ianfromgoldengate的个人专页

～上星期輪到太座約班舊同學飯聚；有得食，我梗做「菠蘿雞」喇。唔止咁，我仲口多多話幫班女人揀間餐廳，訂埋位。班阿太求之不得，於是，我就自把自為，訂咗灣仔『老上海』嘞。而家先至講真話，我其實揀『老上海』係另有目的嘅，並非為咗想食佢哋嘅嘢。因為間飯店幾乎就喺正『通利琴行』對面，而晚飯前有兩個鐘自由時間，我一嘢就走上去試勻哂佢哋啲靚電結他同 amps (我要多謝琴行班哥哥，俾我盡情搞搞震冇幫嚫！)。好嘞，講翻食喇！班女仕之前去咗 Pacific Place 嘆 high tea，所以就由我負責點菜。「醉豬手」，「燻魚」，「燻蛋」，「涼拌西芹豆乾絲」，「蒸素餃」，「椒鹽黃魚」，「紅燒元蹄」，「薺菜炒年糕」。究竟『老上海』掂唔掂呢？絕對唔可以話“唔掂喎”⋯⋯水準呢幾年都係咁保持翻上下。況且，我哋絕對唔係食家，唔識去分析餸菜，我哋只係「為食友」，淨係講得出我哋鍾意啲乜唔鍾意啲乜。咁，呢餐我最鍾意嘅就係碟「燻魚」。其實對我嚟講，『老上海』，『鹿鳴春』，『香港老飯店』，『上海綠楊邨』，『滬江』，『雪園』呢幾間都係差唔多，大家都有自己一兩款 killer dishes ，其他分別唔大。而dining experiences 都冇乜大分別，個中有比較差嘅有，但係比較好就唔多覺。2016/2017年我哋返嚟嘅時候，就試過兩次『蘇浙匯』，印象唔錯，幾開心，希望今年有緣再去試吓啦。…查看更多

～～我哋兩老好鍾意食大大隻涷花蟹，兩斤至少就最好，想翻起都會即刻流口水！但係要揾到閒時都有幾隻巨型花蟹、掛喺度等人叫嘅潮州酒家，我諗都唔會有好多間。不過，咁大隻嘅蟹，始終都係一個 pricey dish，酒家都唔會大量入貨，有機會食倒都係緣份嚟㗎。最近喺『品潮軒』就好好彩可以嘆到一隻近乎完美嘅涷花蟹，二斤多，興奮兼滿足！太座仲得米，𡁻哂兩隻大蟹拑！佢開心，我開心啦！跟住老闆「Dee 哥」仲介紹咗我哋試咗佢哋嘅「酥炸荔芋帶子盒」，我哋食蟹食到咁上下，厨房先開始炸，出到嚟熱辣鬆脆，帶子又鮮嫩多汁，滿分！當晚『品潮軒』雖然滿座，但係招乎一啲都唔馬虎，非常體貼。真係不枉我哋長途跋涉走過嚟九龍城！如果大家都喜歡食大涷蟹，仲可以去『尚興』同『新光』，但係價錢都會比『品潮軒』價啲。至於同區嘅『創發』就⋯⋯個 dining experience 完全唔得，學我個死黨話齋：「洗多多錢，都唔開心！」…查看更多

我哋習慣每日朝早都會行落馬場散吓步。如果嗰日冇約人食晏，又唔想自己煮嘅話，散完步之後、我哋就會唔返上屋企住，而喺附近揾食。幸好，呢區都有好多唔錯嘅食肆，有中有西有日有亞，有排都試唔哂！今次就講吓呢間「跑馬地」嘅『正斗』。對我哋嚟講，方便衛生企理，價錢食物Okay。不過，我哋去嚫大多數都係叫點心，至於佢哋嘅雲呑水餃、粗麵幼麵都未試過。其實唔係佢哋嘅問題，係我哋嘅問題，因為我哋已經將個 quota 留咗俾隔離街嘅『麥兆記』喇！『正斗』究竟正唔正呢？即係咁，飲茶點心嚟講，價錢可以，食物唔差，但唔出色。即係咁，如果『正斗』唔喺「跑馬地」，我哋就唔會特登去食囉。就同佢哋老闆開喺 Hysan Place 嗰間『何洪記』一樣，comme ci comme ça。不過咁，我先前食過佢哋炒牛河一次，都算係上佳之作：食完碟底冇乜油，可以俾高分。至於跨區過嚟「跑馬地」想揾好嘢食嘅朋友，『正斗』未必令你覺得不枉此行。…查看更多

我哋兩個每年都好期待返「香港」：見見老朋友，探探舊同學；當然，仲有就係食嘢啦！尤其是係潮州菜喇！原因有二：一來 San Francisco 灣區唔係有太多潮州餐廳（就算 SoMa 嘅 Teo’s 都止唔倒咳 ）。二來我哋係【架忌冷】，冇潮州菜食真係唔掂㗎。今次我哋返到嚟第一餐潮州菜就選擇咗中環嘅『潮廳』，係老同學極力推薦。餐廳地址係上手嘅 Island Tang，環境裝修唔錯，喺門口已經聞到陣幾香嘅鹵水味。我哋坐埋牆邊半「卡位」，幾舒服；前菜「鹹酸菜」夠 authentic ，杯茶就更加係靚嘢，未點菜已經有個好開始！叫咗乜菜？下面有圖。太座特別鍾意個豬肚湯，佢話個湯「正」在胡椒嘅辣唔太搶，鹹酸菜嘅味就啱啱好，上菜嘅時候又夠熱，打冷嘅地方未必做得咁細緻，滿分！我就樣樣都覺得唔錯。特別一提就係個芥菜，成個芯上，外圍嘅葉就冇要，真係啖啖芥菜都覺得好 refine。總括嚟講，成個 dining experience 唔錯，招呼就更加無得彈，尤其上菜次序同安排，非常細心。另外，呢度有樣嘢係免費嘅：明星、富豪任睇；嗰餐之後，我哋都再幫嚫咗幾次，每次都有名人在座。如果大家唔介意同佢哋一齊食潮州菜，『潮廳』係一個令人食得開心嘅地方！…查看更多

每年我哋都喜歡返嚟過中國新年，約吓親友打邊爐，好開心！而每次打嚫邊爐，就最緊要買『李輝記』嘅牛頸脊肉同埋雪花部位兩款。今年我哋六人初三開爐，因為需要三斤半肉，揾心一開門就賣哂，所以之前已經同佢哋落訂；點知當日下午去到老闆話都要排隊，最後足足等咗 74分鐘先輪到我哋俾錢攞肉。太子爺負責切，大老闆負責入盒兼收錢，兼有禮貌，簡直係 one fine n’ smooth operation！當晚成個邊爐聚會，大家好開心，尤其是當我將第一啖牛肉放入口，就已經開心到唔記得排隊嘅苦悶啦。…查看更多