菜瀾的個人專頁

朋友請我食好西，我就好似肥姐係富貴逼人入面中六合彩一樣咁開心。先寫最正嘅野─燒油甘魚鮫。個魚鮫燒得啱啱好，外皮燒得乾脆而不燶，就好似戲入面嘅李麗珍同陳奕詩一樣，卜卜脆同埋嬌嫩多汁，簡直引死人。鎖住嘅肉汁就好似甘露係我個口度流盪，呢D咪齒頰留香囉。枱上面放住一碟嫩菜，就好似戲入面個細女一樣咁嫩口，店員推薦把菜沾上廚師秘製的嘅麵豉醬黎食。碟醬就好似驃叔一樣咁有內涵同真材實料，用好味黎形容就係了。食住就好似聽到驃叔個句：我董驃講馬你就要聽，聽馬配啤酒是常識吧！把酒當歌，人生幾何？但係駕車不飲酒，飲酒不駕車。我地唔想做楊明，所以叫碟佐酒小食了下心事就算。之咪係烤雞泡魚乾，呢味野我唔好，唔係驚佢有毒，係驚佢仲乾過我。但係呢度嘅魚乾真係不得之了，就好似肥姐一樣咁有肉地，有咬口得黎唔乾韌。其他嘅天婦羅、串燒大蝦、牛肋骨、免治雞肉棒同豆腐，都非常美味可口。最後，我地叫左碗牛肉烏冬，呢碗烏冬咪好似毛毛盧冠廷一樣，實而不華咁令我地食飽飽完場。我朋友話呢間食店歷史悠久，唔知佢有無富貴逼人咁耐呢？不過，佢就可以好似套戲咁，再逼人同再三逼人。第一係雖然佢係樓上舖，但係都有好多熟客仔上去食，去逼爆個場。其次係，呢間舖絕對值得ENCORE，同官人我再要一樣。…查看更多

斜對面卡位對男女嘈交絕對遠比我面前呢碗酸辣粉黎得吸引。呢碗粉絕對顛覆左我對酸辣粉嘅理解，茶記嘅雪菜肉絲米線，肉絲換左肉粒，加幾條辣椒，加幾滴醋，加幾粒花生，就係一碗屯式酸辣粉。佢嘅創意仲勁過死屍四時四十四個何爵天，呢碗可以叫做肉絲食時四十四，仲可以加價到四十四蚊添。其實又唔話得佢嘅？論酸，佢有；論辣，佢都有。如果食物只係用黎填肚嘅話，咁呢間餐廳又做到呢個目的喎。如果食店唔論味道，服務員係幾好嫁，其他人個食相都無乜異樣，可能我只係係呢度揀左唔啱嘅食物姐。…查看更多

朋友相約到通菜街The Yell-Owl Cafe，估唔到又食得幾開心又美味，一齊享用美食，度過了又開心又歡愉的晚上😄😄意大利熱火腿大孔芝士沙律配酸種包熱火腿口感鮮美、咸香，與大孔芝士搭配在一起，可以帶來豐富的口感，酸種包的微酸味還能平衡其食材鹹味，是一道不容錯過的美食。周打蜆湯清甜美味，口感一流。安格斯牛板腱配薯條牛味濃郁，肉質鮮嫩😚😚阿根廷紅蝦藍青口意粉紅蝦和藍青口都是富含蛋白質和維生素的海鮮類食材，口感鮮美爽脆。意大利麵則口感彈牙爽滑，配以番茄醬，別具風味。忌廉曲奇芝士蛋糕外層是甜脆的忌廉曲奇餅乾，內層則是濃郁的芝士蛋糕，帶來了豐富的口感和深度的奶香味，又不會太過甜膩。朱古力心太軟朱古力心太軟的口感非常柔軟，朱古力的甜味和蛋糕的柔軟度完美融合，入口即化，讓人感到非常舒服和滿足。吉列阿根廷紅蝦阿根廷紅蝦是大型的蝦類，身體呈紅色，肉質鮮美、彈牙，口感鮮美，香氣撲鼻，很適合作開胃菜。芝士墨西哥粟米片加上酸忌廉及牛油果醬等調味料配吃的小食，外觀呈金黃色，口感酥脆，味道濃郁。脆炸洋蔥圈及魷魚圈洋蔥切成圓形薄片，浸泡在麵糊中，然後油炸至金黃色，所以外層酥脆，內部則是軟嫩的洋蔥，口感相當不錯。魷魚圈的外層也是酥脆的，內部則是嫩滑的魷魚肉，別具風味。…查看更多

紅燒腱心半筋半肉牛肉麵配上少冰少甜珍奶。那牛肉非常腍，一點也不黐牙，但我就略嫌牛味唔多夠。不過，佢肉同筋的份量都頗多的，絕對係食肉獸的福音（可惜我唔太係），但起碼無令我覺得佢孤寒先。手工麵肥過同厚過我嘅身體，但係我BUY，我鍾意呢個質地，但係食下食下，越發越鹹，仲鹹過電台個DＪ阮子健。終於明白點解佢有個加五蚊加大飲品的選項，我真係好後悔呀。講起飲品，那紙飲管的玩法，令我起初拮不穿那片膠，奶茶滲下滲下咁滲出封膠面，感覺有點噁心。呢間舖會播下台灣歌，我都忍唔住諗起一首《爆開》。舉手，張開口，將湯羮放入個口。別講笑，粒腎爆開了，讓我爆開了，血壓上雲霄。（我作個陣隻鴨都未爆）雖然，我連粒腎都唔見左，我仲諗緊會唔會回頭再試其他野。然後，空氣中流著巨肺GEM的《泡沫》，那絲遲疑即成泡影，忍得住佢嘅鹹，忘不了佢選歌的劣。純貞，我地無咩機會再見了。…查看更多

食完昨天的富記牛雜，呢舖真係肚痛到腸胃炎，在等睇醫生嘅時候，我去附近食左碗（嚴格黎講係一盆）放左鹽嘅白粥，外加一碟蝦米炸両。餐牌上沒有白粥可選，入內問問，19蚊，清清地清番腸胃。難以想像白粥可以煲到如此吸引，綿綿的，咸咸的，令我一口一口的食著，彷彿肚沒有疼一樣。蝦米炸両的味道還好，腸粉夠滑，但入面嘅油條就唔係好夠脆，影響左整體評分。不過，好似食親間間加蝦米都係油條唔夠脆咁，都係唔加正d又平d。不過，總結黎講，呢間野係好味嘅，仲滿載回憶添。…查看更多

星期日嘅下午，經過呢條街，好多間都只係做外賣，唯獨呢間有堂食同最光猛，雖然星期日無茶餐，但都俾佢吸左入去。（計過茶餐其實只係平三蚊）呷一口牛雜河的湯，有令我諗起細個食呢類粉嘅味道，加埋d菜甫，好食。辣椒油夠辣，我宜家肚痛到癲都有啲懷疑係敗佢所賜。檸茶就檸茶一杯，無特別出色，用黎解下辣咁。食到尾聲，有個似非常熟客嘅婆婆入黎，店員請佢飲杯水，睇黎係日日黎。呢度街坊食店，牛什味以外，更濃的可能係舊區先有嘅人情味。…查看更多

按著手機的外賣平台App，呢間有堂食七五折，之前其實幫襯過一次，本來已不欲回頭。但快到晚上十點的銅鑼灣，原來好多食店都已打烊，於是我同頭先散場嘅電影女主角一樣，俾多次機會佢。店員推介我食招牌花膠魚翅雞麵。九十二蚊，係平價餐廳食扮上菜嘅貴價野，咪俾次機會，試下佢虛實囉。那片厚而無味的花膠，就像剛散場啦電影般平淡。不難食，但非鮮甜驚豔。翅嘅質地同味道，又硬又腥，就好似《神探大戰》勇奪金像獎導演同編劇一樣令我一頭霧水。至於雞，咪雞囉。有啲肥，有啲油，有啲癡牙有啲韌。刀削麵係碗野入面最好味嘅。總結，難食又未至於，同套戲一樣令中容易遺忘。唯一令我記得係佢個價錢，打折後，七十八蚊連豆漿。夠我係譚仔食碗米線，再加碟皮蛋，但滿足感卻比呢度高幾倍囉。…查看更多

如果人生四大美事要添一項，「有得食燒肉」絕對係首選。點餐個陣，我望住個屏風，突然諗起東邪西毒，呢度無得點醉生夢死酒，但有得食燒肉就已經令我醉生夢死啦。我唔係慕容燕或者慕容嫣，呢度無湖面俾我練劍，但有個烤網俾我用鉗，佢個外號係東方不敗，我又何嘗唔係有個外號叫燒肉不敗呀。午飯定食可以選三味，我一於高中低價位各揀一碟。78蚊嘅肩脊肉，嫰下Tiger，好食到Error；52蚊四片牛舌，牛舌我期望厚過姜濤，點知呢舖做神徒，因為佢喺薄切嘅，但理得佢姜濤定Anson Lo，一於放入自己肚。姐姐腦中充滿鏡仔，食到以為自己回春，唔識死點左個雞肝，幾十歲人今舖真係食到膽固醇超標。我唔係叉燒炳，燒味店個d外脆內軟先係王道，所以下次都係唔好慳，點多幾件牛。呢度白飯可以無限encore，食到你變肥阿哥。肥婆就無添飯啦，但十二蚊雪糕點可以唔加，抹茶雪糕配上黑糖黃豆粉，為這餐盛宴畫上完美句號，簡直係一百分。…查看更多

黃金即炸脆魚皮跟入口的十二生肖足金擺設一樣精緻吸引，咸蛋王黏住魚皮，就像繪麗奈遇上清水健，欲罷不能。一片接一片，頂唔順啦，好正呀。呷上一口酸梅湯，去掉繪麗奈的油膩感，不死甜不酸死，味道剛好。準備來一場轟轟烈烈嘅火鍋大戰。店員送上冬瓜盅湯底，瑤柱甜，花菇鮮，蟹柳正。等個湯滾就一於思考人生。靚姐，請把瓜盅劈開，能讓你舒發心底愛，冬瓜鑽開，劈開，爆開。我個胃，勁期待。不過，瓜盅並唔係省油的瓜，硬過健哥，靚姐劈到香汗淋漓。我腦中閃起一句：如果有多一把菜刀，你今晚會唔會同我一齊斬呀？湯終於滾起了。鴨血、豆腐同牛栢葉就可惜地吸唔住瓜盅嘅甜，但拈著醬油，又成為美味可口嘅美食了。手打黑白松露鴛鴦滑就本身有味，滾左幾滾，滾左去我個肚度，好味。主角壓軸出場，那插著墓碑的本地靚牛上枱了。朋友同我無俾佢枉死，如果魚皮係繪麗奈，咁碟牛就係葉子媚。內歛不張狂，騷在骨子裏。焯兩焯含在嘴裏，肉嫰汁多牛味濃。呢道就真係「肉罷不能」，醉生夢死，一碟泯恩仇。盛宴完畢，店長送上兩粒雪米糍，為興烚烚嘅一餐收爐熄火。…查看更多

銅鑼灣食晚飯係唔平嘅，我按下某平台睇下有無堂食75折，俾我遇上南洋家。如果唔係屋企印尼姐姐太厲害，呢間算係性價比高嘅。58蚊一碗雞米線，似係我食開嘅梳多，好味嘅。不過，因為我肥同大食，米線好似唔夠飽。於是，我再只係用左50蚊，叫左四串串燒，沙爹汁好味，厚厚嘅牛舌單點都33蚊，我其實想叫4串牛舌，但覺得咁樣真係欺人太甚。於是點了豬潤，可惜賣曬而轉左雞腎。魚餅，粟米（來到係粟米心令我有點失望）。四串中，牛舌令我無失望，厚切的，好抵食。飲品選擇好多，但最後我只簡單選了個凍檸茶，正常味道。計埋個折，埋單92。抵到呢。最後，我仲買左兩盒班蘭糕。…查看更多

朋友首先點了一個小辣香鍋，選了鴨血，薯粉，花甲，酥肉，牛肚。其中鴨血非常好味，食到我心都跳曬。肥婆又點可以無粉麵落肚，那些游走在辣汁之中嘅薯粉，又香又正。牛肚亦見可口。只係略嫌花甲太細，寧願佢用大花甲但俾少d。紅糖糍粑係好食嘅，內軟外脆嘅糍粑粘上不太甜膩的黑糖，像極《飯戲攻心》嘅姣婆遇著脂粉客，食完一件又一件，應接不暇。店員態度親切，朋友早收工，我地食完先七點幾，餐廳都陸續有人入座，都座無虛席嘅。呢餐好味道，因為有人請，同埋陪我吹下電影水。…查看更多

今天午市經過，十分多人，但由於一個人，很快便入座了，位較擠迫，一般食店咁。點了椰子雞湯米線及凍奶茶，東西馬上就到，很有旺角效率。第一口品嚐的湯味很好，雞被很滑很啉，一夾，都好多粉，但啉左些少，越食越沒有驚艷。千萬不要點凍奶茶，十分難飲，叫左少甜都甜到死，完全無茶味，十分恐怖，在喝糖水，可能係佢令我覺得米線越食越一般。像某位食家的感受一樣，不難食但也沒有叫我回頭的吸引力。…查看更多

食評好高，路過試試，門口排了一條人龍，點了豬手粗麵及紅豆冰，豬手好林好入味，紅豆冰甜左些少，豆很林，不負所望，好吃。伙記好忙，但也不會面黑，今時今日，食一餐只係38元，算抵…查看更多

進了渝酸辣粉，才知道套餐只供應到五時，叫了一盤涼拌茄子及酸辣粉後，對面來了個陌生人，點了碟涼拌青瓜。其實真的很想跟這個過客提議一下，交換試對方的小食，但太唐突了，於是放棄了。這個都市讓你跟身邊的人這麽近，又那麼遠。說回食物，因怕辣，點了少少辣的粉，真的很少辣，完全食到。涼拌茄子則有點偏咸，但還是美味啦，這是可再訪的小店。…查看更多

看到雜誌介紹這間著名的拉麵店，本著一試的心態，平常是食開嘉路連那家的。點了富山BLACK半熟蛋那麵，湯很咸，份量較少，麵較硬，個人覺得價錢跟質素不成正比。這家店，我想我只會吃這一次吧，因為真的不太合我的口味。…查看更多