hippoma's Profile

最近同朋友去沙田新城市廣場嘅天天海南雞，點咗「星洲甄選二人餐」，真心超值！價錢合理，份量十足，兩人食到好滿足。黃金雞脆骨炸得金黃香脆，咸蛋黃調味惹味，超開胃。新加坡檸檬鳳爪酸甜微辣，軟腍入味，令人一試難忘。火焰石燒豬頸肉外脆內嫩，炭燒香濃，配特製醬汁，層次豐富。主菜天天海南雞拼燒雞，海南雞皮滑肉嫩，燒雞皮脆肉香，配三款特色醬汁，味道多變。參巴辣椒炒通菜爽脆，辣度適中，連怕辣嘅朋友都讚好。雞油飯粒粒分明，香氣濃郁，配雞肉絕配。飲品50年代豆花美祿，朱古力味濃，豆花滑嫩，冰涼解渴，完美收尾。整體而言，食物用心，味道正宗又創新，環境舒適，服務親切，絕對值得再訪，強烈推薦俾愛星馬菜嘅朋友！！！！！！！…Read More

今日喺將軍澳Popcorn Espresso Alchemy呢餐真係食到心花怒放！首先要提到嘅係特濃巧克力，真係濃到不得了，濃到可以掛喺隻匙羹度！入口即刻感受到濃郁嘅朱古力香，滑滑嘅質感同埋一啖接一啖嘅濃厚口感，絕對係巧克力控嘅夢幻飲品！配上一啖青醬雞胸沙律配檸檬醋醬，慢煮雞胸肉好嫩滑，青醬同檸檬醋醬嘅清新味道一齊發揮，平衡咗油膩感，食落健康又開胃。
再嚟係法式西多士配自家製雜莓醬，西多士煎到金黃酥脆，外面鬆軟內裡濕潤，配上自家製雜莓醬嘅酸甜滋味，甜度正正好好，粉粉嘅糖霜仲加咗一份高級感！
自家製藍莓核桃蛋糕同自家製檸檬蛋糕亦都唔遑多讓，藍莓蛋糕帶出果粒嘅清新同核桃嘅香脆，檸檬蛋糕則酸酸甜甜，質地鬆軟，兩款蛋糕都充滿自家製嘅用心，食落好滿足！整體嚟講，呢餐既美味又精緻，值得一試！…Read More

今日試咗四款超正菜式，款款都有驚喜！ 首先係香煎白酒忌廉汁挪威三文魚配煙燻薯蓉，三文魚煎到外皮脆脆哋，入面仲係嫩滑多汁，白酒忌廉汁香濃得嚟唔會膩，煙燻薯蓉仲有陣陣炭香，正到爆！ 馬蘇里拉芝士焗薯蓉帶子都係必點，帶子大大粒，煎得香口，下面嘅薯蓉混咗拉絲馬蘇里拉芝士，焗到金黃色，一舀起就見到芝士拉絲，邪惡但抵食！ 跟住係香脆雞扒撈通粉，雞扒炸到超脆，肉質juicy，通粉撈咗秘製醬汁，酸酸甜甜好開胃，分量十足，飽到上心口！ 最後係抹茶雪糕麻糬拿破崙，呢個甜品真係無得輸！拿破崙酥皮脆到「索索聲」，中間夾住煙韌麻糬同冰凍抹茶雪糕，一啖咬落去，冷熱交融，抹茶味仲好濃郁，甜度剛剛好，食完想encore！ 仲有自由斟無限暢飲，茶飲梳打水任飲，啱晒同朋友吹水聚餐。呢餐真係大滿足，下次一定會再嚟！…Read More

今日去咗間日式餐廳，一鳴拉麵，食咗幾款菜式，真係有驚喜！ 首先係香菜拉麵，加咗慢煮肩肉、紫菜同蛋。個湯底好濃郁，香菜嘅香味好突出，但唔會搶咗湯嘅風頭。慢煮肩肉超嫩滑，一啲都唔柴，紫菜同蛋就係完美配搭，溏心蛋流心嘅效果正到爆！成碗麵嘅口感同味道都好豐富，香菜控必試！ 跟住試咗叉燒丼定食，叉燒肥瘦適中，燒得啱啱好，甜甜哋嘅醬汁撈飯真係無得彈！定食跟嘅味噌湯同沙律都幾好，整體好滿足，係穩陣之選。 山葵八爪魚就係驚喜之作！八爪魚爽口彈牙，山葵嘅辣度唔會太攻鼻，反而帶出鮮味，食落好開胃，送酒一流！ 最後係芥末醬飛魚籽秋葵，秋葵黏滑嘅口感同飛魚籽嘅爆脆形成對比，芥末醬微微哋辣，好過癮！呢道小食好有層次，值得一試。 總括來講，今餐食得好開心，每樣嘢都有特色，尤其係香菜拉麵同山葵八爪魚，一定會再encore！…Read More

今日嚟咗觀塘突然間好想食壽司，即刻上OpenRice搵吓有冇特別推介，點知俾我搵到呢間評分都幾好嘅壽司舖！喺工業大廈入邊！呢度裝修都幾得意，環境都似日本啲居酒屋，一解思鄉之愁！止一止旅行癮！今日我哋唔算好肚餓，所以唔算叫咗好多嘢食，諗住貴精不貴多！首先我哋嗌咗日式麻醬豆腐沙律，呢個好清新好新鮮，豆腐豆味都好重好滑！之後仲叫咗豚豬頸肉串燒！仲有雞翼串！兩個都燒得香口，最緊要佢醃得好入味！所以都推介推介！跟住我哋仲叫咗煙花，同埋彩虹卷！呢度啲壽司名改名都幾有創意！即係牛油果三文魚吞拿魚整埋一齊嘅卷物！幾好食！有足料又夠鮮！最後我哋叫埋個雜錦天婦羅作結！有蝦同埋秋葵嘅天婦蘿！配合天婦羅汁解解膩都幾好食！兩個人食四百幾蚊都合理！下次再試其他嘢先！…Read More

難得過咗嚟尖沙咀食嘢，好想坐喺個舒服嘅地方睇吓書，所以今次就揀咗呢間Espresso alchemy，呢間Cafe好出名！lunch長期都排隊，好在我今日早咗少少嚟，如果唔係都可能有排等！由於今日超級肚餓嘅關係，同朋友叫咗好多嘢食！首先我叫咗個牛油果沙律，真係超級足料，起碼有半個牛油果仲有大量嘅蔬菜同蕃茄仔！食落好fresh好好食，細隻嘅女仔可能食呢個已經搞掂！之後我哋仲叫咗個青醬雞肉長通粉，啲雞胸肉一啲都唔嚡，咬落好Juicy好好食，個青醬調得剛剛好！又唔會令到個意粉好濕同好乾！之後我哋仲叫咗個青醬烤雞意大利三文治，有蕃茄又有芝士，麵包外脆內軟好好食，芝士半溶好正好好味！仲有我哋仲叫咗個檸檬蛋糕，$33勁大件！食落口好fresh一啲都唔甜！呢個件裝蛋糕好好食！仲有特登整熱咗，唔會凍冰冰！加分加分！之後我仲跟餐叫咗杯綠茶燕麥奶，好好飲，綠茶味好重！由於我飲唔到鮮奶嘅關係，轉飲燕麥奶都係加$3！開心開心！…Read More

今日去咗觀塘行街，突然間好想買啲邪惡食品返屋企食！就諗起好想食啲曲奇餅！因為前排有同事介紹我上去觀塘啲商業大廈有好多好嘢推介！而今次我就嚟咗呢間叫做kiuki sweet!都係朋友推薦我先識搵到過黎！睇返佢社交平台原來都有整蛋糕同埋甜品盒子！今次我就訂咗佢六塊曲奇，揀左三隻味！分別有開心果軟心曲奇 海鹽雙重朱古力同埋杏仁朱古力！佢呢度仲好好，可以冷藏曲奇，軟心曲奇可以放兩日，其他最多仲可以放到七日！可以慢慢食！我自己覺得個軟心開心果曲奇真係幾好食，開心果味好突出！外脆內軟！啱晒我口味另外杏仁朱古力曲奇，仲有半塊lotus塊係上面，真係夠晒邪惡！之後我老公就最鍾意食海鹽雙重朱古力，因為佢係一個朱古力控！佢覺得呢個朱古力曲奇一啲都唔甜，應該係用黑朱古力嚟整！試咗曲奇之後我真係好有興趣訂佢啲蛋糕嚟食！啲賣相都覺得好正！下次有朋友生日，一定要搵佢訂！…Read More

好耐冇自己me time，難得放假，特登搵咗間靚Cafe睇吓書relax下！今次就嚟咗觀塘呢間PLATO！呢度都有朋友介紹話幾好食！由於我都冇食早餐，所以就諗住食個豐富午餐頂一頂！我叫咗個lunch set！澳洲肉眼牛扒薯菜，仲加咗個沙律！肉眼扒五成熟，都幾大塊，熟到剛剛好！食落調味都幾好，唔錯！薯條份量都唔少！賣相都幾高質，一啲都唔馬虎！之後我仲加咗個薰衣草茉莉茶！細細杯飲都幾啱feel!下次約埋啲姊妹過嚟hightea先得！由於太肚餓嘅我，所以我仲加咗份雞翼！辣辣地都幾好食！又夠脆，重點係啲雞肉好嫩滑！啱晒我口味！之後坐咗喺度睇咗陣書，又有啲口痕，最後就叫多咗份甜品，開心果心太軟！甜品舖都唔算好多有開心果心太軟食，所以呢間見到即刻試吓！味道又幾好都好重開心果味唔錯唔錯！整體嚟講呢間都推薦比朋友食！至少一定唔會中伏！最後埋單原來都食咗差唔多$300 ！耐唔耐比自己放縱下都幾好！…Read More

近來係咁打風，今日適逢三號風球落大雨，狼狽之際，經過呢間茶舍，決定入去食啲嘢順手避一避雨。本來都冇諗住食好多，但係佢個Menu又幾豐富，所以最後唔覺唔覺都追加叫咗幾多嘢🤣先嚟咗杯棉花糖熱朱古力，本身諗住都係細粒棉花糖，一嚟到俾佢兩粒大大粒嚇親，仲有啲忌廉喺面，賣相滿分！味道都唔錯，朱古力夠香濃追加餐湯係羅宋湯，比起一般茶餐廳要香濃，夠哂酸，仲要真材實料有菜有肉，啱晒我！加嘅麻醬沙律啲菜都好新鮮！做前菜開胃一流下一味係跟套餐加嘅柑橘雞件。初頭睇佢細細件仲驚佢炸得好乾，點知食落口都有驚喜！醃得幾好味又Juicy，面頭啲柑橘醬又可以解一解膩！主菜係呢個午市特餐A泰式脆辣雞堡撈麵。其實本身都對午餐冇乜期望，但一上到嚟個賣相同味道都睇得出食得出係有心機嘅，塊雞扒係新鮮炸起，唔係預先整定，脆卜卜熱辣辣，個撈麵更加有泰式風味唔係普通撈麵，我估佢其他嘢都會有返相當嘅水準最後係追加朱古力香蕉蛋糕，都係嗰句，本身都係無期望茶餐廳會有咩特別，都係諗住嘗嘗鮮，但又真係估佢唔到又有朱古力味，又有香蕉味，又唔會好甜，入面仲有啲朱古力粒，做呢一餐嘅句號啱啱好！飲飽食醉就剛剛好停雨走得，可能都要多謝呢場令到我誤打誤撞入咗嚟，食咗餐咁意想不到嘅大午餐🤣…Read More

今日走咗嚟尖沙咀食嘢，諗咗一陣就走咗過嚟呢度食泰菜，呢度環境幾好，又方便，喺美麗華入邊，所以位置都好好！今日同老婆過嚟食咗一個好好食嘅泰菜，呢度有啲fusion嘅感覺，唔同平時一般嘅泰菜菜式，都比較新穎同埋特別！例如我哋揀咗個鹹蛋黃沙律，一般泰菜嘅舖頭都係青木瓜沙律，味道都幾特別，鹹蛋黃好香口，食到好開胃！之後我哋仲叫咗冬陰功湯，呢度冬陰功湯，係用咗原隻大蝦煲，好有鮮味同埋好足料！我同老公都食到舐舐脷！之後我哋仲叫咗兩杯嘢飲，喺Mocktail，係冇酒精嘅飲品，幾啱我哋滴酒不沾嘅人！跟住我哋就叫左個菠蘿炒飯，都係原隻菠蘿上碟，賣相好好！值得一讚！之後我哋仲食咗芒果糯米飯，有脆卜卜嘅粟米片混合埋呢個芒果味嘅雪糕！好特別，我哋未試過呢個食法！呢間嘢整體都唔錯，環境100分，下次可以再過嚟試其他嘢！…Read More

今日嚟到尖沙咀，同老公過嚟搵間靚靚Cafe打卡，今次揀咗海港城分店嘅Espresso alchemy！呢度裝修好靚，好多圓拱形設計嘅座位！打卡真係一流！呢度坐嘅位置好寬敞！所以坐得好舒服，一啲都唔迫！首先我哋就揀咗一杯熱朱古力，每杯熱飲都會有拉花，仲拉得好靚，值得讚！之後我哋就嗌咗個三文魚沙律，超級大碟，兩個人share剛剛好！啲三文魚仲扭咗個花添！都幾有心思！令人眼前一亮！之後我哋仲叫咗個卡邦尼意粉!味道好濃郁，意粉有啲偏腍身！整體都OK！最後我就仲叫咗個Tiramisu甜品，呢個係生酮甜品，食幾多都唔怕肥，啱曬生酮飲食嘅人！呢度啲職員服務態度都幾好，又會主動介紹有咩嘢好食，又會唔該前唔該後，又有笑容！抵讚！…Read More

平時黎觀塘成日都打邊爐，今次終於試下其他野，今日黎工廠大廈上面搵cafe食！想食好野梗係要搵下！今次黎到呢間日式cafe叫做kitto katsu！呢個名都幾特別！一入到去，見到好大幅牆畫，畫左黃昏嘅富士山景，好靚！望住黎食野都有啲風味！今次我地叫左豚肉生薑燒味噌烏冬!味道都幾好！仲有隻溫泉蛋可以撈烏冬！平時好少食呢隻款式嘅烏冬，感覺幾新奇！之後我哋仲叫咗個咖喱烏冬，香煎米豚！仲揀咗咖喱汁，唔係好辣，但幾香口！之後我哋仲揀咗個蘆筍炒雜菜，都幾多蘆筍，份量都唔少！仲有我哋仲叫咗個單骨雞翼，炸雞翼都有啲熱氣！脆卜卜好好食！最後我哋仲叫咗個朱古力燕麥拿鐵！仲拉咗花俾我哋添，真係賞心悅目！:):):):)…Read More

今日過咗嚟觀塘，諗咗好耐都唔知食咩好，經過裕民坊，就見到呢間水門雞飯，裝修都幾好，就入咗去試一試！呢度餐牌超級多嘢食，我都揀咗一陣先至揀到，好多嘢都想試！今次就試咗水門雞飯，佢啲雞都幾嫩滑，個飯嘅雞油味都唔錯，唔會太油膩，又夠香，味道剛剛好！之後我仲食咗生牛肉湯河，個湯好濃郁，牛肉嘅份量都唔少，都有啲牛味，唔係啲低質牛肉！見口渴就叫咗杯蘋果雪梨水，都幾潤喉，都有啲雪梨肉，飲落真係幾足料！之後仲叫咗雞肉串燒，有兩串，仲有一個燒烤醬俾我點，都幾好食！如果呢個價錢呢個質素，真係冇得輸，如果我屋企附近都有呢間水門雞飯就好啦！觀塘真係越嚟越多嘢食，真係花多眼亂，每次都要諗一陣先諗到食乜嘢！！！！！！！！！…Read More

今日黎到美麗華食espresso alchemy，想試呢間好耐！成日都聽朋友講呢度嘢食份量好多！性價比好高！所以即刻要嚟試吓！呢度好似Cafe咁，半自助服務，可以自己斟水攞碟攞餐具！完全唔會有人催你交檯！職員嘅服務又幾好，仲會主動俾Menu俾你揀嘢食！所以我就揀咗個大蝦蘆筍意粉，啲蝦都好大隻，爽口彈牙，食得出係勁新鮮！口感好好！而家意粉調味得幾足！唔會太鹹仲好夠味添！朋友就揀咗個雞肉芝士三文治，份量都唔算好細，當lunch食都夠飽！大食嘅男士就可能要叫多啲嘢食！另外我仲叫咗杯薄荷朱古力，因為佢新鮮薄荷葉嚟沖調，好好飲，味道一啲都唔假！仲要冇冰添，擺耐咗都唔會溝淡咗個味！呢度都幾值得推介，不過咁啱呢度商場裝修，所以就為咗好多白色布，但都冇咗我會再理其他嘢嘅決心！推介大家黎試下！…Read More

今日嚟到觀塘食嘢，呢度好多嘢食，今日特別想搵間靚Cafe同老公嚟食嘢，所以今日嚟咗be leaf，每次經過呢度都俾個大門框吸引，所以今次一定要嚟食吓嘢！我哋叫咗幾樣嘢食，水牛芝士巴馬火腿無花果沙律，由於太肚餓嘅關係，一上菜已經食到一半先至記得要影相！可想而知幾吸引！啲菜都好新鮮，冇苦味，食落脆卜卜，好爽口！夾巴馬火腿嘅沙律比較少見，但都幾好食幾match！另外，仲叫咗香煎牛小排紅咖喱意大利飯配鵝肝，成件事好高級好正，賣相都好吸引，牛小排整得剛剛好，好嫩滑好多汁，另外鵝肝撈埋啲飯食令到個飯再滑好多，如果齋食就覺得有少少溜啦，整體都好食好食！最後梗係要叫返個甜品啦，我哋叫咗椰香朱古力花生醬牛角包窩夫配雪糕！花生醬配朱古力呢隻味好正，不敗之選！再加埋雪糕個口感，簡直係Perfect match！最後我哋仲叫咗兩杯嘢飲，一杯係糖餅咖啡，老公話呢杯嘢飲好正，第一次有糖餅喺杯咖啡上邊，啲糖餅溶咗落咖啡入邊甜甜地幾好飲！而我就叫咗洛神花茶，開胃解膩，酸酸地，又可以消脂減肥！正！…Read More