餐廳內外
裝修企理乾淨，光線充足，座位都唔算太密集，唔怕食辣野岀汗覺得辛苦唔舒服。
餐牌
小碗$27都有交易，價錢夠親民，主打麻辣湯，但都可叫無辣，仲有多款小食，特價小食仲$10就食到。
麻辣狂牛麵 $59
只有大碗Size，包括秘製牛腩、秘製牛展、肥牛片、牛柏葉、時菜，揀左小辣。一望落去真係好大碗！料十分多，除左牛展，每款都起碼有5件，以麻辣湯底黎講唔算好紅，偏深色，湯底好惹味，小小辣，辣唔係辛苦辣，而係香口同食落帶甜甜地，食完唔會覺得唔舒服，牛腩肥牛正常、牛展入味有咬口、牛柏葉比較韌，麵掛到少少湯，如果食得辣之人不妨再嗌高少少辣度。
麻辣牛展麵 $49
呢碗就嗌左微辣，同樣只供應大碗size，淨牛展有5-6塊，份量足夠，朋友唔係好食辣都指微辣好岩佢食，好惹味。
麻辣手撕雞 $26(細份)
揀左微辣，有用辣椒粉、花椒油，再灑白芝麻係面，辣椒粉好香，入味，食完一口接一口。
麻辣海哲 $18(細份)
同樣揀微辣，對我黎講就辣度欠奉，正正常常。
自家製豆漿/凍奶茶 各$6(跟餐)
$6跟餐價抵飲，豆漿唔太甜，佐食辣野一流！
每人$80左右，抵食～～Remark！尤其是我呢啲嗜辣之人，色、香、味俱全，連視覺都唔差，第一次食試水溫就食小辣，下次黎會食平時食到既辣度中辣！仲見到有個挑戰牆，20分鐘食完一碗重慶麻辣小麵連湯可以免費，難不到我
下次就黎挑戰。
