記起有人提過三田製麵所，所以一試。由於時候唔早，並唔需要等位~
雖然三田本身主打沾麵，不過我地興趣不大，所以冇試，就不作多說~
至於拉麵款式唔多，主要係普通、辣、生姜口味。份量都分中、大，價錢就唔算貴。
除左拉麵，另外都有小食提供~
三田特製拉麵 $78 (中)
濃香豬骨魚介湯底賣點用豬骨、雞骨、蔬菜、大量魚介熬製~果然有一陣強烈魚介味道，基本上將豬骨味蓋過，幸好飲落唔油唔鹹。
麵中有超多生洋蔥粒，雖然男朋友鐘意洋蔥，但佢都覺得有少少重口味。
店員提醒自家製拉麵麵質硬身，會問需唔需要煮淋身啲，我地並冇特別要求。
拉麵的確比較硬，麵質有啲似蕎麥麵，呈方型，雖然夠硬但欠彈性。
三田特製辛拉麵 $80 (加辣要+$8)
事後睇番照片，再上網搵過其他人嘅相，發現佢爭我幾片荀乾(?)
湯底比起特製拉麵魚介相對冇咁重，對魚湯冇乜特別感覺，鐘意嘅咪覺得鮮，唔鐘意嘅咪會覺得腥囉…
但由於冇得選擇辣度，我又冇俾8蚊加辣，所以我覺得唔辣，基本上生洋蔥味道大嗆，而且食到好臭、好鹹…
叉燒薄薄一片，食到有明顯肉味~但無論厚度、質地都似紙皮…類似湯渣，比較乾。
半熟玉子 $12
雞蛋黃半睘狀態，流心效果一般，所以店家稱為半熟玉子還好，鐘意食溏心蛋都唔需要試~
三田流炸雞翼 (黑胡椒風味) $38/4隻
一上枱已經聞到強烈黑胡椒味，主要係表皮嘅調味，雞翼本身冇乜特別~
正所謂口味呢樣野，完全個人喜好，我地兩個就覺得麻麻地，仲莫名奇妙收加一…除左幫我落單、上菜…做過啲乜？
鐘意魚湯、生洋蔥嘅人相信會喜歡~
呀，設最低消費：每人一碗沾麵/拉麵/兩款一品料理
餐牌：
