八月嘅主題係繽紛海鮮自助晚餐，場內有好多唔同種類嘅海鮮選擇。包括來自美國同埋法國嘅生蠔，松葉蟹，藍青口，大蝦，大蜆，同多種類嘅日本刺身。其他嘅熟食，中式，西式，日式等等都包羅萬有。另外酒店亦會每人送一客蟹肉銀絲蒸帆立貝，雖然size唔係好大，但係味道夠晒！
甜品方面更係另一驚喜，種類非常多，除咗有唔同嘅蛋糕同餅之外，仲有即場整可以自選材料嘅pancake，朱古力噴泉，生果等等。
主要介紹我食過最好嘅幾款菜啦。第一位必定係松葉蟹！雖然佢唔算超大隻，但係每晚一出嚟都比大家秒速清晒就知道有幾高質。蟹鮮味十足，而且食得出海水嘅鹹味，而且肉質鮮嫩，啖啖都係海水嘅味道，再加上蟹本來嘅甜味，人間享受。
第二位係美國生蠔，雖然佢嘅size比法國生蠔細，但係味道有過之而無不及，同蟹一樣，係淡淡海水味，而且食落口鮮甜滑嫩無比。
第三位係即切嘅燒牛肉，可以見豆板上有好大舊牛，廚師會幫你切需要嘅大細，然後可以加上燒汁或者黑椒汁，個人覺得呢舊牛係食牛嘅味道多過食油脂分布，所以鍾意食重牛味嘅朋友可以試下！
埋單每人都係$300多，淨係食生蠔同松葉蟹都返本啦！真係唔錯嘅選擇大家一定要去試吓！
