觀塘返正朋友識食帶路話而家觀塘有好多靚食肆，佢介紹間叫米走雞Live(勁搞笑個名
), 話食過辣雞煲好得！
點知去到餐廳，其中一個朋友仔話病左唔食得雞喎
死啦，去食主打雞煲既地方唔食雞點算呀
諗住反正都一場黎到，咪照試下其他湯底照打邊爐，點知錯有錯著，揀左個蕃茄粟米湯底，原來係勁足料鮮甜
有齊薯仔蕃茄粟米芹菜，煲極都仲好夠味，絕無欺場！
食物我地點左五香駝鳥肉同五香鮮牛肉
駝鳥肉夠淋身，而鮮牛肉個味係調得岩岩好
另外仲點左鮮製四拼餃
同埋最愛的鱔片
凍豆腐呢就貪心點左大份，點知送到黎超大份囉，差d 食唔晒呀
鮮炸響鈴呢，係非常推薦！
因為佢好夠脆口，我怕肥都食左兩舊，盒裝質素係無得比
除左肉我地都叫左唔少菜架
有雜菌啦，娃娃菜啦，油麥菜啦，最好食係翡翠苗，大家都搶食晒，都唔記得影相
食咁多熱氣野，我就中意飲鮮製既竹蔗茅根
呢個一樣係真材實料，係好飲！點得過！
成餐飯我地食到勁飽，閒日可以慢慢坐，我地傾到10點幾先走，侍應仲成日幫我地換碟，好好服務
係喎，呢到叫米走雞Live, 原來真係有人現場唱歌架
個女仔把聲仲非常似楊千嬅呢！
