清爽解膩。 牛舌芯燒得香口，爽彈有肉汁。…Read More

Omakase最緊要係新鮮，感覺到呢度食材真係好靚，唔需要太複雜已經好好味。蜜柑鯛肉質結實又嫩，入口有啲蜜柑果香。 墨魚軟糯彈牙，甜味突出。深海池魚、銀鱈魚同鰆魚油脂豐富，後兩者有火炙香，鐘意銀鱈魚配白京蔥碎，口感豐富有多重香氣。赤貝灑上帶煙燻香嘅竹炭鹽，配赤貝嘅甜味好正，簡單調味就將赤貝嘅鮮味完全帶出。象拔蚌爽彈，用咗最厚身幼嫩嘅位置，帶青檸清香。太刀魚嫩滑，銘茗荷同芽蔥加咗清新辣味，襯托太刀魚嘅鮮美。 油甘魚入口即化，柚子胡椒嘅組合有驚喜，濃味但完全唔會蓋過魚香，有加分。牡丹蝦鮮上加鮮，蝦膏濃到爆，入口彈牙又甜。金目鯛外皮微焦有炭香，嫩滑多汁，蔥花加咗清香同少少辣味，油脂同鮮甜好平衡。中拖羅油脂均勻，甜味爆棚。 秋刀魚而家食係最靚，超級肥同香，薑蓉壓一壓超濃魚味，新鮮。 鯖魚軟嫩肥美，醋昆布酸酸地開胃，中和油脂。單點左白海膽，質感似奶凍、鮮味爆棚，師傅仲好大方咁放滿咗兩層，純粹極致嘅鮮甜留喺口度好耐，係全晚最滿足嘅一刻。…Read More

西班牙this this rice聽落幾得意，黎試吓晚市真係有啲格調，食到港式fusion嘅元素。A5和牛鵝肝他他嫩滑得黎充滿油花香，搭上鵝肝嘅濃郁奶香同甘甜，入口即化，連埋酥脆嘅迷你油炸鬼一齊食，味道好豐富。藤椒嘅麻香同微辣都有加分，帶點清新感。A5和牛沙巴當表面煎到金黃，入口嫩滑又充滿肉香。 沙爹荷蘭醬花生嘅香氣同微辣同荷蘭醬嘅滑順好融合，帶點東南亞風味。西班牙煙燻醬就多咗份煙燻嘅獨特香氣，濃郁得黎唔會蓋過和牛嘅原味。黑毛豬叉燒西班牙燴飯米粒吸滿咗紅椒嘅精華，軟糯但唔過濕，帶點微酸好開胃。 黑毛豬叉燒烤到表面微焦，肉質軟腍多汁，有蜜汁甜香同燒烤香味。…Read More

好多時同朋友出去中菜都唔係首選，難得搵到底子深厚又有新意嘅中菜，好岩口味。西班牙黑豚肉叉燒皇肉質超級嫩，蜜汁嘅甜香同炭燒味並重。 江南熟醉蝦清爽彈牙，有淡淡酒香，兩款一齊食，濃淡相得益彰。花膠陳皮黃魚羹湯底濃而不重，黃魚嘅鮮甜同花膠嘅軟糯完美融合，飲落去順滑又回甘。廿二頭南非吉品鮑炆得軟硬適中，咬落去有彈性又有鮮味，花菇厚實多汁，吸滿醬汁嘅香氣。羊城辣醬湘椒炒日本和牛肉質軟滑，羊城辣醬同湘椒嘅麻辣味好過癮，辣得夠爽但唔會搶風頭，好味。鵝肝醬乳豬鍋巴名不虛傳，乳豬皮脆肉嫩，鵝肝醬甘香唔會膩，襯托酥脆嘅鍋巴，三種口感一齊爆發，好有層次。香菇肉醬炒飯炒得乾身香口，香菇嘅濃香同肉醬嘅鹹香好夾，食落好有家嘅味道。香芒草莓青蘋果凍清新開胃，懷舊芝麻卷軟糯，甜度岩岩好。…Read More

前菜係唔同嘅脆口，銀魚乾有海鮮嘅鹹香，琥珀核桃糖衣透薄唔會太甜，椒鹽溏心鮑魚角外脆內嫩，鮑魚爽彈。花膠海參魚茸羹湯底用魚茸煮到好滑，花膠同海參口感軟滑，有滋補嘅感覺。蟹黃銀針燴玉帶味道濃郁，帶子新鮮爽口，吸收咗蟹黃嘅香味，滑嘟嘟嘅銀針令口感更加豐富。20年古月龍山花雕蛋蒸虎蝦球酒香滲入左蛋同蝦肉，蛋夠滑，虎蝦鮮甜，做法傳統但味道有驚喜。拔絲咕嚕肉豬肉嫩滑唔會太肥，菠蘿同彩椒加咗清新感，食落好開胃。香煎一夜鮮馬友魚煎到外皮金黃，魚肉嫩，調味簡單，食得出魚嘅新鮮同甜味。蝦子花膠濃雞湯手工拉麵湯底濃郁，手工麵條有彈性，豌豆清新，簡簡單單。芋茸燉鮮奶芋茸香濃順滑，甜而不膩。…Read More

靜岡水果番茄真係水果級數，好甜，爽口開胃。 深海池魚肉質細嫩，入口即化，同山藥蓉嘅清爽好夾。象拔蚌爽脆鮮甜，北寄貝軟滑細嫩，赤貝厚實有彈性，各有特色。 鐘意貝類加左檸檬皮碎好清新。帶子天婦羅份量十足、新鮮大粒，肉質厚實而嫩滑。 帶子炸得岩岩好，外脆內嫩，酥脆同海膽滑順嘅對比令味道好豐富。黑陸魚魚肉軟滑帶甜。室津真蠔新鮮肥美，入口軟腍，完全唔會有海水咸味，係好純粹嘅甜。北海道毛蟹蟹肉結實鮮甜，蟹膏濃郁，同係日本食高級蟹專門店既水準差唔多，新鮮水潤。赤蝦配左濃味嘅蝦膏同蘭王蛋，但完全冇搶fo，赤蝦大隻爽甜好鮮味。南非鮑魚經過4小時慢煮，質地更柔軟，入味但調味岩岩好，感覺食左鮑魚最幼細嘅位置。魔鬼魚面肉滑中帶一絲絲肉嘅彈性，配清新嘅紫菜醬好舒服。腦天油脂豐富，滑順，魚香突出。 赤身魚味濃郁，醬油漬做法帶點鹹香。拖羅肥美到極點。A5和牛虎蝦海膽卷組合好奢華，和牛燒到油花香氣四溢，入口即化，虎蝦肉質彈牙，鮮甜味好出，加埋海膽完全係將人類鐘意嘅食材齊集，冇可能唔好食。…Read More

間中夜晚會想食有水準嘅中菜，力寶軒係方便穩定嘅選擇，一出站就到，坐得舒服。龍蝦伊麵非常有水準，龍蝦肉飽滿爽彈，童叟無欺。上湯清甜而濃郁，伊麵煮得啱啱好、好掛湯，完全有去食海鮮酒家嘅滿足感。碧綠川椒雞睇個樣都知惹味，雞肉煎得好香口又嫩滑，有少少令我諗起雞爽肉嘅幼嫩口感，連埋炸到好酥脆嘅珍珠葉一齊食，香上加香。滷水鵝片拼墨魚各有千秋，鵝片水潤嫩滑，少少鵝皮好甘香，墨魚厚肉得黎依然好滑，滷水夠香、入味但唔會鹹。…Read More

海膽龍珠卷喺日本Foodie page就見得多，好懷疑係咪得個樣，估唔到真係食到舔舔脷。 首先海膽新鮮清甜，但重點係醬油漬蛋黃非常香濃漿口，原個啪真係好香，值得一試。黑松露煙燻帆立貝好完美，帆立貝輕輕燒過，加埋黑松露嘅香氣、三文魚籽嘅咸香，味道好豐富，重點當然係帆立貝甜味冇被蓋過，各適其適。汁燒免治雞軟骨棒水準以上，雞肉棒腍滑，蛋汁有蛋香唔會太咸。鹽燒仙台熟成牛舌芯有驚喜，可以話係香港第一次食到內裡仲係嫩紅，唔係爽口而係爽中帶腍嘅牛舌，非常高質，感覺到熟成真係重左牛味同軟熟左。墨魚刺身卷得好靚，本來怕卷大量青瓜絲會搶味，但完全冇問題，墨魚新鮮爽彈，咬落清脆唔會粉。 三文魚腩刺身係典型厚切嘅腩位，新鮮緊致，大大件性價比好高。令和之怪物蠔真係怪物size，差唔多有手掌咁大，入口海水味濃，蠔肉飽滿爽滑。…Read More

實不相瞞燒海鮮好多時我都暗暗期待燒龍蝦嘅一刻，見到有推廣餐龍蝦饗宴即時book位。拖羅、深海池魚同赤蝦係升級item，赤蝦真心甜同彈牙，拖羅油花好靚，加得夠值。活龍蝦浜燒好大隻厚肉，其實用呢啲爐好難控制火候，但店員燒得好好，保持幼嫩，完全唔會過火。 龍蝦夠哂新鮮鮮甜，就咁食已經係一大享受，最後仲灑埋芝士更加香。活帆立貝浜燒揀左簡單用清酒煮，更加食到食材原味，好清甜。紐西蘭牛柳份量比想像中多，黑椒同蒜片一齊食好香口。龍蝦頭味噌湯烏冬落左原個活龍蝦浜燒嘅龍蝦頭，估唔到都好多肉仲有膏，尤其龍蝦螯啖啖肉，最後主食都仲有海鮮好開心。…Read More

正所謂不時不食，omakase好大嘅魅力就係不知不覺會試左好多自己平時唔會主動叫嘅野食，今晚又有好多驚喜。一般比較常食到濃味嘅黑梅貝煮，白梅貝簡單調味，食到佢獨有嘅清甜同香味，肝都好香回甘。海苔茶碗蒸嫩滑，海苔帶來一絲海味。伊佐木柔軟通透，新鮮甘甜，最驚豔嘅係酸汁入面嘅福岡蔥，第一次感受到日本細蔥嘅香氣，同伊佐木一齊食加左唔少分。北海道秋刀魚新鮮當造，口感幼嫩到好似bb秋刀魚咁，同時油分十足，魚香細緻柔和，好易入口。燒帆立貝清甜，醬汁令人眼前一亮，紫洋蔥同檸檬醬嘅組合好清新，突出左帆立貝嘅鮮味。炸春卷內有乾坤，近乎100%松葉蟹肉，加少少蟹味噌同洋蔥調味，可以話係我今晚最愛菜式。 春卷皮好薄，咬落去係滿到毫無空隙嘅蟹肉，食落一啲都唔油膩，感覺就好似另一個形式嘅高級蟹肉天婦羅咁，非常出色。愛媛縣蜜柑鯛用蜜柑果皮餵養，神奇地真係有淡淡蜜柑味，比一般鯛魚更清新。赤貝好厚身，食到檸檬皮嘅清香。鰤魚輕輕燒過，魚油豐盈，配柚子胡椒好解膩。蛇腹表面燒一燒，好似食緊肥豬肉咁柔軟，非常滿足，有衝動想加錢encore。真名鰹魚皮燒到好似薯片咁脆，師傅叫我哋將燒魚切碎撈飯，配合埋海苔、芝麻同調咗味粒粒分明嘅飯，味道好有層次。…Read More

帶長輩去食家鄉菜慶生係有啲壓力，味道要正宗又要坐得舒服，開心搵到呢度大家都好滿意，有高級飲宴嘅水平。富貴自選套餐有金牌紅燒翅同潮式炸雙棗，金牌紅燒翅非常濃稠鮮美，魚翅好足料，面頭仲灑左炸瑤柱，甜上加甜。 紅燒翅嘅調味好重要，食得出自家熬製上湯嘅鮮味，咸淡恰到好處，濃郁得黎唔會膩好清甜。潮式炸雙棗有蝦棗同蟹棗，各有特色，明確食到蝦肉粒或蟹肉絲，真材實料。 雙棗炸得外脆內軟唔會油膩，蜜糖汁有加分作用，好似燒雞翼搽蜜糖咁將件事昇華左。油泡南澳島鮮魷幼嫩同時好爽口，大塊厚肉，連埋炸珍珠葉一齊食好香口。 不得不提個蝦醬真係一流，點一點個提鮮作用好勁，唔會太咸，有衝動想問師傅點較出黎。…Read More

有時不禁驚歎香港omakase越做越出色，日本食材空運來港，個新鮮程度真係媲美日本當地一級鮨店。前菜太刀魚卷、栗子甘露煮同鯛魚明太子等砌到好似幅畫咁靚，當中最鐘意鯛魚明太子，魚肉新鮮又有咸香。碗物主角係木之子同燒秋刀魚，即係菇菌湯，將兩樣秋天產物夾埋一齊，清新又濃郁。真羽太魚味清新，配醋橘同紫蘇花岩岩好，鮮美彈牙。櫻島間八油潤透亮，有彈性、魚油甘香，連我唔太好白身魚都覺得好食。三重縣甘海老色澤鮮明，大隻厚實，一個字甜。北海道北寄貝係我見過最巨型，切成兩半依然好厚啖啖肉。炸白蝦酥脆好香蝦味，餸酒一流。水八爪魚一次過試哂兩個部位，觸鬚取中心最幼嫩位置，口感柔軟。 我鐘意吸盤配醬油漬wasabi夠爽脆，係高級版嘅芥末八爪魚。愛知縣白見貝口感好似象拔蚌，不過更加厚身同鮮甜，要點鹽黎平衡返個甜味。新鮮嘅筋子唔係成日都有，咬落去表面嘅膜好有回彈，用力「卜」一聲爆開，近乎係平時台飲爆珠嘅口感，一試難忘。炸目光魚好香口，魚肉幼嫩，聽講頭最好食所以好期待，真係好甘香，食落完全冇渣冇骨，超越左香魚係我心目嘅地位。海老真丈用左富山縣白蝦，水潤幼滑，比豆腐、魚腐更加軟滑，蝦味清甜。靜岡金目鯛輕輕燙過魚皮，完全冇火炙之類搶味嘅做法，簡簡單單食到魚油香。帆立貝用昆布醃製，有淡淡香氣，帆立貝好柔軟，唔算好厚但鮮味濃郁。九州大分關鯖魚油份高，緊緻厚實，回味無窮。福岡槍魷魚新鮮爽甜，有少少紫蘇葉提鮮。北海道秋刀魚令人忘記至今食過嘅秋刀魚，好似師傅咁講，呢個唔岩食嘅話即係秋刀魚唔岩你，因為佢已經係最新鮮嘅版本，我鐘意，好滑好油，魚味濃但唔腥。特上中拖羅油花十足，同日本食到嘅大拖羅冇分別，滑嘟嘟極香。蛇腹大拖羅賣相同肥豬肉冇分別，非常誘人，魚油爆棚完全冇筋，唔洗點咬就吞到，係今晚數一數二喜愛嘅壽司。醬油漬赤身用左矜貴嘅天身，夠新鮮完全冇血味，係好純粹嘅吞拿魚香，比起平時較常食到嘅拖羅留下更深刻印象。今晚有口福，一次過試左厚岸同根室海膽，前者較清甜，後者就似加拿大海膽濃味啲，各有千秋，重點係師傅毫不手軟俾左大量海膽，開心。…Read More

鮨逸永遠係我心中愛店，omakase好多時怕食唔中最鐘意嘅食材，但每次黎我嘅wishlist都會出現哂，物超所值。沖繩水雲好開胃，鮟鱇魚肝creamy香醇，汁煮黑梅貝彈牙入味。真鯛薄切裡面包左海膽豆腐，兩者都非常柔軟，唔洗點咀嚼就滑左入口。粒貝刺身非常爽甜，青檸碎餘味好香。 北寄貝刺身再軟滑啲，海苔醬令海味更突出。沖繩龍蝦刺身新鮮到全程龍蝦觸鬚都猛烈咁郁緊，龍蝦肉爽甜，真正夠鮮。平時燒鯖魚其實唔太岩我口味，估唔到鯖魚刺身比秋刀魚更容易接受，甘甜唔會太濃重，面頭嘅磯雪昆布令味道更加柔和。赤貝色澤誘人、水潤透亮，新鮮爽甜。秋刀魚開始肥，好濃魚味，最後有一絲紫蘇葉香味唔會膩。北海道牡丹蝦擺盤精緻，牡丹蝦厚實彈牙，蝦頭膏係神來之筆，甘香得黎唔會蓋過蝦嘅甜味，一啖食哂成隻蝦嘅精華。北海道仙鳳趾真蠔完全滿足到我最近想食靚蠔嘅慾望，蠔肉大隻飽滿，咬落去濃稠creamy，同一般清爽嘅日本蠔好唔同，真係岩時候先食到呢個質素，好滿足。鰤魚輕輕醃左，估唔到同柚子胡椒好夾，甘香之中帶點清新。白見貝清甜，少少竹炭鹽做到提鮮。筋子係秋天限定當造先食到，一大片筋子同一粒粒三文魚籽口感截然不同，味道更加濃郁。黑陸有香濃魚味，爽脆惹味嘅洋蔥漬令柔軟嘅魚肉口感更豐富。赤身醬酒漬海膽卷係好出色嘅組合，海膽填補左赤身唔夠油香嘅短處，入口滑溜，好似食左舊魚油豐盈嘅吞拿魚又唔會膩。紫海膽天婦羅整體上都幾濃味，wasabi同炸紫菜夾擊都搶唔到紫海膽嘅風采，多層濃厚嘅海膽好滿足。磯煮鮑魚慢煮4小時果然好幼滑，厚切都完全唔會韌，拌蟹膏醬恰到好處。 立鱗燒外脆內嫩，淡淡嘅紫菜汁中和左炸物嘅油膩感，調味好簡單，感受到食材原味同鮮。拖羅卷係不用多言嘅美味，魚油多到爆好香。 白海膽甜到要灑少少淡雪鹽中和返，軟滑嘅海膽同燒鱈魚片一齊食好夾，海膽係好純粹嘅甜。龍蝦頭煮成高湯，有日本鰻魚店飲到嘅高級味道。 最後益力多雪糕配蜜瓜，全25品身心滿足。…Read More