Video
Read full review
2024-03-01
720 views
Milu Thai มิลู่ไทย (尖沙咀)📍尖沙咀亞士厘道24-38號天星大廈4樓對上一次食Milu，原來已經係上年嘅事，真係時光飛逝！估唔到一年後，呢間出名正宗同份量大嘅泰菜，生意好到進軍埋人流好旺嘅尖沙咀，不論一家人、情侶、三五知己定訪港旅客，都可以坐得好舒服咁嘆返餐。平日晚上。我同朋友book咗檯食晚餐，尖沙咀呢間分店同樣有好多富有特色嘅graffiti art，色彩繽紛，好適合打卡。而且地方好大好闊落，仲有大量梳化凳卡位，坐得好舒服。闊別一年再食Milu，份量依然驚人，我哋兩個又再食到好似挑戰緊大胃王咁，真係非常推介胃口比較大或者鍾意聚會嘅人。 💰$228火山排骨 🌋🐖餐廳嘅人氣招牌菜，巨型火山排骨一定必點，但今次好特別嘅係推出咗新店限定甜酸口味！呢種新口味真係我哋呢啲唔食得好辣嘅人嘅福音！青色嗰款酸辣口味的確令人食得過癮，但我哋唔食得辣，要邊食邊飲凍飲解辣，唔可以好暢快咁大啖大啖咬！限定甜酸口味火山排骨，依舊選用上盛豬頸骨，以秘製湯料熬煮，肉質軟嫩無筋又入味，砌成巨塔之後，淋上秘製甜辣醬，色香味俱全仲令人大飽眼福添！秘制甜酸汁用咗菠蘿、泰國酸子同砂糖調製，食落甜中帶少少辣，好
📍尖沙咀亞士厘道24-38號天星大廈4樓
對上一次食Milu，原來已經係上年嘅事，真係時光飛逝！估唔到一年後，呢間出名正宗同份量大嘅泰菜，生意好到進軍埋人流好旺嘅尖沙咀，不論一家人、情侶、三五知己定訪港旅客，都可以坐得好舒服咁嘆返餐。平日晚上。我同朋友book咗檯食晚餐，尖沙咀呢間分店同樣有好多富有特色嘅graffiti art，色彩繽紛，好適合打卡。而且地方好大好闊落，仲有大量梳化凳卡位，坐得好舒服。
闊別一年再食Milu，份量依然驚人，我哋兩個又再食到好似挑戰緊大胃王咁，真係非常推介胃口比較大或者鍾意聚會嘅人。
[價錢 Price]
💰$228
火山排骨 🌋🐖
餐廳嘅人氣招牌菜，巨型火山排骨一定必點，但今次好特別嘅係推出咗新店限定甜酸口味！呢種新口味真係我哋呢啲唔食得好辣嘅人嘅福音！青色嗰款酸辣口味的確令人食得過癮，但我哋唔食得辣，要邊食邊飲凍飲解辣，唔可以好暢快咁大啖大啖咬！
限定甜酸口味火山排骨，依舊選用上盛豬頸骨，以秘製湯料熬煮，肉質軟嫩無筋又入味，砌成巨塔之後，淋上秘製甜辣醬，色香味俱全仲令人大飽眼福添！秘制甜酸汁用咗菠蘿、泰國酸子同砂糖調製，食落甜中帶少少辣，好味程度有5粒星！
[價錢 Price]
💰$208
鮮檸檬肉碎明爐烏頭 🐟
明爐烏頭有兩款泰式口味，我哋揀咗唔辣嘅鮮檸檬肉碎口味，湯汁微酸好醒胃。烏頭大條肉厚，放係爐上用明火烤住，食耐啲都keep到溫度。魚肉肉質緊實，本身處理得好乾淨，再加上大量濃味配料，如薑、芹菜、辣椒等，每啖都只會食到煮到入晒味嘅正魚肉！我自己好鍾意啲肉碎，因為佢吸晒啲湯汁，湯底仲附有娃娃菜，材料非常豐富。
[價錢 Price]
💰$98
乾炒雞肉河 🐓
同屋企人食泰國菜，我哋一定食濕炒河，但同朋友食，就實會叫乾炒，因為佢唔太鍾意加個芡去炒。配料方面，佢揀咗雞肉，啲料都比想像中多，件件雞肉都好大件，仲有各類雜菜一齊兜炒，碟頭仲咁大，真係幾抵食！我最欣賞佢嘅地方，就係佢一炒起就上碟，所以客人可以食到出晒煙、熱辣辣嘅炒河。更難得嘅係，即使放涼咗，佢都無瓊哂油，食落依然爽口唔油膩，係我全餐最滿意嘅一道！
[價錢 Price]
💰$88
飛天芥蘭 🥬
佢哋有幾款蔬菜供食客選擇，我哋揀咗芥蘭，每款菜又可以揀唔同嘅調味，例如清炒、蒜蓉、馬拉盞同飛天等。朋友揀左飛天，睇埋英文先知完來係泰式咁解。蒜蓉、辣椒呢啲基本料頭就肯定有架啦，但佢仲多咗磨豉醬，確係比較少見。我自己偏好馬拉盞多啲，因為比較惹味；但如果想食清啲嘅，呢款飛天菜都不失為一個好選擇。
[價錢 Price]
💰$36
珍多冰 🥥
本來其實真係無叫嘢飲嘅打算，但食食下又想飲啲凍嘢，所以我就揀咗我至愛—珍多冰。珍多又即係啲綠色粉條，係以糯米粉為原材料，再加以斑蘭葉染色製成，質感又爽又滑，配埋濃香嘅椰汁，實在係泰滋味！
Post
