Gipson Wu's Profile

一直以嚟同老公成日食，那個亦都曾經係我top3喜愛嘅餐廳，自覺都算係常客，但真心感覺到質素一直下降。由以前跟嘢飲、食物高質、份量足料、員工親切，到宜家變咗飲品優惠減$10、品質退步、越嚟越細份、服務態度差。啲食物冇以前咁好食都算，杯飲品仲要減料，明明加咗$3要大杯，話咩常溫就係會少一截，不嬲都係咁？我幫襯咁多次，話你知從來都唔係咁，我仲搵得返以前嘅相為證；同時亦都代表你哋嘅出品係冇standard。另外失望位係，啲飯又硬、滷肉又嚡、杯奶茶嘅粉條仲要有陣怪味⋯⋯商家有冇用心經營，顧客係真係感受得到。唔知係咩原因，可能轉咗老闆/轉咗廚房/轉咗樓面/開多咗分店/加緊控制成本？見佢係黃店，又咁好食，曾經仲幫佢打過好評，又介紹朋友去食，但覺得可惜宜家係越做越差。下決心唔再幫襯。…Read More

同老公紀念日，唔想食貴價嘢，反而想食啲溫馨小店。千挑萬選揀咗呢間，覺得自己好好運揀咗佢！本身已經好鍾意有大玻璃望到街嘅餐廳，尤其係地舖，可以直接望到出面。而店內嘅裝修簡單而溫馨，位置唔多，不過略嫌每張枱之間嘅距離有啲近，格籬枱講嘅嘢都聽得一清二楚（可能因為當時格籬枱講嘢真係好大聲），有少少影響用餐體驗。嗌完嘢食之後都好快就上枱，我哋嗌咗兩款定食，都係比預期好食，讚👍🏻味噌燒豚肉定食：好出色，送飯簡直一流，最後連汁都撈埋🤣豚肉好新鮮，肥肉嘅比例啱啱好。日式他他醬配慢煮雞胸定食：唔鍾意食肉嘅我表示第一次食到咁好味嘅雞胸！呢個係有少少驚艷到我，好滑好滑嘅肉質，配上他他醬有少少新奇，但又出奇地夾😳日木和歌山梅子咖啡：對我嚟講有少少太酸，不過佢的確係梅子，真係應該係酸嘅。扣咗嗰一分只係關於個人口味。若竹抹茶奶凍卷蛋：超動L！卷蛋海綿部份都好濕潤，係我鍾意食嘅口感。不過個人覺得呢個卷蛋份量$52係有少少少少貴，還可接受。如果可以配埋定食有減價優惠就感覺划算好多。overall都好滿意，會想回訪的！❤️‍🔥…Read More

成日喺v walk行過見到粉紅色裝潢嘅都覺得幾特別，於是今次就嚟試試佢。一入去已經覺得個女店員啲態度差差哋，放低點菜QR code張單同啲碗碟嘅時候都係木無表情，一句嘢都唔講。而我哋用餐期間佢喺度執嘢都係冰拎嘭躝咁，感覺上有啲趕客。我哋叫咗一個天花頂酸菜魚同埋獨家秘製麻辣豬手，有前菜同白飯跟埋嘅。兩款餸嘅味道都過得去，但係最敗筆係酸菜魚竟然有骨😓 另外，兩個碟架嘅底都分別有一舊蠟燭，應該係作保溫嘅用途，不過都係冇點着嘅😂本身想飲紫米豆漿，但係見佢已經售罄，最後嗌咗個五穀豆漿，非常一般。而且隻杯本身已經細，仲要得七成滿，使唔使咁慳⋯⋯仲要，後來聽到個女店員問格離嗰張枱個小朋友飲唔飲紫米豆漿，憑對話聽得出佢哋係本身相識嘅。因為個女店員由頭到尾落枱落任何嘢都係咩都唔講，就咁掉落枱，對住格離枱就好多嘢講，識得笑。但係紫米豆漿喺網站上面明明顯示售罄⋯⋯用餐差唔多尾聲，枱面一張紙巾都冇提供，於是問佢攞紙巾。佢就黑晒面咁，手都唔抹一抹，攞咗兩張污糟紙巾俾我哋，見到紙巾上面嗰啲漬，真係無言⋯⋯整個用餐體驗都好差，無論係食物品質定係服務質素，所以更加諗唔明點解會零負評。…Read More

元朗出名多好嘢食，今次嚟到呢間外表似咖啡店，實際係西+泰菜！估佢唔到，又幾好食～首先登場嘅係奶蓋泰奶茶，厚厚嘅奶蓋已經令人垂涎欲滴🤤奶蓋好滑，個泰奶茶味道都剛剛好，有茶嘅香味，亦都唔會太甜。主食虎蝦意粉同鴨肉pizza都好好味，略嫌意粉有少少少少硬，不過軟硬度呢樣嘢唔會迎合到所有人，明白嘅，所以絕對收貨！特別想提嘅係個pizza厚度做得好好，因為我唔鍾意太薄，好似食緊餅乾咁冇晒個口感。但係佢呢個就啱啱好👍🏻本身見佢幾款甜品都好吸引，最後揀咗呢個出面未必會食到嘅泰茶tiramisu，感覺上比較特別。不過真係失望咗，食到係酸酸哋嘅，而且個手指餅嘅質感都唔太好……唔知係咁啱手勢唔好，定係本身呢款甜品唔啱我口味🥹但都好似唔應該係酸……(?)不過整體都覺得可以，值得再訪的。…Read More

門面低調到睇唔出佢係食肆，入到去忍唔住高呼咗一聲「好靚啊😍」成間舖嘅氛圍都好日系好舒服，榻榻米好吸引，不過唔想屈膝坐就揀咗坐檯。因為入座嘅時候已經係黃昏，所以係由天光坐到天黑，全餐飯都望住個窗，好治癒🪟因為我一直都好鍾意有窗嘅店，而且呢個窗好特別呢～就係有種好舒服嘅感覺☺️食物方面就還好，不過真係即叫即做，飯嘅質素偏向黏身，魷魚鬚最好食🦑賣相亦非常精美，呢個份量一人食應該都會幾滿足，不過我哋比較細食，所以只係嗌咗一個餐，加咗個甜品～甜品對我嚟講就真係差少少，雖然一向都偏好moist啲嘅蛋捲，但呢個過份moist，甚至係有啲黏，口感有少少奇怪🤔️ 不過可能佢係想做到咁嘅口感，純粹個人口味有差異～咖啡出乎意料有個咁靚嘅拉花🌿 一啖蛋糕一啖咖啡，瞬間為個甜品生色不少！整體用餐體驗唔錯，店員服務都好親切☺️會想二訪！💛…Read More

朋友話想食片皮鴨，喺OpenRice搵到呢間，一行五人就決定試吓。開頭有兩位朋友攞咗位先，店員講咗話90分鐘用餐時間，即係8:45要交枱。咁五個人食嘢就當然會傾偈㗎啦，有時出於禮讓，每一碟餸都剩返少少放咗喺度大家都未食，啲侍應就係咁過嚟想收我哋啲碟。講咗好多次唔使收，都係不停車輪轉咁樣過嚟想收。我知道我哋咩時問要交枱，明明仲有大半個鐘，我8:45一定會交枱俾你哋，但係可唔可以唔好不斷收我哋啲嘢食？最後真係惱羞成怒，同佢哋講其實我哋未食完，可唔可以唔好不斷過嚟收？本身仲有個蛋糕想喺嗰度食埋，最後都係嗱嗱臨埋單走。其中有一個特別好態度嘅女侍應都有過嚟問我哋點解唔喺度食埋，我哋都話見你哋咁想我哋走，我哋就唯有去第二度食啦。我自己都係做飲食業，但係我冇辦法理解，就算想翻枱翻場做多轉都好，都唔係咁樣收人哋啲嘢食。更何況仲有大把吉枱，更何況我哋唔係過咗鐘，而係仲有好多時間先至要交枱。食物質素一般，又冇話難食，亦都唔係特別好食。食物味道偏淡，尤其係雪菜肉絲年糕，都唔係好食到有咩味...唯一可取係年糕嘅質地適中，唔會話咬好耐都咬唔開。片皮鴨肉質唔夠肥，不過呢個係個人口味，我自己就鍾意食肥少少嘅。小籠包外皮比較厚身，肉汁偏少。最好食係雞絲粉皮同個酸辣湯，味道還好。茶芥同餐前小碟偏貴。整體無論係食物質素定係服務，都唔值呢個價錢。…Read More

試吓呢間主打有得唱k嘅cafe，上網睇好似好靚好吸引咁。我哋walk-in去嘅，所以冇晒粉紅色嘅房，唔緊要啦，照試吓佢。職員俾咗幾個其他顏色嘅房我哋揀，我哋揀咗藍色。入到去間房，間房細到不得了，同普通Red Mr二人房冇咩分別，就純粹係牆身嘅顏色唔同咗，同埋有得較房嘅光度。諗住嗌咗嘢食先，係用QR code自助落單嘅，揀好晒但落唔到單，問職員佢先至話櫻花拿鐵冇晒。好啦，咁我揀咗另一杯抹茶沙冰，見網站上面係冇得揀嘅，就再去問職員呢個特飲係咪要向佢哋落單先至得，佢話呢個都冇貨，網站上面冇得揀嘅都係冇。然後再揀其他櫻花嘅飲品，都係揀唔到。咁即係網站上面有得揀嘅係冇，網站上面冇得揀嘅都係冇🤷🏿咁點解一開始唔同我講有啲咩係冇嘅呢？？？搞到我揀咗幾次，全部都係都冇嘅😑最後求其揀杯雪梨菊花茶。嗌完嘢食就開始點歌，我就一直都有Red Mr會員同app，但係連極都連唔到，房內又冇remote，即係話下下都要行過去部機度揀歌🤔所以就叫咗職員過嚟，搞咗一輪之後都係處理唔到，佢哋叫我用朋友部電話試吓，我個朋友又要即刻download個app，搞一大輪終於得咗，結論係：有啲電話係唔知點解唔得🤷🏿明明都係iPhone咋喎…佢哋話其他客都試過呢個情況，即係一早已經知有呢個問題，咁點解唔準備多個remote呢？原來我入嚟就係研究佢哋有啲咩飲品係有得叫，同埋研究點樣用電話個app...搞咗咁大輪嘢啲嘢食都嚟到，未開始唱過歌已經用咗咁多時間研究點樣玩，好彩佢都話會補返啲時間俾我哋🫠仲有，唱第一首歌，支咪已經冇電係咩玩法……啲嘢食都正常嘅，但係呢個價錢我會expect好少少嘅質素…可能有得唱k拉返勻啦，唯有當係普通Red Mr咁。最後佢補咗半個鐘有多俾我哋，覺得都fair嘅，不過就個體驗唔係咁好。…Read More

今次帶埋男朋友過嚟試，依舊冇令人失望！雖然我哋已經兩點幾先去，但都勁好生意，全場爆滿咁滯，當時得一個員工打全場，所以都等咗好耐先得閒過嚟幫我哋落單🥹不過好生意係好事嚟嘅！首先試咗個小食，醬油烤年糕串，好煙韌好好食～另外個家庭料理真係好精緻，味道恰到好處，芥末牛柳粒好惹味！仲有富士山御結，之前上網睇到藍色同粉紅色就已經即刻bookmark咗，終於食到！好味仲非常打卡able𠻹😋最後係個開心果千層蛋糕，開心果味好濃，為今次用餐畫上完美句號💛ps. 食食吓中途老闆同老闆娘帶埋woahwoah返咗嚟，即刻變成全場焦點🤣…Read More

同男朋友揸26嚟到呢度，出面咁啱有幾個骨位，唔使擔心泊車問題，實在太好喇！超鍾意藍色嘅我，一入到去就俾嗰幅牆震懾到😳好靚呀！！！我哋冇book位，但係都有得坐戶外，實在太好了～因為專登揸咗兩架26過嚟想影相，問咗員工，佢話可以等晏少少清咗場，推架車入嚟影😛我哋太遲先嚟到，得返light meal，不過都吸引嘅，所以就揀咗三樣，諗住一場嚟到，食咩都好啦～啲嘢食係有熱碟，好專業！味道亦比預期中好，特別係個潛艇，幾足料，個法包好脆，讚👍🏻另外嗌咗杯愛琴海，睇中佢都係藍色🤭超好飲！跟住就係瘋狂影相環節，相信啲員工都睇慣㗎喇🙈啲嘢好食，又有得打卡，員工嘅服務態度都好親切，加上食埋個咁靚嘅環境，呢個價錢平就唔係平㗎喇，不過就係一種絕佳嘅享受😎已經同男朋友講好一定要encore！食完飯仲可以去附近下白泥睇日落😁…Read More

有朋友自遠方歸來，指明想吃上海菜。朋友介紹這間夜上海，本來在OpenRice搜尋過看到其他人的評論不太好，不過看它是米之蓮一星，環境也好像不錯，就即管來試試這間。店內裝潢冠冕堂皇，下樓梯後店員指示我們坐第一張檯，並說明沒有其他檯可以選擇。檯上早已經放了一碗榨菜，以為這是送的頭盤，吃了一兩條，但上菜期間就被悄悄地收走了。結帳的時候才知道是要收費的，榨菜$50，茶水$40⋯⋯可能這是約定俗成的規矩？但我個人認為不太要得，餐廳沒有明碼實價告訴我們榨菜要收取費用，而且早就放在檯上，營造不是收費食物的假象。不然我們早就讓他們直接拿回去，更不會只吃了一兩條就讓他們在沒有詢問過的情況下收走。食物質素正常，不是特別好吃，也不難吃，就一般般。但平心而論，不值米之蓮一星質素。食物吃不完就讓他們幫我們打包，食物盒和袋子都要價$2，兩個盒子一個袋子承惠$6。這個價錢，這個質素，還不斷以其他雜項加收費用⋯⋯不建議光顧。…Read More

每個人心中都有一個烏托邦應有嘅模樣。你未必知道具體係點嘅樣，但當佢真正出現嘅時候，你就會知道☺️想去呢間咖啡館好耐，但少去上環，難得經開附近就終於可以去試！出咗上環站要行一段路程，好彩係秋天，我呢啲大汗嘅人都還頂得住🙈 直至去到目的地，就覺得行上嚟完全係值得！雖然有少少隱蔽，不過剛好就營造咗一種世外桃源嘅感覺🌸店內外嘅裝潢都好靚，感覺耳目一新。其實一直想試富士山御結，但一個人怕太飽，今次就先試咗一件柚子芝士蛋糕，另外叫咗杯蜜瓜特飲。蛋糕好食，蜜瓜特飲就爭啲，希望下次有機會試返咖啡☕️ 雖然會等耐少少少少，都只係10分鐘左右，但感覺到佢好用心去裝飾，將最好嘅presentation送到客人枱上。號外：坐坐吓忽然跑咗兩隻兔仔出嚟，我開心到差啲尖叫了！兩隻全程周場跑，得閒望吓佢哋，心情好愉快🥰另外佢仲有好多好有價值嘅書俾人攞嚟睇，真係好有心💛 平時去coffee shop都好少會有咁強烈嘅感覺係想再嚟，真係覺得可以淨化心靈嘅一個地方！必須必須再來的😎…Read More

好耐以前見朋友大推呢間，bookmark咗兩年喇，但係元朗對我嚟講太遠，今次終於有機會試到！佢鋪面好細，只有兩張檯，名副其實嘅溫馨小店。一行到過去第一樣吸引到我嘅就係兩個放晒奶茶嘅雪櫃！奶茶控表示心心眼，好彩今日未買手搖，有quota可以試佢嘅奶茶😛企咗喺店外睇餐牌嘅時候女店員已經好熱情招呼我哋入去坐低慢慢睇，撲鼻而來嘅香味原來係老闆準備緊馬騮搣嘅茶底，我哋就被吸引咗去睇奶茶menu...不過女店員好有組織咁樣叫我哋揀咗嘢食先，奶茶可以容後等佢慢慢介紹。我哋揀咗蟹膏蛋治(+煙燻芝士)同埋鰻魚蛋燒豆腐，製作速度都幾快，佢一落枱嗰一下忍唔住「嘩」咗一聲😆 個presentation好吸引，本身唔係好肚餓都狼吞虎嚥🤣 我個人本身唔係太鍾意食蛋，但係佢個炒蛋勁出色，連我咁揀飲擇食都覺得好好食！經過女店員嘅介紹同游說，我哋都想試真啲奶茶嘅味道，所以就分別嗌咗少甜馬騮搣奶茶 同走甜世一奶茶。本身好擔心走甜會有澀味，但一啲都唔澀，完全喜出望外！（利申我平時喺出面飲手搖通常都係飲全糖🙈）女店員話如果走甜會有澀味嗰啲係唔靚嘅奶茶，呢個我哋認同。雖然啲奶茶相對上係少少貴，不過佢嘅質素絕對對得住個價錢。臨走仲買咗支金銀菊花茶帶走，之後飲咗都係覺得好高質！真係好想試晒佢咁多款奶茶同埋另外嗰個羅漢果桂花茶，必須encore！😋…Read More

本身諗住幫個朋友買一杯嘢飲，所以大熱天時都專程行過嚟買。一行埋去個女店員已經勁唔耐煩咁樣講「冇喎，嗰個係舊menu嚟」。然後揀咗另外一杯，佢全程都勁黑面，好似我一行埋去嗰下已經得罪咗佢咁⋯⋯俾錢嗰陣時用八達通，我發現收多咗錢，佢先望一望自己個mon，原來真係佢撳錯咗，先勁唔耐煩咁樣拎返$6現金出嚟俾我。利申我自問真係由頭到尾都好好態度，反而係我唔該前唔該後。而杯嘢飲無論係賣相定係味道都一般，如果唔係朋友話想飲，我真係唔會幫襯，好似欠咗佢咁🤷🏻‍♂️ 老實講附近大把手搖飲品可以選擇，連最簡單嘅服務質素都冇辦法取勝，真係自求多福喇👋🏻…Read More

一向都好鍾意食薯仔產品，第一次有人買呢個薯蓉俾我食嘅時候，真係一試難忘😇鍾意食肥煙肉嘅一定要試呢個！煙肉同薯蓉真係好夾好夾😋千島醬蟹柳都好好味，不過如果要連埋個薯蓉一齊食嘅話，相對上味道就唔夠重，我自己就係食晒上面啲千島醬蟹柳，另外先至食啲薯蓉🫣粟米火腿都好正，不過俾我揀嘅話始終都係煙肉第一名🥰另外仲有試咗佢個伯爵曲奇，好濃好香嘅伯爵味！不過真係有啲貴，半磅$58，一磅$102😬仲有酥皮蛋撻，正😋…Read More

五個女仔想搵個地方傾偈坐耐啲，揀中咗呢間樓上cafe，有得book枱，有室內同埋室外座位，店內裝修都幾靚，感覺上坐得幾舒服😌因為係幫其中一個朋友慶祝生日嘅，店員都好配合，幫我哋偷偷哋運個蛋糕放入佢哋雪櫃先～首先嗌咗三杯嘢飲，份量都幾足同埋幾濃。其實之前都係睇中咗佢啲豆腐系列嘅飲品，果然不負所望～首先嗌咗個小食拼盤，啲薯條真係好！好！食！作為薯仔狂熱分子，真係食到停唔到口😣所以即刻又嗌多咗個小食拼盤😂個pizza係好脆嘅薄批，味道唔錯～意粉都幾好，不過不失吧～墨魚意大利飯偏硬，雖然本身意大利飯都係硬啲嘅，不過佢呢個真係唔係好咬到🫢食完晒正餐之後我哋就切埋蛋糕，切餅費要加$50。其實有用餐限時一個半鐘，我哋應該都超晒時，不過店員冇特別趕我哋走🫣雖然都有少少貴，不過可以坐咁耐都抵返嘅。總括用餐體驗良好☺️…Read More