晚飯時間關係，食唔到佢哋嘅下午茶。我哋叫咗招牌鴨腩麵、紅燒乳鴿叉燒飯、蠔油烚菜、一杯熱咖啡、一杯熱奶茶。老闆仲俾咗一人一碗例湯！
招牌鴨腩麵 $48
鴨腩麵係等於燒鴨加牛腩，非常新穎既配搭。冇諗過鴨同牛可以放埋一齊，啱晒我哋呢啲食肉獸！湯底頓時變得好特別，有鴨同牛既油香味，令湯底更上一層。燒鴨沾甜酸醬很好吃。除了半肥瘦牛腩，仲有一兩件牛筋，真係好滿足。而麵是用油麵，非常配搭湯底。呢個價錢，滿足咁多需求真係好抵食！
推薦：5/5（必食之選）
紅燒乳鴿叉燒飯$68
平時食開乳鴿都係食炸乳鴿，估唔到紅燒到咁好味！一碟飯有半邊乳鴿切半，一排半肥瘦叉燒，份量相當多。叉燒入口有爽口感覺，油脂分佈適中，是吃過叉燒之中算是數一數二。會令人再想返去食既叉燒！
推薦：5/5（必食之選）
例湯
味道同老火湯一樣，夠味夠濃郁！一啲都唔Hea，無味精感。
推薦：4.5/5
蠔油烚菜
菜心和白菜都非常鮮甜及大份。
推薦：4.5/5
咖啡&奶茶
估唔到連餐飲都有驚喜，特別係咖啡。咖啡非常香濃，配上濃厚鮮奶，平常喜愛咖啡的你肯定會喜歡。
總括而言，餐廳食材同味道水準都非常高，係一間食完你會再去既選擇之一。價錢亦都非常合理超值。
