樂宮美食中心

Open Now

Now Closed

年30去澳門住左晚酒店，初一中午要去飲茶拜年。早左起身，但食早餐又好似太飽；諗左一輪，都係落樓睇下有乜好食。最後去左樂宮，諗住叫少少野一家三口share食。見到佢有豬潤水喎，就同老公傾兩份飲，再加多個公司三文治一家三口食。仔食2件，我同老公一人一件加飲豬潤水。計落岩岩好，唔飽又唔餓，轉頭唔夠一個鐘又食Lunch囉。個公司三文治又幾正喎，跟薯條，重要有厚身牛扒同雞扒的，咁先係70幾蚊,重要包飲品。感覺比香港茶餐廳4-50個一份無乜睇頭既公司三文治黎講抵好多；比香港有D食店排到好靚既公司三文治黎講係超抵食。牛扒係勁淋，係勁多鬆肉粉既牛扒；味係差D，但賣相同份量真係唔錯，係驚喜黎。另外豬潤水，我食完先記得冇影相呢。真心好奇，佢到底係一早煮定？有人叫先煮？好好飲喎，好夠味，但豬撋又冇溶晒，重有好多塊係度可以食，而且係煮得岩岩好，唔會覺得佢乾難食的。本來以為咁樣三份share食唔會好飽，晏少少飲茶都冇問題。結果公司三文治係出奇地飽肚，到飲茶時，真係食唔到幾多呢。