港久新街

Open Now

Now Closed

早排響樓上妹記食完飯先發現落一層有另一間裝修甚有玩味性的大牌檔，充滿懷舊元素但又幾新潮，環境舒適好多。呢期餐廳搞緊High冧啤酒節活動，多個本地啤酒品牌買二送一（任選不同品牌口味都得，送價位較低者），有獅子山啤，香港啤酒公司，Heroes，Moonzen，少爺，蜜月等等超過30款選擇！① 孫悟空琥珀啤酒 $60② 玫瑰紅茶季節啤 $57③ 鹹檸啤 $51雖然唔鍾意劈酒狂隊啤，但同朋友吹水都會飲翻一兩杯。我試左孫悟空有啲桃味，唔會太甜，幾易入口。而鹹檸啤亦都溝得唔錯，飲落幾清新。食物方面有好多選擇，佐酒小食都唔少，串燒，滷味打冷，小炒，川菜等等真係一次試唔晒。④ 大廚脆皮鹹豬手 $168豬手件件都好厚切，啖啖肉又唔會太肥，加埋脆皮真係佐酒一流！點埋個黃芥末再提昇一個層次。⑤ 懷舊雞蛋焗魚腸 $98呢啲買少見少既懷舊菜，雞蛋唔會太老，魚腸魚膶分量多但不覺油膩，配飯好好味！⑥ 沙嗲金菇肥牛粉絲煲 $128又一個撈飯絕配，沙嗲汁夠濃，無論食粉絲定撈飯都咁正！如果天氣再凍，食呢煲一定暖入心，因為影完相食完碗飯，呢煲小菜仲係熱辣辣。