❀ 薑汁蕃薯小丸子豆花｜$38
平時最喜愛黃澄澄的蕃薯糖水，轉季又濕又凍更加要多吃薑，所以叫咗呢個冬日暖薯系列糖水 🧡 蕃薯帶有自然香甜，煮至綿密而不散，剛剛好的口感 🍠 加入薑汁微微辛辣，驅寒又暖胃，白玉丸子煙煙韌韌，就算影相浸咗陣都唔會變粉，配埋幼滑豆花更加正～🍡
❀ 鮮芋泥豆乳｜$32
第一吓拎到有少少嚇親，芋泥會唔會畀得太多！😳 樽入面有三分之一都係淡紫色嘅芋泥，打得非常均勻完全無粒粒，芋泥濃稠軟滑帶有栗子香甜 💜 7.6 特濃豆乳豆香濃郁，相比起牛奶感覺仲無咁膩！調味唔會過甜飲完好滿足，留意返咁大枝都幾有飽腹感，如果食完正餐就等多陣再嚟飲啦 hahaa 😆
❀ 吉列豬扒粢蛋飯｜$45
唔講唔知店內原來仲有鹹食！呢個粢飯又係超巨型，入面有豬扒、甜玉子、大量肉鬆、脆卜卜嘅油炸鬼同榨菜，層次豐富包你唔會寡 😙 糯米飯偏乾但係壓得好實，唔驚跌到成身都係 👻 兩個人 Share 一個加杯嘢飲絕對夠飽，學生都唔會有負擔，好抵食 👏🏻
❀ 鹹蛋黃 Mini 豆卜｜$38
❀ 和風七味脆皮木棉豆腐｜$32
呢一刻喉嚨痛緊嘅我好懷念炸物，鹹香金沙包裹住細細粒嘅脆炸豆卜，一啖一粒幾過癮 😋 木棉豆腐口感較紮實有豆香，薄薄嘅脆皮感覺無咁熱氣，均勻灑上微辣七味粉特別惹味 ✌🏽 到底有邊個會抵抗到炸嘢嘅魅力？快啲好返好想瘋狂食熱氣嘢 😾
📍 SOYmart by 豆乳狂人
荃灣海之戀商場 ２ 樓 2036 號
1
