餐廳以一幅木製趟門與街外隔絕, 帶點神秘感。拉開趟門, 店內古色古香充滿日本風味, 感覺就好似通過隨意門去到日本咁。
晚餐選擇唔多, 但樣樣都好吸引
。8款丼飯套餐, 當中2款海寶丼集合多種海鮮, 另外3款以吞拿魚作主食材, 仲有3款係熟食。 我就揀咗最豐富嘅特上海寶丼, 丼中有: 紅肉、白肉、章魚、穴子、蛤、小扇貝、海膽、甜蝦、真雪蟹、鮭魚籽、黃瓜 。
海寶丼 (特上)$210
呢個丼賣相有幾吸引, 唔洗我講啦, 睇相已見真相！
十款海鮮各自發揮出自我特色, 海膽水潤甘甜, 甜蝦又大又鮮味, 其他食材亦非常新鮮。拌起來吃, 口感極為豐富。柔軟、鮮味、潤滑、 彈牙、爽口層層交疊, 成為完美嘅組合。
白飯用上日本出產嘅珍珠米, 質感帶黏性, 濕潤度適中。 飯底不經調味, 附上一小碟壽司醋果凍, 落多落少自己話事。
小鉢凍蕃茄
介紹完主角, 返轉頭講返呢個飯前小食, 絕不能睇小呢個凍蕃茄, 經調味後酸中帶點微辣, 令整餐飯生色不少。
魚介出汁
飯食到剩返三分一時, 就係魚介湯出場嘅時候啦。魚介湯以鮮魚淆製而成, 好似食茶漬飯咁倒入飯中, 鮮甜度更上一層樓呀。
*提提您: 魚介湯只於晚市供應, lunch嚟就試少一個食法㗎啦。
1
