環境
位於APM旁邊既鱷魚恤中心，估唔到傳統既酒樓裝修都咁靚，比較新式既酒樓，以藍色做主調，配合返星海既主題。
燒味拼盤
1
原來有每位計既set $468，一人包4餸1湯及糖水，首先嚟既係燒味拼盤包括叉燒四片、腩仔四件及海蜇。叉燒以瘦肉為主，但唔會柴口夠味，腩仔脆皮下帶層脂肪，海蜇彈牙，不錯的燒味拼盤。
花膠元貝燉響螺
十分足料，有好幾件雞件，大粒元貝，兩三粒響螺，湯頭清甜，飲完好舒服。
西蘭花炒帶子蝦仁
蝦仁及帶子同樣彈牙，西蘭花新鮮唔會炒到老哂。
西施龍躉球
龍躉片下面有燉蛋白，龍躉片冇骨刺，配燉蛋白估唔到又幾match，蛋白嫩滑，細細份都夠飽肚。
乾隆石鍋炒飯
每人都有個石鍋，好似食韓國石鍋拌飯咁，裏面有迷你元貝、瓜粒，飯應該係用左XO醬炒，已經夠味，石鍋炒飯更香，加上有飯焦，鍾意既可以加啲豆瓣醬調味更惹味。
紅豆沙
是日糖水係紅豆沙，紅豆沙向來看似簡單，其實好難做到好食，呢碗就比較平庸，起唔到沙，幸好唔會死甜。
總括而言，一間頗高質既酒樓，裝修美觀，呢個套餐既食物都好係水平之上，亦夠飽肚，後尾屋企人先講原來遲啲有親戚都係都擺酒，都真係冇簡錯。
附：餐牌參考
