Savoury-Food's Profile

同事榮升老豆，一班同事約好入大埔探BB，探完BB後一齊喺大埔開餐，喺佢屋企附近見到一間有爐端燒嘅餐廳，就走入去試試。雖然餐廳喺內街，門口有啲細，入到去先知道唔止得地下嗰層，原來仲有閣樓㖭，因為我哋人數不少，老闆娘就招呼我哋上閣樓，餐廳內燈光柔和，裝修簡樸，牆上仲掛咗好多80年代嘅超正日本動畫海報。因為人多，我哋可以叫多幾款菜式試試，香蒜牛油炒野菜先上，蒜香十足，椰菜爽脆。跟住係火炙芝士餃子，香脆日式煎餃子再配上濃濃溶芝士，真係好好食。美食一浪接一浪，麻辣炒蜆， 麻同辣都恰到好處，可惜偶然有幾隻蜆有沙，可以算係美中不足。另外，吉列虎蝦配柚子沙律醬好好味，吉列外皮夠薄，虎蝦新鮮，配上柚子沙律醬更有淡淡柚子清香，兩者非常配合。在眾多小食中，我最愛嘅係皇室脆辣雞鎚，因為雞肉嫩滑多汁，真係做到外脆內軟，加上少少辣，十分惹味。食完小食，卡邦尼意大利麵配63度溫泉卵送上，估唔到將溫泉蛋撈入卡邦尼意大利麵中，會令到啲意大利麵味道提升， 而且麵質軟硬適中，食到停唔到口。主菜方面，我哋叫齊三個火山石燒牛定食，當中有美國頂級吉列牛小排、澳洲和牛肉眼上蓋肉同熊本霜降西冷扒，每款牛都各有特色，牛味十足，非常好食，老闆娘仲非常貼心，每人送我哋一個自家製嘅粟米蓉湯。我哋仲叫咗啲好特別嘅樽裝可樂，其中一款叫富士山頂可樂，而另一款則叫赤富士可樂，前者味道似波子汽水，後者就似返可樂，外型討好，味道都唔錯，不妨一試。…Read More

本來一心想去九龍灣德福School Food食韓國嘢，點知去到先知道已結業，可能係韓餐潮流漸淡關係啦，不過朋友同我都有啲失望，畢竟真係好耐冇去School Food開餐囉！但係原址開咗間叫港麵子嘅港式麵店，外面望入去發覺只有少許裝修有改動過，其餘大部分仍然係School Food舊貌，最後知道原來兩間餐廳嘅背後老板都係同一集團，我同朋友都話想試吓新嘢，於是就走入去一試啦，當時人唔多，所以我哋可以直接入場。睇完menu後，發覺食物種類雖然不算多，但麵底選擇就好多元化，真係諗得出都有，我朋友叫咗個椰香掛湯海鮮喇沙，我就要骨膠原牛尾番茄湯麵。椰香掛湯海鮮喇沙一送到，好濃嘅喇沙味已湧入個鼻度，麵質彈牙，啲豆卜又索晒喇沙湯底，完全入晒味，簡直就係精華所在，我朋友話超正，食唔停口。至於我嘅骨膠原牛尾番茄湯麵就更吸引，牛尾炆得好腍，相信係食材用料正，加上濃郁蕃茄湯底，就更特顯牛尾嘅牛香，筋肉都超腍，麵嘅軟硬程度適中，啱晒我口味，最後我食到連湯都飲晒！😅不過認真講，港麵子嘅價錢一啲都唔平，啲麵平均都要八十幾、九十蚊碗，呢間餐廳仲要冇開水供應，顧客如要飲水就要order枝樽裝水，或者叫飲品，真係夠晒講面子囉。😑整體嚟講，與School Food相比，新店有佢自己嘅風格，個人認為絕對唔係舊酒新瓶。…Read More

今日午飯後剛巧經過銅鑼灣，心血來潮想飲杯珍珠奶，於是走去渣甸街睇睇，平日大排長龍嘅老虎堂，可能因為已經兩點幾，個個都趕住返公司，見到唔算好多人，即刻走去龍尾排隊先，但係等等吓都排咗半個鐘。我叫咗杯黑糖波霸系列嘅波霸厚鮮奶(含奶霜)。嘩！果然係人氣店，出品果然有返咁上下，入口幼滑、奶味香濃、甜度適中，啲珍珠煙韌又彈牙，總之就係口感豐富、滑溜，在港飲過眾多珍珠奶，暫時都係覺得老虎堂最好飲，不枉我排咗咁耐隊先買得到，真係要慢慢好好品嚐先得！…Read More

一早起身，梳洗完畢就想落街食個早餐，一個人唔知食咩好，行行吓去到阿媽屋企附近，有間集團式粥店，真係從來未曾光顧過，見到店內寬敞，姑且走入去試試。見到嗰個蜜糖雞扒炒麵早餐嘅廣告牌張相好似唔錯，就排隊買票，之後再排另一條隊攞早餐，等咗幾分鐘就有。估唔到佢哋嘅烚蛋竟然用力康蛋，剛好我亦比較喜歡食白殼蛋多於啡殼蛋，而件雞扒都算嫩滑，但就比較咸，廚房落鹽都幾重手喎，至於炒麵真係少得可憐，大啖嘅話兩啖就食晒，味道就還可以。至於杯奶茶就真係唔錯，茶膽唔太濃，淡奶份量剛剛好，飲落口感順滑，！講真果句，廿幾蚊咁平嘅早餐，夫復何求！真係唔敢有太高要求囉！…Read More

尖沙咀午飯時間四處都十分擠迫，與同事走去諾士佛臺行一轉，睇睇食乜嘢好呢，結果我哋都係上去一遊食。搭lift上到四樓，燈光仍然係暗暗的，有啲恐怖，入到餐廳𥚃面就好啲，不過總覺得佢嘅環境都係偏暗。同事叫咗個紅酒煮牛舌定食，餐飲就叫凍檸茶，最好係呢間餐廳order餐茶凍飲係唔使加錢。定食嘅前菜好快就送上，起初我哋都唔知係乜嘢嚟，但一食就知道，原來係醃漬蓮藕，蓮藕片切得好薄，酸酸地，好爽好好味！好快就俾我哋兩個食晒。牛舌、味噌湯同飯跟住送上，同事話啲牛舌煮得好腍好入味，俾咗啲我試，嘩！真係冇呃我，真係好好味，牛舌啲質感非常好，紅酒汁同牛舌簡直係絕配。我就叫咗個生薑豚肉石頭飯，豚肉唔嚡，飯汁好味，唔係得個咸字嗰隻，加上石碢底嘅飯焦好脆好香，令到整碢飯都充滿焦香味，真係好呀！因為我個石頭飯唔係套餐，所以我就order杯蒸餾熱齋啡飲，雖然杯咖啡都算滑，但係實在太淡啦，我唔太喜歡，因為我平時都係只飲espresso。唔係第一次嚟一遊食啦，食過幾次都覺得佢哋可以保持住水準，暫且未有強差人意嘅感覺發生過。…Read More

我一向喜歡食叻沙，今晚就去好友介紹嘅星加坡餐廳食飯，餐廳位於黃大仙區豪宅嘅商場裡面，朋友話午飯時段經常要等位，相反晚飯就比較容易有位，可能因為地段關係，住豪宅嘅人通常晚餐都有人煮！餐廳內座位唔多，而且座位之間亦比較窄，但還可以接受，而內部裝修幾可愛，侍應服務亦有禮貌。睇完一輪menu後，發現原來選擇都幾多，最後我哋叫咗招牌厚切豬扒娘惹叻沙餐同肉骨茶餐各一。肉骨茶餐先上，除咗肉骨茶同白飯外，套餐亦有碟油菜同幾嚿油炸鬼俾我哋送肉骨茶，一見到肉骨茶我就即刻試啖湯先，但個人覺得藥材味唔夠濃，而且排骨啲肉有啲嚡㖭，原本對此餸有好大期望，現在反而變咗有啲失望。跟住叻沙接住上，侍應一放低已聞到叻沙香味，啲炸豬扒大大件，肉嫩又多汁，啲肉仲非常腍，加上叻沙湯味濃郁，真係食唔停口，一個字講晒 ！最後叫埋杯餐飲熱檸茶同熱齋啡作完結，杯齋啡就嘛嘛地，因為應該係即溶咖啡嚟㗎。聽閒海南雞都係佢哋嘅招牌菜，下次嚟一定會試埋佢！…Read More

應承要陪阿媽買餸做節，一早已到油塘，就叫阿媽陪我去食個早餐先，隨便去地鐵站附近一間cafe食，方便食完去附近街市買餸，呢間cafe外面係露天茶座模式，而且又可吸煙，所以通常坐喺出面嘅都係啲放狗人仕同煙民，入面就座位唔多，但景色就一流，對住個海，尤其係日落時分，超！不過今次係同阿媽一齊食早餐啫。阿媽叫咗個牛乳炒蛋早餐，炒蛋唔算滑，牛角包外皮唔酥脆，而且火腿通粉啲湯好咸，真係有啲強差人意，食到阿媽扁晒嘴，好在餐飲華田還可以。我就叫咗個雙併麵餐，揀咗煎蛋、炸菜雞絲米粉同熱齋啡，佢哋用嗰啲係炒嗰隻米粉，比較粗啲，口感嘛嘛，唔係咁喜歡，但味道就OK啦。而杯齋啡就值得一讚，真係好味、好濃，！講真嗰句，咁嘅價錢，咁嘅境觀，真係冇要求囉！…Read More

同朋友睇戲前食個快飯頂頂肚，就去咗附近間台式牛肉麵店食，因為時間尚早，店鋪𥚃面冇乜人。侍應攞咗兩張過咗膠嘅菜單俾我哋，原來又係用蠟筆tick選項落單，依家似乎越嚟越多餐廳用呢個方法俾客人選項落單，既環保又可慳返啲菜單印刷費。我哋點咗兩個麵加一杯凍飲。排骨湯麵先到，先試啖湯，感覺好腥，而且幼麵麵身好硬，湯同麵嘅味道都唔係咁易令人接受，至於排骨其實就係炸豬扒，不過啲豬扒就唔錯，炸完都肉嫩多汁。跟住半筋半肉麵就到，啲筋同肉都好腍，牛肉一啲都唔韌，酸菜亦好味！但湯底就幾味精湯感覺，啲麵就同幼麵一樣咁硬，相比起嚟，個人就認為粗麵比較好味啲。至於杯荔枝玉露就比較失敗，完全冇荔枝味，好似飲緊一杯凍嘅糖水一樣。整體嚟講，呢間小店嘅麵嘅質感唔係好啱我哋食，試過就算啦！…Read More

每星期日午餐都係同屋企人飲茶，今日換換口味去食日本嘢，就去咗家人屋企附近嗰間日本壽司餐廳食，未夠12點已到達，排頭位等入坐。餐廳開鋪後，侍應安排我哋一行6人入坐卡位，感覺座位有點狹窄，睇完menu後，立即落單order食物，食物亦好快送上。極上壽司定食嘅壽司款式不少，新鮮度還可以，但真係冇嗰隻剛從壽司冰櫃攞出嚟，嗰啲冰凍嘅新鮮感覺，實在有點可惜。什錦魚生飯跟之前啲壽司味道差不多，魚生亦係冇嗰啲冰凍新鮮感覺，而係暖暖的，感覺唔太好！鰻魚飯定食嘅鰻魚，肉質質感不錯，但鰻魚汁不夠，而且味道似豉油雞汁多過鰻魚汁。滑蛋豬扒飯表面睇外觀確實不錯，但原來洋蔥和蛋汁都只係上面一遍，食咗一半唔夠已經好似食白飯咁，真係有點強差人意。野菜牛肉鍋係今次呢餐飯最好食嘅，牛肉嫩滑，味道鹹甜剛好到位，不錯！沙律菜配上一片厚切帶子，新鮮可口，日式蒸蛋夠嫩滑，味噌湯味道也算不錯，呢啲全都係定食套餐附送嘅。最後送上定食甜品，原來係芒果奶凍，只可以講句味道還可以啦！不過整體嚟講，呢間餐廳出品真係好一般囉！…Read More

辛苦工作咗成個星期，幾個兄弟即興吹雞約食飯，一呼百應，其中有人提議食好啲，話要食和牛，就揀咗呢間日式燒肉店去試試，晚市放題時段分三段，我哋一班人揀咗食第一段，即5:30pm至8:00pm，一放工即到餐廳門口等，餐廳位於一樓，眾人懶得行樓梯，一齊搭lift上去，內𥚃座位不多，但感覺寬敞，環境舒適。我哋坐低後，侍應隨即送上一盤魚生刺身，當中有三文魚、油甘魚、吞拿魚、帶子、甜蝦同八爪魚，仲有成板海膽㖭，刺身新鮮，肉質爽口，真係好正！跟住海鮮拼盤送上，嘩！除咗有鮑魚、大蝦、生蠔、螺之外，竟然日本三大名魚喜知次都有，我都係第一次用喜知次嚟燒，以前通常都係食刺身多。嘩完我哋又再嘩！因為兩盤燒肉拼盤駕到，主菜盤當中有美國牛肋骨、澳洲牛西冷、牛胸腹、肉眼同米澤三元豚西冷，而另一盤則有雞翼、骨付雞肉腸同七味豚拖羅(豬頸肉)。我哋將貝殼類海鮮放喺爐邊燒，中間就燒肉類，咁樣就可以一邊燒肉一邊等海鮮熟，慳啲時間食多啲囉。而且啲和牛真係肉嫰多汁，再點啲喜馬拉雅山玫瑰鹽嚟食，更能帶出多幾分牛肉香味，當中最好味就係和牛西冷，我哋追加咗幾碟之餘，再叫多份厚切牛舌片，牛舌口感嫩滑，食前加幾滴青檸汁，一啲肥膩感都冇，食唔停口。另外，我哋加咗啲七味粉去燒雞翼同豬頸肉，真係超好味。而海鮮就落啲清酒一齊燒，既可提升海鮮鮮味外，啲肉都冇咁乾，好食好多哦！一班酒鬼，不停咁飲，嚐盡各式各樣酒類飲品，有sake、梅酒、柚子酒、紅白酒、麥啤同韓啤，如果唔飲酒亦有其他飲料，最特別係有蘋果味嘅玉泉+C，仲有一系列冇防腐劑嘅韓國果汁，啲果汁有幾多果肉粒㖭，又幾好味喎！除咗標準嘅蛋糕、撻甜品外，亦有Movenpick杯裝雪糕任食，不過榴槤雪糕一定要試，榴槤味非常濃，仲有兩隻好有趣嘅雪條：芒果益力多味同另一隻澳洲雪條，由果菜汁造成，味道清得嚟幾特別，總之就係好味啦！最後揀款喜愛茶包，泡杯熱茶解解膩。一班兄弟都覺得呢間餐廳服務好，食物質素高，大家決定約個時間再嚟飽餐一番！…Read More

百無聊賴之際，約個朋友去將軍澳食下午茶，途經一商場cafe不用等位，便與友人走進去一試，原來餐廳以韓式食物為主，但整體感覺和食品味道就是一間港式韓國餐廳。餐廳門口不算太開陽，比較隱蔽，但是原來內裡十分寬敞，雅座舒適。炸雞球(3 粒)配田園沙律+餐飲(熱柚子茶) $45雞球肉嫩，沙律菜新鮮、爽脆、清甜。韓式紫菜蛋卷+餐飲(熱檸檬茶) $46蛋卷十分幼滑，味道不錯，可惜紫菜味不夠，可能是個人口味，因我十分喜愛吃紫菜…… 😅…Read More

與阿囡行油塘大本營商場，見到一家打正「沖繩二段料理」旗號的餐廳，未試過，抱住一試心態入去試試，因為正值晚飯時段，要等半小時先有位入座，總括係食品味道不錯，價格合理，有驚喜。不過值得一提係：佢哋點菜係用marker寫落張過咗膠嘅食品選單上，用完擦咗去就得，真係夠晒環保，有諗頭，值得一讚！👍🏻餐廳裝修有啲特別，環境舒服。二段定食上蒸下煮，有主食+小食+餐飲，我點咗個甘甜黑咖哩湯麵配粟米雞定食 $68，雞肉好嫩滑，黑咖哩味道有啲似豉汁味，不過都幾好味，麵身有點林，我則比較喜歡爽口嗰隻！阿囡就點咗個豚肉壽喜燒配冲繩蒸餃子 $68，豚肉好林，餃子好夠味。小食就點咗：南瓜芝士脆皮餅，芝士味濃，配上南瓜蓉，外脆內軟，一口咬落去，芝士會流晒出嚟，味道不錯！不過都唔夠黑糖蜜蕃薯條好味，表面脆甜，蕃薯味超濃，簡直食唔停口，超正！😋😋餐飲就點咗凍檸水和凍檸茶，原來兩款凍飲配黑糖糖漿都好好味㗎！而且呢間餐廳只有黑糖糖粉，係冇白沙糖㗎！最後阿囡叫咗個海鹽焦糖雪糕冬甩 $32，雪糕凍、冬甩熱，真係有冰火嘅感覺，勁好味！…Read More

家人生日，一齊走去將軍澳食日式自助晚餐，雖然門面不大吸引，但食物選擇和質素卻令我哋有驚喜，原來價錢平都有好嘢，仲有六送一㖭，性價比甚高。魚生鮮甜，特別係虎蝦刺身好大隻又爽口，真係好好味！😋壽司有我至愛嘅海膽三文魚子軍艦壽司，一口氣食咗4件，新鮮好味，正！串燒一口牛、牛舌、日本小紫薯、鰻蒲燒和芝士焗蠔都好好味，可惜眼闊肚窄！仲有燒菠蘿和魚乾都非常正，魚乾、秋葵伴熱sake，正到停唔到口！😋邪惡嘅大大件鵝肝，掙扎要食幾多件呢？即時做會員，費用全免，仲有半打生蠔送㖭，不過對生蠔就唔好太大期望，畢竟係送嘅！Macaron真係好好味，唔太甜，叫完再叫，食到糖尿病。。。😅最後叫杯奶蓋紅茶，確有水準，不錯不錯，來個完美終結，超正！…Read More

有朋友話某某信用卡有優惠食尖沙咀五星級酒店午市自助餐，買一送一，即半價，預約左半個多月終於有得去食，環境舒適，雖然種類不算多，但食物質素高，值得再去。餐廳入口在酒店大堂右邊，旁邊仲有間叫COCO嘅酒店Cafe餅店。冷盤有龍蝦鉗、蝦、青口和蜆，美味可口！新鮮魚生有三文魚、吞拿魚、鯛魚和帶子，配鮮磨Wasabi，一流！沙律菜非常新鮮爽脆。手撕豬肉迷你漢堡好食到停唔到口😋仲有即做關西大阪燒 😋燒牛排十分美味。壽喜燒湯汁味濃可口。Movenpick 呍呢拿雪糕配斑蘭窩夫非常美味，見到都已經口水流！😋最後嘆杯Peppermint熱茶，飽腹、身心滿足極了。…Read More