Tai-Parfait (Closed)

同小小豬去銅鑼灣買嘢，見未夠鐘去上興趣班，所以就帶小小豬去食下午茶。路經見到有雪糕鯛魚燒，所以就買一份俾嚟試下啦~之前都聽朋友仔講過話銅鑼灣都有，不過直都冇機會嚟試，終於可以趁今次試下Tai-Parfait嘅鯛魚燒啦~依度鯛魚燒都有好多選擇哦~諗左好耐，最後小小豬就揀左雜果加原味乳酪雪糕鯛魚燒。落好單後就拎住個機仔準備等食啦~等食等到悶悶不樂嘅小小豬~其實都真係唔怪得小小豬，我地都等左差唔多20分鐘。不過啲鯛魚燒係即叫即整，再加上得一位姐姐負責做，落單...整魚仔...都係佢一腳踢呀~終於等到震機嘅時候，可以去拎鯛魚燒啦~單睇個賣相都好吸引呀~好一隻為食豬呀~上層雪糕就俾小小豬食晒，佢當然係話好好食啦，不過我眼見啲乳酪都溶得幾快，所以要快快食先得啦！下層嗰條魚仔就當然係我食，可能係即整關係，所以個鯛魚燒餅都幾脆口，而且亦唔會太厚身。內裡嘅紅豆餡都算幾多，而且又唔算太甜，所以口感同味覺都唔錯。唯一就係覺得整份雪糕鯛魚燒份量就細左啲啲，可以大份啲就更加好啦！