霸嗎拉麵 (金巴利道)

Open Now

Now Closed

間唔中周圍去唔同拉麵店食下。平時行過呢間都會見到門口大排長龍，今日經過難得唔洗排隊，即刻入去試下先！叫左個招牌的豬骨湯底拉麵，湯底都幾濃郁，豬骨味重。比較驚艷嘅係塊豚肉叉燒，第一下望落去好似好多肥肉好油膩，食落先知肥瘦肉分佈非常均勻，肥肉嘅部份個底係瘦肉，入口即溶，但又有瘦肉的口感，唔會好似食咗一大舊脂肪咁。朋友叫左辛辣湯底，對於平時食開譚仔中辣的本人都覺得有啲辣，真係食得辣嘅先好嗌。比起辛辣湯底我覺得原味更加好食，個湯底有少少辣過頭，掩蓋咗佢本身香濃嘅豬骨味。但總括嚟講我覺得都唔錯，尤其是佢個豚肉叉燒，暫時來講未喺第二間拉麵店食過呢個口感。