興記茶餐廳 (Moved) New Location

睇openrice，先知道牛頭角下邨於今年上半年要拆卸，一啲有特式嘅地道小吃可能因搵唔到舖位要被迫結業。趁今日假期，筆者與太座趕潮流，到牛下嚟一次集體回憶。一進入牛下，已經發覺不少攝影發燒友响各處用影像記錄底這一段香港房屋史。筆者對攝影冇深究，唯有用筆記錄好味嘅食物。第一站去到一間港式茶餐廳，享受一吓港式小食及絲襪奶茶。餐廳頗簡陋，部份樓面僭建而成。筆者與太座點了西多士、豬扒多士、菠蘿油、炸雞脾及奶茶。菠蘿油不是新鮮出爐，所以唔夠熱，而且牛油唔夠厚，沒有什麼特別之處。相反，炸雞脾皮脆肉滑，肉汁豐富但唔肥膩。雞肉炸得鬆化，唔會話炸得死實，十分精彩。西多士雖然蛋漿味唔香，但很奇怪多士很鬆軟；同樣地豬扒多士嘅多士很鬆軟，索了豬扒嘅肉汁，也是一件人間美食。豬扒用了數款醃料，炸完之後都幾香，不過豬扒用了梳打粉預先醃鬆，雖然醃料味濃厚，但隱隱然有少許梳打粉醃過嘅痕跡。奶茶是上乘之作，奶茶香滑，可以想像茶胆是經過歷練而成大器。以上咁多款食物，只耗掉五十七個半，雖然面臨清拆搬遷，都冇話坐地起價，只係取消下午茶套餐，稱得上是有良心嘅食肆。