順德公漁村河鮮酒家

Open Now

Now Closed

今日好大雨，求其都搵咗間睇落去好傳統嘅河鮮餐館食飯，我同朋友們成身濕晒，不過見到呢度啲嘢食應該都唔錯，所以心情頓時變好。我問咗經理，經理建議我哋喺呢一度點四人餐，因為我哋有四個人，有幾款仲係佢哋嘅招牌餸同埋得獎菜式添，咁就真係要試吓啦。順帶一提呢度免收茶介，所以都幾抵食。由於我哋四個都係女仔，第一個湯就啱晒我哋，佢哋叫個湯做女人美容神器，因為裏邊有好豐富嘅藥材，有紅棗當歸等等，佢哋話佢哋真係足料煲足咁多個鐘，仲有靚仔經理幫我地上湯添！裏邊有個好大嘅魚頭，魚有好豐富嘅蛋白質，飲落去嘅時候覺得好補身，而且啱啱濕過身，飲落去就更加溫暖。最後我哋仲每人飲咗兩碗，太好味了，又無味精好少有，個胃好似已經填滿左一半！之後仲試咗呢度嘅手打鮻魚球釀青椒，平時我都好鍾意喺茶樓點尖椒，呢個青椒富有好豐富嘅魚肉係中間做餡料，唔會似普通茶樓有時魚肉同青椒分得好開，會甩出嚟。每人一隻，岩岩好，而且呢一度仲有炸過嘅鮻魚球，好香口，仲有蜆蚧醬點添。我哋傾吓傾吓就過咗成個夜晚，差唔多最後一台先走，好不愉快。