2
午餐菜單包一杯冷熱檸檬茶，主廚推介湯同主菜。主菜有薄餅，意粉，丼飯，三明治，墨西哥捲餅，漢堡，牛扒，價錢算可以。
1
芝士鬆餅
先上一客3件芝士鬆餅，用餐巾包住，係暖暖哋。芝士鬆餅外厚內鬆軟，上面塊皮好多芝士，再灑上香草，食落芝士味都幾濃。呢個餐包正呀。
南瓜湯
主廚推介湯係南瓜湯，味道甜甜哋，質感就麻麻哋，唔夠厚身。
龍蝦湯 加$20 另加一
可加錢升級龍蝦湯。龍蝦湯賣相同南瓜湯一樣，湯上面灑上少少香草。湯入面有一舊龍蝦肉，算有味又唔韌，湯味道都可以。
招牌龍蝦安格斯牛肉漢堡 $198 另加一
招牌龍蝦安格斯牛肉漢堡同跟餐薯條用左將牛油紙墊住上枱，漢堡大大個用支金屬簽拮好，上層麵包有烤印，下面就係龍蝦肉，熱熔芝士，安格斯牛肉漢堡扒，番茄生菜同下層麵包。上層麵包搽左牛油，鬆軟但唔夠脆口，味道甜甜哋。龍蝦肉大概有兩隻龍蝦鉗份量，好爽口，味道就主要食個汁。安格斯牛肉漢堡扒好厚身，叫左medium rare，入面粉紅有肉汁，可惜唔脆皮。最下底層包就太實。成個包食落唔乾，都算唔錯。
跟餐薯條係幼身，炸得好脆口。明明叫左走鹽都仲鹹，要另外叫服務員俾茄汁。
焗波士頓龍蝦尾配特製梛子薑飯 $158 另加一
焗波士頓龍蝦尾一隻連殼，肉質爽口，味道偏鹹，所以配左少少甜甜哋嘅菠蘿同紅青椒粒就平衡啲。特製梛子薑飯係幼身絲苗米，梛香十足，薑味欠奉，整得好乾身。伴碟蔬菜有西蘭花，梛菜花，粟米同紅蘿蔔條，似白灼。另外仲有一塊檸檬。呢款主菜就較健康。
飲品選擇少，好彩可以唔要茶。
熱檸水(跟餐)
熱檸水有兩塊檸檬，不過冇俾匙羹你拮。
食左招牌龍蝦，總括而言，龍蝦質感可以不過冇味，午餐價錢勉強可以，晚餐同要排隊就唔好搞。食完都夠飽。今日坐左卡位，座位都舒適。服務就麻麻，成日都唔見有服務員。回頭率唔高，見而家完全唔洗排隊就知道。
